Read idoma UJƐRƐMÍYA 24 Bible Online

UJƐRƐMÍYA 24 - idoma bible

UJƐRƐMÍYA 24

¹Eko éyi, Ɔwɔicō lɛ ómbilí ɛpa kú aíkpō Ufíigi nēe hayi iyɔ̄bū Agblīihɔ-nɛ̄hi kú Ɔwɔicō ā mafú ga um. Ɔdā nyā yá igbīhi nɛ̄ Unebúkádinēsa, ɔcɛ́nɛ̄hi kú Ubábīlɔn kwú ɔyí kú Ujɛhóyākim, Ujɛhóyācin, ɔcɛ́ kú Ujúda alagbá ŋmá Ujerúsālɛm ga Ubábīlɔn ā. Ó le aígabɔ̄ kú ɔlɛ ɔcɛ́ mɛ́mla ācoyúklábɔ̄ kú Ujúda kpó ɔfiyɛ nyɔ̄ Ubábīlɔn mɛ́mla ɔcɛ́ ā dúú.

²Aíkpō ufíigi nēe bá ipú ómbilí éyi ā le lɔɔlɔhi nɛ̄hi, bɛ̄ɛka aíkpo ufíigi nēe ī pīya aflɛ́yí ā. Aíkpō nēe bá ómbilí ɔhá ā le bīya nɛ̄ɛ̄nɛ̄hi, nēe tōō lé lɛ ɔ̄cɛ dúúmā ŋ́.

³Anɔ́ɔ Óndú ā da um kahíníī, “Ɔdí nɛ̄ a má āa, Ujeremíya? N tá ɔ̄ ohi ka īkpō ufígi “nō o lɔhi ā lɔhi nɛ̄hi, mɛ́mla obɔ̄bí a bɔ̄bí nɛ̄hi nɛ̄ ɔ̄cɛ dúúmā í gáā lé glá ŋ́.”

⁴Anɔ́ɔ Óndú ā da um kahíníī,

⁵“Ami, Uyáwɛ, nōo wɛ Ɔwɔicō nɛ̄ Ísrɛ̄lu gē gbɛ̄ɛ̄gbā ā ka, n géē je ācɛ Ujúda nɛ̄ n yá ɛ́ɛ́ nēé kpó uwā ga aɔ́fiyɛ ga ajɛ Ubábīlɔn ā kéē lɔhi lɛbɛ̄ɛka aíkpō ufíigi olɔhi nyā.

⁶Eyī kú um géē kwu uwá ká um yá uwā lɔhi. N géé je uwá kwúcē wā ipú ajɛ nyā kpɔ́. N kē í ma uwā gicō bɛ̄ɛka ɛ́gɛ́nɛ̄ ɔ̄cɛ ī gwó ɔlɛ́ gicō ā. Ń kē gáā wúla uwá tū ajɛ ɛ́ɛ́ gɛ ŋ́. N géē bū uwá tū, ń kē gáā fu uwá ɔkwu ŋmá ajɛ gɛ ŋ́.

⁷N géē je ɔtū lɛ uwá kéē lɛ um jé, ka ami ɔ́ɔ wɛ Ɔwɔicō á. É géē wɛ ācɛ ɔlɛ́ um, n kē í wɛ Ɔwɔicō kú uwā, ohígbū ka é géē kwúcē wā ɛgiyí um ŋmá odúúdú ɔtū kú uwā.

⁸Amáŋ n géē yá Usedekíya, ɔcɛ́ kú Ujúda ā mɛ́mla aígabɔ̄ kú nū, mɛ́mla ācɛ nēe bá Ujerúsālɛm kpɔ́ ā, klla mɛ́mla aɛ́nɛ̄ e pɛ́ kwu ga Íjīpiti ā bɔ̄bí nɛ̄hi. N géē yá uwā lɛbɛ̄ɛka aíkpō ufíigi obɔ̄bí nēe tōō lé lɛ ɔ̄cɛ dúúmā ŋ́ mā.

⁹N géē ya uwā ɔdōbɔ̄bí nɛ̄ɛ̄nɛ̄hi nɛ̄ ācɛ aéwɔhá géē yúúfi. É í je pīya ɔdā nɛ̄ ācɛ í yá uwā okónu, í yá uwā ɛbɛ́, klla í bī iyē uwā le tókónū lɛ ɔ́mpā uwā. Abɔ̄ ó gáā lɛ ā lɛ uwá ɛga dúúmā nɛ̄ n géē fíyá uwā ákátā nyɔ̄ ā á.

¹⁰N géē cɛ̄ lɛ ɛfú lé uwā, n géē cɛ̄ lɛ ɔkpɛtá ŋmó uwā, klla í yá ka ōcē obɔ̄bí kóō kpó uwā ŋmó jāā gbéeko nēé kwú yíífi dúúdú ŋmá ajɛ nɛ̄ n je lɛ aádáádā uwā ā.”