Read idoma UJƐRƐMÍYA 25 Bible Online

UJƐRƐMÍYA 25 - idoma bible

UJƐRƐMÍYA 25

¹Ipú iháyí ɔ́mɛɛnɛ nɛ̄ Ujɛhóyākim, ɔyí kú Ujosíya wɛ ɔcɛ́ kú Ujúda ā, Ɔwɔicō lɛ ɛhɔ̄ tū Ujeremíya lɛyíkwu odúúdú ācɛ kú Ujúda. (Eko ɔ́ɔmā wɛ iháyí aflɛ́yí nɛ̄ Unebúkádinēsa lé ɔcɛ́ kú Ubábīlɔn á.)

²Anɔ́ɔ ó da odúúdú ācɛ kú Ujúda mɛ́mla ācɛ nēe lā Ujerúsālɛm ā kahíníī,

³“Ífi iháyí ofucɛtá, ŋmá eko kú iháyí igwɛ́ɛtá nɛ̄ Ujosíya, ɔyí kú Ámɔ̄ri lé ɔcɛ́ kú Ujúda ā, jāā gāá kwu ícɛ, Ɔwɔicō ā húmáyī kɛlā gā um, n kē húmáyī ka ɔdā nōó gā um ā lɛ aá eko dóódu. Amáŋ aá jāhɔ̄ ŋ́.

⁴Aá jāhɔ̄ ɛ́ɛ́ nɛ̄ aá gē pó ɛlā kú Óndú ā ŋ́, náaná nōó yɔ̄ ī tū ācomɛ́ɛbɛ nēe ī cɛ̄ ɛhɔ̄ nɛ̄ ó tū uwā fu aá ā.

⁵Ācomɛ́ɛbɛ ā da aá ka aá kwú pīyabɔ̄ ŋmá ucē ɔbíipú kú aá mɛ́mla ɔdōbɔ̄bí nɛ̄ aá bá ī yá ā. É da aá ka ɔ́dāŋ nɛ̄ aá le yá lɛ ā, aá géē lā ɛbɔ́ ipú ajɛ nɛ̄ Ɔwɔicō ɔ́ɔ je lɛ aá mɛ́mla aádáádā aá, kóō wɛ ákú aá piyóó ā.

⁶É da aá ka Ɔwɔicō ɔ́ɔ ka aá híī pā aɛ́cí ɔhá dúúmā ɛ́ɛ́ nɛ̄ aá gē gbā uwā ɛ̄gbā ŋ́. Ka aá ɔ́ɔ híī yá Ɔwɔicō cɔ̄nū ŋmá lɛ ō gbā ɛcí nɛ̄ aá bī abɔ̄ kú yá ā ɛ̄gbā ŋ. Ka ɔ́dāŋ nɛ̄ aá lɛyítáajɛ lɛ Óndú ā, ɔ́ɔ gáā yá aá ɔdōōlɔnɔ dúúmā ŋ́.

⁷Amáŋ Ɔwɔicō abɔ̄yī nū ka aá tá ō jāhɔ̄ lɛ anúɔ. Ikɔkɔ ɔ́ɔmā, aá lɛ anúɔ yá cɔ̄nū ŋmá lɛ ɛcí nɛ̄ aá bī abɔ̄ kú aá ma nɛ̄ aá ī pā ɔ̄ gē gbā ɔ̄ ɛ̄gbā. Ohígbū ɔ́ɔmā aá lɛ ɔdōlɔnɔ yá īyī aá ɛɛ́.

⁸Ɔwɔicō nōo lɔfu fíyɛ́ dúú kahíníī, “Abɔ̄ aá lɛyítáajɛ lɛ odúúdú ɛlā nɛ̄ n ka lɛ aá ā ŋ́ mā.

⁹Ohígbū ɔ́ɔmā n géē tɛ̄hɔ̄ fu odúúdú ācɛ kú ajɛ ɛhícō, mɛ́mla ɔ̄cocɛ̄hɔ̄ kú um, Unebúkádinēsa, ɔcɛ́ kú Ubábīlɔn. N géē bī uwā wā í kpɛ́fú tá ajɛ Ujúda mɛ́mla odúúdú ācɛ nēe lā anú, klla mɛ́mla odúúdú aéwo nēe lā kwú Ujúda ajaajɛ ā. N géē je éwo nyā mɛ́mla ācɛ kú nū, mɛ́mla aéwo nēe lā kwu ɔ́ ajaajɛ ā yíífi, nōó géē wɛ ɛbɛ o héyī. Ó kē í tá alácɛ̄ piyóó, nɛ̄ ācɛ kē í yá uwā okónu.

¹⁰N géē yá ka ācɛ ā kéē híī gwéeyē klla yá ucɛ gɛ ŋ́. É gáā lɛ ɔnyā mɛ́mla ɔbá gɛ ŋ́. Ācɛ í kē gáā má aíkpɔ́dɛ̄hɔ̄ gbā ɛgɔ̄ ɛ́ɛ́ nēé ī bá ī hɛ́ ɔlá kwu agege ipú ajɛ ā ŋ́.

¹¹Odúúdú ajɛ Ujúda géē tá alácɛ̄, nōó gāa tōō má ŋ́. Ujúda mɛ́mla aéwo nēe kwu ɔ́ ajaajɛ ā géē yúklɔ́ ɔfiyɛ lɛ ɔcɛ́ kú Ubábīlɔn iháyí ofɛtá cigwó.

¹²Igbīhi iháyí ofɛtá cigwó ɔ́ɔmā, cɛ́ɛ́ n lɛ italā yá ācɛ Ubábīlɔn mɛ́mla ɔcɛ́ kú uwá ohígbū ɔ́bíipú kú uwá. N géē je Ubábīlɔn yíífi klla í je ɔ́ tá alácɛ̄ piyóó.

¹³N géē yá odúúdú ācɛ Ubábīlɔn ā italā mɛ́mla ámíyā nɛ̄ n ka bū okónu kú Ujeremíya ka n géē tū klá aéwɔhá ā. Ɔ́ɔmā wɛ odúúdú aámíyā nēe tá tū ipú ɔkpá nyā á.

¹⁴N géē cílá ācɛ Ubábīlɔn ulé ka ɔdōbɔ̄bí dóódu nēe yá ā. Aɔ́cɛ́ olɔfú nɛ̄hi kú aéwɔhá alɛwa géē yá uwá lé, je uwá pīya aɔ́fiyɛ.”

¹⁵Uyáwɛ, nōo wɛ Ɔwɔicō nɛ̄ Ísrɛ̄lu í gbɛ̄ɛ̄gbā ā da ami nōo wɛ Ujeremíya ā kahíníī, “Íkókwū nɛ̄ ejé wɛ omōōmu nū nyā kwɛyí ɛ́gɛ́nɛ̄ n cɔ̄nū nɛ̄hi lɛ ā. Mīyɛ íkókwū ā ká ā le bī gé lɛ odúúdú aéwo nɛ̄ n tū uwɔ ɛhɔ̄ fu uwá ā, cɛ́ɛ́ ká ā yá kéē le gwá ŋmá anú.

¹⁶Ó géē yá uwā lɛbɛ̄ɛka ɔ̄cɛ nɛ̄ ejé lɛ ɔ́ kwú, yɔ̄ ī túgagá ga ɔwɛ ga ácí ā. Ɛ́gɔ́ɔmā nēé gáā jé īyī uwá ŋ́ ohígbū ɛfú nɛ̄ n gáā tū ācɛ nyɔ̄ gáā kpó tú uwā ā.

¹⁷Anɔ́ɔ n kwú íkókwū ā ú ŋmá abɔ̄ kú Ɔwɔicō le bī gé lɛ odúúdú aéwo nōó tū um ɛhɔ̄ fu uwá ā. Anɔ́ɔ n le je lɛ uwá gwá ā.

¹⁸N le je lɛ Ujerúsālɛm mɛ́mla odúúdú aígelī nɛ̄hi kú Ujúda, mɛ́mla aɔ́cɛ́ mɛ́mla aótrɛ̄yí kú Ujúda le gwá ŋmá anú. N yá lɛ ā cɛ́ɛ́ kéē kwú yíífi má tá alácɛ̄. Ācɛ klla í bá ī yá uwā okónu, klla í bī iyē kú uwā le tókónu lɛ ācɛ ɛ́gɛ́nɛ̄ é gē yá jāā kwu ícɛ ā.

¹⁹Ācɛ nēe bá nyā le gwá ŋmá ipú íkókwū nyā dúu. N le je lɛ Uféro, ɔcɛ́ kú Íjīpiti mɛ́mla ācocɛ̄hɔ̄ mɛ́mla aígabɔ̄ mɛ́mla odúúdú ācɛ ɔlɛ́ nū.

²⁰N klla le je lɛ odúúdú ācɛ aéwɔhá nēe bá abɔ́ɔ ā le gwá dúú. N le je lɛ odúúdú aɔ́cɛ́ kú Úus mɛ́mla aɔ́cɛ́ kú Ufílístiya (kwu aɔ́cɛ́ kú Ásskɛ̄lɔn), Ugása, Ɛ́krɔn mɛ́mla ācɛ kú Assdɔ́ɔduu nēe hile ā le gwá.

²¹N le je lɛ ācɛ Ɛ́dɔm, Umówābu, mɛ́mla Ámɔ̄ri le gwá.

²²N le je lɛ odúúdú aɔ́cɛ́ kú Utáya, mɛ́mla aɔ́cɛ́ kú Usídɔn mɛ́mla odúúdú aɔ́cɛ́ kú ajɛ kú okónu ísu ogbehé kú ísu nɛ̄hi ā le gwá.

²³N le je lɛ ācɛ Udédan, Utéma, Ubús mɛ́mla odúúdú ācɛ nēe ī plla áklō ɛyí kú uwā ā le gwá.

²⁴N le je lɛ odúúdú aɔ́cɛ́ kú ācɛ Árābu, mɛ́mla odúúdú aɔ́cɛ́ kú aéwɔhá nēe lā ipú ígbíli ā le gwá.

²⁵N le je lɛ odúúdú aɔ́cɛ́ kú Usímri, aɔ́cɛ́ kú Ɛ́lam mɛ́mla aɔ́cɛ́ kú Umédīya le gwá.

²⁶N le je lɛ odúúdú aɔ́cɛ́ kú ɛhícō ā, kwu aɛ́nɛ̄ é bá ajaajɛ mɛ́mla ɛga oligbó ā le gwá. Ɔnyɔɔnyɛ kú uwá gwá ɔgbɔɔgba. N le je lɛ odúúdú aéwo nēe bá ɛcɛ nyā ā le gwá. Eko nɛ̄ odúúdú uwá le gwá ā, cɛ́ɛ́ ɔcɛ́ kú Ussɛ́ssāku (Ubábīlɔn) le gwá dúú.”

²⁷Anɔ́ɔ Ɔwɔicō da um kahíníī, “Lɛ da uwá ka ami nōo wɛ Ɔwɔicō nōo lɔfú fíyɛ́ dúú ā, nōo wɛ Ɔwɔicō nɛ̄ Ísrɛ̄lu gē gbɛ̄ɛ̄gbā ā ka, aá gwá kóō lɛ aá kwú, kú aá gba klá iyē, cɛ́ɛ́ kú aá gwōnū, nɛ̄ aá klá gáā cāŋjɛ glá ɛ́ɛ́ gɛ ŋ́, ohígbū ka um yɔ̄ ī tū ācɛ ɛhɔ̄ wā í kpɛ́fú tá ā.

²⁸Eko nēé tá ō mīyɛ íkókwū nyā ŋmá abɔ̄ kú uwɔ kéē gwá, le da uwá ka amíyɔ̄ nōo wɛ Ɔwɔicō nōo lɔfú fíyɛ́ dúú ɔ́ ka, ‘Aá géē gwá piíí.’

²⁹Má ɔ̄, ɔ́dāŋ nɛ̄ n gbɔɔ́ ŋmá ō je igelī nɛ̄hi nōo lé iyē kú um mā yíífi, aá gbɛlá ka ń gáā yá aá italā ŋ́ nɛɛɛ? Aá gāá nyɔ̄ áncā ŋ́. Ohígbū ka n géē tɛ̄ɛfú klá odúúdú ācɛ nēe lā ɛcɛ ā. Ami, Ɔwɔicō nōo lɔfú fíyɛ́ dúú ā le ka ɛɛ́.”

³⁰Anɔ́ɔ Ɔwɔicō da um kahíníī, “Lɛ ɛbɛ nyā ka tɛ́ɛcɛ lɛ odúúdú uwā ká ā da uwá kahíníī, ‘Óndú ā géē kɛlā gbōm ŋmá ɔkpáncō bɛ̄ɛka ɛ́gɛ́nɛ̄ ágábá gē tōoji ā. Ó í je ɔkɔ kú nū gicō ŋmá ɛga otīhɔ nōó lā ā. Ó í dɛ̄gba nɛ̄hi tū ācɛ ɔlɛ́ nū ā bɛ̄ɛka ágábá ā. Ó klla géē dɛ̄gba klá odúúdú ācɛ nēe lā ɛcɛ ā bɛ̄ɛka ɛ́gɛ́nɛ̄ ācɛ nēe ī yá ejé gē dɛ̄gba ā.

³¹Ācɛ géē pó ɛ̄gbā nōo í dɛ̄ ā kwu ɛga dóódu kú ɛcɛ. Óndú ā lɛ ɛlā ō kpó ce odúúdú aéwo kú ɛcɛ. Ó kē í kɛpɔ̄ tū odúúdú ācɛ, klla í je ācobɔ̄biipú ā kpó ŋmó. Óndú ā le ka ɛɛ́.”

³²Óndú ā nōo lɔfú fíyɛ́ dúú ā kahíníī, “ífi gē yɔ̄ ī yá ŋma éwo éyi ga éwo ɔhá bɛ̄ɛka owu nɛ̄hi nōo yɔ̄ ī tá kwūūū ŋmá ɔ́kíkā kú ɛcɛ éyi ga ɔhá ā.

³³Okwū kú ācɛ nɛ̄ Óndú ā géē ŋmó ɛ̄cī ɔ́ɔmā ā géē pahīla klá ɛga dóódu kú ɛcɛ. Ɔ̄cɛ í kōō gáā jikwū uwā glá ŋ́ ɛ́ɛ́ nēé kōō gē kɛlā ō kpó okwū uwā nyi ŋ́. Okwū kú uwá géē tīkwū klá ajɛ bɛ̄ɛka imu kú ɛyétutulu ā.

³⁴Aá tɛ̄gíkwū, aá nēe wɛ aótrɛ̄yí kú ācɛ ɔlɛ́ um, nēe lɛbɛ̄ɛka ācogbāálá kú um ā. Aá jikwū, ká aá lɛ īyī aá míya ajɛ. Eko le yá nēé gáā kpó aá ŋmó, klla í hɛ́ ɛbɛ́ aá nyɛŋɛnyɛŋɛ ɛ́gɛ́nɛ̄ é gē wá ɛbɛ́ omlede ā nyɛŋɛnyɛŋɛ ā.

³⁵Aá gáā má ɛga dúúmā nɛ̄ aá í kwu nyɔ̄ í tayínū ŋ́.

³⁶Ācogbāálá ā gē jikwū tɛ́ɛcɛ, ohígbū ka Óndú ā yɔ̄ ī je ácí nɛ̄ aálá kú uwā gē lé ā yíífi.

³⁷Óndú ā le cɔ̄nū nɛ̄hi kwú éwo kú aá nōo yɔ̄ ɛbɔ́ ā ú yíífi, klla kwú ɔ̄ ú tá alácɛ̄ ɛɛ́.

³⁸Óndú ā lɛ igbīhi ce kwu ācɛ ɔlɛ nū a bɛ̄ɛka ágábá nōo nyɛ̄ɛ̄ ŋmá ɔ̄gɔ̄ kú nū ā. Óndú ā kwú cɔ̄nū nɛ̄hi anɔ́ɔ ó lɛ ācɛ tɛ̄hɔ̄ gaá kpɛ́fú tú ācɛ ɔlɛ́ nū lɛ uwā kpó, ŋmó cɛ̄ lɛ ɔlɛ́ uwā má tá alácɛ̄.