Read idoma UJƐRƐMÍYA 26 Bible Online

UJƐRƐMÍYA 26 - idoma bible

UJƐRƐMÍYA 26

¹Ujeremíya kahíníī, “Óndú ā kɛlā nyā gā um, bōōbū nɛ̄ Ujehóyākim, ɔyí kú Ujosáya je pīya ɔcɛ́ kú Ujúda ā.”

²Ó kahíníī, “Háyi ipú Agblīihɔ-nɛ̄hi kú um ā, cɛ́ɛ́ ká ā le odúúdú ɔdā nɛ̄ n je ɔ́da gā uwɔ ka ā ka lɛ odúúdú ācɛ kú aígelī nɛ̄hi kú Ujúda, nēe gē wā í gbɔ̄ɔkɔ abɔ́ɔ ā. A híī je ɛlā dúúmā tá ajɛ ŋmá anú ŋ́.

³Ekōhī é lɔfú jāhɔ̄ klla pó, nɛ̄ ɔnyɔɔnyɛ í pīyabɔ̄ ŋmá ɔ́bíipú nɛ̄ ó bí ā. Ɔ́dāŋ́ nēé le pīyabɔ̄, n géē pīya ɔtū kú um abɔ̄, n kē gáā kpó uwā yíífi, ɛ́gɛ́nɛ̄ n miya lɛ ā ɛ́ɛ́ gɛ ŋ́.

⁴Da uwá ka ami nōo wɛ Ɔwɔicō ā ɔ́ɔ kéē húmáyī jāhɔ̄ ga um kéē lɛyítáajɛ lɛ íne kú um nɛ̄ n je lɛ uwá ā ŋ́,

⁵ɛ́ɛ́ nēé ī jāhɔ̄ lɛ olɛhɔ̄ nɛ̄ amíyɔ̄ ī tū ācomɛ́ɛbɛ, nēe wɛ ācotɛ̄hɔ̄ kú um fu uwá ā ŋ́.

⁶Da uwá ka ɔ́dāŋ nēé tá ō lɛyítáajɛ kpɔ́, n géē je Agblīihɔ-nɛ̄hi nyā yíífi bɛ̄ɛka ɛ́gɛ́nɛ̄ n je Ussílo yíífi ā. N klla géē yá nɛ̄ aéwɔhá ā géē bī iyē kú igelī nyā le tókónu lɛ ɔ̄cɛ.”

⁷Ācogwɛ́ɛya mɛ́mla ācomɛ́ɛbɛ mɛ́mla odúúdú ācɛ ā kē pó abɔ̄ Ujeremíya yɔ̄ ī ka ɛlā nyā tɛ́ɛcɛ ipú Agblīihɔ-nɛ̄hi kú Óndú ā.

⁸Bōōbū nɛ̄ Ujeremíya lɛ odúúdú ɛlā nɛ̄ Óndú ā da ɔ́ kó ō ka lɛ ācɛ ā ka mɛ ā, ācogwɛ́ɛya mɛ́mla ācomɛ́ɛbɛ mɛ́mla odúúdú ācɛ ā gāá lɛ ɔ́ kwú. Anɔ́ɔ é da ɔ́ kahíníī, ‘A géē kwú piíí!

⁹Ɔdíyá nɛ̄ a bī iyē kú Ɔwɔicō í ka ka Agblīihɔ-nɛ̄hi nyā ɔ́ɔ géē je yíífi lɛbɛ̄ɛka Ussílo ā? Ka igelī nɛ̄hi nyā ɔ́ɔ klla í tá alácɛ̄ āa?” Anɔ́ɔ odúúdú ācɛ ā kwú jīla tū Ujeremíya ipú Agblīihɔ-nɛ̄hi kú Ɔwɔicō ā á.

¹⁰Eko nɛ̄ aótrɛ̄yí kú ācɛ ā lɛ ɛ̄nyā pó ā, é le bɛ̄cɛ ŋmá agblɔ̄cɛ́ ā gaá cíce okómpinu ɛ̄yīpɛ̄ kú Agblīihɔ-nɛ̄hi kú Ɔwɔicō ā.

¹¹Anɔ́ɔ ācogwɛ́ɛya mɛ́mla ācomɛ́ɛbɛ ā da odúúdú aígabɔ̄ mɛmla ācɛ ā kahíníī, “É cíkā ō lɛ ɛpɔ̄bí ŋmó ɔ̄cɛ ā, kéē kwú ɔ̄ ú ŋmó. Ohígbū koó lɛ ɛbɛ obɔ̄bí ka tɛ́ɛcɛ lɛyíkwu igelī nyā. Aá abɔ̄yī aá kē pó ɛlā nōó ka ā dúú.

¹²Anɔ́ɔ Ujeremíya da odúúdú aótrɛ̄yí mɛ́mla odúúdú ācɛ ā kahíníī, “Ɔwɔicō tū um ɛhɔ̄ ka amiyɔ̄ ka odúúdú ɛlā nɛ̄ n ka nɛ̄ aá pó ā lɛyíkwu Agblīihɔ-nɛ̄hi mɛ́mla igelī nyā á.

¹³Aá lɛ ɔwɛ nɛ̄ aá ī lā oyēeyī ā mɛ́mla ucē nɛ̄ aá ī yá ā pīyabɔ̄, cɛ́ɛ́ kú aá lɛyítáajɛ lɛ Uyáwɛ, nōo wɛ Ɔwɔicō nɛ̄ aá ī gbɛ̄ɛ̄gbā ā. Ɔ́dāŋ́ nɛ̄ aá le yá lɛ ā, Ɔwɔīcō géē je ɔtū kú nū pīyabɔ̄, cɛ́ɛ́ ó gáā yá aá ífi ɛ́gɛ́nɛ̄ ó ka anúɔ géē yá ā ɛ́ɛ́ gɛ ŋ́.

¹⁴Amáŋ ami ā, n yɔ̄ ipú abɔ̄ kú aá nɛ̄. Aá yá um ɔdā dúúmā nɛ̄ aá má ka ɔ́ɔ lɔhi klla le kpaakpa tū aá ā.

¹⁵Amáŋ aá le jé ka, ɔ́dāŋ ka aá kwú um ú ŋmó, oyī kú um í ce aá mɛ́mla odúúdú ācɛ nēe lā igelī nyā ɛyí ka aá lɛ ɔ̄cɛ nōó lɛ́pɔ̄bí ŋ́ ŋmó. Ó lɛ ā ohígbū ka Óndú ā tū um ɛhɔ̄ ɔkwɔ̄ɔ̄kwɛ̄yi ka amíyɔ̄ ka odúúdú ɛlā nyā lɛ aá á.”

¹⁶Anɔ́ɔ aótrɛ̄yí mɛ́mla odúúdú ācɛ ā, da ācogwɛ́ɛya mɛ́mla ācomɛ́ɛbɛ ā kahíníī, “Abɔ̄ ɔdā nɛ̄ Ujeremíya ka ā wɛ ɔdā nōo ka Uyáwɛ, nōo wɛ Ɔwɔicō nɛ̄ alɔ ī gbā ā. ɔ́ɔ ka anúɔ da alɔ ā, ó cíkā nēé gē ŋmó ɔ ŋ́.”

¹⁷Anɔ́ɔ anyākwɔ́cɛ kú ācɛ ōhī nēe bá abɔ́ɔ cāŋ́jɛ le pɛ́ wā ɛcɛ á. É da odúúdú ojíla kú ācɛ ā kahíníī,

¹⁸“Ó lɛ eko éyi eko nɛ̄ Uhesekíya, wɛ ɔcɛ́ kú Ujúda ā, Umáyíka, ɔyí kú Umɔ́rēssɛt ka ɛbɛ tɛ́ɛcɛ. Ó da odúúdú ācɛ kú Ujúda ā ka Ɔwɔicō nōo lɔfú fíyɛ́ dúú ā ɔ́ɔ géē je Usáyɔn wúlatāajɛ bɛ̄ɛka ɛ́gɛ́nɛ̄ ɔ̄cɛ í je ajɛ hɛ́hɔ̄ cɛ̄tla tāajɛ. Ka Ujerúsālɛm ɔ́ɔ klla í je yíífi í tīkwū bá ajɛ bɛ̄ɛka ɛyétutulu ā. Ó klla kú ɛyí ɛfu nɛ̄ Agblīihɔ-nɛ̄hi ā ɔ́ɔ kwu ā ɔ́ɔ í je mu ácí mla aɔ́cí bɛ̄ɛka ipú ūpū.

¹⁹Eko ɔ́ɔmā, Uhesekíya, ɔcɛ́ kú Ujúda, mɛ́mla odúúdú ācɛ kú Ujúda ā í je ɔ́ ŋmó ŋ́. Ikɔkɔ ɔ́ɔmā, Uhesekíya lɛ ojīlīmā ce Ɔwɔicō, klla gbɔɔ́ ō tíne kóō gbo Óndú ā ɔtū. Anɔ́ɔ Ɔwɔicō lɛ ɔtū kú nū pīyabɔ̄, anɔ́ɔ ó klla yá uwā ífi ɛ́gɛ́nɛ̄ ó ka anúɔ géē yá ɛ́ɛ́ gɛ ŋ́ mā. Ɔ́dāŋ́ nɛ̄ alɔ lɛ Ujeremíya ŋmó, ayíka alɔ tíne ka ífi nɛ̄hi nɛ̄ alɔ yɔ̄ ī bī gé lɛ iyī alɔ á.”

²⁰Anyákwɔ́cɛ ā klla ka gɔbū kahíníī, “Ó lɛ ɔ̄cɛ ɔhá nōo bī iyē kú Ɔwɔicō ka ɛbɛ obɔ̄bí tɛ́ɛcɛ lɛyíkwu igelī nyā mɛ́mla ajɛ nyā bɛ̄ɛka ɛ́gɛ́nɛ̄ Ujeremíya ka ā dúú. Iyē nū lé ka Uríya, ɔyí kú Ussɛmáya nōo ŋmá Ukɛriyat Ujēyarím ā.

²¹Ujɛhóyākim, ɔcɛ́ kú Ujúda, mɛ́mla aícɔ́ɔja kú ɔlɛ́ nū mɛ́mla odúúdú aígabɔ̄ kú nū, mɛ́mla aótrɛ̄yí kú ācɛ ā lɛ ɛlā kú nū ɔ́ɔmā pó. Abɔ̄ é le pó ā, é tíne kéē kwú ɔ̄ ú ŋmó. Amáŋ Uríya le pó, anɔ́ɔ ó kwú kwu ga ajɛ Íjīpiti á.

²²Náaná ā Ujɛhóyākim, ɔcɛ́ kú Ujúda ā lɛ Ɛlinátan, ɔyí kú Ákbɔ mɛ́mla ācɛ ɔhá tɛ̄hɔ̄ ga Íjīpiti kéē gaá lɛ Uríya bī wā.

²³É lɛ Uríya bī ŋmá Íjīpiti wā gē lɛ ɔ́. Anɔ́ɔ Ujɛhóyākim, ɔcɛ́ ā cɛ̄ lɛ uwā bī ɔkpacāŋ́gelī lɛ ɔ́ ŋmó á. É kwú okwū kú nū ú tá tá ɛga nēe gē nyi ācɛ nēé wɛ ɔdā dóódu ŋ́ mā á.”

²⁴Amáŋ abɔ̄ Ahíkam, ɔyí kú Ussafán le ɛpɔ̄ Ujeremíya cɛ̄ ā, é je Ujeremíya lɛ ācɛ ā kéē ŋmó ɔ̄ gɛ ŋ́.