Read idoma UJƐRƐMÍYA 27 Bible Online

UJƐRƐMÍYA 27 - idoma bible

UJƐRƐMÍYA 27

¹Eko kpií igbīhi nɛ̄ Usedekíya, ɔyí kú Ujosíya lé ɔcɛ́ kú Ujúda ā, Ɔwɔicō lɛ ɛlā nyā ka lɛ Ujeremíya.

²Ɔwɔicō da ɔ́ kahíníī, “Lɛ ɔdā nēé ī le kwu ɛna ɔkɔ kéē bī ɔ̄ le hɛ́hɔ̄ ā yá ŋmá ɔkpɛ́bɛ́, mɛ́mla ɔcí nēé ī kpó híla anú, cɛ́ɛ́ ká ā kwú ɔ̄ ú wu īyī uwɔ ɔkɔ.

³Cɛ́ɛ́ ká ā lɛ ɛhɔ̄ tū fu aɔ́cɛ́ kú Ɛ́dɔm, Umówābu, Ámɔ̄ri, Utáya, mɛ́mla Usídɔn, bū abɔ̄ kú ācokwɛyí uwā nēé tɛ̄hɔ̄ wā Ujerúsālɛm, ɛgiyí Usedekíya ɔcɛ́ kú Ujúda ā.

⁴Lɛ uwá tɛ̄hɔ̄ fu aɔ́kpani uwā kéē da uwá kahíníī, “Ami Uyáwɛ, nōo lɔfú fíyɛ́ dúú ā, nōo wɛ Ɔwɔicō nɛ̄ Ísrɛ̄lu ī gbā ā, ka

⁵ami bī ɔfú nɛ̄hi kú um nɛ̄hi, bī ogblábɔ̄ kú um le yá ɛcɛ mɛ́mla ɔdā dóódu nēe bá ipú nū, kwú ācɛ mɛ́mla aɛ́bɛ́ á. Ɔ̄cɛ dúúmā nōo he um ɔtū ā, nɛ̄ n kē gē je ɛcɛ lɛ ɔ́ kóō gbō á.

⁶N kwú odúúdú aéwo kú aá ú kpó lɛ ɔ̄cocɛ̄hɔ̄ kú um Unebúkádinēsa, ɔcɛ́ kú Ubábīlɔn kóō gbō aá abālɔbányā ɛɛ́. N kē géē yá ka aɛ́bɛ́ kú ipácí kéē gbā ɔ̄ ɛ̄gbā dúú.

⁷Odúúdú aéwo géē gbā anú mɛ́mla ɔyí nū klla mɛ́mla ɔyɔ́ɔ́yí nū ɛ̄gbā jāā gbéeko nɛ̄ eko ga nēé ī je éwo kú nū yíífi ā. Eko nɛ̄ eko ɔ́ɔmā ga, cɛ́ɛ́ aéwo nɛ̄hi mɛ́mla aɔ́cɛ́ olɔfú nɛ̄hi géē kpó ācɛ éwo kú ɔlɛ́ nū yá aɔ́fiyɛ kú uwā.

⁸Amáŋ abālɔbányā ɔ́dāŋ ka éwo ámāŋ ajɔ̄ɔ̄cɛ́ dúúmā í gbā Unebúkádinēsa, ɔcɛ́ kú Ubábīlɔn, ɛ̄gbā ŋ́, n géē bī ɛfú mɛ́mla ɔkpɛtá mɛ́mla ōcē obɔ̄bí le yá éwo ɔ́ɔmā italā jāā gbéeko nɛ̄ n cɛ̄ lɛ Unebúkádinēsa kwú éwo ɔ́ɔmā ú yíífi.

⁹Ohígbū ɔ́ɔmā, aá lɔfú lɛ ācomɛ́ɛbɛ mɛ́mla aógwɛ́bā mɛ́mla ācɛ nēe gē ka ɛyí ɔ̄na mɛ́mla ācoyímabɔ̄ ipú ajɛ ɔlɛ́ aá. Amáŋ aá híī jāhɔ̄ lɛ ɛlā nēe gē ka lɛ aá ka aá ɔ́ɔ́ gáā gbā ɔcɛ́ kú Ubábīlɔn ā ŋ́ má ŋ́.”

¹⁰Ɛ̄kɛ̄mgbɛ̄ ofōōfūnū nēé gē kā lɛ aá. Ohígbū ka ɔ́dāŋ nɛ̄ aá cɛ̄ ɛlā kú uwā, n géē yá kéē lɛ aá ɔkwu fu ŋmá ajɛ kú ɔlɛ́ aá ga ɛga oligbó. N géē kpó aá nū ŋmá ajɛ ɔlɛ́ aá, nɛ̄ aá í je kpó yíífi.

¹¹Amáŋ, ɔ́dāŋ ka éwo dúúmā géē tú ɛyí wāajɛ í gbā ɔcɛ́ kú Ubábīlɔn ɛ̄gbā, N géē mā ācɛ éwo ɔ́ɔmā tá ipú ajɛ kú ɔlɛ́ uwā, cɛ́ɛ́ kéē hɛ́hɔ̄ anú, kéē klla lā abɔ́ɔ.”

¹²Ami nōo wɛ Ujeremíya lɛ ɛhɔ̄ ékpónú ɔ́ɔmā cɛ̄ lɛ Usedekíya, ɔcɛ́ kú Ujúda. N da ɔ́ kahíníī, “Usedekíya, ɔ́dāŋ nɛ̄ a tíne ō yēeyī, ayíka a tú ɛyí wāajɛ lɛ ɔcɛ́ kú Ubábīlɔn, cɛ̄ anú mɛ́mla ācɛ ɔlɛ́ nū ɛhɔ̄.

¹³Ɔ́dāŋ ka á yá lɛ ā ŋ́, ayíka ɛfú ɔkpɛtā mɛ́mla ōcē obɔ̄bí kē í kpó aá ŋmó ɛ́gɛ́nɛ̄ Óndú ā ka kóō géē yá éwo dóódu nōo tá ō tɛ́yí wāajɛ lɛ ɔcɛ́ kú Ubábīlɔn ā.

¹⁴Ācomɛ́ɛbɛ ōhī lɔfú da uwɔ ka a híī tɛ́yí wāajɛ lɛ ɔcɛ́ kú Ubábīlɔn gbóógbóō ŋ́. Amáŋ ā jāhɔ̄ lɛ uwá ŋ́. Ohígbū ka ɛhɔ̄ ɛ̄kɛ̄mgbɛ̄ nēé gē cɛ̄ ga uwɔ á.

¹⁵Ɔwɔicō abɔ̄yī nū koó wɛ anúɔ tū uwā ɛhɔ̄ ŋ́, amáŋ́ uwá bī iyē kú nū bá ī cɛ̄hɔ̄ ɛ̄kɛ̄mgbɛ̄ á. Ó ka ɔ́dāŋ nɛ̄ a lɛ ɔdā nēé ī ka ā yá, ka anúɔ géē kpó awɔ mɛ́mla ācomɛ́ɛbɛ nēe bá ī kɛ̄mgbɛ̄ nēe bá nyā ga uwɔ ā kpó nū ŋmá ipú ajɛ nyā, cɛ́ɛ́ aá le pɛ́ gekwú.”

¹⁶Anɔ́ɔ n da ācogwɛ́ɛya ā mɛ́mla odúúdú ācɛ ā kahíníī, “Ɔwɔicō ka aá híī jāhɔ̄ lɛ ɛlā kú ācomɛ́ɛbɛ nēe gē ka ka, eko kpíii é géē kpó iyó kú Agblīihɔ-nɛ̄hi kú Óndú ā cīgbīhi wā ŋmá Ubábīlɔn ā ŋ́. Ɛbɛ ɛ̄kɛ̄mgbɛ̄ nēé bá ī ka tɛ́ɛcɛ lɛ aá á.

¹⁷Aá pó ɛlā kú uwá a ŋ́! Aá tú ɛyí wāajɛ kú aá cɛ̄ ɔcɛ́ kú Ubábīlɔn ɛhɔ̄, cɛ́ɛ́ aá géē yēeyī! Ɔ́dāŋ́ nɛ̄ aá yá lɛ ā ŋ́, igelī nyā géē je pīya alácɛ̄.

¹⁸Ɔ́dāŋ́ ka ācomɛ́ɛbɛ́ ɔ́ɔmā wɛ ācomɛ́ɛbɛ ɔkwɛ̄yí, nɛ̄ Ɔwɔicō kē ī kɛlā bū okónu kú uwā, uwá kéē gbɔ̄ɔkɔ lɛ Ɔwɔicō nōo lɔfú fíyɛ́ dúú ā, cɛ́ɛ́ kéē híī kpó ohile kú iyó kú ipú Agblīihɔ-nɛ̄hi kú Ɔwɔicō ā, nēe bá Ujerúsālɛm ā, ga Ubábīlɔn gɛ ŋ́. É kē gbɔ̄ɔkɔ kéē híī kpó aíyō kú ɔlɛ́ ɔcɛ́ kú Ujúda nōo hile Ujerúsālɛm ā ŋ́ dúú.

¹⁹Ɔwɔicō kɛlā nyā lɛyíkwu upíla mɛ́mla ɔgbanjɛ aókpómōlóolo mɛ́mla aɔ́dā ō kpó odée ce ɔ́ nēe lɛ akā ā mɛ́mla aíyó ohile nēé mā ɔ̄ tá bá Ujerúsālɛm ā.

²⁰Unebúkádinēsa, ɔcɛ́ kú Ubábīlɔn í kpó aɔ́dā nēe bá ā, eko nōo je Ujɛhóyācin, nōo wɛ ɔcɛ́ kú Ujúda, ɔyí kú Ujɛhóyākim ā, mɛ́mla odúúdú aígabɔ̄ kú Ujúda aɔ́fiyɛ ŋmá Ujerúsālɛm ga Ubábīlɔn ā ŋ́.

²¹Uyáwɛ nōo lɔfú fíyɛ́ dúú, Ɔwɔicō nɛ̄ Ísrɛ̄lu gē gbɛ̄ɛ̄gbā ā ka lɛyíkwu aíyó ohile nēé mā uwā tá bá ipú Agblīihɔ-nɛ̄hi kú Ɔwɔicō ā mɛ́mla agblɔ̄cɛ́ kú ɔcɛ́ kú Ujúda, Ujerúsālɛm ā kahíníī,

²²“É géē je uwá kpó ga Ubábīlɔn. É kē í bá abɔ́ɔ jāā gbéeko nɛ̄ n le tútū ō gaá nyɔ̄ í kpó uwā. Eko ɔ́ɔmā, cɛ́ɛ n lɛ uwá kpó cīgbīhi wā Ujerúsālɛm amāa.”