Read idoma UJƐRƐMÍYA 28 Bible Online

UJƐRƐMÍYA 28 - idoma bible

UJƐRƐMÍYA 28

¹Igbīhāajɛ ipú iháyí ɔ́ɔmā piíí ā nōo wɛ iháyí ɔ́mɛɛnɛ nɛ̄ Usedekíya lé ɔcɛ́ kú Ujúda ā, Uhananíya, ɔyí kú Ássɔ, ɔ̄comɛ́ɛbɛ́ nōo ŋmá Ugíbeyɔn ā, lɛ ɛlā da um ipú Agblīihɔ-nɛ̄hi kú Ɔwɔicō ā. Ipééyī ācogwɛ́ɛya mɛ́mla ācɛ ā, ó da um kahíníī,

²“Uyáwɛ nōo lɔfú fíyɛ́ dúú ā, nōo wɛ Ɔwɔicō nɛ̄ Ísrɛ̄lu ī gbɛ̄ɛ̄gbā ā ka anúɔ kwú agbá kú ɔcɛ́ kú Ubábīlɔn hɛ́ ŋmá aá ɔkɔ ɛɛ́.

³Ó ka ipú iháyí ɛpa nōo ī wā ā, anúɔ géē je odúúdú aíyó kú Agblīihɔ-nɛ̄hi kú anúɔ nɛ̄ Unebúkádinēsa, ɔcɛ́ kú Ubábīlɔn kpó ŋmá amānyā ā kpó kwúcē wā amānyā.

⁴Ó ka anúɔ klla í je ɔyí kú Ujɛhóyākim, Ujɛhóyācin, nōo wɛ ɔcɛ́ kú Ujúda ā mɛ́mla odúúdú ācɛ ohile nēé kpó ɔfiyɛ ŋmá Ujúda ā kpó wā ɔlɛ́. Ó ka anúɔ géē je agbá kú ɔcɛ́ kú Ubábīlɔn hɛ́ ŋmá aá ɔkɔ.”

⁵Anɔ́ɔ ami nōo wɛ Ujeremíya tá Uhananíya ohi iyɔ̄bū ācogwɛ́ɛya mɛ́mla odúúdú ācɛ nēe háyi abɔ́ɔ, ipú Agblīihɔ-nɛ̄hi kú Ɔwɔicō ā kahíníī,

⁶“Amí! Ɔwɔicō koó cɛ̄ kóō le yá lɛ ā! Ɔwɔicō kóō ya ká ɛlā kú uwɔ ā, kóō le yá jīla, cɛ́ɛ́ kéē lɛ aíyó kú Agblīihɔ-nɛ̄hi ā kpó wā ɔlɛ́ ŋmá Ubábīlɔn, mɛ́mla ɛjɛ̄ɛ̄jī ācɛ nēé kpó aɔ́fiyɛ ga ajɛ éwɔhá ā.

⁷Amáŋ Uhananíya jāhɔ̄ ká a pó ɛlā nɛ̄ n gáā ka ga uwɔ mɛ́mla odúúdú ācɛ ā ā.

⁸Ŋmá í kée ā, ācomɛ́ɛbɛ nēe tɛtɛ mɛ́ɛbɛ gbɔbū gā uwɔ mɛ́mla ami ā, ka ɛbɛ obɔ̄bí tɛ́ɛcɛ kú ɛfú mɛ́mla ɔkpɛtá lɛyíkwú aéwo alɛwa mɛ́mla aájɔ̄ɔ̄cɛ́ olɔfú.

⁹Amáŋ é gē jé ka Óndú ā ɔ́ɔ tū ɔ̄comɛ́ɛbɛ nōo gē ka ɛbɛ kú ɛbɔ́ tɛ́ɛcɛ á, ɔ́dāŋ ka ɛlā nōó ka lɛ yá yá jīla.”

¹⁰Anɔ́ɔ Uhananíya, ɔ̄comɛ́ɛbɛ ā, kwú úkplākā nɛ̄ um le wu ɔkɔ ā ú púla klla kwú ɔ̄ ú ca á.

¹¹Anɔ́ɔ ó ka iyɔ̄bū odúúdú ācɛ ā kahíníī, “Ɔwɔicō ka ɔwɛ ékpónú nyā nɛ̄ anúɔ géē je agbá kú Unebúkádinēsa, ɔcɛ́ kú Ubábīlɔn hɛ́ ŋmá ɔkɔ kú odúúdú aéwo ipú iháyí ɛpa nēe ī wā ā.” Eko nōó lɛ ɛ̄nyā ka ā, n nyɛɛ ŋmá abɔ́ɔ á.

¹²Eko kpií igbīhi nɛ̄ Uhananíya kwú úkplākā ú hɛ́ ŋmá ɔkɔ kú ami nōo wɛ Ujeremíya ā, Óndú ā gáā da um kahíníī,

¹³Ujeremíya, nyɔ̄ gāá da Uhananíya ka ami nōo wɛ Ɔwɔicō ā ɔ́ɔ ka úkplākā kú ɔcí nɛ̄ ɔ́ɔ hɛ́ á, amáŋ n géē yá úkplākā kú oje kwɛ́yí nū.

¹⁴Uyáwɛ nōo lɔfú fíyɛ́ dúú ā, nōo wɛ Ɔwɔicō nɛ̄ Ísrɛ̄lu ī gbɛ̄ɛ̄gbā ā ka anúɔ géē je úkplākā kú oje nyā wu odúúdú aéwo kú ɛcɛ ā ɔkɔ, cɛ́ɛ́ kéē cɛ̄ Unebúkádinēsa, ɔcɛ́ kú Ubábīlɔn ɛhɔ̄. É kē í cɛ̄ ɔ̄ ɛhɔ̄. N klla í yá ka aɛ́bɛ́ kú ipácí ā kéē cɛ̄ ɔ̄ ɛhɔ̄ dúú.”

¹⁵Anɔ́ɔ n da Uhananíya, ɔ̄comɛ́ɛbɛ ā kahíníī, “Uhananíya, jāhɔ̄! Ɔwɔicō í tū uwɔ ɛhɔ̄ dúúmā ŋ́. A kē cɛ̄ lɛ ācɛ nēe bá ā kéē kpɔ́tūce ɛ̄kɛ̄mgbɛ̄ ɛɛ́.

¹⁶Ohígbū ɔ́ɔmā, Ɔwɔicō ka anúɔ géē je uwɔ fu ŋmá ipú ɛcɛ nyā dúúdú. A géē kwú iháyí nyā piíí ā ohígbū ka a le da ācɛ kéē yá īkpɛ̄yí olɔfú tá anú nōo wɛ Ɔwɔicō ā ɛɛ́.”

¹⁷Ipú ɔyā ahāapa kú iháyí ɔ́ɔmā pīíí ā, Uhananíya, ɔ̄comɛ́ɛbɛ ā gekwú.