Read idoma UJƐRƐMÍYA 29 Bible Online

UJƐRƐMÍYA 29 - idoma bible

UJƐRƐMÍYA 29

¹Ujeremíya lɛ ɔkpá tá fu aótrɛ̄yí kú ācɛ ā mɛ́mla ācogwɛ́ɛya mɛ́mla ācomɛ́ɛbɛ mɛ́mla odúúdú ācɛ ɔhá, nɛ̄ Unebúkádinēsa kpó aɔ́fiyɛ ŋmá Ujerúsālɛm ga Ubábīlɔn ā.

²Ó tá ɔkpá nyā igbīhi nēé lɛ Ujɛhóyācin, ɔ̄cɛ ā, mɛ́mla ɛ́nɛ́ nú mɛ́mla aígabɔ̄ kú agblɔ̄cɛ́ mɛ́mla aótrɛ̄yí kú Ujúda mɛ́mla Ujerúsālɛm mɛ́mla ācoyúklábɔ̄ mɛ́mla aónɔwá ā kpó aɔ́fiyɛ ga ajɛ ewɔhá ā.

³Ó kwú ɔkpá nyā ú lɛ Ɛlása, ɔyí kú Ussafán mɛ́mla Ugemáriya, ɔyí kú Uhílīkiya, nɛ̄ Usedekíya, ɔcɛ́ kú Ujúda yɔ̄ ī tɛ̄hɔ̄ fu Unebúkádinēsa, ɔcɛ́ kú Ubábīlɔn ā. Ɔdā nɛ̄ ɔkpá ā ka ā yɔ̄ á.

⁴“Ami, Uyáwɛ nōo lɔfú fíyɛ́ dúú ā, nōo wɛ Ɔwɔicō nɛ̄ Ísrɛ̄lu ī gbɛ̄ɛ̄gbā ā ka ɛnyā lɛ odúúdú ācɛ nēé kpó aɔ́fiyɛ ŋmá Ujerúsālɛm ga Ubábīlɔn ā á.

⁵Aá gwó aɔ́lɛ́ kú aá lā ipú uwā. Aá hɛ́hɔ̄ kú aá lé ɔdɛ̄hɔ̄ nɛ̄ aá géē hí ā.

⁶Aá lɛ anyā, ká aá ma ayí. Aá lɛ anyā lɛ ayí aá nɔ̄nyīlɔ, kú aá kpó ayí aá nɔ̄nyā lɛ ɔbá. Aá yá lɛ ā ká aá nyīla tā ajɛ abɔ́ɔ, cɛ́ɛ́ ká aá híī mɛ tāajɛ ŋ́.

⁷Aá yá kóō lɔhi lɛ igelī nɛ̄hi nɛ̄ n yá kéē kpó aá aɔ́fiyɛ nyɔ̄ ā. Aá gbɔ̄ɔkɔ ga um lɛyíkwu ɔɔ́, ohígbū ka ɔ́dāŋ ó yɔ̄ lɔhi, aá géē bá lɔhi dúú.

⁸Ami, Uyáwɛ nōo lɔfú fíyɛ́ dúú ā, Ɔwɔicō nɛ̄ Ísrɛ̄lu gē gbɛ̄ɛ̄gbā ā gē pi aá ahɔ̄ ka aá cɛ̄ ka ācomɛ́ɛbɛ mɛ́mla aógwɛ́bā nēe bá ipú ā kéē púla aá ŋ́. Aá jāhɔ̄ lɛ ɔ̄́na nēé ī ka ka aá ɔ́ɔ nā ɔ́ɔmā ŋ́.

⁹Ɛ̄kɛ̄mgbɛ̄ nēé bī iyē kú um bá ī kā lɛ aá á. Ó wɛ ami nōo wɛ Ɔwɔicō ā tū uwā ɛhɔ̄ ā ŋ́.

¹⁰Eko nɛ̄ aá lɛ iháyí ofɛtá cigwó yá Ubábīlɔn, n géē méyīnyinyi aá, cɛ́ɛ́ ka n lɛ aá kpó cīgbīhi wā ɔlɛ́ amānyā ɛ́gɛ́nɛ̄ n cokónu lɛ aá ā.

¹¹Ohígbū ka n jé ojuju nɛ̄ n lɛ lɛyíkwu aá ā. N lɛ ojuju ō yá kóō lɔhi lɛ aá. Ó wɛ ojuju ō yá aá obɔ̄bí ŋ́. Ojuju ō je eyīyōce kú ekɔ̄bū lɛ aá.

¹²Cɛ́ɛ́ aá géē hī um igwú, klla í wā í gbɔ̄ɔkɔ gā um. N kē í jāhɔ̄ lɛ aá.

¹³Eko nɛ̄ aá gbɔɔ́ ō gbā um ɛ̄gbā ŋmá odúúdú ɔtū kú aá.

¹⁴Aá géē má um. N géē je olɔhi kú aá cīgbīhi lɛ aá. N kē í kpo aá cīgbīhi ŋmá odúúdú aéwo nɛ̄ um cɛ̄ lɛ uwá kpó aá nyɔ̄ ā. N géē kpó aá cīgbīhi wā ɛga nɛ̄ n kpó aá ŋmá ā. Abɔ̄ Óndú ā ka lɛ á.”

¹⁵Aá gē ka ka amíyɔ̄ lɛ ācomɛ́ɛbɛ je lɛ aá ajɛ kú Ubábīlɔn ɛɛ́.

¹⁶Amáŋ, ɔdā nɛ̄ n gē ka lɛyíkwu ɔcɛ́, nōo ce ɔcɛ́ nɛ̄ Udéfīdi tɛtɛ lé ā mɛ́mla aɔ́máapú aá nēe hile bá Ujúda, nēé kpó aɔ́fiyɛ mɛ́mla aá ɛ́ɛ́ ŋ́ má yɔ̄ á.

¹⁷Ami Uyáwɛ nōo lɔfú fíyɛ́ dúú ā ka n géē tū ācɛ ɛhɔ̄ wā í kpɛ́fú tú uwā. Ɔkpɛtā mɛ́mla ōcē obɔ̄bí klla í ŋmó uwā. N géē je uwá yá bɔ̄bí bɛ̄ɛka īkpɔcí ufígi nōo kwú wā, nɛ̄ ɔ̄cɛ dúúmā í gáā lé glá ɛɛ́ gɛ ŋ́ mā.

¹⁸N géē bī ɛfú, ɔkpɛtā mɛ́mla ōcē obɔ̄bí le nū uwā inya, klla í je uwá pīya ɔdā nōo ī tū ódúúdú aéwo kú ɛcɛ ā ufi. Ācɛ kē í bī ɔdā nōo yá uwā ā le tokónu lɛ ācɛ ɛga dóódu nɛ̄ n géē nū uwā nyɔ̄ ā.

¹⁹Ó géē lɛ ā ohígbū ka uwá tá ō jāhɔ̄ lɛ ɛlā kú um nɛ̄ n tɛ̄hɔ̄ fu uwá igbalɛwa bū okónu kú aíkonó kú um, ācomɛ́ɛbɛ ā. Aá nēe wɛ aɔ́fiyɛ ajɛ aéwɔhá ícɛ nyā í kē jāhɔ̄ ŋ́ dúú.

²⁰Ohígbū ɔ́ɔmā, odúúdú aá nɛ̄ n yá nēé kpó aɔ́fiyɛ ŋmá Ujerúsālɛm ga ajɛ Ubábīlɔn ā, aá pó ɛlā nɛ̄ ami nōo wɛ Ɔwɔicō ā, gē ka ā.

²¹Ami Uyáwɛ, Ɔwɔicō nɛ̄ Ísrɛ̄lu gē gbɛ̄ɛ̄gbā ā nōo lɔfú fíyɛ́ dúú ā ka aá gbɛlá ka Áhāabu, ɔyí kú Ukoláya mɛ́mla Usedekíya, ɔyí kú Umaásēya ɛ́ɛ́ wɛ ācomɛ́ɛbɛ abɔ̄ é bá ī bī iyē um kɛ̄mgbɛ̄ lɛ aá ā. N géē kpó uwā tū Unebúkádinēsa, ɔcɛ́ kú Ubábīlɔn, abɔ̄. Ó kē í kpó uwā ŋmó ipééyī aá abɔ́ɔ.

²²Ɔdā nōo géē yá uwā ā géē je pīya ɔdā nɛ̄ odúúdú ācɛ Ujúda nēe bá Ubábīlɔn ā géē bī le tokónu lɛ ācɛ ka ‘Óndú ā kóō lɛ uwɔ yá bɛ̄ɛka Usedekíya mɛ́mla Áhāabu nɛ̄ ɔcɛ́ kú Ubábīlɔn je kpó pā ɔlá oyēeyī ā.’

²³Ó géē yá uwā lɛ ohígbū ka é lɛ ɔdōbɔ̄bí nɛ̄hi yá Ísrɛ̄lu. É gē cikpó anyā kú ɔ́mpa uwā, klla ī bī iyē kú um le kɛ̄mgbɛ̄. Ɔdā nɛ̄ ń da uwá ŋ́ mā nēé ī ka á. N jé ɔdā nēé ī yá ā, n kē í cījáalí tū uwá.”

²⁴Da Ussɛmáya, ɔ̄cɛ Unehɛ́lam ā kahíníī,

²⁵“Ami Uyáwɛ nōo lɔfú fíyɛ́ dúú ā, Ɔwɔicō nɛ̄ Ísrɛ̄lu gē gbɛ̄ɛ̄gbā ā ka a lɛ ɔkpá tá fu odúúdú ācɛ nēe bá Ujerúsālɛm ā, mɛ́mla Usefaníya, ɔyí kú Umaásēya, ɔ̄cogwɛ́ɛya ā, mɛ́mla odúúdú ācogwɛ́ɛya igbɔhá kpɔ́. Aá da Usefaníya ipú ɔkpá ā ka,

²⁶‘Ɔwɔicō lɛ uwɔ fu ɔ̄cogwɛ́ɛya kwɛyí Ujɛhóyāda, cɛ́ɛ́ kú ā leyīkwu Agblīihɔ-nɛ̄hi kú Óndú ā. Á cíkā ō kwú ojɛɛ́lɛ́ dúúmā, nōo ka anúɔ wɛ ɔ̄comɛ́ɛbɛ ā ú ce odó klla lɛ agbá kwu ɔɔ́ ɔkɔ.

²⁷Ó lɛ ā, ɔdíyá nɛ̄ á yá Ujeremíya, nōo ŋmá Ánatɔ̄ɔtu, yɔ̄ ī ka ɛbɛ tɛ́ɛcɛ, ka anúɔ wɛ ɔ̄comɛ́ɛbɛ ā italā ɛ́ ŋ́ mā?

²⁸Ujeremíya le ɔkpá tá fu alɔ Ubábīlɔn ka eko nɛ̄ alɔ géē bá aɔ́fiyɛ amānyā ɔ́ɔ géē gbojī kpɔ́ ɛɛ́. Ó da alɔ ka alɔ̄ gwó ɔlɛ́, ká ālɔ̄ lā anú. Ka ālɔ̄ klla hɛ́hɔ̄, ká ālɔ̄ lé īkpɔ̄dɛ̄hɔ̄ kú ɛhɔ̄ ā.”

²⁹Anɔ́ɔ Usefaníya, ɔ̄cogwɛ́ɛya ā lɛ ɔkpá nyā jé lɛ Ujeremíya, ɔ̄comɛ́ɛbɛ ā.

³⁰Anɔ́ɔ Óndú ā da Ujeremíya kahíníī,

³¹“Lɛ ɛhɔ̄ nyā tū gē lɛ odúúdú ācɛ nēe bá ī cɛ̄ ɔfiyɛ ajɛ éwɔhá ā lɛyíkwu Ussɛmáya, ɔ̄cɛ Unehɛ́lam ā. Da uwá ka nááná nɛ̄ ń tū Ussɛmáya ɛhɔ̄ ŋ́ mā, ɔ́ɔ lɛ ɛhɔ̄ cɛ̄ lɛ aá, nōo cɛ̄ lɛ aá lɛ ɔtūkpóce ɛ̄kɛ̄mgbɛ̄ ɛɛ́.

³²Ohígbū ɔ́ɔmā, ami nōo wɛ Ɔwɔicō ā ka n géē yá Ussɛmáya ɔ̄cɛ Unehɛ́lam mɛ́mla ugbɛ kú nū italā pííí. Ɔ̄cɛ dúúmā kú ipɔ́ɔma kú nū í gáā wi ŋ́. Anú abɔ̄yī nū í gáā yēeyī má ɔdā olɔhi dúúmā nɛ̄ n géē yá lɛ ācɛ ɔlɛ́ um ā ŋ́. Ó í lɛ ā ohígbū koó lɛ ɛlā ka lɛ aá kú aá kóō yá īkpɛ̄yí olɔfú tá um.”