Read idoma UJƐRƐMÍYA 30 Bible Online

UJƐRƐMÍYA 30 - idoma bible

UJƐRƐMÍYA 30

¹Óndú ā klla le ɛlā ka lɛ Ujeremíya ɛ̄cī ɔhá kpɔ́.

²Uyáwɛ, nōo wɛ Ɔwɔicō nɛ̄ Ísrɛ̄lu gē gbɛ̄ɛ̄gbā ā da ɔ́ kóō lɛ odúúdú ɛlā nɛ̄ anúɔ ka lɛ ɔ́ ā tá tū ɔkpá.

³Óndú ā klla ka eko gē wā nɛ̄ anúɔ géē kpɔ́ ācɛ ɔlɛ́ anúɔ, ācɛ kú Ísrɛ̄lu mɛ́mla ācɛ kú Ujúda cīgbīhi wā ɔlɛ́ ŋmá ajɛ kú éwɔhá nēé bá ā. Ó ka anúɔ klla í je ajɛ nɛ̄ anúɔ je lɛ aádáádā uwā ā, kwúce lɛ uwá.

⁴Ɔwɔicō kɛlā nyā lɛyíkwu ācɛ Ísrɛ̄lu mɛ́mla Ujúda.

⁵Ɔwɔicō kahíníī, “Alɔ pó abɔ̄ ācɛ bá yɔ̄ ī jikwū ā, ohígbū ka é bá ī yúufi nɛ̄hi. Ó wɛ ɔga kú ɛbɔ́ nēé bá ī tá ā ŋ́.

⁶Aá háyi ká aá gbɛlá ɛ́ɛ́. Ó tɔ́ɔtɛ́ kú ɔ̄cɛnyīlɔ kóō yá ɔma lɛ ɔyí ma bɛ̄ɛka ɔ̄cɛnyā ā glá āa? Ó lɛ ā, ɔdíyá nɛ̄ n gē má odúúdú ācɛnyīlɔ le abɔ̄ kwú ipú bī, le kɔ́ kɛnɛbɛɛ bɛ̄ɛka ɔnyā nɛ̄ ɔma lɛ ɔ́ kwú ā mɛ́ɛ̄? Ɔdíyá nɛ̄ ikpēyī kú ɔnyɔɔnyɛ pīya ɔnɔwá gɔɔ āa?

⁷Ɛ̄cī ōbɔ̄bí nɛ̄hi nɛ̄ ó wɛ á. Ɛ̄cī ɛ́gɔ́ɔmā í yɔ̄ jééjē ɛ́ɛ́ ŋ́. Ó géē wɛ eko kú unwalu lɛ ācɛ Ísrɛ̄lu nēe wɛ ayáayí kú Ujékɔ̄pu ā, amáŋ é géē nyá uwá tá ŋmá ipú unwalu ā.

⁸Ami, Ɔwɔicō nōo lɔfú fíyɛ́ dúú ā ka eko nɛ̄ ɛ̄cī ɔ́ɔmā gā, n géē hɛ́ uwā tá ŋmá abɔ̄ kú ācɛ nēe lɛ íkwu ikpɛ̄yí kú uwā, ɛ́gɛ́nɛ̄ é gē hɛ́ úkplākā nēé ī le cíla ɛna ɔkɔ kóō hɛ́hɔ̄ ā. É klla gáā wɛ ɔfiyɛ kú aéwɔhá ɛ́ɛ́ gɛ ŋ́.”

⁹Óndú ā klla ka ka ikɔkɔ ɔ́ɔmā, é géē gbā Uyáwɛ, nōo wɛ Ɔwɔicō kú uwā ā, ɛ̄gbā. Ɛ́ɛ klla í gbā ɔ̄cɛ éyi nɛ̄ anúɔ géē je ŋmá ipɔ́ɔma kú Udéfīdi kóō wɛ ɔcɛ́ kú uwā ā.

¹⁰ Óndú ā klla da uwá kpɔ́ kahíníī, “Ohígbū ɔ́ɔmā, aá yúúfi ŋ́, ācɛ Ísrɛ̄lu, aá nēe wɛ ayááyí kú Ujékɔ̄pu, nōo wɛ ɔ̄cocɛ̄hɔ̄ kú um ā. Ɔtū kú aá kóō hɛ́ aá ko ŋ́. N géē hɛ́ aá tá ŋmá ajɛ ɛga oligbó ā. N kē í hɛ́ ayí aá tá ŋmá ɛga nēe bá gē cɛ̄ ɔfiyɛ ā. Aá nēe wɛ ayááyí kú Ujékɔ̄bu ā géē kwúcē wā ɔlɛ́ aá gaá lā ɛbɔ́. Ɔ̄cɛ dúúmā í klla gáā tū aá ufi ɛ́ɛ́ gɛ ŋ́.”

¹¹Óndú ā klla kahíníī, “Ɛ́gɛ́nɛ̄ aá jé lɛ ā, n kē yɔ̄ mla aá. N géē wā ɛgiyí aá í nya aá tá. N géē yá italā, amáŋ ó gáā lɔfú nɛ̄hi ŋ́. N géē kpó aéwo nɛ̄ n pa aá hīla bá ipú uwā ā yíífi ŋmá ajɛ. Amáŋ ń gáā kpó aá yíífí dúúdú ŋ́.

¹²Ɔwɔicō kahíníī, “Ágbe kú aá ā í tōō tá ɛ́ɛ́ gɛ ŋ́. Ágbe ā í kē gáā jé glá ɛ́ɛ́ gɛ ŋ́.

¹³É lɛ ɛlā kpó ce aá, ɔcɛ dúúmā í yɔ̄ nōo í kɔɔkɔ lɛ aá ɛ́ɛ́ gɛ ŋ́. Ágbe kú aá í kē lɛ ɛcí ŋ́. Ɔ̄cɛ nōo í nya aá tá dúúmā í kē yɔ̄ ŋ́.

¹⁴Ódúúdú ācɛ nēe ī cɛ̄pɔ̄ aá nyɛ̄ɛ̄ hɛ̄ aá tá ɛɛ́. É kē lɛ ɛlá wu aá gɛ ŋ́. Ami ā kē le ɔfú kpó kwu aá ɛ́gɛ́nɛ̄ olɛlā gē kpɔ́fú kwu olɛlā kú nū nōó gē méyīnyinyi nū ŋ́ mā. Italā nɛ̄ n yá ā nwunē nɛ̄hi, ohígbū ka ɛpɔ̄bí nɛ̄ aá lé ā nwuné. Ɔ́bíipú nɛ̄ aá bī ā klla kē nwuné nɛ̄hi.

¹⁵Aá kóō ka ífulá kú ágbe nōo yá aá ŋ́. Ágbe ā í tōō tá kóō kwú jé ŋ́. N yá aá italā ɛ́gɛ́nyā ohígbū ka ɛ́pɔ̄bī nɛ̄ aá lé ā nwuné nɛ̄hi. Ɔ́bíipú nɛ̄ aá bī ā klla kē nwuné nɛ̄hi.

¹⁶Amáŋ n̄ yá aá kú aá lɛ jé koó wɛ opiíí ka odúúdú ācɛ nēe kpó aá yíífi ā, é géē kpó uwā yíífi dúú. É géē kpó odúúdú aólɛlā kú aá kwú ŋmá ɔlɛ́ uwā bɛ̄ɛka aɔ́fiyɛ ga ajɛ aéwɔhá. É kē í yá ācɛ nēe yá aá ōwē ā, ōwē piíí. É kē í wu ɔlɛ́ kú odúúdú ācɛ nēe kpó ɔlɛ́ kú aá wu ā piíí.

¹⁷Aólɛlā kú aá gē kɛlā lɛyíkwu ɔlɛ́ aá Ujerúsālɛm kahíníī, ‘Usáyɔn lɛbɛ̄ɛka ɔ̄cɛ nɛ̄ ācɛ gē tá tónū ā. Ó lɛbɛ̄ɛka ɔ̄cɛ nɛ̄ ɔ̄cɛ dóódu í kōō lɛ ɛlā wu ɔ́ ŋ́ mā.’ Amáŋ n géē yá cɛ́ɛ́ kú iyē kóō lé lɔhi lɛ aá ɛ́gɛ́nɛ̄ aá tɛtɛ lɛ aā. N kē í cɛ̄ lɛ ágbe kú aá kóō kwú jé.’”

¹⁸Ɔwɔicō klla kahíníī, “Aá má ɔ̄, n géē mēnyinyi aá, í cɛ̄ lɛ aá nēe wɛ ācɛ Ísrɛ̄lu, ayááyí Ujékɔ̄pu ā, cīgbīhi wā ɔlɛ́ aá kpɔ́ ɛ́ɛ́. Ujerúsālɛm nōo tá alácɛ̄ nyā, aá géē tá ɔ̄ gwó igbɔhá klla í gwó agbla kú ɔcɛ́ ā ɛ̄yīpɛ̄ kpɔ́.

¹⁹Ācɛ nēe lā Ujerúsālɛm ā géē gwíijē tá um ahínyá. É klla í gwéeyē bá géē yɔ̄ ī tɔ́ɔga. N géē cɛ̄ lɛ uwá ma ayí alɛwa cɛ́ɛ́ kéē nyīla. É gáā le kɛ́tɛ̄kɛtɛ̄ ɛ́ɛ́ gɛ ŋ́. N géē yá kú ācɛ ɔhá kéē lɛ ojīlīmā ce uwá.”

²⁰Óndú ā klla kɛlā gɔbū kpɔ́ ka, “N géē yá kú ayí aá kóō bá ahɔ̄ olɔhi nɛ̄ aá tɛtɛ yɔ̄ íkée ā kpɔ́. N klla géē jē uwá pīya éwo kpɔ́cíí. N kē í yá ɔ̄cɛ dúúmā nōo í pīya uwá tū ā italā.

²¹Ɔ̄cɛ éyi kú ācɛ ɔlɛ́ uwā piíí géē wɛ ɔcɛ́ kú uwā á. Ɔ̄cɛ ɔlɛ́ uwā piíí kē í gbō uwā á. Ɔcɛ́ ɔ́ɔmā kē í túblá um ajaajɛ eko dúúmā nɛ̄ n lɛ ɔ́ hīgwú wā ɛga o gbā um ɛ̄gbā. Aá kē jé ka ɔ̄cɛ dúúmā nɛ̄ n hī ɔ̄ igwú ŋ́, í jámá túblá um abɔ́ɔ glá ŋ́.

²²Aá géē wɛ ācɛ ɔlɛ́ um, n kē í wɛ Ɔwɔicō kú aá.”

²³Aá má ɔ̄, ícɔ̄nū kú Ɔwɔicō ā lɛbɛ̄ɛka owu nɛ̄hi nōo gē tá ā. Ó géē wā kwūūū wā í ca klá ācobɔ́biipú ā ɛyí.

²⁴Ɔnū nɛ̄hi nɛ̄ Ɔwɔicō cɛ̄ ā í gáā mɛ ŋ́ jāā gbéeko nōó lɛ ɔdā nōó bī ɔtū ā yá ācobɔ̄bíipú ā gaajɛ. Aá nēe wɛ ācɛ ɔlɛ́ nū ā géē jɛ́yí ɔdā nyā igbīhāajɛ.