Read idoma UJƐRƐMÍYA 31 Bible Online

UJƐRƐMÍYA 31 - idoma bible

UJƐRƐMÍYA 31

¹Ɔwɔicō klla ka gɔbū kpɔ́ kahíníī, “Eko gē wā nɛ̄ n géē wɛ Ɔwɔicō kú odúúdú aípɔ́ɔma kú Ísrɛ̄lu, uwá kē í wɛ ācɛ ɔlɛ́ um”

²Ɔwɔicō klla kahíníī, “N ményinyi ācɛ nēé kwú ipú ígbíli ŋ́, eko nɛ̄ ācɛ Ísrɛ̄lu bá ī tíne ɛga nēé ī lā ɛbɔ́ ā.

³Ami nōo wɛ Ɔwɔicō ā lɛ īyī um mafú lɛ uwā íkée gaá da uwā kahíníī, “Aá he um ɔtū piyóó. Ohígbū ɔ́ɔmā nɛ̄ n húmáyī ma ihɔtū fú lɛ aá eko dóódu á.

⁴N géē tū aá nēe wɛ ācɛ Ísrɛ̄lu hayi kpɔ́ ɛ́ɛ́. Aá géē kpó aɔ́dā ō bī jīījē ká aá cɛ́ɛ́ ká aá jīījē mla éeyē.

⁵Aá géē hɛ́hɔ̄ kú ɔcí ufáyin tá ɛyí aɛ́fu kú Usamérīya kpɔ́ ɛ́ɛ́. Aɔ́glɛ́ɛjí nēe nyi īkpō ufáyin tū aɛ́hɔ̄ ā kē í wɛ ācɛ nēe ī lé īkpɔ̄cí ā á.

⁶Ɛ̄cī éyi géē wā nɛ̄ ācogbāājɛ ā géē tɔ́ɔna ɛyí aɛ́fu kú Éfrem kahíníī, “Aá wā ká ālɔ̄ ga Usáyɔn, gaá gbā Uyáwɛ, nōo wɛ Ɔwɔicō kú alɔ ā ɛ̄gbā.’”

⁷Ɔwɔicō klla kahíníī, “Aá gwííjē ká aá gwéeyē lɛ Ujékɔ̄bu. Aá tɔ́ɔga lɛ Ísrɛ̄lu nōo jājīmā fíyɛ́ éwo dóódu ā. Aá cɛ̄trā Óndú ā, ká aá je ɔkɔ gicō cɛ̄tra anú ka, ‘Ɔwɔicō le ācɛ ɔlɛ́ nū ohile ā hɛ́tá!’

⁸Óndú, kahíníī, “Aá má ɔ̄, ami nōo wɛ Uyáwɛ ā géē bī uwā wā ŋmá ajɛ kú ɛhícō, klla í tū uwā bá ŋmá ɛga dóódu kú ipú ɛcɛ. Kwu aópeyī, aócīkpó, anyā oyīipú, mɛ́mla anyā nɛ̄ ɔmā lɛ uwá kwú géē bá ipú uwā dúú. Álūka kú uwā nēe géē kwúcē wā í wɛ ɛwa nɛ̄hi kú éwo.

⁹Abɔ̄ é géē bá ī wā ā, é géē bá i jikwū klla bá ī gbɔ̄ɔkɔ. N kē í tú uwā ɔtū lé abɔ̄ n géē yɔ̄ ī bī uwā kwúcē ā. N géē bī uwā jé ɔwɛ ga aɔ́kpá nēé ī gwá éŋkpɔ̄, bū ɛga nōo i mɛ̄ɛ̄lɛ́ nēé gáā lɛ ikpó gbo ajɛ ŋ́. Aá kē jé ka n lɛbɛ̄ɛka ádā kú Ísrɛ̄lu ā. Ɛ́frem wɛ ɔ́kplá kú um á.”

¹⁰Óndú ā kahíníī, “Aéwo, aá jāhɔ̄ ká aá pó ɛlā kú um, cɛ́ɛ́ ká aá bī ɛlā ā tɔ́ɔna ga ogbeé kú ísu ā. ‘Ami nōo je ācɛ ɔlɛ́ um Ísrɛ̄lu fíyákátā ā, géē tú uwā bá. N géē gbō uwā bɛ̄ɛka ɛ́gɛ́nɛ̄ ɔ̄cogbāálá gē gbō aálá kú nū ā.

¹¹Ohígbū ka Óndú ā géē fula ācɛ Ísrɛ̄lu, nēe wɛ ayááyí kú Ujékɔ̄pu ā. N klla í hɛ́ uwā tá ŋmá abɔ̄ kú aólɛlā, nēe lɔfú fíyɛ́ uwā abɔ̄ ā.

¹²É géē wā í gwéeyē klla í gwííjē gbōmgbōm ɛyí ɛfu kú Usáyɔn. Ɔtū kē í he uwā ohígbū ɔdōōlɔhi nɛ̄ um géē yá lɛ uwá ā. É géē gwéeyē lɛyīkwu īkpɔ́dɛ̄hɔ̄, mɛ́mla ejé mɛ́mla anɔ̄, mɛ́mla ayí aálá, aɛ́wū mɛ́mla aɛ́na. Ó géē lɔhi lɛ uwá oyēeyī kú uwā lɛbɛ̄ɛka ɛhɔ̄ nēé gē kpó éŋkpɔ̄ tū ɔ̄ eko dóódu ā.

¹³Ayípɔ̄nɔ̄nyā mɛ́mla ayípōklóbīya mɛ́mla anyākwɔ́cɛ géē gwéeyē, klla í jījē. N géē tú uwā ɔtū lé, klla í je ɔtūnōbí kú uwā pīya éeyē. N géē yá nɛ̄ ɔtū í he uwá.

¹⁴N géē yá nɛ̄ ācogwɛ́ɛya ā géē bá ī lé ɔdōlé nēe lɔhi fíyɛ́ dúú ā cabácabá. N kē í je ɔdōlɔhi nɛ̄ ācɛ ɔlɛ́ um cɛgbá ā le uwá jɛ̄ uwā.”

¹⁵Ɔwɔicō klla kahíníī, “É pó ɔkɔ éyi Uráma, yɔ̄ ī yá aidɔ klla yɔ̄ ī tɛ̄gíkwū nɛ̄hi. Urécɛ̄lu yɔ̄ ī jikwū ayí nū á. Ó tá kéē tá ɔ̄ ɔtū lé, ohígbū ka ayípɛ̄ ɔlɛ́ nū le pɛ́ gekwú.

¹⁶Óndú ā da ɔ́ kahíníī, “Mā ikwū ō je, ká ā lɛ agíje nya ŋmá eyī mɛ́ɛnɛ. Ohígbū ka ami nōo wɛ Óndú ā ka a géē mīyɛ ulé úklɔ́ nɛ̄ a yá ohígbū ayípɛ̄ ɔlɛ́ uwɔ ā. Ayípɛ̄ ɔlɛ́ uwɔ kē í pɛ́ kwúcē wā ɔlɛ́ ŋmá ajɛ ɔlɛ́ aólɛlā kú uwā ā.

¹⁷Abɔ̄ é géē kwúcē wā ajɛ ɔlɛ́ uwā ā, ami nōo wɛ Ɔwɔicō ā ka, a lɛ eyīyōce kú ɛcɔ̄bū kpɔ́ ɛ́ɛ́.

¹⁸N pó abɔ̄ ācɛ Ísrɛ̄lu bá ī jikwū gē ka kahíníī, ‘Óndú, alɔ lɛbɛ̄ɛka ɔyí ɛna nɛ̄ é nwū ɔ̄ ɛyí ō táajɛ ŋ́ mā. Amáŋ a kē lɛ ɛlā nwū alɔ nɛ̄ alɔ le jé ɛɛ́. Lɛ alɔ kpó kwúcē wā ɔlɛ́ mɛ́ɛnɛ. Alɔ le tútū ō wā í gbā awɔ nōo wɛ Ɔwɔicō kú alɔ ā ɛ̄gbā ɛɛ́.

¹⁹A kē jé ka eko nɛ̄ alɔ nyɛ̄ɛ̄ hɛ̄ uwɔ tá ā, igbīhāajɛ alɔ kē le pīyabɔ̄ tíne ō kwúcē wā. Abɔ̄ ā lɛ ɛlā nwū alɔ nɛ̄ alɔ le ɔdōbɔ̄bí nɛ̄ alɔ yá eko nɛ̄ alɔ wɛ ayípɛ̄ ā jé ā, uwēyī lɛ alɔ kwú nɛ̄hi. Anɔ́ɔ alɔ lɛ abɔ̄ kpó klá eyī, le ɛyí kpó kwaajɛ á.

²⁰Ācɛ Ísrɛ̄lu, aá wɛ ayí um okpóocu. Aá kē he um ɔtū nɛ̄hi. Nááná nɛ̄ n gē fu aá ɔnū ā, abɔ̄ aá ī kwú um kpɔ́. N kē ī tíne kú aá bá pi um. Ami nōo wɛ Ɔwɔicō ā géē ményinyi aá.

²¹Aá lɛ aɔ́dā ō cābɔ̄ ɛga nɛ̄ ɔwɛ yɛ nyɔ̄ kpó kwaajɛ ɔwɛ. Cɛ́ɛ́ kóō cābɔ̄ ɔwɛ lɛ aá. Aá tíne ɔwɛ nɛ̄ aá yɛ nyɔ̄ ā. Aá kwúcē bū ɔwɛ ɔ́ɔmā piíí wā, ācɛ Ísrɛ̄lu. Aá lɛ bɛ̄ɛka ayípɔ̄nɔ̄nyā nɛ̄ ó jé ɔ̄cɛnyīlɔ jééjē ɛ́ɛ́ ŋ́ mā tū ɔ̄cɛ nōo gáā lɛ ɔ́ ā. Aá kwúcē wā aígelī nɛ̄ aá nyɛ̄ɛ̄ ŋmá anú ā.

²²Ācɛ ɔlɛ́ um, eko nyā nɛ̄ aá í bá ī ga amu ga ánú gaá kwu ā? Aá gáā hayi kpaakpa ŋ́ nɛɛ? Aá kóō le jé ka n géē yá ka ɔdā ɛyípɛ̄ kóō le yá ipú ɛcɛ. Ó géē lɛbɛ̄ɛka ɔdā nɛ̄ ɔ̄cɛnyā yɔ̄ ī gbō ɔ̄cɛnyīlɔ ɛyí ā.”

²³Uyáwɛ, nōo lɔfú fíyɛ́ dúú ā, nōo wɛ Ɔwɔicō nɛ̄ Ísrɛ̄lu ī gbɛ̄ɛ̄gbā ā kahíníī, “Eko nɛ̄ n lɛ ācɛ ā kpó cīgbīhi wā ipú ajɛ kú uwā, é géē ka igbɔhá kpɔ́ ipú ajɛ kú Ujúda mɛ́mla aígelī kú nū ā kahíníī, ‘Óndú ā kóō hɔ́hā ce ɛyí ɛfu otīhɔ kú Ujerúsālɛm mɛ́mla ɛga otīhɔ, nōó lā ā.’

²⁴Ācɛ í lā Ujúda mɛ́mla odúúdú aígelī nɛ̄hi kú nū ā. Āɔ́glɛɛjí mɛ́mla ācogbāálá mɛ́mla álá kú uwá í bá abɔ́ɔ dúú.

²⁵N géē lɔfú tū ācɛ dóódu nɛ̄ ɛ̄jɛ̄ jɛ́ uwā ā iyē, klla í je ɔdōlé lɛ ācɛ dóódu nɛ̄ ɛmiyɛ gē ŋmó uwā ā.

²⁶Cɛ́ɛ́, ācɛ géē bá ī kahíníī, ‘N le iyɔ̄lā gbō le héyī, iyɔ̄lā kē lɛ um ɔnyɛ nɛ̄hi.’

²⁷‘Ami nōo wɛ Óndú ā ka eko géē wā nɛ̄ n géē yá kú ācɛ mɛ́mla aɛ́bɛ́ kéē le nyīla tū ajɛ kú Ísrɛ̄lu mɛ́mla ajɛ kú Ujúda.

²⁸Ɛ́gɛ́nɛ̄ n héyītū uwā jāā gbéeko nɛ̄ n lɛ uwá ɔkwu fu ŋmá ajɛ, lɛ uwá wúlātāajɛ, lɛ uwá bī wāajɛ, klla kpó uwā yíífi tɛtɛ ā, ɔwɛ ɛ́gɔ́ɔmā nɛ̄ n géē lɛ ɛlā kwú uwá dúú, cɛ́ɛ́ ká n̄ lɛ uwá būtū, ká n̄ klla lɛ uwá tūgwó.

²⁹Eko nɛ̄ eko ɔ́ɔmā gā, ācɛ í klla gáā kwu ita ka, ‘Aádā mɛ́mla aɛ́nɛ́ lé aíkpɔ̄cí kú ufáyin omákáká á, amáŋ ayīnu kú ayí uwā kwú ijile ɛ́ɛ́ gɛ ŋ́.’

³⁰Amáŋ ɔ̄cɛ dúúmā nōo lɛ ikpɔ̄cí ufáyin omákáká lé, anú nɛ̄ ayīnu kú nū gáā kwíijile á. Ɛyí nū lé ka ɔ̄cɛ dóódu í kwú ohígbū ínōbīya kú abɔ̄yī nū.

³¹ Óndú ā kahíníī, “Eko gē wā nɛ̄ n géē gbo ɛka ɛ̄yīpɛ̄ mla ācɛ Ísrɛ̄lu mɛ́mla ācɛ Ujúda

³²Ó gáā lɛbɛ̄ɛka ɛka nɛ̄ n gbo íkée mla aádáádā uwā, eko nɛ̄ n lɛ abɔ̄ tū uwā abɔ̄ bɛ̄cɛ ŋmá Íjīpiti ā ŋ́. Náāná nɛ̄ n lɛbɛ̄ɛka ɔbá uwā ā, é kē le ɛka ɔ́ɔmā tá nyílá.

³³Ɛka ɛ̄yīpɛ̄ nɛ̄ n gáā gbo mla ācɛ Ísrɛ̄lu ā yɔ̄ á. N géē je íne kú um tá ipú ɔtū kú uwā, klla í tá ɔ tū uwā ipú odo. N géē wɛ Ɔwɔicō kú uwā, é kē í wɛ ācɛ ɔlɛ́ um.

³⁴Ɔ̄cɛ dúúmā kú uwā í klla gáā nwū ɔ́mpānū kú ɔ́ɔ jé ami nōo wɛ Ɔwɔicō ā ɛ́ɛ́ gɛ ŋ́. Ohígbū ka odúúdú uwā, kwu aóflaajɛ kwu ācɛnɛ̄hi, géē jé um. N géē je ɔ́bíipú nēé bī ā yá uwā ɛhi. Ń klla gáā blakwu ɔdōbɔ̄bí nēé yá ā ɛ́ɛ́ gɛ ŋ́.”

³⁵Óndú ā lɛ ɛnɔ kwú icō kóō fíyaajɛ eyī ōnyā á. Anú klla fu ɔyā mɛ́mla aínyílɔ́wɔ kéē fíyaajɛ otú á. Anú gē tú ísu úgbagwú nōó ī cūwūu wūūū á. Iyē kú nū lé ka Uyáwɛ, nōo lɔfú fíyɛ́ dúú ā.

³⁶Ó cokónu kahíníī, “Ɛ́gɛ́nɛ̄ aɔ́dā nēe bá nyā géē yɔ̄ ī yá piyóó ipéyī um ā, ɛ́gɔ́ɔmā nɛ̄ éwo kú Ísrɛ̄lu géē yɔ̄ lɛ ā dúú á.

³⁷Ɛ́gɛ́nɛ̄ ɔ̄cɛ í miya ɔwá kú ɔkpáncō glá ŋ́, ɛ́ɛ́ nōó í bū ɔ̄gɔ̄ nyɔ̄ í jīla etikpa kú ɛcɛ glá ŋ́ mā, ɛ́gɔ́ɔmā nɛ̄ ami nōo wɛ Ɔwɔicō ā í gáā tá ācɛ Ísrɛ̄lu ŋ́ má, nááná nēé le ɔdōbɔ̄bí nɛ̄hi yá ā.

³⁸Ɔwɔicō kahíníī, “Eko gē wā nēé géē tū Ujerúsālɛm gwó kóō le pīya igelī nɛ̄hi kú um. É géē gwó ɔ̄ ŋmá ɛgiyí inɔ̄ɔda nēé cē ī gbōajɛ kú Uhanánɛlu lɛyíkwu ɛnɔ̄ɔ̄nɛ̄ ga okómpinu kú ɔ́kíkā ā.

³⁹Ɛjī ā í gbɔɔ́ ŋmá abɔ́ɔ jāā ga ɛnɔ̄ɔ̄nɛ̄ ɛyí ɛfu kú Ugárēbu klla pīya kɛɛlɛ ga Ugówa.

⁴⁰Kwu odúúdú ɔpɛ́ nēé gē nyi okwū klla í kpó īmū tū ā, mɛ́mla odúúdú ajɛ nōo yɔ̄ ɛhícō kú ɔkpá kú Ukídrɔn ā jāā gáā kwu okómpinu kú ɔnya ā, nōo kwu ɛnɔ̄ɔ̄cī ā, géē wɛ ákú um abɔ̄yī um. É klla gáā wúla igelī á tāajɛ ɛ́ɛ́ nēé gē je ɔ́ yíífi igbɔhá gɛ ŋ́.”