Read idoma UJƐRƐMÍYA 32 Bible Online

UJƐRƐMÍYA 32 - idoma bible

UJƐRƐMÍYA 32

¹Eko éyi, Ɔwɔicō le ɛlā ka ga um. Eko ɔ́ɔmā wɛ iháyí ɔ́migwó nɛ̄ Usedekíya ce ɔcɛ́ kú Ujúda ā, anú kē wɛ iháyí ɔ́migwáahatá nɛ̄ Unebúkádinēsa ce ɔcɛ́ kú Ubábīlɔn dúú á.

²Eko ɔ́ɔmā, aícɔ́ɔja kú Ubábīlɔn bá ī kpɛ́fú ta Ujerúsālɛm, le íbɔm cē tū ɔ̄. É kē lɛ ɔwɛ gwū tū um ipú agblɔ̄cɛ́, ɛga nɛ̄ ācogbāājɛ gē bá ā.

³Usedekíya, ɔcɛ́ kú Ujúda kwú um tá agbá abɔ́ɔ. Ó kpó ɛlā ce um ka ɔdíyá nɛ̄ amíyɔ tɔ́ɔna ka Óndú ā ɔ́ɔ kahíníī, “N géē cɛ̄ lɛ ɔcɛ́ kú Ubábīlɔn miyɛ igelī nɛ̄hi nyā a.

⁴Usedekíya, ɔcɛ́ kú Ujúda í gáā kwu glá ŋ́. Ɔcɛ́ kú Ubábīlɔn géē kwú ɔ̄. Ó kē ī má ɔ̄ lɛ eyī kweyī mla anú, klla í kɛlā mɛ́mla anú.

⁵É géē je Usedekíya ga Ubábīlɔn. Ó kē í yɔ̄ abɔ́ɔ jāā gbéeko nɛ̄ n le yá mɛ mla anú. Ɔ́dāŋ́ kóó kpɛ́fú tá ācɛ Ubábīlɔn nááná, ó gáā yá uwá lé glá ŋ́.”

⁶Abɔ̄ n yɔ̄ abɔ́ɔ ā, Ɔwɔicō da um kahíníī,

⁷“Uhanámɛlu, ayínɛ̄ɛpa kú uwɔ, nōo wɛ ɔyí kú Ussálum, ɔmáapú ádā uwɔ ā, géē wā ɛgiyí uwɔ gáā da uwɔ ka ā lɛ ajɛ kú anúɔ nōo yɔ̄ Ánatɔ̄ɔtu ā lá. Ka abɔ̄ awɔ wɛ ɔmáapú anúɔ nōo kwu anúɔ ajaajɛ fíyɛ́ dúú á, ɔ́ɔ wɛ ukpɛ̄ kú uwɔ ka á lɛ ajɛ á lá.”

⁸Ɛ́gɛ́nɛ̄ Óndú ā da um lɛ ā ā, anɔ́ɔ Uhanámɛlu, ɔyínɛ̄ɛpa kú um, gā ɛgiyí um ka amíyɔ̄ gáā lɛ ajɛ ā lá ohígbū ka amíyɔ̄ lɛ íkwu ō lá ajɛ ā kwúcē á. Ɔ́ɔmā cɛ̄ ga um le jé ka Óndú ā kā n lɛ ajɛ ā lá ɔkwɛ̄yi.

⁹Anɔ́ɔ n lɛ ajɛ nyā lá ŋmá ɛgiyí Uhanámɛlu, ɔyínɛ̄ɛpa kú um ā á. Anɔ́ɔ n lɛ ije oje nɛ̄hɛ́ ofɛtá cigwó gbā lɛ ɔ́ á.

¹⁰N lɛ ɔkpá ajɛ ā tá, lɛ abɔ̄ tú ɔ̄ klla lɛ aíjáalí hī. Anɔ́ɔ n lɛ ije miya ɔdā nēé ī bī le miya anú ā kwú kpó lɛ Uhanámɛlu á.

¹¹Anɔ́ɔ n kwú ɔkpá kú ajɛ nyā ɛpa ā ú á, kwu ɛ̄nɛ̄ é tá ɛ́gɛ́nɛ̄ é je ajɛ ā lá lɛ ā tū ɔ̄, lɛ abɔ̄ tá ɔ̄ lɛ ɔ́ gwu mla ɔja ā, mɛ́mla ɛ̄nɛ̄ é gwu mla ɔja ŋ́ mā.

¹²Anɔ́ɔ n kwú ɛplɛ̄ɛ̄pa kú ɔkpá nyā ú lɛ Ubárūku, ɔyí kú Uneríya, ɔyí kú Umaséya ipéyī ɔyínɛ̄ɛpa kú um, Uhanámɛlu, mɛ́mla ipééyī kú aíjáalí nēe lɛ abɔ̄ tū ɔkpá ā, mɛ́mla odúúdú ācɛ Ujíyu nēé cīce inu nɛ̄ ācogbāajɛ gē bá ipú agblɔ̄cɛ́ ā mɛ́mla alɔ ā.

¹³Ipééyī uwá abɔ́ɔ, n jé ɔ́da nyā lɛ Ubárūku.

¹⁴N da ɔ́ kahíníī, “Uyáwɛ nōo lɔfú fíyɛ́ dúú ā, nōo wɛ Ɔwɔicō nɛ̄ Ísrɛ̄lu gē gbɛ̄ɛ̄gbā ā ka ā kwú ɛplɛ̄ɛ̄pa kú ɔkpá kú ajɛ nēe bá nyā í kpó, kwu ɛ̄nɛ̄ é gwū mla ɔja ā mɛ́mla ɛ̄nɛ̄ é gwū ŋ́ mā. Cɛ́ɛ́ kú ā kwú uwā í kpó tū ipú ɔjá kú ɔmɛ, kéē géē bá gbojī.

¹⁵Uyáwɛ, nōo lɔfú fíyɛ́ dúú ā, nōo wɛ Ɔwɔicō nɛ̄ Ísrɛ̄lu ī gbɛ̄ɛ̄gbā ā ka aá le jé ka ācɛ klla géē lá aɔ́lɛ́, mɛ́mla aájɛ mɛ́mla aɛ́hɔ̄ ɔcí ufáyin ipú ajɛ Ujúda nyā igbɔhá kpɔ́ ɛɛ́.”

¹⁶Igbīhi nɛ̄ n kwú ɔkpá kú ajɛ nyā í kpó lɛ Ubárūku, ɔyí kú Unérīya ā, n le ɔkɔ gbā lɛ Ɔwɔicō kahíníī,

¹⁷“Woó, Uyáwɛ, awɔ nōo wɛ Ɔwɔicō ā! Awɔ bī ɔfú nɛ̄hi mɛ́mla ɔfúiyē kú uwɔ yá ɛcɛ mɛ́mla ɔkpáncō á. Ɔdā dúúmā í lɔnɔ tū uwɔ ō yá ŋ́.

¹⁸A gē yíihɔtū ācɛ eko dóodu ga ayááyí uwā ɔ́muúlúúlā, amáŋ a cɛ̄ lɛ ayí gē móōwē ohígbū ɔ́bíipú nɛ̄ aádā mɛ́mla aɛ́nɛ́ uwā bī ā. Awɔ wɛ Ɔwɔicō nōo gbɛ klla lɔfú nɛ̄hi á. Iyē uwɔ kē le ka Ɔwɔicō nōo lɔfú fíyɛ́ dúú ā.

¹⁹A gē bī íjéeyī nɛ̄hi le yá ojuju, a klla ī yá ɔdā nɛ̄hi. A gē má ɔdā dóódu nɛ̄ ācɛ gē yá ā, a kē ī cílá ācɛ ulé, ɛ́gɛ́nɛ̄ ɔdā nēé yá ā lɛ ā ā.

²⁰A yúklɔ́ idáagó mɛ́mla ɔdōōcābɔ̄ alɛwa nɛ̄hi Íjīpiti īkée. A kē yɔ̄ í yá lɛ ā Ísrɛ̄lu mɛ́mla odúudu ɛcɛ ícɛ kpɔ́. Ohígbū ɔ́ɔmā ācɛ lɛ uwɔ jé lɔɔlɔhí ɛga dóódu.

²¹A bī ɔfú nɛ̄hi kú uwɔ le yá aúklɔ́ idáagó mɛ́mla aɔ́dōōcābɔ̄ alɛwa nōo tū ācɛ Íjīpiti ufi, anɔ́ɔ a lɛ ācɛ ɔlɛ uwɔ kpó wɛ̄ɛcɛ ŋmá ajɛ Íjīpiti á.

²²Anɔ́ɔ a kwú ajɛ nōo lɔhi lɛ ɔdāajɛ mɛ́mla ɔdɛ̄hɔ̄ nyā nɛ̄ a cokónū nū lɛ aádáádā uwá ā ú lɛ uwá.

²³É gā ipú ajɛ ā gáā mīyɛ ajɛ ā, amáŋ é lɛyítáajɛ lɛ ɛlā nɛ̄ a ka ā, ámāŋ́ é bī íne nɛ̄ a tū ā yúklɔ ŋ́. É yá ɔdā nɛ̄ a da uwá kéē yá ā ŋ́. Ohígbū ɔ́ɔmā a cɛ̄ lɛ odúúdú ámíyā nyā le yá uwā.

²⁴Mɔ́ɔ̄, ācɛ Ubábīlɔn lɛ íbɔm cē tū Ujerúsālɛm, lɛ imu tīkwū klá ɔdɔ kú igá kú igelī ā, kéē gaá mīyɛ ɔ́ tū abɔ̄. É bá ī kpɛ́fú tú alɔ, ɔkpɛtā yɔ̄ ī ŋmó alɔ, ōcē obɔ̄bí kē yɔ̄ ī yá alɔ. A kē má ɔ̄ ka ohígbū ɔdā nēe bá ā, é kē í yá igelī nyā lé ɛ́gɛ́nɛ̄ a ka ā.

²⁵Náaná nɛ̄ a jé ku ācɛ Ubábīlɔn géē mīyɛ igelī nyā ā, Óndú le ka ga um, awɔ nōo wɛ Ɔwɔicō ā, piií kē da um ka amíyɔ̄ bī ije lɛ ajɛ ā lá, klla lɛ aíjáalí hī.

²⁶Anɔ́ɔ Ɔwɔicō da ami nōo wɛ Ujeremíya ā kahíníī.

²⁷“Ami wɛ Uyáwɛ, nōo wɛ Ɔwɔicō kú odúúdú ācɛ kú ipú ɛcɛ á. Ɔdā dúúmā í lɔnɔ tū um ō yá ŋ́.

²⁸Ó wɛ ɔkwɛ̄yi ka ami nōo wɛ Ɔwɔicō ā kē í je igelī nyā lɛ Unebúkádinēsa, ɔcɛ́ kú Ubábīlɔn mɛ́mla ācɛ ɔlɛ́ nū. É kē í mīyɛ ɔ̄ tū abɔ̄.

²⁹Ācɛ Ubábīlɔn nēe bá ī kpɛ́fú tú igelī nyā ā géē je ɔ́ tɔ̄ɔlá. É géē je yi ɔ́ ɔlá tāajɛ mɛ́mla odúúdú aínu nɛ̄ ācɛ ā gē yá um ícɔ̄nū ɛyí uwā ŋmá lɛ ɔtulali nēé ī yɔɔlá lɛ Ubáalu, klla ī lɛ ejé fu ajɛ lɛ aɛ́cí kú aáwɔhá ā.

³⁰Ɔdā ōfōōfūnū nɛ̄ ācɛ Ísrɛ̄lu mɛ́mla ācɛ Ujúda ī yá īpéeyī um ŋmífī nēé gbɔɔ́ ŋmá ajɛ ā wɛ ɔdōbɔ̄bí nɛ̄. É gē yá um cɔ̄nū piyóó mla ɔdā nēé bī abɔ̄ kú uwá yá ā.

³¹Ŋmífī nēé gwó igelī nyā jāā gáā kwu ícɛ ā, é húmáyī yá um cɔ̄nū nɛ̄ɛ̄nɛ̄hi piyóó. Ohígbū ɔ́ɔmā n géē je ɔ́ yíífi ŋmá ipéyī um.

³²Odúúdú ācɛ Ujúda mɛ́mla ācɛ Ísrɛ̄lu, kwu aɔ́cɛ́ mɛ́mla aótrɛ̄yí kú uwā, kwu ācogwɛ́ɛya mɛ́mla ācomɛ́ɛbɛ,mɛ́mla ācɛ nēé lā Ujerúsālɛm ā, húmáyī yá um ɛlā ícɔ́nū ohígbū odúúdú ɔdōbɔ̄bí nēé húmáyī yá ā.

³³É kwú igbīhi í cē kwu um. Nááná n húmáyī nwú uwá klla nwū uwá ā, é tá ō jāhɔ̄ ɛɛ́ nēé gē pó ɛlā nɛ̄ n gē nwū uwā ā ŋ́.

³⁴É kōō kwu aɛ́cí elihɔ kú uwá ɔ́ɔmā í kpó ce ipú Agblīihɔ-nɛ̄hi kú abɔ̄yī uwā, kē lɛ ɔ́ nyílá ɛɛ́.

³⁵É lɛ aíkpɛ́cí gwó lɛ Ubáalu, ɔpɛ́ kú Uhínɔm, cɛ́ɛ́ kéē kpó ayí uwā nɔ̄nyīlɔ gwɛ́ɛya lɛ Umólɛ̄ki. N da uwá kéē yá lɛ ā ŋ́, ɛ́ɛ́ nɛ̄ n kōō gē gbɛlá nū, ka é í yá ɔdōbɔ̄bí nɛ̄hi mɛ́mla ucē ɛbí ɔ́ɔmā ŋ́. Ɔ́ɔmā cɛ̄ lɛ ācɛ Ujúda lɛ ɛpɔ̄bí nɛ̄hi lé.

³⁶Anɔ́ɔ Ɔwɔicō da um kahíníī, “A yɔ̄ í ka lɛyíkwu igelī nyā ka ɔcɛ́ kú Ubábīlɔn ɔ́ɔ géē kpɛ́fú tú ɔ́, í yá ɔ́ lé ohígbū ɔkpɛtā nōo yɔ̄ ī ŋmó ācɛ ā mɛ́mla ōcē obɔ̄bí nōo yɔ̄ ī yá uwā ā. Amáŋ ɔdā nɛ̄ ami nōo wɛ Uyáwɛ, Ɔwɔicō nɛ̄ Ísrɛ̄lu gē gbɛ̄ɛ̄gbā ā ka lɛyíkwu ɔ́ ā yɔ̄ á.

³⁷N géē tú ācɛ ā bá ŋmá ipú ajɛ dóódu, nɛ̄ n pa uwá hīla nyɔ̄ eko nɛ̄ n cɔ̄nū nɛ̄ɛnɛ̄hi lɛyíkwu uwā ā. N géē kpó uwá cīgbīhi wā amānyā, n kē í cɛ̄ lɛ uwá í lā amānyā ɛbɔ́.

³⁸É géē wɛ ācɛ ɔlɛ́ um, n kē í wɛ Ɔwɔicō kú uwā.

³⁹N géē yá ka ɔtu kú uwā kóō le yá ékpónú ipú ucē nēé ī yá ā. Ɔ́ɔmā í cɛ̄ lɛ uwá géē bá ī lɛ ojīlīmā ce um piyóó, cɛ́ɛ́ kóō le lɔhi lɛ uwá, mɛ́mla ugbɛ kú uwā.

⁴⁰N géē gbɛka mɛ́mla uwá nōo géē yɔ̄ piyóó. N gáā mā ō yá olɔhi lɛ uwá gbóógbóō ŋ́. N géē yá uwā kéē yúúfi um, cɛ́ɛ́ kéē nyɛ̄ɛ̄ hɛ̄ um tá ɛ́ gɛ ŋ́.

⁴¹Ɔtū géē he um ká n yɔ̄ ī yá uwá lɔhi, n kē í bu uwá tū ipú ajɛ nyā piyóó, ŋmá odúúdú odo kú um.”

⁴²Óndú ā klla ka gɔbū kahíníī, “Ɛ́gɛ́nɛ̄ n cɛ̄ lɛ ífi nɛ̄hi nyā yá ācɛ nēe bá nyā ā, ɛ́gɔ́ɔmā nɛ̄ n gáā yá uwā olɔhi kpɛ́mm nɛ̄ n cokónū nū lɛ uwá ā dúú á.

⁴³A ka ācɛ Ubábīlɔn ɛ́ɛ kwú ajɛ nyā yíífi, nōo gáā tá alácɛ̄ bɛ̄ɛka ipú ígbíli nɛ̄ ɔ̄cɛ ámāŋ ɛbɛ́ í lā ŋ́ mā. Amáŋ ɛ́gɛ́nɛ̄ a lá ajɛ ā, ācɛ klla géē lá aájɛɛhɔ̄ ipú ajɛ nyā kpɔ́ ɛɛ́.

⁴⁴É géē bī ije lá aájɛɛhɔ̄ ā, klla í lɛ abɔ̄ tá ɔkpá ajɛ, í gwū ɔ̄ mla ɔja, klla í hī aíjáalí. É géē yá lɛ ā ipú ajɛ kú Ubɛ́njamīn nyā, mɛ́mla ipú aípɔ́lɛ́ nɛ̄ bá yɛ Ujerúsālɛm tá biíli ā. mɛ́mla aígelī kú Ujúda ā. É klla í yá lɛ ā aígelī nēe kwu ajɛ kú ɛyɛ́fu ā, ɛyí aóci ā, mɛ́mla ajɛ nōo yɔ̄ ɛháajɛ kú Ujúda nēé hī ka Unɛ́gɛ̄bu ā. Le jé ka n géē je uwá cīgbīhi wā ɔlɛ́ uwā. Ami nōo wɛ Ɔwɔicō ā ka á.”