Read idoma UJƐRƐMÍYA 33 Bible Online

UJƐRƐMÍYA 33 - idoma bible

UJƐRƐMÍYA 33

¹Eko nɛ̄ Ujeremíya tá agbá ipú inu kú ācogbāajɛ kú agblɔ̄cɛ́ ā kpɔ́ ā, Ɔwɔicō lɛ ɛlā ka lɛ ɔ́ igbo ɔ́mpa.

²Ó kahíníī, “Ami wɛ Ɔwɔicō nōo yá odúúdú ɛcɛ, klla lɛ ɔ́ kwu ajɛ á. Uyáwɛ wɛ iyē um á.

³Hī um igwú, n géē cɛ̄ uwɔ igwú, klla í da uwɔ ɔdā nɛ̄hi mɛ́mla ɔdōōtayínū nɛ̄ á jé ŋ́ mā.

⁴Ami nōo wɛ Uyáwɛ, Ɔwɔicō nɛ̄ Ísrɛ̄lu í gbɛ̄ɛ̄gbā ā kɛ̄lā lɛyíkwu aɔ́lɛ́ kú Ujerúsālɛm mɛ́mla agblɔ̄cɛ́ kú Ujúda, nēé é géē wúlatāajɛ ā, cɛ́ɛ́ kéē kpó aɛ́cɔ̄ kú uwā le tū ɔdɔ kú igelī ā kwaajɛ ohígbū íbɔ́m nēé cē tū ɔ̄ ā.

⁵Le jé ka ācɛ Ubábīlɔn géē ŋmó ācɛ nēe géē nuunu tú uwā ā, klla ī kpó aókwū uwā tīkwū klá īyī uwā ipú aɔ́lɛ́ ɔ́ɔmā. é géē ŋmó ācɛ ɔ́ɔmā ohígbū ka n le cɔ̄nū da uwá nɛ̄ɛ̄nɛ̄hi. N kwú igbīhi ú cē kwu igelī nyā, ohígbū odúúdú ucē ɔ́bíipú kú ācɛ ā ɛɛ́.

⁶Amáŋ igbīhāajɛ, n géē tú igelī nyā gllayá, klla í hɛ́ ācɛ kú igelī ā tá ŋmá ɔdōbɔ̄bí nōo yɔ̄ ī yá uwā ā. N géē hɛ́ uwá tá klla ī yá kóō lɔhi lɛ uwá, kéē klla lā ɛbɔ́.

⁷N géē kpó ācɛ Ujúda mɛ́mla Ísrɛ̄lu wā ɔlɛ́ ŋmá ajɛ nēé kwú uwā aɔ́fiyɛ nyɔ̄ ā. N kē ī tá uwá gwó lɛbɛ̄ɛka ɛ́gɛ́nɛ̄ é tɛtɛ lɛ ā.

⁸N géē na uwá yēŋēē ŋmá odúúdú ɔdōbɔ̄bí nēé yá lɛyíkwu um ā, klla í je odúúdú ɔ́bíipú nēé bī ŋmá lɛ īkpɛ̄yí olɔfú nēé yá tū um ā yá uwā ɛhi.

⁹Cɛ́ɛ́ Ujerúsālɛm géē bī ēeyē gé um klla í cɛ̄ lɛ ācɛ í cɛ̄tra um klla lɛ ojīlīmā ce um. Abɔ̄ ācɛ kú odúúdú aéwo géē pó odúúdú ɔdōōlɔhi nɛ̄ n yá lɛ uwá ā, mɛ́mla ɛbɔ́ nɛ̄hi nɛ̄ n géē je lɛ uwá ā, ufi géē kwú uwā nōo klla í cɛ̄ le uwá fīyégbúlú.

¹⁰A gē ka kéē kwú ajɛ nyā ú yíífi, nɛ̄ ɔ̄cɛ ámāŋ ka ɛbɛ́ dúúmā í gáā lā anú gɛ ŋ́. Ɔ́ɔmā ɔkwɛ̄yi ɔkwɔɔkwu nyā. Amáŋ ipú aígelī kú Ujúda mɛ́mla úláyi kú Ujerúsālɛm nɛ̄ ācɛ í lā anú ŋ́ ma, ācɛ géē yúuya kpɔ́ ɛɛ́.

¹¹A géē pó ācɛ bá ī yú uya kú éeyē, mɛ́mla uya kú ɔnyā ō lɛ mɛ́mla ācɛ nēe gē bī ɛhi ga ipú Agblīihɔ-nɛ̄hi kú um wā gáā tá um ahínyá. É géē bá ī ka ka “Tá Ɔwɔicō nōo lɔfú fíyɛ́ dúú ā ahínyá dúú. Ohígbū ka Óndú ā gē yá olɔhi. Ó kē ī yíihɔtū eko dóódu piyóó.” N géē je agbénú kú ajɛ nyā kwúcē lɛ uwá ɛ́gɛ́nɛ̄ ó tɛtɛ lɛ ā kpɔ́.”

¹²Ajɛ nyā nōo tá alácɛ̄, nɛ̄ ɔ̄cɛ ámāŋ ɛbɛ́ ī lā anú ŋ́ nyā, ipú odúúdú ipɔ́lɛ́ a, ácí klla í bū anú ɔhá kpɔ́, nɛ̄ ācogbāálá géē kpó aálá kú uwā nyɔ̄ í lúlé.

¹³Ipú aígelī kú ɛyí ɛfu, mɛ́mla aóci, mɛ́mla ɛháajɛ kú Ujúda nēé hī ka unɛ́gɛ̄bu, mɛ́mla ipú ajɛ kú Ubénjāmin, mɛ́mla aípɔ́lɛ́ nēe bá yɛ jīla Ujerúsālɛm tá biílí ā, ācogbāálá klla í bá ī gbo aálá kú uwá áluka kpɔ́ ɛ́.”

¹⁴Óndú ā klla kahíníī, “Eko gē wā nɛ̄ n géē yá okónu nɛ̄ n ce lɛ ācɛ Ísrɛ̄lu mɛ́mla Ujúda ā jīla.

¹⁵Eko ɔ́ɔmā, n géē yá ká ɔ̄cɛ okpaakpa éyi kóō le bɛ̄cɛ ŋmá ipɔ́ɔma kú Udéfīdi. Ó géē yá ɔdā okpaakpa klla í hɛ́pɔ̄ kpaakpa ipú ajɛ ā.

¹⁶Ācɛ Ujúda géē lɛ onyatá, ācɛ nēe lā Ujerúsālɛm ā kē í lā ɛbɔ́. É kē í hī Ujerúsālɛm ka, ‘Ɔwɔicō gē hɛ́pɔ̄hi lɛ alɔ á.’

¹⁷Ɔ̄cɛ éyi ŋmá ipɔ́ɔma kú Udéfīdi géē ce ɔcɛ́ Ísrɛ̄lu piyóó.

¹⁸Ācogwɛ́ɛya nēe ŋmá ipɔ́ɔma kú Ulífāyi ā géē bá ī cɛ̄ um ɛhɔ̄ piyóó, bá ī gwɛ́ɛya oyi ɔlá dúúdú, bá ī yi īkpɔ̄dɛ̄hɔ̄ ɔlá ga um, klla bá ī gwɛ́ɛya gā um piyóó.”

¹⁹Igbɔhá kpɔ́ Ɔwɔicō lɛ ɛlā ka lɛ Ujeremíya.

²⁰Anɔ́ɔ ó kahíníī, “Ami nōo wɛ Ɔwɔicō ā le okónu ce mɛ́mla eyōōnyā mɛ́mla otú cɛ́ɛ́ kéē yɔ̄ eko kú uwā. Ɔdā ɔdū dúú lɔfú bīya okónu nɛ̄ n ce mla uwá ɔ́ɔmā glá ŋ́,

²¹ayíka okónu nɛ̄ n ce mla Udéfīdi, ɔ̄cocɛ̄hɔ̄ kú um, géē je bīya nɛ̄ ɔyí kú Udéfīdi dúúmā í klla gáā lé ɔcɛ́ ɛɛ́ gɛ ŋ́. Ɛ́nɛ̄ n ce mɛ́mla ācɛ Ulífāyi, ācogwɛ́ɛya, nēe gē yúklɔ́ iyɔ̄bū um ā, kē je bīya dúú.

²²N géē nyīla ipɔ́ɔma kú Udéfīdi mɛ́mla ipɔ́ɔma kú Ulífāyi nēe gē yúklɔ́ iyɔ̄bū um ā bɛ̄ɛka aínyílɔ́wɔ nōo bá ɔkpáncō ā, mɛ́mla ɔjɛ kú ísu, nēe tōō gbaáluka ŋ́ mā.”

²³Óndú ā klla da Ujeremíya kahíníī,

²⁴“A má ɔ̄ abɔ̄ ācɛ aéwɔhá bá ī ka kahíníī, “Ɔwɔicō fu Ísrɛ̄lu mɛ́mla Ujúda á. Amáŋ ó tá aípɔ́ɔma ɛpa ɔ́ɔmā ɛɛ́.’ Ohígbū ɔ́ɔmā, é gē leyīgwō uwá bónū, klla í je uwá kéē wɛ ewo dúúmā ɛ́ɛ́ gɛ ŋ́.

²⁵Ami nōo wɛ Ɔwɔicō ā le okónu ce mla ɛnɔ mɛ́mla otú, klla lɛ íne tū lɛ ɔkpáncō mɛ́mla ɛcɛ ɛɛ́.

²⁶Ɛ́gɔ́ɔmā nɛ̄ n gáā tá ayááyí Ujékɔ̄pu ŋ́ mā. N kē í yá ka ɔ̄cɛ éyi ŋmá ipɔ́ɔma kú Udéfīdi, ɔ̄cocɛ̄hɔ̄ kú um, kóō wɛ ɔcɛ́ kú uwā nēe wɛ ayááyí kú Ébrahām, Áyísīki mɛ́mla Ujékɔ̄pu ā eko dóódu. Le jé ka n géē je agbénú kú uwá cīgbīhi lɛ uwá klla í méyīnyinyi uwā.”