Read idoma UJƐRƐMÍYA 34 Bible Online

UJƐRƐMÍYA 34 - idoma bible

UJƐRƐMÍYA 34

¹Eko éyi Unebúkádinēsa, ɔcɛ́ kú Ubábīlɔn lɛ odúúdú aícɔ́ɔja kú nū mɛ́mla odúúdú aícɔ́ɔja kú aéwo nōó gē gbō ā kpó gaá bá ī kpɛ́fú tá Ujerúsālɛm mɛ́mla aígelī nēe kwu ɔɔ́ ajaajɛ ā. Eko ɔ́ɔmā, Ɔwɔicō lɛ ɛlā ka lɛ Ujeremíya

²Ó kahíníī, “Ami, Uyáwɛ, nōo wɛ Ɔwɔicō kú Ísrɛ̄lu ka ā da Usedekíya, ɔcɛ́ kú Ujúda ā ka amíyɔ nōo wɛ Óndú ā ɔ́ɔ ka n gáā je igelī nyā tá abɔ̄ kú ɔcɛ́ kú Ubábīlɔn ɛɛ́. Ó kē í je ɔ́ yɔɔlá tāajɛ.

³Á gáā hɛ́ ɔ abɔ̄ glá ŋ́. É géē kwú uwɔ klla í bī ɔ̄ gé lɛ ɔ́. A géē bī eyī kú abɔ̄yī uwɔ má ɔcɛ́ kú Ubábīlɔn ā, klla í kɛlā mla anú abɔ̄yī uwɔ. Ó kē í bī ɔ̄ nyɔ̄ Ubábīlɔn mla anú.

⁴Nááná ā, Usedekíya, ɔcɛ́ kú Ujúda eee, ami nōo wɛ Ɔwɔicō ā cokónu gā uwɔ ka á gáā kwú ipú ɛfu ŋ́

⁵A géē kwú ɛbɔ́. Ɛ́gɛ́nɛ̄ ācɛ kē yá uculo kú ikwū kú aádā uwɔ, aɔ́cɛ́ nēe tɛtɛ bá gbɔbū ga uwɔ ā, ɛ́gɔ́ɔmā nēé géē yá ga uwɔ klla í jikwū uwɔ, géē yēkwu kú uwɔ dúu á. É géē dɛ̄ kahíníī, “Eléélelé! Ɔcɛ́ kú alɔ gekwú ɛɛ́!” Ami abɔ̄yī um cokónu nyā á.”

⁶Anɔ́ɔ Ujeremíya, ɔ̄comɛ́ɛbɛ ā lɛ odúúdú ɛla nyā ka lɛ Usedekíya, ɔcɛ́ kú Ujúda ā, Ujerúsālɛm á.

⁷Eko nōo da ɔ́ ā wɛ eko nɛ̄ aícɔ́ɔja kú ɔcɛ́ kú Ubábīlɔn bá ī kpɛ́fú tá ācɛ Ujerúsālɛm mɛ́mla aígelī, nēe hile Ujúda, nēé hī ka Ulákīs mɛ́mla Asɛ́kah ā. Aɛ́pa ɔ́ɔmā wɛ aígelī nēé du igá tū uwā ofōofūnū nōo hile Ujúda mɛ́ɛ́ á.

⁸Ɔwɔicō klla kɛlā lɛ Ujeremíya igbīhi nɛ̄ Usedekíya mɛ́mla odúúdú ācɛ kú Ujerúsālɛm le okónu ce ka aá ɔ́ɔ géē hɛ́ aɔ́fiyɛ kú ɔlɛ́ aá

⁹nēe wɛ ācɛ Uhíbru ā tá ā. Kwu ācɛnyīlɔ mɛ́mla ācɛnyā. É yá lɛ ā cɛ́ɛ ka ɔ̄cɛ dúúmā kóō híī bī ɔ̄cɛ Ubíhuru, ɔmpanū ɔfiyɛ ŋ́.

¹⁰Odúúdú aígabɔ̄ mɛ́mla ācɛ ā cɛ̄ le okónu nyā ce, cɛ́ɛ́ kú aá ɔ́ɔ géē hɛ́ aɔ́fiyɛ nɔ̄nyā mɛ́mla aɔ́fiyɛ nɔ̄nyīlɔ kú aá tá, nɛ̄ ɛ́ɛ klla gáā bī uwā ɔfiyɛ kú uwá ɛ́ɛ gɛ ŋ́. Anɔ́ɔ é cɛ̄ lɛ uwá hɛ́tá á.

¹¹Amáŋ Igbīhāajɛ ā, é kwú ɔtū kú uwā í pīyabɔ̄, klla gáā lɛ aɔ́fiyɛ kú uwā nēé hɛ́tá ā kpó kwúcē kwú pīya aɔ́fiyɛ kú uwā kpɔ́.

¹²Anɔ́ɔ Ɔwɔicō da Ujeremíya kahíníī,

¹³“Ami wɛ Uyáwɛ, Ɔwɔicō nɛ̄ Ísrɛ̄lu gē gbɛ̄ɛ̄gbā ā á. N cokónu mla aádáádā aá eko nɛ̄ n kpó uwá bɛ̄cɛ ŋmá ipú ajɛ kú Íjīpiti, nēé wɛ aɔ́fiyɛ ā. N da uwá kahíníī,

¹⁴“Ipú iháyí ɔ́mahāapa dóódu, ɔ̄cɛ Uhíburu dúúmā nēe je lá ɔfiyɛ lɛ aá, eko nōo lɛ úklɔ́ yá lɛ aá iháyí ɛhili, aá kóō lɛ ɔ́ hɛ́tá. Amáŋ aádáádā ā í lɛyítáajɛ lɛ ɛlā nɛ̄ n ka ā ŋ́.

¹⁵Ó gbojī ɛ́ɛ́ ŋ́, aá le pīyabɔ̄ klla lɛ ɔdā nōo wɛ okpaakpa ā yá. Ɔnyɔ̄ɔnyɛ kú aá lɛ ācɛ Uhíbru nēe wɛ aɔ́fiyɛ kú nū ā hɛ́tá. Aá kē lɛ um gbo ipú Agblīihɔ-nɛ̄hi kú um ā.

¹⁶Amáŋ abālɔbányā, aá kwú pīya kɛnɛpɛɛ, le iyē kú um tá nyílá. Ɔnyɔ̄ɔnyɛ kú aá klla gáā lɛ aɔ́fiyɛ nɔ̄nyā mɛ́mla aɔ́fiyɛ nɔ̄nyilɔ nɛ̄ aá hɛ́tá, kéē ga ɛga dúúmā, nēe he uwá ɔtū ā kwú, cɛ́ɛ́ kéē kwú pīya aɔ́fiyɛ kú aá kpɔ́ ɛɛ́.

¹⁷Ohígbū ɔ́ɔmā, ami nōō wɛ Ɔwɔicō ā ka aá lɛyítáajɛ ga um ŋ́ kú aá hɛ́ ācɛ Uhíbru ɔ́mpa aá ā tá ŋmá ɔfiyɛ ŋ́. Ohígbū ɔ́ɔmā, n géē je ohɛ́tá tá lɛ aá. Ɛdɔ ohɛ́tá nɛ̄ n géē je lɛ aá ā wɛ ka n géē ma aá tá kú aá pɛ́ kwú ipú ɛfu, ɔkpɛtā mɛ́mla ōcē obɔ̄bí. N géē je aá pīya ɛbɛ ohéyī lɛ odúúdú aéwo kú ɛcɛ ā.

¹⁸Eko nēé gbɛka gā um ā, é hɛ́ okwū ɔyí ɛna ɛpa, gaá yāwu yɛ ɔtāhɛ̄ āyā ɛpa ā. Ɛyí nū le ka n lɛ uwá yá bɛ̄ɛka ɛnā ɔ́ɔmā ā ɔ́dāŋ ka é le ɛka ā nyílá. Ó lɛ ā odúúdú ācɛ nēe nyílá ɛka nēé gbo ga um, í yá ɔdā nēé ka ā ŋ́ mā, n géē yá uwá bɛ̄ɛka ɛna nēé hɛ́ ɛpa, bū ɔtāhɛ̄ āyā ɛpa kú nū ā.

¹⁹Aótrɛ̄yí kú Ujúda mɛ́mla ákú Ujerúsālɛm, aígabɔ̄ kú ɔlɛ́ ɔcɛ́, mɛ́mla ācogwɛ́ɛya, mɛ́mla odúúdu ācɛ nēe yāwu gáā bū ɔtāhɛ̄ kú ɛna nēé hɛ́ ɛpa ɔ́ɔmā ā,

²⁰n géē kpó uwá lɛ aólɛlā kú uwá nēe gē tíne ō ŋmó uwā ā. Aígbáanɔ mɛ́mla aɛ́bɛ́ ipácí géē kpó aókwū kú uwā lé.

²¹N géē kpó Usedekíya, ɔcɛ́ kú Ujúda, mɛ́mla aígabɔ̄ kú nū lɛ aólɛlā kú uwá, nēe tíne ō ŋmó uwā ā. Aólɛlā ɔ́ɔmā wɛ aícɔ́ɔja kú ɔcɛ́ kú Ubábīlɔn. Obōōbū nyā, é nyɛ̄ɛ̄ hɛ̄ aá tá ɛ́.

²²Amáŋ n géē je ɔ́da lɛ uwá, kéē klla kwúcē wā igelī nyā. É géē kpɛ́fú tá ɔ̄, í yá ɔ̄ lé, klla í je ɔ́ yɔɔlá tāajɛ. N géē je aígelī kú Ujúda ā pīya alácɛ̄, nɛ̄ ɔ̄cɛ dúúmā í lā ipú uwā ŋ́.”