Read idoma UJƐRƐMÍYA 35 Bible Online

UJƐRƐMÍYA 35 - idoma bible

UJƐRƐMÍYA 35

¹Eko nɛ̄ Ujɛhóyākim, ɔyí kú Ujosíya, wɛ ɔcɛ́ kú Ujúda ā, Ɔwɔicō lɛ ɛlā ka ga um.

²Ó kahíníī, Ujeremíya, nyɔ̄ gaá lɛ ācɛ ipɔ́ɔma kú Urécābu ā hīgwú. Lɛ uwá bī wā ipú inu éyi kú Agblīihɔ-nɛ̄hi ā, cɛ́ɛ́ kú a lɛ ejé je lɛ uwá kéē gwá.”

³Anɔ́ɔ n nyɔ̄ gaá lɛ Ujaasáníya, nɛ̄ ádā nū wɛ Ujeremíya, nɛ̄ ádáádā nū kē wɛ Uhábasínīya ā kpó mɛ́mla aɔ́máapú nū mɛ́mla odúúdú ayí nū, klla mɛ́mla odúúdú ācɛ ipɔ́ɔ́ma kú Urécābu ā hīgwú á.

⁴N lɛ uwá kpó wā ipú Agblīihɔ-nɛ̄hi kú Óndú ā. N lɛ uwá kpó wā ipú inu kú ayí kú Uhánan, ɔ̄comɛ́ɛbɛ kú Ɔwɔicō, nōo wɛ ɔyí kú Igdalíya ā. Inu ā gbo ce inu kú aígabɔ̄ kú ipú Agblīihɔ-nɛ̄hi á. Inu ā kē yō icō kú inu kú ɔyí kú Umáasēyah, ɔ̄cogbɔɔwɛ kú Agblīihɔ-nɛ̄hi, nōo wɛ ɔyí kú Ussálum ā.

⁵Anɔ́ɔ n lɛ aɔ́já nɛ̄hi nɛ̄ ejé wɛ omōomū uwā mɛ́mla íkókwū kpó ce iyɔ̄bū ācɛ ipɔ́ɔmā kú Urécābu. Anɔ́ɔ n da uwá kahíníī, “Aá lɛ ejé gwá.”

⁶Amáŋ é tóohi kahíníī, “Alɔ í gē gwá ejé ŋ́. Ohígbū ka aádáádā alɔ, Ujónādaabu, ɔyí kú Urécābu ā je íne lɛ alɔ ka alɔ ámāŋ ka ayááyí alɔ dúúmā kóō gwá ejé gbóógbóō ŋ́.

⁷Ó klla da alɔ ka alɔ híī gwó inu ŋ́, hɛ́hɔ̄ ŋ́, hɛ́hɔ̄ ɔcí ufáyin ŋ́. Amáŋ aá kóō lā ipú áklɔ̄kpɛ piyóó. Cɛ́ɛ́ kú aá géē yēeyī ligbó ipú ajɛ nɛ̄ aá wɛ aúgbɔga ipú nū ā.

⁸Alɔ kē húmáyī lɛyítáajɛ lɛ odúúdú ɔdā nɛ̄ aádáádā alɔ Ujónādaabu, ɔyí kú Urécābu je lɛ alɔ ā. Alɔ mɛ́mla anyā alɔ, mɛ́mla ayí alɔ, í gwá ejé jéjée ɛ́ɛ́ ŋ́

⁹Alɔ í gwó inu nɛ̄ alɔ gē lā anú ŋ, alɔ í kē hɛ́hɔ̄ kú ɔcí ufáyin ɛ́ nɛ̄ alɔ ī ce īkpɔ̄dɛ̄hɔ̄ ŋ́.

¹⁰Alɔ húmáyī lā ipú áklɔ̄kpɛ, klla húmáyī lɛyítáajɛ lɛ odúúdú íne nɛ̄ aádáádā alɔ, Ujónādaabu, ɔyí kú Urécābu ā je lɛ alɔ ā.

¹¹Amáŋ, eko nɛ̄ Unebúkádinēsa, ɔcɛ́ kú Ubábīlɔn ā gáā gbɔɔ́ ō kpɛ́fú tú ajɛ ā, anɔ́ɔ alɔ ka, alɔ wā Ujerúsālɛm cɛ́ɛ́ ka alɔ le kwú ŋmá abɔ̄ aícɔ́ɔja kú Ubábīlɔn mɛ́mla Usiríya. Oŋmífi ɔ́ɔmā nɛ̄ alɔ lā Ujerúsālɛm jāā kwu ícɛ á.”

¹²Anɔ́ɔ Óndú ā da ami nōo wɛ Ujeremíya ā kahíníī,

¹³“Ujeremíya, nyɔ̄ gaá le da ācɛ kú Ujúda mɛ́mla ācɛ nēe lā Ujerúsālɛm ā ka ami Uyáwɛ, nōo lɔfú fíyɛ́ dúú ā, Ɔwɔicō nɛ̄ Ísrɛ̄lu gē gbɛ̄ɛ̄gbā ā ɔ́ɔ ka uwá kéē gaá kllɔcɛ́ kéē jé ɛ́gɛ́nɛ̄ é géē lɛyítáajɛ gā um ā.

¹⁴Ujónādaabu, ɔyí kú Urécābu lɛ ɔ́da, je lɛ ayááyí nū kéē gwá ejé ŋ́, é kē lɛyítáajɛ lɛ íne ɔ́ɔmā jāā kwu ícɛ. Ohígbū ɔ́ɔmā, é ī gwá ejé ŋ́. Amáŋ, n kɛlā lɛ aá, klla ka lɛ aá, nááná aá gáā lɛyítáajɛ gā um ŋ́.

¹⁵N húmáyī tū aíkonó kú um, ācomɛ́ɛbɛ ā, ɛhɔ̄ fu aá. É da aá ka ɔnyɔɔnyɛ kú aá kóō mā ɔ́bíipú nōó ī bī ā tá, kóō lɛ ucē kú nū pīyabɔ̄. Aá híī pā ɛcí kú aéwɔhá ɛ́ɛ́ nɛ̄ aá géē gbā uwá ɛ̄gbā ŋ́. Cɛ́ɛ́ kú aá géē yēeyī ligbó ipú ajɛ nɛ̄ n je lɛ aádáádā ā. Amáŋ aá jāhɔ̄ ɛ́ɛ́ nɛ̄ aá gē pó ɛlā kú um ā ŋ́.

¹⁶Ipɔ́ɔma kú Ujónādaabu, ɔyí kú Urécābu gē lɛyítáajɛ lɛ íne nɛ̄ aádáádā uwá jē lɛ uwá ā, amáŋ aá, ācɛ nēe bá nyā í lɛyítáajɛ gā um ŋ́.

¹⁷Ohígbū ɔ́ɔmā, ami, Uyáwɛ, nōo lɔfú fíyɛ́ dúú, nōo wɛ Ɔwɔicō nɛ̄ Ísrɛ̄lu gē gbɛ̄ɛ̄gbā ā ka n géē kpó ācɛ Ujúda mɛ́mla odúúdú ācɛ nēe lā Ujerúsālɛm ā yíífi, ɛ́gɛ́nɛ̄ n ka ka n géē yá ā. N kɛlā lɛ uwá, amáŋ é jāhɔ̄ ŋ́. N hī uwá igwú, amáŋ é cɛ̄ um igwú ŋ́.”

¹⁸Anɔ́ɔ ami nōo wɛ Ujeremíya ā da ācɛ ipɔ́ɔmā kú Urécābu ā ka Ɔwɔicō kahíníī, “Ami, Uyáwɛ, nōo lɔfú fíyɛ́ dúú, nōo wɛ Ɔwɔicō nɛ̄ Ísrɛ̄lu gē gbā ā ka aá gē lɛyítáajɛ lɛ íne kú aádáádā á, Ujónādaabu, ɔyí kú Urécābu, ī yɛce odúúdú ukɔ́ nōó tū aá, klla ī yá ɔdā dóódu nōó da aá ā.

¹⁹Ohígbū ɔ́ɔmā, Óndú ā nōo lɔfú fíyɛ́ dúu, Ɔwɔicō kú Ísrɛ̄lu a ka; Ujonádāābu, ɔyí kú Urécābu géē lɛ ayááyí nēe géē bá í gbā um ɛ̄gbā piyóó.”