Read idoma UJƐRƐMÍYA 36 Bible Online

UJƐRƐMÍYA 36 - idoma bible

UJƐRƐMÍYA 36

¹Ipú iháyí ɔ́mɛnɛ nɛ̄ Ujɛhóyākim, ɔyí kú Ujosíya, wɛ ɔcɛ́ kú Ujúda ā, Ɔwɔicō lɛ ɛlā ka gā um.

²Ó kahíníī, “Kwú ɔkpá ú, kú ā lɛ odúúdú ɛlā nɛ̄ n ka ga uwɔ, lɛyíkwu ācɛ Ísrɛ̄lu mɛ́mla ācɛ Ujúda mɛ́mla odúúdú aéwɔhá ā tá tū ɔ̄. Lɛ ɔdā dóódu nɛ̄ n húmáyī í ka ga uwɔ, ŋmá ɛ̄cī aflɛ́yí nɛ̄ n gbɔɔ́ ō kɛlā ga uwɔ, ŋmá eko nɛ̄ Ujosíya ce ɔcɛ́ ŋmá ā, jāā gaá kwu ícɛ tá.

³Ekōōhī ɔ́dāŋ ka ācɛ kú Ujúda lɛ odúúdú ífi nɛ̄hi nɛ̄ n gáā yá kéē yá uwā ā pó, é géē pīyabɔ̄ ŋmá ucē obɔ̄bí kú uwá, cɛ́ɛ́ n kwú ɔ́bíipú kú uwā yá uwā ɛhi.”

⁴Ujeremíya lɛ Ubárūku, ɔyí kú Unérīya hīgwú. Anɔ́ɔ Ujeremíya le ɔdā dóódu nɛ̄ Ɔwɔicō da ɔ́ ā ka lɛ Ubárūku, anɔ́ɔ́ ó lɛ uwā tá tāajɛ á.

⁵Anɔ́ɔ Ujeremíya lɛ ukɔ́ nyā tū Ubárūkú á. “É cɛ̄ ga um ga ipú Agblīihɔ-nɛ̄hi ɛ́ɛ́ gɛ ŋ́.

⁶Amáŋ, n tíne kú á le yɛ tá ipú Agblīihɔ-nɛ̄hi, eko ɔhá nɛ̄ ācɛ ā gē gwū okónu ā. Nyɔ̄ í lɛ ɔkpá nyā jé tɛ́ɛcɛ gbōmgbōm, cɛ́ɛ́ kéē le odúúdú ɛlā nɛ̄ Ɔwɔicō kā ga um ā, nɛ̄ n ka gā uwɔ nɛ̄ a tá tāajɛ ā pó. Lɛ ɔkpá nyā jé lɛ odúúdú ācɛ kú Ujúda nēe ŋmá aígelī kú ɔlɛ́ uwá wā ā.

⁷Ekōōhī é géē gbɔ̄ɔkɔ lɛ Ɔwɔicō klla í pīyabɔ̄ ŋmá ucē obɔ̄bí kú uwā, ohígbū ka Óndú ā lɛ ācɛ nēe bá nyā fɔɔnū kú ícɔ̄nū nɛ̄hi ɛɛ́.

⁸Anɔ́ɔ Ubárūku lɛ ɛlā nɛ Óndú ā ka ā jé ipú Agblīihɔ-nɛ̄hi ɛ́gɛ́nɛ̄ Ujeremíya da ɔ́ lɛ ā á.

⁹Ipú ɔyā ahāanɛ kú iháyí ɔ́mɛɛhɔ̄ nɛ̄ Ujɛhóyākim, wɛ ɔcɛ́ kú Ujúda ā, ācɛ ā lɛ okónu gwū kéē má eyī olɔhi kú Óndú ā. Odúúdú ācɛ nēe lā Ujerúsālɛm, mɛ́mla ācɛ nēe ŋmá aígelī kú Ujúda wā ā, gwū okónu nyā á.

¹⁰Eko nɛ̄ odúúdú ācɛ ā bá i jāhɔ̄ ā, Ubárūku lɛ odúúdú ɛlā nɛ̄ Ujeremíya ka lɛ ɔ́ ā jé ŋmá ipú ɔkpá ā. Ó jé ɛ̄nyā ipú Agblīihɔ-nɛ̄hi ā, ŋmá ipú inu kú Ugɛmaríya, ɔyí kú Ussafán, ɔmálotɔ́kpá ā. Inu kú nū ā kwu ɛhícō kú ɔwɛ ɛ̄yīpɛ̄ kú Agblīihɔ-nɛ̄hi ā ajaajɛ.

¹¹Umikáya, ɔyí kú Ugemaríya, ɔyɔ́ɔ́yí kú Ussafán le ɛlā nɛ̄ Ɔwɔicō ka ā nɛ̄ Ubárukú yɔ̄ í je ŋmá ɔkpá ā pó.

¹²Anɔ́ɔ ó le tá agblɔ̄cɛ́, le tá ipú inu kú ɔmálotɔ́kpá kú agblɔ̄cɛ́, ɛga nɛ̄ odúúdú aígabɔ̄ mɛ́mla aótrɛ̄yí ā bá ā. Ɛlíssāma, ɔmálotɔ́kpá kú agblɔ̄cɛ́ ā, mɛ́mla Udeláya, ɔyí kú Ussɛmáya, mɛ́mla Ɛlnátan, ɔyí kú Ákibɔ, mɛ́mla Ugɛmaríya, ɔyí kú Ussáfan, mɛ́mla Usedekíya, ɔyí kú Uhananíya mɛ́mla aótrɛ̄yí ɔhá bá abɔ́ɔ.

¹³Anɔ́ɔ Umikáya le da uwá ɔdā dóódu nōo pó Ubárukú jé tɛ́ɛcɛ lɛ ācɛ ā.

¹⁴Anɔ́ɔ aótrɛ̄yí a lɛ Ujehúdi, ɔyí kú Unetaníya, ɔyɔ́ɔ́yí kú Ussɛlɛmíya, ɔyɔ́ɔ́yí kú ɔyí Ukúsi, tɛ̄hɔ̄ ka ɔ́ɔ gaá da Ubárūku ka ɔ́ɔ lɛ ɔkpá ɔ́ɔmā nɛ̄ ɔɔ́ jé lɛ ācɛ ā bī wā. Anɔ́ɔ Ubárukú lɛ ɔkpá ā bī nyɔ̄ á.

¹⁵Anɔ́ɔ é da ɔ́ kahíníī, “Má cīce kú ā jé ɔkpá ɔ́ɔmā lɛ alɔ.” Anɔ́ɔ Ubárūku lɛ ɔkpá ā jé lɛ uwá á.

¹⁶Eko nɛ̄ Ubárūku lɛ ɔkpá nyā jé lɛ uwá ā, ufi le uwá kwú, anɔ́ɔ é pīyeyī má īyī uwā á. É da Ubárūku kahíníī, “Alɔ géē kpó ɛlā kú ɔkpá nyā nyɔ̄ í da ɔcɛ́ piíí.”

¹⁷Anɔ́ɔ é da ɔ́ ɔ̄kā kahíníī, Da alɔ, abɔ̄ a yá lɛ ɛ́ɛ́ nɛ̄ a tá odúúdú ɛlā nyā tū ɔkpá lɛ ā a? Ujeremíya ka gā uwɔ ɛ́ɛ́ nɛ̄ a tá ɔ́ tū ɔkpá á nɛɛ?”

¹⁸Ubárūku tá uwá ohi kahíníī, “Ujeremíya ka odúúdú ɛlā kú ɔkpá nyā gā um ɛ́ɛ́, nɛ̄ n bī ɔdōtɔ́kpá le tá ɔ̄ tū ɔkpá nyā á.”

¹⁹Anɔ́ɔ é da ɔɔ́ kahíníī, “Awɔ mɛ́mla Ujeremíya kóō le kwu gaá tayínū, nɛ̄ ɔ̄cɛ dúúmā í gáā jé ɛga nɛ̄ aá yɔ̄ ā ŋ́.”

²⁰Anɔ́ɔ Aótrɛ̄yí ā kwú ɔkpá ā ú tá ipú inu kú Ɛlíssāma ɔmálotɔ́kpá kú agblɔ̄cɛ́ ā, anɔ́ɔ é le tá agblɔ̄cɛ́ gaá lɛ ɔdā dóódu nōo yɔ̄ ɔkpá ā kpó ka lɛ ɔcɛ́ ā á.

²¹Anɔ́ɔ ɔcɛ́ lɛ Ujɛ́hūdi tɛ̄hɔ̄ ka ɔ́ɔ gaá kwú ɔkpá ā ú wā á. Ó gaá kwú ɔkpá ú ŋmá ipú inu kú Ɛlíssāma klla lɛ odúúdú nū jé lɛ ɔcɛ́ mɛ́mla odúúdú aótrɛ̄yí nēe háyi jīla ɔcɛ́ ā tá abɔ́ɔ ā.

²²Eko ɔ́ɔmā, wɛ eko kú ofū nɛ̄hi. Ɔcɛ́ ā cīce inū nɛ̄ ó ī yɔ̄ eko ofū ā iyɔ̄bū ɔlá.

²³Obōōbū nɛ̄ Ujɛ́hūdi lɛ āyā ɛtá, ámāŋ ɛnɛ kú ɔkpá ā jé mɛɛ ā, ɔcɛ́ ā kwú ɔkpá āyā ɔ́ɔmā ú hɛ́ ɛ̄wā, klla kwú ɔ̄ ú kpó tá ga ipú ɔlá. Ó hɛ́ ɔkpá nyā tū ɔlá kléklé jāā gbéeko nɛ̄ odúúdú ɔkpá nyā kwú yɔɔlá dúúdú.

²⁴Amáŋ kwu ɔcɛ́ ā ámāŋ aígabɔ̄ kú nū dúúmā nēe pó ɛlā kú ɔkpá nyā nēé jé lɛ uwá ā, í yúúfi ɛ́ɛ́ nɛ̄ ɔtū gē hɛ́ uwá kō, ɛ́ɛ́ nēé gē yá ɔtūnōbí kú ɛlā ā ŋ́.

²⁵Ɛlnátan, mɛ́mla Udéláya mɛ́mla Ugɛmaríya gbɔ̄ɔkɔ tá ɔcɛ́ ā ka ɔ́ɔ híī je ɔkpá ā yɔɔlá ŋ́ nááná ā, ɔcɛ́ ā í kē jāhɔ̄ lɛ uwá ŋ́.

²⁶Anɔ́ɔ ɔcɛ́ ā lɛ ɔ́da je lɛ ɔyí nū, Ujɛramíilu, mɛ́mla Usɛráya, ɔyí kú Asrīyɛlu mɛ́mla Ussɛlɛmíya, ɔyí kú Abudíílu ka ɛ́ɛ lɛ Ujeremíya, ɔ̄comɛ́ɛbɛ́ ā mɛ́mla Ubárūku, ɔmálotɔ́kpá kú nū ā kwú. Amáŋ Óndú ā kwú uwā í tayínū.

²⁷Eko nɛ̄ Ujɛhóyākim, ɔcɛ́ ā, kwú ɔkpá nɛ̄ Ujeremíya ka lɛ Ubárukú nōó tá ā ú yɔɔlá ā, Ɔwɔicō lɛ ɛlā ka lɛ Ujeremíya. Ó kahíníī,

²⁸“Ujeremíya, kwú ɔkpá ɔhá ú kú ā lɛ odúúdú ɔdā nēe bá ɔkpá kú aflɛ́yí ā tá tū ɔ̄ kpɔ́.

²⁹Da Ujehóyákim, ɔcɛ́ ā kahíníī, ‘A kwú ɔkpá ā ú yɔɔlá ɛɛ́, a klla da Ujeremíya ka ɔdí yá nɛ̄ ɔɔ́ gē ka ka ɔcɛ́ kú Ubábīlɔn ɔ́ɔ ī wā í je ajɛ kú ɔlɛ́ alɔ yíífi klla kpó ācɛ mɛ́mla aɛ́bɛ́ ŋmó ŋmá ipú ajɛ kú ɔlɛ́ alɔ ā.

³⁰Ohígbū ɔ́ɔmā ā, ami nōo wɛ Ɔwɔicō ā gē da uwɔ, Ujehóyakim, ɔcɛ́ kú Ujúda, abālɔbányā, ka ɔyí uwɔ dúúmā í klla gáā lé ɔcɛ́ kú Ujúda nɛ̄ Udéfīdi lé ā ɛ́ɛ́ gɛ ŋ́. É géē je okwū kú uwɔ tɛ́cɔ̄ tá ɛcɛ, ɛga nɛ̄ ɛnɔ géē yɔ̄ í cɛ̄ ɔ̄ ɔlɛɛ́nɔ, nɛ̄ ébú géē yɔ̄ ī ce klá anú otú.

³¹N géē yá awɔ mɛ́mla ayí uwɔ, odúúdú aígabɔ̄ kú uwɔ italā ohígbū odúúdú ɔ́bíipú nɛ̄ aá bī ā. Kwu awɔ mɛ́mla ācɛ nēe lā Ujerúsālɛm mɛ́mla ācɛ kú Ujúda dúúmā í jāhɔ̄ lɛ ahɔ̄ nɛ̄ n pi aá anú ā ŋ́. Ohígbū ɔ́ɔmā odúúdú ífi nɛ̄ n ka ka n géē yá kéē yá ā, n géē cɛ̄ lɛ uwā yá aá.”

³²Anɔ́ɔ Ujeremíya kwú ɔkpá ɔhá ú lɛ Ubárūku, ɔmálotɔ́kpá kú nū ā, anɔ́ɔ ó klla le odúúdú ɛlā nōó ka lɛ ɔ́ ā tá tū ajɛ igbɔhá á. Ó lɛ odúúdú ɔdā nēe bá ɔkpá kú aflɛ́yí mɛ́mla ɛhɔ̄ ékpónú ɔ́ɔmā kpó tá tāajɛ.