Read idoma UJƐRƐMÍYA 38 Bible Online

UJƐRƐMÍYA 38 - idoma bible

UJƐRƐMÍYA 38

¹Ussɛfátīya, ɔyí kú Umátan, mɛ́mla Ugɛdalíya, ɔyí kú Upássɔ, mɛ́mla Ujɛ́hūkalu, ɔyí kú Ussɛlɛmíya mɛ́mla Upássɔ, ɔyí kú Umalkíya le ɔdā nɛ̄ Ujeremíya yɔ̄ ī da ācɛ ā pó. Ó yɔ̄ ī da uwā kahíníī,

²“Ɔwɔicō ka ɔ̄cɛ dúúmā nɛ̄ ɔ́ɔ klá Ujerúsālɛm amānyā kpɔ́, ɛfú géē lé ɔ̄, ámāŋ ɔkpɛta ámāŋ ka ōcē obɔ̄bí ɛ́ɛ́ géē ŋmó ɔ̄. Amáŋ ɔ̄cɛ dúúmā nɛ̄ ɔ́ɔ le tá ɛcɛ gáā cɔ̄nyā lɛ ācɛ Ubábīlɔn ā, é gáā ŋmó ɔ̄ ŋ́. É í cɛ̄ lɛ ɔ́ yēeyi.”

³Ujeremíya klla yɔ̄ ī da uwá ka Ɔwɔicō ɔ́ɔ kahíníī, “N géē je igelī nyā lɛ aícɔ́ɔja kú Ubábīlɔn, é kē í yá ɔ̄ lé.”

⁴Anɔ́ɔ aótrɛ̄yí ā le tá ɛgiyí ɔcɛ́ ā gáā da ɔ́ kahíníī, “É cíkā ō kwú Ujeremíya ā ú ŋmó. Ɛdɔ ɛlā nɛ̄ ó gē ka igelī nyā ā gē yá ká aícɔ́ɔja ā kéē yúúfi cɛ́ɛ́ ka ɔtū kú uwā kóō gbenyi. Ó klla yɔ̄ ī yá odúúdú ācɛ kú igelī ā ɔdā ékpónú ɔ́ɔmā. Ó tú ācɛ abɔ̄ dúúmā ŋ́, amáŋ obɔ̄bí kú uwā nōó yɔ̄ ī yá á.”

⁵Anɔ́ɔ Usedekíya, ɔcɛ́ kú Ujúda ā tá uwā ohi kahíníī, “Ó lɔhi. Ó yɔ̄ abɔ̄ kú aá, ɔdā dúúmā nōo he aá ɔtū ā, aá yá mla anú. N gáā ci aá ɔdā dúúmā nɛ̄ aá tíne ō yá mla anú ā ŋ́.”

⁶Anɔ́ɔ é kwú Ujeremíya ú, kwú ɔ́ngbá ú tū ɔ̄ abɔ̄, kwú ɔ̄ ú tá ipú obugā kú Umalkíya, ɔyínɔ̄nyīlɔ kú ɔcɛ́ ā. Obugā ā yɔ̄ inu kú ācogbāajɛ kú ipú agblɔ̄cɛ́ ā. Éŋkpɔ̄ í yɔ̄ obuga ā ŋ́, ɔ́tɔ̄ ōfōōfūnū. Anɔ́ɔ ɔ́tɔ̄ ā le Ujeremíya hɛ́ gā ɛháajɛ piyɔ á.

⁷Anɔ́ɔ Ɛbɛdimɛ́lɛ̄k, ɔ̄cɛ Itiyópīya, igabɔ̄ éyi nōo gē yúklɔ́ ipú agblɔ̄cɛ́ ā, le pó ka é kwú Ujeremíya ú tá ipú obugā á. Eko ɔ́ɔmā, ɔcɛ́ ā yɔ̄ ī kɛpɔ̄ Okómpinu kú Ubɛ́njamīn ā.

⁸Anɔ́ɔ Ɛbɛdimɛ́lɛ̄ki le tá abɔ́ɔ gáā da ɔcɛ́ ā kahíníī,

⁹“Ágábáidu, ɔdā nɛ̄ ācɛ nēe bá nyā yá ā, í lɔhi ŋ́. É kwú Ujeremíya ú tá ipú obugā. Ɛmiyɛ géē ŋmó ɔ̄, ɛ́gɛ́nɛ̄ ɔdōlé dúúmā í yɔ̄ igelī ā gɛ ŋ́ mā.”

¹⁰Anɔ́ɔ ɔcɛ́ ā lɛ ɔ́da je lɛ Ɛbɛdimɛ́lɛ̄ki ka ɔ́ɔ lɛ ācɛ ɛtá kpó mla īyī nú ka ɛ́ɛ gáā kwú Ujeremíya pi wɛ̄ɛcɛ ŋmá ipú obugā ā, gbɔbū ɛ́ɛ́ ka ɔ́ɔ kwú.

¹¹Anɔ́ɔ Ɛbɛdimɛ́lɛ̄ki le tá inu okpíyó tū kú agblɔ̄cɛ́ ā gáā lɛ aáhingílí kpó, kwú uwā í kpó tū ɔ́ngbá lɛ ɔ́ tá ga ajɛ gé lɛ Ujeremíya á.

¹²Anɔ́ɔ ó da ɔ́ kóō kwú aáhingílí ā í kpó wu ipú aácá kú nū, cɛ́ɛ́ ka ɔ́ngbá ā ka ɔ́ɔ yá ɔ̄ ágbe acá ŋ́. Ujeremíya lɛ yá lɛ ā.

¹³Anɔ́ɔ é kwú ɔ̄ ú pi wɛ̄ɛcɛ ŋmá ipú obugā ā. Igbīhi ɛ̄nyā, é kwú Ujeremíya ú tá ipú inu éyi kú agblɔ̄cɛ́ ā.

¹⁴Igbɔhá, Usedekíya da ācɛ ɔlɛ́ nū kéē lɛ Ujeremíya bī wā gé lɛ ɔ́, ɛgiyí okómpinu ɔmɛɛtá kú Agblīihɔ-nɛ̄hi ā. Anɔ́ɔ ó da ɔ́ kahíníī, “N gáā da uwɔ ɔ̄kā éyi. N tíne ka a lɛ odúúdú ɔ̄kwɛ̄yí kú ɛlā ā da um.”

¹⁵Anɔ́ɔ Ujeremíya tá ɔ́ ohi kahíníī, “Ɔ́dāŋ́ ka n lɛ ɔkwɛ̄yí ā da uwɔ, á gáā je um ŋmó ŋ́ŋ? Ɔ́dāŋ́ ka n kē lɛ ɛlā nwū uwɔ, á kē gáā jāhɔ̄ lɛ ɛlā nɛ̄ n nwū uwɔ ā ŋ́.”

¹⁶Anɔ́ɔ Usedekíya lɛ okónu ce lɛ ɔ́ wɛɛlɛ kahíníī, “Ɛ́gɛ́nɛ̄ Ɔwɔicō nōo yá alɔ ā yɔ̄ ā, n gáā ŋmó uwɔ ɛɛ́, nɛ̄ n géē je uwɔ lɛ ɔ̄cɛ dúúmā kóō je uwɔ ŋmó ŋ́.”

¹⁷Anɔ́ɔ Ujeremíya da Usedekíya kahíníī, “Uyáwɛ nōo lɔfú fíyɛ́ dúú, nōo wɛ Ɔwɔicō kú Ísrɛ̄lu ā ka, ɔ́dāŋ ka a cɔ̄nyā lɛ ɔcɛ́ kú Ubábīlɔn, a géē yēeyī, é klla gáā je igelī nyā tū ɔlá ŋ́. Kwu awɔ mɛ́mla aíkonó kú ɔlɛ́ uwɔ, é géē mābɔ̄ aá tá.

¹⁸Amáŋ, ɔ́dāŋ ka á cɔ̄nyā ŋ́, é géē je igelī nyā lɛ ācɛ kú Ubábīlɔn, é kē í je ɔ́ yɔɔlá tāajɛ. Á gáā kwu ŋmá abɔ̄ uwā glá ŋ́.”

¹⁹Anɔ́ɔ Usedekíya tá ɔ̄ ohi kahíníī, “N gē yúúfi ācɛ ɔlɛ́ alɔ nēe kwu ga ɛgiyí ācɛ Ubábīlɔn ā. É géē je um lɛ uwá kéē yá um ōwē nɛ̄hi.”

²⁰Anɔ́ɔ Ujeremíya tá ɔ̄ ohi kahíníī, “É gáā je uwɔ lɛ uwá ŋ́. N gē gbɔ̄ɔkɔ gā uwɔ ka ā lɛyítáajɛ lɛ ɛhɔ̄ nɛ̄ Ɔwɔicō tū um fu uwɔ ā. Cɛ́ɛ́ ó géē lɔhi gā uwɔ, é kē gáā ŋmó ŋ́.

²¹Amáŋ ɔ́dāŋ nɛ̄ aá cɔ̄nyā ŋ́, ɔdā nɛ̄ Ɔwɔicō mafú gā um ā yɔ̄ á.

²²Ipú ɛbɛ nɛ̄ má um ā, n má odúúdú ācɛnyā kú ɔlɛ́ ɔcɛ́ ā abɔ̄ é lɛ abɔ̄ tū uwá abɔ̄ gé lɛ aótrɛ̄yí kú aícɔ́ɔja kú ɔcɛ́ kú Ubábīlɔn ā. Eko nēé bá ī nyɔ̄ ā, ācɛnyā bá ī ka kahíníī, ‘Aóklóbīya kú uwɔ nēe kwu uwɔ ajaajɛ ā lɛ uwɔ bī nyíleyī. É kē le fíyɛ́ uwɔ abɔ̄. Abɔ̄ aíkpó kú uwɔ le hɛ́ wu ɔ́tɔ̄ ɛɛ́ mā, aóklóbīya uwɔ ā nyɛ̄ hɛ̄ uwɔ tá ɛɛ́.’”

²³Anɔ́ɔ ó klla da ɔcɛ́ ā kahíníī, “É géē kpó odúúdú anyā uwɔ mɛ́mla ayí uwɔ ā ga ɛgiyí ācɛ Ubábīlɔn. Awɔ abɔ̄yī uwɔ ā í gáā kwu hɛ́ uwā abɔ̄ tá glá ŋ́. Ɔcɛ́ kú Ubábīlɔn géē kwú uwɔ alagbá, é kē í je igelī nyā tū ɔlá.”

²⁴Anɔ́ɔ Usedekíya da ɔ́ kahíníī, “A yá ka ɔ̄cɛ dúúmā kóō pó ɔ̄kā kú alɔ nyā ŋ, cɛ́ɛ́ abɔ̄ í gáā kwu oyēeyī kú uwɔ ŋ́.

²⁵Ɔ́dāŋ́ ka aígabɔ̄ kú um ā le pó ka ami mɛ́mla awɔ ɔ́ɔ lɛ ɔ̄kā kā, é géē wā í da uwɔ ɔ̄kā ɔdā nɛ̄ alɔ ka ā. É géē cokónu ga uwɔ ka aá gáā ŋmó uwɔ ŋ́, ɔ́dāŋ ka a lɛ odúúdú ɔ̄kā ā ka lɛ aá.

²⁶Lɛ da uwá ka, a yɔ̄ ī gbɔ̄ɔkɔ ga um ka amíyɔ̄ je anúɔ tá agbá ɔlɛ́ Ujonátan igbɔhá ɛ́ɛ́ gɛ ŋ́, cɛ́ɛ́ ka anúɔ kwú ŋ́.

²⁷Anɔ́ɔ odúúdú aígabɔ̄ ā wā í lɛ ɔ̄kā da Ujeremíya. Anɔ́ɔ ó le ɔdā nɛ̄ ɔcɛ́ da ɔ́ ka ɔ́ɔ ka lɛ uwá ā da uwá á. Ó lɛ ɔdā dúúmā ɔhá nēé yá glá ɛɛ́ gɛ ŋ́, ohígbū ka odúúmā kú uwá í pó ɔ̄kā nɛ̄ ami mɛ́mla ɔcɛ́ ka ā ŋ́.

²⁸Ujeremíya tū agbá ipú agblɔ̄cɛ́ ā jāā gbó ɛ̄cī nɛ̄ aólɛlā gaá yá Ujerúsālɛm lé ā.