Read idoma UJƐRƐMÍYA 39 Bible Online

UJƐRƐMÍYA 39 - idoma bible

UJƐRƐMÍYA 39

¹Ipú ɔyā ɔ́migwó kú iháyí ɔ́mahāanɛ nɛ̄ Usedekíya ce ɔcɛ́ kú Ujúda ā, Unebúkádinēsa, ɔ́cɛ kú Ubábīlɔn gā mɛ́mla odúúdú aícɔ́ɔja kú nū wā í kpɛ́fú tá ācɛ Ujerúsālɛm.

²Ipú ɛ̄cī ahāanɛ kú ɔyá ɔ́mɛnɛ kú iháyí igwóléyi nɛ̄ Usedekíya ā wɛ ɔcɛ́ kú Ujúda ā, é lɛ ɔdɔ kú igá kú Ujerúsālɛm ca kwú bēhé wā ipú nū.

³Eko nēé mīyɛ Ujerúsālɛm ā, odúúdú aótrɛ̄yí kú aícɔ́ɔja kú ɔcɛ́ kú Ubábīlɔn, gaá lɛ ajɛ kwú okómpinu kú ɔtāhɛ̄ ā. Aótrɛ̄yí ā wɛ Unágalu Usarɛ́sa, mɛ́mla Usámga Unébo, mɛ́mla Usasécím, nōo wɛ otrɛ̄yí nɛ̄hi ā, mɛ́mla Unégalu Usarɛ́sa ɔhá nōo wɛ igabɔ̄ nɛ̄hi ā, mɛ́mla aígabɔ̄ kú ɔcɛ́ Ubábīlɔn ā.

⁴Eko nɛ̄ Usedekíya, ɔcɛ́ kú Ujúda, mɛ́mla odúúdú aícɔ́ɔja kú ɔlɛ́ nū lɛ ɔdā nōo yɔ̄ í yá ā má ā, é tíne kéē kwú kwu ŋmá igelī ā otú. É kwú bū ɔwɛ kú ɛhɔ̄ kú ɔlɛ́ ɔcɛ́ ā, bū okómpinu nɛ̄ ɔdɔ ɛpa ā gaá jīla ɔhá ā. É bá í kwu ga ɛgiyí ɔpɛ́ kú Ujɔ́dan ā.

⁵Amáŋ aícɔ́ɔja kú Ubábīlɔn ā nū uwá inya gaá lɛ Usedekíya kwú ajɛ kpátáá, nōo kwu Ujérīko ajaajɛ ā. Anɔ́ɔ é kwú ɔ̄ ú gé lɛ ɔcɛ́ kú Ubábīlɔn Unebúkádinēsa, nōo yɔ̄ igelī nēé hī ka Uríbla, ipú ajɛ kú Uhámāti ā. Abɔ́ɔ ā, Unebúkádinēsa lɛ ɛpɔ̄bí ŋmó ɔ̄.

⁶Uríbla abɔ́ɔ ā, ipééyī Usedekíya, ó kwú ayí kú Usedekíya í kpó ŋmó. Ó klla le odúúdú aígabɔ̄ kú ɔlɛ́ nū ā kpó ŋmó dúú.

⁷Igbīhi ɛ̄nyā ā, ó lɛ Usedekíya eyī kpó pu klla lɛ agbá kpó kwu ɔ̄, cɛ́ɛ́ kéē bī ɔ̄ ga Ubábīlɔn.

⁸Eko nyā, ācɛ Ubábīlɔn ā kwú agblɔ̄cɛ́ ā mɛ́mla odúúdú aɔ́lɛ́ kú ācɛ kú Ujúda ā í kpó tū ɔlá. É klla kwú ɔdɔ kú Ujerúsālɛm ú wúlatāajɛ.

⁹Ámōmɛ ā, Unebusárādan, otrɛ̄yí dúúdú kú aícɔ́ɔja ā, kwú ācɛ nēe hile ipú igelī ā, mɛ́mla ācɛ nēe cɔ̄nyā pɛ́ wā ɛgiyí nū ā í kpó aɔ́fiyɛ ga Ubábīlɔn.

¹⁰Aólɛhá mɛ́mla ācɛ nēé lɛ agbénú dúúmā ŋ́ mā nɛ̄ Unebusárādan mā uwá tá Ujúda á. Anɔ́ɔ ó klla lɛ ajɛ mɛ́mla ɛhɔ̄ kú ɔcí ufáyin kpó lɛ uwá á.

¹¹Amáŋ Unebúkádinēsa, ɔcɛ́ kú Ubábīlɔn ā, lɛ ɔ́da nyā je lɛ Unebusárādan, otrɛ̄yí dúúdú kú aícɔ́ɔja kú nū ā kahíníī,

¹²“Aá nyɔ̄ kú aá gaá tíne Ujeremíya cɛ́ɛ́ ka aá lɛ leyī kwu ɔ́ lɔhi. Aá yá ɔ ɔdōbɔ̄bí dúúmā ŋ́. Amáŋ aá lɛ ɔdā dúúmā nōó tíne ā yá lɛ ɔ́.”

¹³Anɔ́ɔ Unebusárādan mɛ́mla aígabɔ̄ nɛ̄hi ɔhá nēé hī ka Unebúsāsban, Unágalu Sarɛ̄sa mɛ́mla odúúdú aótrɛ̄yí ɔhá kú aícɔ́ɔja kú Ubábīlɔn ā,

¹⁴lɛ ɛhɔ̄ tū gaá lɛ Ujeremíya bī wɛ̄ɛcɛ ŋmá ipú inū kú ācogbāajɛ kú agblɔ̄cɛ́ ā. Anɔ́ɔ é kwú ɔ̄ ú tū Ugɛdalíya, ɔyí kú Ahíkam, ɔyɔ́ɔ́yí kú Ussafán ā abɔ̄ á. É ka ɔ́ɔ lɛ ɔ́ bī ga ɔlɛ́ nū ɛbɔ́. Anɔ́ɔ Ujeremíya lā abɔ́ɔ ipú ācɛ ā á.

¹⁵Eko nɛ̄ Ujeremíya yɔ̄ agbá ipú inu kú ācogbāajɛ kú agblɔcɛ́ ā kpɔ́ ɛ́ɛ́ mā, Ɔwɔicō kɛlā nyā lɛ ɔ́.

¹⁶Ó kahíníī, “Ujeremíya, da Ɛbɛdimɛ́lɛ̄ki, ɔ̄cɛ Itiyópīya ā, ka ami, Uyáwɛ, nōo lɔfú fíyɛ́ dúú, nōo wɛ Ɔwɔicō nɛ̄ Ísraɛ̄lu gē gbɛ̄ɛ̄gbā ā ɔ́ɔ kahíníī, ‘Ɛ́gɛ́nɛ̄ n ka ka n géē yá a, n géē je igelī nyā yíífi. Ó wɛ ɔdōōlɔhi nɛ̄ n gáā yá igelī nyā ā ŋ́. Eko nōó í yá ā, a kē í yɔ̄ abɔ́ɔ géē má ɔ̄.

¹⁷Amáŋ ami nōo wɛ Óndú ā géē gbō uwɔ. É gáā je uwɔ lɛ ācɛ nɛ̄ a géē yúufi uwā ā ŋ́.

¹⁸N géē lɛ oyēeyī kú uwɔ tū, é kē gáā ŋmó uwɔ ŋ́. Ami nōo wɛ Ɔwɔicō ā ka a géē wi, ohígbū ka a lɛ ɔtū ce um.’”