Read idoma UJƐRƐMÍYA 4 Bible Online

UJƐRƐMÍYA 4 - idoma bible

UJƐRƐMÍYA 4

¹Óndú ā kahíníī, “Ācɛ kú Ísrɛ̄lu, ɔ́dāŋ ka aá tíne ō kwúcē, aá kwúcē wā ɛgiyí um. Aá kwú aɛ́cí nɛ̄ aá ī pā ā, nēe ī wú um ɔtū ā í kpó bónū, ká aá gbā um ɛ̄gbā kpaakpa.

²Aá kóō bī iyē kú um lɛ gbɛka ipú ɔkwɔ̄ɔ̄kwɛ̄yí mɛ́mla okpaakpa. Ɔ́dāŋ nɛ̄ ɔ́ɔmā le lɛ ā, odúúdú aéwo kú ɛcɛ ā géē da um ka amíyɔ̄ hɔ́há ce aá. É klla í bá ī gwō ohígbū ka é le um jé.”

³ Óndú ā da ācɛ kú Ujúda mɛ́mla ācɛ nēe lā Ujerúsālɛm ā kahíníī, “Aá lɛ ɔtū kú aá tútū lɔhi ká aá gbā Ɔwɔicō ɛ̄gbā icííci lɛbɛɛka ɛ́gɛ́nɛ̄ ɔ̄cɛ gē hí ajɛ nōó húmáyī hí ŋ́ o yá kóō híī nyī ɔdɛ̄hɔ̄ kú nū tū ipú ácí ujē áncā ŋ́ mā.

⁴Aá lɛ ɔtū kú aá pīyabɔ̄ cɛ́ɛ́ kú aá kwú īyī aá ú gā um. Ācɛ kú Ujúda mɛ́mla ācɛ nēe lā Ujerúsālɛm ā, ɔ́dāŋ ka aá yá lɛ ā ŋ́, n géē cɔ̄nū nɛ̄ɛ̄nɛ̄hi da aá ohígbū aɔ́dā obɔ̄bí nɛ̄hi nɛ̄ aá yá ā. N géē kpó aá yíífi bɛ̄ɛka ɔlá nōo gē yi nɛ̄ ɔ̄cɛ dúú í gáā nyí ɔ̄ glá ŋ́ mā.”

⁵Óndú ā da um kahíníī, Lɛ opo tá ipú odúúdú ajɛ ā! Dɛ̄gba tɛ́cɛ gbōmgbōm. Le ka lɛ ācɛ kú Ujúda mɛ́mla ācɛ nēe lā Ujerúsālɛm kéē kwinya ga aígelī nɛ̄hi nēé le igá olɔfú cē tū uwā ā.

⁶Lɛ otúta miya kwu ɔwɛ Ujerúsālɛm. Aá kwinya nyɔ̄ í tayínū abɔ́ɔ, aá kpó eko bónū ŋ́. Ohígbū ka n yɔ̄ ī bī ámíyā mɛ́mla ífi nɛ̄hi wā ŋmá ɛhícō.

⁷Ɔ̄cɛ éyi nōo ī kpó aéwo yíífi gbɔɔ́ ō wā lɛbɛ̄ɛka ágábá nōo gē wɛ̄ɛcɛ ŋmá ɛga otayínū kú nū ā ɛɛ́. Ó gē wā í je ajɛ Ujúda yíífi. É géē je aígelī nɛ̄hi kú Ujúda ā kpó catāajɛ nēé í tá alácɛ̄, nɛ̄ ɔ̄cɛ dúúmā í gáā lā anú ŋ́.”

⁸Anɔ́ɔ n da ācɛ ā kahíníī, “Ó lɛ ā, aá kwu īlī ekwu ú kpó wiiyē ká aá jikwū klla tɛ̄gíkwū. Ohígbū ka Óndú ā yɔ̄ ī cɔ̄nū nɛ̄hi da alɔ nēe wɛ ācɛ Ujúda ā kpɔ́ ɛ́ɛ́.”

⁹Óndú ā klla kahíníī, “Ɛ̄cī ɔ́ɔmā, ɔtū géē gbenyi lɛ aɔ́cɛ́ mɛ́mla aígabɔ̄ kú uwā. Ufi nɛ̄hi géē kwú ācōgwɛ́ɛya ā, eyījii nɛ̄hi géē yá ācomɛ́ɛbɛ ā.”

¹⁰Anɔ́ɔ n kahíníī, “Óndú ā, nōo wɛ Ɔwɔicō ā, a lɛ ācɛ kú Ujerúsālɛm plla dúúdú. Á da uwá ka ɛbɔ́ ɔ́ɔ géē yɔ̄, amáŋ ɔkpacaŋ́gelī kē ce uwá ɔkɔ á.”

¹¹Eko géē wā, nɛ̄ Óndú ā géē da ācɛ kú Ujerúsālɛm ka owu okwɔ́lá ɔ́ɔ yɔ̄ ī tá klá uwá ŋmá ipú ígbíli. Ó gáā wɛ owu nōo gē tá ɛmɛɛma nɛ̄ ɔ̄cɛ gē tá igwu owu ipú nú ŋ́.

¹²Óndú ā kahíníī, “N géē tū owu nɛ̄hi olɔfú fíyɛ́ ɔ́ɔmā gé le uwá. Ami abɔ̄yī um yɔ̄ ī ŋmó uwā ɛpɔ̄bí á.”

¹³N klla kahíníī, “Má ɔ̄, olɛlā ā kpó aícɔ́ɔja kú nū bá ī wā wuuu bɛ̄ɛka ojujā ā. Aúgbɔ́ɔnya kú ɛfú kú uwā bá gē wā kwūūū bɛ̄ɛka ofúlutu nɛ̄hi ā. Aɔ́nya kú ɛfú kú uwā kwinya fíyɛ́ ɛ́gɛ́nɛ̄ ígbáanɔ okpé gē wu á. Alɔ gebí ɛɛ́, ákú alɔ mɛ ɛ́ɛ́!

¹⁴Ācɛ kú Ujerúsālɛm, aá lɛ odo kú aá na yēŋēē ŋmá ɔ́bíipú, cɛ́ɛ́ kú aá géē le nyatá. Aá géē bá ī gbo ohílīpú obɔ̄bí piyóó mɛ́ ŋ́ŋ̄?

¹⁵Ācocɛ̄hɔ̄ ŋmá igelī kú Udáni mɛ́mla ɛyí aɛ́fu kú Ɛ́frem bá ī bī ɔ̄kā obɔ̄bí wā kéē bá ī kpó aá yíífi á.

¹⁶Óndú ā kahíníī, “Da aéwɔhá, ká ā klla da ācɛ Ujerúsālɛm ka aólɛlā bá ī wā ŋmá ajɛ nōo yɔ̄ ɛga oligbó ɛ́ɛ. Aólɛlā nyā í dɛ̄gba ogwú lɛyíkwu aígelī kú Ujúda.

¹⁷É klla géē yɛ Ujerúsālɛm jīla tá lɛbɛ̄ɛka ācɛ nēe yɛ ajɛ ɛhɔ̄ jīla tá bá ī gbō ɔ̄ ā. Ohígbū ka ācɛ kú Ujerúsālɛm lɛ ikpɛ̄yí olɔfú yá tá ami nōo wɛ Óndú ā.

¹⁸Anɔ́ɔ Ujeremíya kahíníī, “Ācɛ kú Ujúda, aá bī ɛ̄nyā wā í klá īyī aá á ŋmá lɛ ucē kú aá nɛ̄ aá yá ā á. Ɔdā olɔnɔ nōo yɔ̄ ī yá nyā wɛ ōwē kú italā nɛ̄ aá gē má ohígbū ɔbíipú kú aá. Ó kē ī kwú aá iyē bɛ̄ɛka ɔdā nēé lɛ ɛ̄wā gwū aá odo bēhé ā.

¹⁹Ɔnɔ nɛ̄ um yɔ̄ ī jé ā le fíyɛ́ um abɔ̄. Ɔtū yɔ̄ ī hɛ́ um ko nɛ̄hi. Ń lɛ okónu klá glá ŋ́. N yɔ̄ ī pó abɔ̄ é bá ī tá opo klla bá ī dɛgba ogwú.

²⁰Ámíyā éyi kwu ce amíyā ɔhá jāā gbéeko nōo odúúdú éwo ā má tá alácɛ̄ ɛɛ́. Acígilí é kwú aɔ́lɛ́ kú alɔ ú kpó yíífi dúúdú ɛɛ́.

²¹N géē yɔ̄ gē má ɛfú nōo yɔ̄ ī kpó alɔ ā, klla í yɔ̄ ī pó opo kú ɛfú nyā piyóó ōō?”

²²Óndú ā kahíníī, “Ācɛ ɔlɛ́ um ā wɛ aólíla. É jé um ŋ́. É lɛbɛ̄ɛka ayí olíla nēé jé ɔdā dúúmā ŋ́ mā. Ɔdōbɔ̄bí ofōōfūnū nēé jé ō yá á, amáŋ é yá ɔdā dúúmā nōo lɔhi glá ŋ́.”

²³Ujelemiya ka, N pīyeyī má ɛcɛ, ó le ŋmíkpākplā klla tá alácɛ̄. N klla má ɔkpáncō, ó kē le dobū.

²⁴N pīyeyī má aɛ́fu, é kē bá ī jíliyē. Aɛ́fu nɛ̄ŋcɛ́ ā kē bá ī túwɔɔ́ɔ́ yɛɛ́ ŋmá abɔ̄ éyi ga abɔ̄ ɔhá.

²⁵N má ka ɔ̄cɛ dúúmā í yɔ̄ ɛɛ́ gɛ ŋ́. Kwu aígbáanɔ ā le pɛ́ wu nyɛ̄ɛ̄ ɛɛ́.

²⁶Ajɛ̄hɔ̄ olɔhi ā kwú pīya ígbíli. Aígelī nɛ̄hi ā le wúlatāajɛ, ohígbū ka Óndú ā le cɔ̄nū nɛ̄hi.

²⁷Óndú ā ka odúúdú ɛcɛ ɔ́ɔ géē je pīya alácɛ̄, mɛ́mla ígbíli, amáŋ anúɔ ɔ́ɔ gáā je ɔ́ yíífi dúúdú ŋ́.

²⁸Ɛcɛ géē yɔ̄ símm bɛ̄ɛka ɔ̄cɛ nōo yēkwu ā. Ɔkpáncō í je dobū. Óndú ā, lɛ ɛlā ka ɛɛ́. Ó kē gáā pīya ɔtū kú nū abɔ̄ ŋ́. Ó le ɔtū kú nū ŋmó tá ɛɛ́, ó kē gáā cīgbīhi ŋmá anú ŋ́.

²⁹Ɛgba nɛ̄ ācɛ okpɛ́fú ɔnya, mɛ́mla ācotɔ́yī ā géē dɛ̄ ā, géē cɛ̄ lɛ odúúdú ācɛ kwinya nyɔ̄ í tayínū. Ācɛ ōhī géē kwinya gā ipú ūpū, aɔ́há géē kwinya gicō ɛyí aápátɛ́cɔ̄. Odúúdú aígelī ā géē je tá alácɛ̄, nɛ̄ ɔ̄cɛ dúúmā í gáā lā uwá ŋ́.

³⁰Ācɛ kú Ujerúsālɛm, aá le jī ɛɛ́! Ó lɛ ā ɔdí nɛ̄ aá gbɛlá ɛ́ɛ́ nɛ̄ aá ī yá ucē bɛ̄ɛka akwuna nōo lɛ īlī nɔ̄wá bōō nōo gbɔɔ́lá nɛ̄hi wiyē ā. Ó klla bī ɛ́cɛ mɛ́mla ɔká le ifa yá klla lɛ ɛwɔ́ nya eyī kóō héyīfuuú. Aá bá ī yá áncā bɛ̄ɛka akwunā ɔ́ɔmā nēe ī yá īyī nū kóō jɔ́ncɛ́nyā áncā ā. Aéwo nēe ī yá ɛma tá ā bá ī bɛ́yíkwu aá, gē tíne kéē kpó aá ŋmó ɛɛ́.

³¹N yɔ̄ ī pó ikwū ōje bɛ̄ɛka ɔnyā nɛ̄ ɔma lɛ ɔ́ kwú ā. N klla yɔ̄ ī pó íbá bɛ̄ɛka ɔnyā nōo yɔ̄ ī mɔyí aflɛ́yí kú nū ā. Ācɛ Ujerúsālɛm bá ī jikwú klla bá ī nya, ī tíne ō fu owu. É lɛbɛ̄ɛka ɔyípɔ́ncɛ́nyā nōo le abɔ̄ kú nū nāńdaa yɔ̄ ī dɛ̄ kahíníī, “N le jí ɛɛ́! É ī wā í je um ŋmó ɛ́ɛ́.”