Read idoma UJƐRƐMÍYA 40 Bible Online

UJƐRƐMÍYA 40 - idoma bible

UJƐRƐMÍYA 40

¹Eko nɛ̄ otrɛ̄yí kú aícɔ́ɔja kú Ubábīlɔn, Unebusárādan lɛ um hɛ́tá, Uráma ā, Ɔwɔicō lɛ ɛlā ka gā um. É lɛ agbá kpó kwu um abɔ̄ mla odúúdú ācɛ kú Ujerúsālɛm mla ācɛ kú Ujúda nēé ba í kpó alagbá ga Ubábīlɔn ā gbɔbū.

²Amáŋ otrɛ̄yí kú aícɔ́ɔja ā lɛ um hīgwu wā ɛkwúbá, da um kahíníī, “Óndú ā, nōo wɛ Ɔwɔicō nɛ̄ a ī gbā ā ka anúɔ géē je ajɛ nyā yíífi.

³Ícɛ nyā, ɔdā nōó ka ɔ́ɔmā le yá ɛɛ́. Ɔdā dóódu ā yá aá lɛ ā, ohígbū ka aá lɛ ɔdōbɔ̄bí yá ɛgiyí Ɔwɔicō, klla tá ō lɛyítáajɛ lɛ ɛlā nōo ka ā.

⁴abālɔbányā n géē je agbá nōo tū uwɔ abɔ̄ ā wī hɛ̄ uwɔ abɔ̄ tá, klla í hɛ́ uwɔ tá. Ɔ́dāŋ́ koó he uwɔ ɔtū ō nyɔ̄ Ubábīlɔn mla um, a lɔfú wā glá. N kē í lɛ ɛlá kwu uwɔ lɔhi. Amáŋ ɔ́dāŋ ka á tíne ō wā mla um ŋ́, odúúdú ajɛ nyā tá ga uwɔ. Ɛga dúúmā nɛ̄ a tíne ō nyɔ̄, aá lɔfú nyɔ̄ glá.”

⁵Amáŋ gbɔbū ɛ́ ka n pīyeyī ka n nyɔ̄ ā, Unebusárādan da um kahiníīī, “Kwúcē ga ɛgiyí Ugɛdalíya, ɔyí kú Ahíkam ɔyɔ́ɔ́yí kú Ussáfan, nɛ̄ ɔcɛ́ kú Ubábīlɔn je ɔ́ yá igbómína kú odúúdú aígelī kú Ujúda ā. Nyɔ̄ ka á gaá lā pī ɔ̄, cɛ́ɛ́ kú ā lā mɛ́mla ācɛ ɔlɛ́ uwɔ. Amáŋ ɛga dúúmā nōo he uwɔ ɔtū nɛɛ, ayíka a nyɔ̄.” Anɔ́ɔ ó lɛ ɛhi yá um klla lɛ ɔdōlé je ga um, mābɔ̄ um tá ká n nyɔ̄ á.

⁶Anɔ́ɔ n nyɔ̄ gaá lā mɛ́mla Ugɛdalíya ipú ajɛ kú Umíspa, ipú ācɛ nēe hile ipú ajɛ ā á.

⁷Aótrɛ̄yí kú aícɔ́ɔja ōhī kú Ujúda mɛ́mla aícɔ́ɔja kú uwá nēe kwāajɛ eyīyɛ̄ɛcɛ kú igelī ipácí ā í cɔ̄nyā ɛ́ɛ́ ŋ́. É le pó ka ɔcɛ́ kú Ubábīlɔn ɔɔ́ kwu Ugɛdalíya ú yá igbómína kú Ujúda, klla kwú ācɛ ohile nēe kpó ga Ubábīlɔn ŋ́ mā í tū ɔ̄ abɔ̄. Ācɛ nēé mā uwā tá ā wɛ ācɛ ogbɛhá fíyɛ́ dúú kú ipú ajɛ ā.

⁸Anɔ́ɔ aórɛ̄yí kú aícɔ́ɔja nyā, le yɛ tá ɛgiyí Ugɛdalíya, ipú ajɛ kú Umíspa mɛ́mla ācɛ ɔlɛ uwá ā. Aótrɛ̄yí ā wɛ Íssmɛ̄lu, ɔyí kú Unɛtánīya, mɛ́mla Ujohánan mɛ́mla Ujónátan, ayí kú Ukaréya, mɛ́mla Useráya, ɔyí kú Utanhúmēti, mɛ́mla ayí kú Ɛfāyi nōo ŋmá Unétofa ā, mɛ́mla Ujɛsaníya, nōo ŋmá Umáaka ā.

⁹Anɔ́ɔ Ugɛdalíya da uwá kahíníī, “N géē da aá ka aá yúúfi ō cɔ̄nyā lɛ ɔcɛ́ kú Ubábīlɔn ŋ́. Aá lā ajɛ amānyā, kú aá gbā ɔcɛ́ kú Ubábīlɔn ɛ̄gbā. Ó kē í lɔhi lɛ aá.

¹⁰Ami abɔ̄yī um yɔ̄ Umíspa amānyā, kē í kwɛyí aá eko dúú nɛ̄ ācɛ kú Ubábīlɔn ga. Amáŋ aá nyɔ̄ í lā aígelī nɛ̄ŋ́cɛ́ nɛ̄ aá mīyɛ tū abɔ̄ ā. Aá kóō yá ejé kú aá kpó tū. Aá kē tú anɔ̄ ólīifu, mɛ́mla aíkpɔ̄cí bá.”

¹¹Ɛpléeko ɔ́ɔmā odúúdú ācɛ kú Ísrɛ̄lu nēe bá ajɛ Umówābu, mɛ́mla Ámɔ̄ri, mɛ́mla Ɛ́dɔm mɛ́mla aéwɔhá ā le pó ka ɔcɛ́ kú Ubábīlɔn ɔ́ɔ lɛ ɛga je lɛ ācɛ kú Ísrɛ̄lu ōhī kéē lā Ujúda. Ka ɔ́ɔ klla kwú Ugɛdalíya ú yá igbómína kú Ujúda ɛɛ́.

¹²Anɔ́ɔ é nyɛ̄ɛ̄ ŋmá ɛga dóódu nēé pahīla nyɔ̄ ā, kwúcē wā Ujúda á. É ga ɛgiyí Ugɛdalíya Umíspa. Abɔ́ɔ ā, é gaá lɛ ejé mɛ́mla aíkpɔ̄cí túbá nɛ̄hi.

¹³Igbīhi ɛ̄nyā, Ujohánan mɛ́mla aótrɛ̄yí kú aícɔ́ɔja nēé cɔ̄nyā ɛ́ɛ́ ŋ́ mā, ga ɛgiyí Ugɛdalíya Umíspa.

¹⁴Anɔ́ɔ é da ɔ́ kahíníī, “Á jé ka Ubáalīsi, ɔcɛ́ kú Ámɔ̄ri, lɛ Íssmɛ̄lu tɛ̄hɔ̄ kóō gaá kwú uwɔ ú ŋmó ŋ́ nɛɛ?” Amáŋ Ugɛdalíya í cɛ̄ ɛlā nēé ka nyā ŋ́.

¹⁵Anɔ́ɔ Ujohánan da ɔ́ wɛɛlɛ kahíníī, “N nyɔ̄ gaá kwú Íssmɛ̄lu ú ŋmó. Ɔ̄cɛ dúúmā í kē gáā jé ɔ̄cɛ nōo ŋmó ɔ̄ ā ŋ́. Ɔdí yá nɛ̄ alɔ géē je ɛga lɛ ɔ́ kóō kwú uwɔ ú ŋmó āa? Ohígbū ka ɔ́ɔmā géē cɛ̄ lɛ odúúdú ācɛ Ujíyu nēe túbá jīla uwɔ tá nyā je kpó pahīla kpɔ́. Ɔ́ɔmā kē ī cɛ̄ lɛ odúúdú ācɛ nēe hile Ujúda ā je yíífi.”

¹⁶Amáŋ Ugɛdalíya da ɔ́ kahíníī, “A yá ɔdā nɛ̄ a ka ɔ́ɔmā ŋ́. Ɛlā nɛ̄ a ka lɛyíkwu Íssmɛ̄lu nyā í wɛ ɔkwɛ̄yí ŋ́.”