Read idoma UJƐRƐMÍYA 41 Bible Online

UJƐRƐMÍYA 41 - idoma bible

UJƐRƐMÍYA 41

¹Ipú ɔyā ahāapa kú iháyí ɔ́ɔmā, Íssmɛ̄lu, ɔyí kú Unetaníya, ɔyɔ́ɔ́yí kú Ɛlíssāma, éyi kú ācɛ ɔlɛ́ ɔcɛ́, nōo kē wɛ éyi kú aótrɛ̄yí kú aígabɔ̄ kú ɔcɛ́ ā le tá Umíspa mɛ́mla ācɛ igwó gaá má Ugɛdalíya. Eko nēé bá í lé ɔdōlé tɔ̄ha á,

²Íssmɛ̄lu mɛ́mla ācɛ igwó ā lɛ ɔkpacāŋ́gelī kú uwā kpó pi ŋmá apɛ́ kwú Ugɛdalíya ú ŋmó.

³Íssmɛ̄lu lɛ ācɛ kú Ísrɛ̄lu nēe bá Umíspa pī Ugɛdalíya ā kpó ŋmó dúú, mɛ́mla aícɔ́ɔja kú Ubábīlɔn nēe bá abɔ́ɔ mɛ́mla uwá ā.

⁴Oŋmɔ́ɔ̄cí nū, ká ɔ̄cɛ dóódu kóō í pó ka é le Ugɛdalíya ŋmó dúú ā,

⁵Ācɛ ofɛnɛ faajɛ ŋmá Ussɛ́kɛm, mɛ́mla Ussílo, mɛ́mla Usamérīya. É lɛ ɔnwāgba kú uwā wā, lɛ īlī kú uwá kpó híla, lɛ ewo wu klla ɛyí. É yá lɛ ā kéē mafú ka aá yɔ̄ ɔtūnobí. É bī īkpɔ̄dɛ̄hɔ̄ mɛ́mla ɔtulalī gáā le gwɛ́ɛya ipú Agblīihɔ-nɛ̄hi ā.

⁶Anɔ́ɔ Íssmɛ̄lu le bɛ̄cɛ ŋmá Umíspa gaá jīla uwá ɔwɛ á. Ó yɔ̄ ī jikwū abɔ̄ ó yɔ̄ ī nyɔ̄ ā. Eko nōó ga ɛgiyí uwā ā, ó da uwá kahíníī, “Aá ŋŋŋmá, aá wā gaá má Ugédalíya, ɔyí kú Ahíkam.”

⁷Obōobū nēé kwú bēhé wā igelī ā, Íssmɛ̄lu mɛ́mla ācɛ igwó ā, lɛ uwá kpó ŋmó lɛ okwū kú uwá kpó tá tū ipú obugā.

⁸Amáŋ ācɛ igwó éyi bá ipú ācɛ ā nēe da Íssmɛ̄lu kahíníī, “Kóocō ā je alɔ kpó ŋmó ŋ́. Alɔ lɛ īkpɔ̄dɛ̄hɔ̄,mɛ́mla umu, mɛ́mla anɔ̄, mɛ́mla ɛnwú kpó tayínū ipú ɛhɔ̄ kú alɔ.” Anɔ́ɔ ó mābɔ̄ uwá ā tá á.

⁹Obugā nɛ̄ Íssmɛ̄lu kpó okwū kú ācɛ nōo ŋmó ā tū ɔɔ́ ā wɛ ɛnɛ̄hi. Anú wɛ obuga nɛ̄ Ása, ɔcɛ́ kú Ujúda tɛtɛ, bū eko nɛ̄ Ubássa, ɔcɛ́ kú Ísrɛ̄lu yɔ̄ í kpɛ́fú tá ɔ̄ ā á. Íssmɛ̄lu le obugā ɔ́ɔmā mu mɛ́mla aókwū ā.

¹⁰Anɔ́ɔ ó kwú ayínɔ̄nyā kú ɔcɛ́ ā í kpó ɔfiyɛ mɛ́mla odúúdú ācɛ ohile, nēe bá Umíspa ā nɛ̄ Unebusárādan otrɛ̄yí kú aícɔ́ɔja kú Ubábīlɔn kpó tū Ugɛdalíya abɔ̄ ā. Íssmɛ̄lu lɛ uwá kpó ɔfiyɛ, anɔ́ɔ ó gbɔɔ́ ō nyɔ̄ lɛyíkwu ajɛ kú Ámɔ̄ri á.

¹¹Anɔ́ɔ Ujohánan mla odúúdú aótrɛ̄yí kú aícɔ́ɔja nēe bá mɛ́mla anú ā, le ɔdōbɔ̄bí nɛ̄ Íssmɛ̄lu yá nyā pó á.

¹²Anɔ́ɔ uwá mɛ́mla aícɔ́ɔja kú ɔlɛ́ uwá gbɔɔ́ ō nū ɔ̄ inya gaá lɛ ɔ́ hɛ́tū okónu ókpoó nɛ̄hi nōo kwu Ugíbēyɔn ā.

¹³Eko nɛ̄ ācɛ nɛ̄ Íssmɛ̄lu kwú aɔ́fíyɛ́ ā lɛ Ujohánan mɛ́mla aótrɛ̄yí kú aícɔ́ɔja má ā, ɔtū he uwá nɛ̄hi.

¹⁴Anɔ́ɔ é kwú pīyeyī kwúcē ga ɛgiyí Ujohánan, ɔyí kú Ukaréya á.

¹⁵Amáŋ Íssmɛ̄lu mɛ́mla ācɛ ɔlɛ́ nū ahātá le hɛ́ Ujohánan abɔ̄ le kwu ga ajɛ kú Ámɔ̄ri.

¹⁶Anɔ́ɔ Ujohánan mɛ́mla aótrɛ̄yí kú aícɔ́ɔja ā, kwú ācɛ ā kpó kwúcē ŋmá Ugíbēyɔn. Ācɛ ā wɛ ācɛ nɛ̄ Íssmɛ̄lu kwú aɔ́fiyɛ ŋmá Umíspa eko nōó lɛ Ugɛdalíya, ɔyí kú Ahíkam, mɛ́mla aícɔ́ɔja, mɛ́mla ācɛnyā, mɛ́mla ayípɛ̄, mɛ́mla ācɛ nēé lɛ uwá búdá nēe wɛ aígabɔ̄ ɔlɛ́ ɔcɛ́ ā kpó ŋmó ā á.

¹⁷É yɛ nyɔ̄ gaá māháyi Ugerutkínham nōo kwu Ubɛ́tlɛhɛ̄m ajaajɛ ā. É tíne ō bū ɔwɛ ɔ́ɔmā nyɔ̄ Íjīpiti.

¹⁸É bá ī tíne ō kwu ŋmá ɛgiyí ācɛ kú Ubábīlɔn ohígbū ka é bá ī yúúfi uwā ohigbū Ugɛdalíya, ɔyí kú Ahíkam, nɛ̄ ɔcɛ́ kú Ubábīlɔn je yá igbómína kú Ujúda, nɛ̄ Íssmɛ̄lu, ɔyí kú Unetaníya je ŋmó ā.