Read idoma UJƐRƐMÍYA 42 Bible Online

UJƐRƐMÍYA 42 - idoma bible

UJƐRƐMÍYA 42

¹Anɔ́ɔ ɛjɛ̄ɛ̄jī Aótrɛ̄yí kú aícɔ́ɔja mɛ́mla Ujohánan ɔyí kú Ukaréya mɛ́mla Asárīya, ɔyí kú Uhosáya mɛ́mla ɛjɛ̄ɛ̄jī ācɛ ā, ŋmá ɛnɛ̄ŋcɛ́ ga ɛnɛ̄hi ā ga ɛgiyí Ujeremíya á.

²É da Ujeremíya, ɔ̄comɛ́ɛbɛ ā kahíníī, “Kóocō, alɔ í gbɔ̄ɔkɔ̄ ga uwɔ ká ā gbɔ̄ɔkɔ lɛ Ɔwɔicō, nōo wɛ Ɔwɔicō nɛ̄ a ī gbɛ̄ɛ̄gbā ā lɛ alɔ. Alɔ nēe le lígíí nɛ̄ a má nyā wɛ ācɛ nēe hile ŋmá ipú ɛwa ā. Awɔ abɔ̄yī uwɔ kē má lɛ ā.

³Gbɔ̄ɔkɔ cɛ́ɛ́ ká Ɔwɔicō, nōo wɛ Ɔwɔicō, nɛ̄ a ī gbɛ̄ɛ̄gbā ā kóō ma ɔwɛ nɛ̄ alɔ géē yɛ ā fu lɛ alɔ mɛ́mla ɔdā nɛ alɔ cíkā ō yá ā.”

⁴Ujeremíya, ɔ̄comɛ́ɛbɛ ā da uwá kahíníī, “N lɛ ɛlā kú aá ā pó ɛɛ́, n kē í gbɔ̄ɔkɔ lɛ Uyáwɛ, nōo wɛ Ɔwɔicō nɛ̄ aá gē gbɛ̄ɛ̄gbā ā, ɛ́gɛ́nɛ̄ aá ba lɛ ā. Ohi dóódu nōó tá aá, ń kē gáā lɛ ɔdā dúúmā tayínū lɛ aá ŋ́.

⁵Anɔ́ɔ é da Ujeremíya ka, Óndú ā kóō cīijáalí ɔkwɛ̄yi kpɔ́cí tū alɔ, ɔ́dāŋ ka alɔ í yá ɔdā nɛ̄ Ɔwɔicō, nōo wɛ Ɔwɔicō nɛ̄ a ī gbā ā, kā ālɔ̄ ɔ́ɔ yá ā ŋ́.

⁶Ó wɛ obɔ̄bí ámāŋ olɔhi, alɔ géē lɛyítáajɛ lɛ ɛlā kú Ɔwɔicō kú alɔ, nɛ̄ alɔ gē tū uwɔ ɛhɔ̄ nyɔ̄ ɛgiyí nū ā. Alɔ í yá lɛ ā cɛ́ɛ́ kóō le lɔhi lɛ alɔ, abɔ̄ alɔ í lɛyítáajɛ lɛ ɔ́ ā.

⁷Ɛ̄cī igwó gā le yɛ ā, Óndú ā lɛ ɛlā ka lɛ Ujeremíya.

⁸Anɔ́ɔ ó lɛ Ujohánan, ɔyí Ukaréya mɛ́mla ɛjɛ̄ɛ̄jī aótrɛ̄yí kú aícɔ́ɔja, nēe bá mɛ́mla anú ā hīgwú á, mɛ́mla ɛjɛ̄ɛ̄jī ācɛ ā, ŋmá ɛnɛ̄ŋ́cɛ́ ga ɛnɛ̄hi.

⁹Anɔ́ɔ ó da uwá kahíníī, “Uyáwɛ, nōo wɛ Ɔwɔicō nɛ̄ Ísrɛ̄lu gē gbɛ̄ɛ̄bā ā, nɛ̄ aá tū um ɛhɔ̄ fu ɔ́ ka amíyɔ̄ gbɔ̄ɔkɔ lɛ ɔ́ lɛyíkwu aá ā kahíníī,

¹⁰“Ó kwú um iyē, n kē híjémā ɛ́gɛ́nɛ̄ n yá aá ífi lɛ ā ā. Ɔ́dāŋ́ ka aá bá ajɛ nyā kpɔ́, n géē je aá gicō, ń gáā tū aá wā ajɛ ŋ́, n géē bū aá tū, ń gáā fu aá ɔkwu ŋmá ajɛ ŋ́.

¹¹Aá híī yúúfi kú ɔcɛ́ kú Ubábīlɔn ŋ́. N jé ka aá ī yúúfi nū. Aá kóō le jé ka n géē yɔ̄ pī aá, í gbō aá, klla í nya aá tá ŋmá abɔ̄ kú nū.

¹²N géē ményinyi aá, í cɛ̄ lɛ ɔcɛ́ kú Ubábīlɔn ményinyi aá, klla ī cɛ̄ lɛ aá kwúcē ga ajɛ ɔlɛ́ aá.

¹³Amáŋ aá híī tá ō lɛyítáajɛ lɛ ɛlā kú Uyáwɛ nōo wɛ Ɔwɔicō kú aá ā, nɛ̄ aá tá ō bá ajɛ nyā ŋ́.

¹⁴Aá híī ka ka aá ɔ́ɔ géē nyɔ̄ ajɛ Íjīpiti. Ka aá ɔ́ɔ gáā kpɛ́fu abɔ́ɔ ŋ́, ámāŋ pó opo kú ɛfú ŋ́. Ka ɛmiyɛ ɔdōlé ɔ́ɔ kē gáā ŋmó aá ŋ́. Ɔ́dāŋ́ ka aá le ka lɛ ā,

¹⁵Uyáwɛ, nōo lɔfú fíyɛ́ dúú, nōo wɛ Ɔwɔicō nɛ̄ Ísrɛ̄lu gē gbɛ̄ɛ̄gbā ā, kahíníī, “Aá nēe hile Ujúda ā, ɔ́dāŋ nɛ̄ aá kwú eyī kú aá kwu ō nyɔ̄ Íjīpiti gaá lā abɔ́ɔ,

¹⁶ayíka ɛfú mɛ́mla ɛmiyɛ nɛ̄ aá ī yúúfi uwā í nū aá wā ipú ajɛ Íjīpiti, géē wā í kpó aá ŋmó abɔ́ɔ.

¹⁷Ɛjɛ̄ɛ̄jī ācɛ nɛ̄ eyī kú uwā kwú Íjīpiti ō nyɔ̄ gaá lā abɔ́ɔ piíí ā, ɛfú géē lé uwā, ámāŋ́ ka ɛmiyɛ mɛ́mla ōcē obɔ̄bí géē kpó uwá ŋmó. Ohígbū ɔ́ɔmā odúúmā kú uwā í gáā wi ŋmá ífi nɛ̄ n gáā yá kóō yá uwā ā ŋ́.”

¹⁸Uyáwɛ, olɔfú fíyɛ́ dúú, nōo wɛ Ɔwɔicō nɛ̄ Ísrɛ̄lu gē gbɛ̄ɛ̄gbā ā klla kɛlā ɔhá kahíníī, “Ɛ́gɛ́nɛ̄ nɛ̄ n cɔ̄nū nɛ̄ɛ̄nɛ̄hi tū ācɛ nēe lā Ujerúsālɛm, nɛ̄ n yá uwá italā, ɛ́gɔ́ɔmā nɛ̄ nɛ̄ n gáā yá aá ɔ́dāŋ nɛ̄ aá le pɛ nyɔ̄ gaá lā Íjīpiti á. Aá géē wɛ ɛbɛ ohéyī, ācɛ í bī iyē aá le tókónu lɛ ācɛ, é klla í yá aá ɛbɛ́. Aá kē gáā má ajɛ ɔlɛ́ aá eyī gbóógbóō ɛ́ɛ́ gɛ ŋ́.

¹⁹Anɔ́ɔ Ujeremíya klla kɛlā kahíníī, “Ɔwɔicō le da aá, ācɛ Ujúda nēe hile lígíí ā, ka aá híī pɛ nyɔ̄ í lā ajɛ Íjīpiti ŋ́. Ohígbū ɔ́ɔmā, aá le jé ka n lɛ abɔ̄ pīya aá ahɔ̄ ícɛ nyā ɛɛ́.

²⁰Aá jégédē tū um ɛhɔ̄ ka amíyɔ̄ gbɔ̄ɔkɔ lɛ Uyáwɛ nōo wɛ Ɔwɔicō nɛ̄ aá ī gbɛ̄ɛ̄gbā ā, ohígbū aá, ka ɔdā dúúmā nɛ̄ Ɔwɔicō kú aá ā ɔ́ɔ ka ā, nɛ̄ aá géē yá á. Amáŋ onyíleyī nōo ī ŋmɔ́ɔ̄cɛ nɛ̄ aá yá á.

²¹Ohígbū ka abɔ̄ n kē le ka lɛ aá ɛɛ́ mā, aá kē cɛ̄ lɛyítáajɛ lɛ ɛlā kú Uyáwɛ, nōo wɛ Ɔwɔicō kú aá ā, nōó tū um ɛhɔ̄ ka amíyɔ̄ da aá ā gɛ ŋ́.

²²Abālɔbányā, aá le jé pélúú ka aá géē pɛ́ kwú ipú ɛfú mɛ́mla ɔkpɛtā, mɛ́mla ōcē obɔ̄bí, ɛga nōo kwu aá ɔtū ká aá nyɔ̄ í lā ɔ́ɔmā.