Read idoma UJƐRƐMÍYA 43 Bible Online

UJƐRƐMÍYA 43 - idoma bible

UJƐRƐMÍYA 43

¹Ujeremíya lɛ ɛlā nɛ̄ Uyáwɛ, nōo wɛ Ɔwɔicō nɛ̄ uwá ī gbɛ̄ɛ̄gbā ā, le tū ɔ̄ ɛhɔ̄ fu uwá ka lɛ uwá kwɛyí.

²Anɔ́ɔ Asárīya, ɔyí kú Uhosáya mɛ́mla Ujohánan, ɔyí kú Ukaréya mɛ́mla ɛjɛ̄ɛ̄jī ācɛ nēe ī yá aflūmā ā da Ujeremíya kahíníī, “A gē kɛ̄mgbɛ̄ íbí. Ɔwɔicō í tū uwɔ ɛhɔ̄ fu alɔ, ká ālɔ̄ ɔɔ́ híī ga ajɛ Íjīpiti ŋ́ nɛ ŋ́.

³Amáŋ Ubárūku, ɔyí kú Uneríya ā tū uwɔ okónu lɛyíkwu alɔ á. Ó yá kéē lɛ alɔ kpó tū ipú abɔ̄ kú ācɛ Ubábīlɔn, kéē lɛ alɔ kpó ŋmó ámāŋ́ kéē lɛ alɔ kwú aɔ́fiyɛ ga ajɛ ɔlɛ uwá nɛ.”

⁴Anɔ́ɔ Ujohánan, ɔyí Ukaréya mɛ́mla aótrɛ̄yí kú aícɔ́ɔja ā mɛ́mla ācɛ ā tá ō pó ɛlā kú Óndú ā, ka aá ɔ́ɔ géē nyɛ̄ɛ̄ ŋmá ajɛ kú Ujúda ā piíí á.

⁵Amáŋ Ujohánan, ɔyí kú Ukaréya ā mɛ́mla ɛjɛ̄ɛ̄jī aótrɛ̄yí kú aícɔ́ɔja ā lɛ ɛjɛ̄ɛ̄jī ācɛ Ujúda nēe hile pīyɛyí ŋmá éwo dóódu, ɛga nēe pa uwá hīla nyɔ̄ í lā ā kpó á.

⁶Kwu ācɛnyīlɔ mɛ́mla ācɛnyā, ayípɛ̄nɛ̄ŋcɛ́ mɛ́mla ayínɔ̄nyā kú ɔlɛ́ ɔcɛ́, mɛ́mla ɔ̄cɛ dúúmā nɛ̄ Unebusárādan, otrɛ̄yí kú aícɔ́ɔja ogbāājɛ kú Ubábīlɔn mā ɔ̄ tá pī Ugɛdalíya, ɔyi kú Ahíkam, ɔyɔ́ɔ́yí kú Ussafán, kwu Ujeremíya, ɔ̄comɛ́ɛbɛ ā mɛ́mla Ubárūku, ɔyí kú Uneríya.

⁷É pó ɛlā nɛ̄ Ɔwɔicō ka ā ŋ́, le pɛ́ ga ajɛ kú Íjīpiti. É faajɛ gaá lā igelī nēé hī ka Utapánhes ā.

⁸Anɔ́ɔ Óndú ā lɛ ɛlā ka lɛ Ujeremíya abɔ́ɔ ó klá Utapánhes ā ā.

⁹Ó kahíníī, “Kwú aɛ́cɔ̄ nɛ̄hi í ká a kwú uwā í nyi ipú ɔmɛ tū ipú aɔ́blɔ́ɔkwu nēé le yá ɛga nēé ī lɛ ikpó cē ɔ́ ga okónpīinu kú agblɔ̄cɛ́ kú Uféro, nōo yɔ̄ Utapánhes ā. Yá ɔ́ lɛ ā ipéyī ācɛ kú Ujúda.

¹⁰Cɛ́ɛ́ ká ā da uwá kahíníī, “Ami, Uyáwɛ, olɔfú fíyɛ́ dúú, nōo wɛ Ɔwɔicō nɛ̄ Ísrɛ̄lu gē gbɛ̄ɛ̄gbā ā, ka n géē tɛ̄hɔ̄ gáā bī Unebukádinēsa, nōo wɛ ɔ̄cocɛ̄hɔ̄ kú um ā, wā amānyā. Ó kē í je akpa kú ɔcɛ́ kú nū háyi ɛyí aɛ́cɔ̄ nɛ̄ a nyī nyā, klla í je áklɔ̄kpɛ kú ɔcɛ́ kú nū kwu ɛyí uwā.

¹¹Ó géē wā í kpɛ́fú tú ajɛ Íjīpiti. Ācɛ nɛ̄ ōcē obɔ̄bí cíkā ō ŋmó ā, ōcē obɔ̄bí í ŋmó uwā. Ācɛ dúú nɛ̄ é cíkā ō kpó aɔ́fiyɛ ga ajɛ ɔhá ā, é géē kwú uwā nyɔ̄. Ācɛ nɛ̄ é kē cíkā ō kwú ipú ɛfú ā, é géē ŋmó uwā ipú ɛfú ā.

¹²N géē cɛ̄ lɛ ɔ́ tū aágbla kú aɛ́cí kú ācɛ Íjīpiti ā ɔlá. Ó géē yi aɛ́cí ā ōhī ɔlá, klla í kpó aóhī nyɔ̄ ga ajɛ ɔlɛ́ nū. Ɛ́gɛ́nɛ̄ ɔ̄cogbálá gē fu iko ŋmá úwé kú nū dúúdú ā, ɛ́gɔ́ɔmā nɛ̄ Unebukádinēsa géē je ajɛ Íjīpiti tá áncā á. Cɛ́ɛ́ ó kē nyɛ̄ ŋmá abɔ́ɔ ɛbɔ́.

¹³N géē je ɛcɔ̄ nēé le kwu ajɛ lɛ ɛcí ipú Uhɛliyopólīisi, nōo yɔ̄ ajɛ kú Íjīpiti ā catāajɛ, klla í kpó aágbla kú aɛ́cí kú ācɛ Íjīpiti ā yɔɔlá tāajɛ.”