Read idoma UJƐRƐMÍYA 44 Bible Online

UJƐRƐMÍYA 44 - idoma bible

UJƐRƐMÍYA 44

¹Óndú kɛlā gā um lɛyíkwu ācɛ Ujíyu nēe lā ajɛ kú Íjīpiti, ipú aígelī nēé hī ka Umígidɔlu, mɛ́mla Utapánhes, mɛ́mla Umémfīisi mɛ́mla ɛháajɛ kú Íjīpiti, nēé hī ka Upátrɔ̄ɔsi ā.

²Ó ka amíyɔ̄ da uwá kahíníī, “Ami, Uyáwɛ, olɔfú fíyɛ́ dúú, nōo wɛ Ɔwɔicō nɛ̄ Ísrɛ̄lu gē gbɛ̄ɛ̄gbā ā ka, aá abɔ̄yī aá má ɛ́gɛ́nɛ̄ n yá ācɛ Ujerúsālɛm mɛ́mla odúúdú aígelī kú Ujúda ā ífi lɛ ā ā. Jāā kwu ícɛ nyā, uwá tá alácɛ̄ kpɔ́ ɛɛ́, ɔ̄cɛ dúúmā í kē lā ipú uwā ŋ́.

³N yá lɛ ā ohígbū ka ācɛ kú aígelī ɔ́ɔmā yá ɔdōbɔ̄bí nōo cɛ̄ gā um le cɔ̄nū. É gwɛ́ɛya lɛ aɛ́cí kú aéwɔhá, klla gbā aɛ́cí, nɛ̄ uwá ámāŋ́ aá ámāŋ́ aádáádā aá í jé jééjéē ɛ́ ŋ́ mā ɛ̄gbā.

⁴N tū ācocɛ̄hɔ̄ kú um, ācomɛ́ɛbɛ ā, ɛhɔ̄ igbalɛwa kéē da aá ka, aá híī yá ɔdōbɔ̄bí nɛ̄hi nɛ̄ n tū eyījii nyā ā ŋ́.

⁵Amáŋ aá jāhɔ̄ ɛ́ɛ́, nɛ̄ aá gē pó ŋ́. Aá kē mā ucē obɔ̄bí kú aá, ō gwɛ́ɛya lɛ aɛ́cí ɔ́ɔmā tá ŋ́.

⁶Anɔ́ɔ n le cɔ̄nū nɛ̄ɛ̄nɛ̄hi da ācɛ aígelī kú Ujúda, le yá mla uwá bɛ̄ɛka ɔlá ā ipú aígelī ɔhá kú Ujúda ā mɛ́mla aúlāyi kú Ujerúsālɛm á. É le uwá wúlatāajɛ, kwú uwā ú tá alácɛ̄ jāā kwu ícɛ nyā.

⁷Ohígbū ɔ́ɔmā, ami, Uyáwɛ, olɔfú fíyɛ́ dúú, nōo wɛ Ɔwɔicō nɛ̄ Ísrɛ̄lu gē gbɛ̄ɛ̄gbā ā, géē da aá ɔ̄kā ka ɔdí yá ɛ́ɛ́ nɛ̄ aá géē yá īyī aá ɛdɔ ɔ̄dōōbɔ̄bí nɛ̄hi nyā ā. Aá tíne kú odúúdú aá, kwu ācɛnyīlɔ, mɛ́mla ācɛnyā, mɛ́mla ayípɛ̄, mɛ́mla ayípōobene, kóō kwú kpó yíífi, nɛ̄ ɔ̄cɛ dúúmā kú aá í gáā hile gɛ ŋ́ nɛɛ?

⁸Ɔdí yá nɛ̄ aá ge yá um cɔ̄nū ŋmá lɛ ō pá ɛcí, klla í gwɛ́ɛya lɛ aɛ́cí kú aéwɔhá Íjīpiti amānyā nɛ̄ aá wā í lā āa? Aá gē yá lɛ ā, aá géē je īyī aá kpó yíífi, nɛ̄ ācɛ gée bī iyē aá ī tókónū lɛ ācɛ, klla í bá ī yá aá okónu ipú éwo dóódu ipú ɛcɛ.

⁹Aá kwú mlanyi, odúúdú ucē ɔ́bíipú nɛ̄ aádáádā aá, mɛ́mla aɔ́cɛ́ kú Ujúda mɛ́mla anyā ɔlɛ́ uwá, mɛ́mla aá abɔ̄yī aá yá ipú ajɛ kú Ujúda mɛ́mla aúlāyi kú Ujerúsālɛm ā ɛɛ́ ɛ̄ɛ̄?

¹⁰Amáŋ jāā kwu ícɛ, aá tá īyī aá wā ajɛ ŋ́ kpɔ́. Aá ce um ojīlīmā ŋ́, ɛ́ɛ́ nɛ̄ aá gē lɛyítáajɛ lɛ odúúdú íne nɛ̄ n je lɛ aá mɛ́mla aádáádā aá ā ŋ́.

¹¹Ohígbū ɔ́ɔmā ami, Uyáwɛ, olɔfú fíyɛ́ dúú, nōo wɛ Ɔwɔicō nɛ̄ Ísrɛ̄lu gē gbɛ̄ɛ̄gbā ā géē bɛ́yíkwu Ujúda í je ɔ́ yíífi dúúdú.

¹²Ācɛ kú Ujúda nēe hile, nēe lɛ abɔ̄ tū ɔtū wā í lā Íjīpiti ā, n géē je uwá yíífi dúúdú. Odúúdú uwá, kwú ayípɛ̄, kwu anyākwɔ́cɛ, kwu ācɛnyā géē pɛ́ kwú ipú ajɛ kú Íjīpiti. Ɛfú í lé uwā, ámāŋ́ ɔkpɛtā í kpó uwá ŋmó. É géē wɛ ɛbɛ ohéyī lɛ ācɛ. Ācɛ géē bī iyē uwá le tókónu lɛ ācɛ, klla í yá uwā okónu.

¹³N géē bī ɛfú, mɛ́mla ɔkpɛtā, mɛ́mla ōcē obɔ̄bí le yá ācɛ nēe lā Íjīpiti ā italā, ɛ́gɛ́nɛ̄ n yá ācɛ Ujerúsālɛm ā.

¹⁴Odúúmā kú ācɛ Ujúda nēe hile, nēe kwu gā Íjīpiti í lā ā í gáā wi ŋ́. Odúúmā kú uwá í gáā hile oyēeyī nōo géē kwúcē ga ajɛ kú Ujúda ŋ́. Ajɛ Ujúda nōo ŋmó uwá unwū ō nyɔ̄ í lā ɔ́ɔmā, é gáā nyɔ̄ ŋ́, ayíka olígíí kú uwá nēe í wi ā ōfōōfūnū nɛ̄.”

¹⁵Anɔ́ɔ ɛwa nɛ̄hi kú ācɛ ā, kwu odúúdú ācɛnyīlɔ nēe jé ka anyā aá ɛ́ɛ gwɛ́ɛya lɛ aɛ́cí ā, mɛ́mla odúúdú ācɛnyā nēe māháyi abɔ́ɔ ā, mɛ́mla ācɛ kú Ísrɛ̄lu nēe lā ɛháajɛ kú Íjīpiti, nēé hī ka Upátrɔ̄ɔsi ā lɛ ohi tá um. É kahíníī,

¹⁶“Alɔ í gáā pó ɛlā nɛ̄ a ka lɛ alɔ ka Ɔwɔicō ɔ́ɔ ka ā ŋ́.

¹⁷Alɔ cokónu ka alɔ géē gwɛ́ɛya lɛ ɛcí nɔ̄nyā nēé hī ka ‘Ɔcányā kú ɔkpáncō’ ā, klla géē lɛ ejé fu ajɛ lɛ ɔ́. Ɛ́gɔ́ɔmā nɛ̄ alɔ kē gáā yá á. Alɔ géē lɛ ɔtulālī kwu ɔlá lɛ ɔ́ klla í le ejé fu ajɛ lɛ ɔ́, ɛ́gɛ́nɛ̄ alɔ mɛ́mla aádáádā alɔ, mɛ́mla aɔ́cɛ́ kú alɔ, mɛ́mla aótrɛ̄yí kú alɔ gē yá eko nɛ̄ alɔ lā aígelī kú Ujúda mɛ́mla aúláyi kú Ujerúsālɛm ā. Eko ɔ́ɔmā, alɔ gē lɛ ɔdōlé nɛ̄hi, ó gē lɔhi lɛ alɔ, alɔ í klla lɛ unwalu ŋ́.

¹⁸Amáŋ ŋmá eko nɛ̄ alɔ í lɛ ɔtulālī kwu ɔlá lɛ ‘Ɔcányā kú ɔkpáncō’ ā gɛ ŋ́ mā, alɔ í klla lɛ ɔdā dúúmā abɔ̄ gɛ ŋ́, ɛfú yɔ̄ i lé ācɛ ɔlɛ́ alɔ, alɔ klla bá ī pɛ́ kwú ipú ɔkpɛta.”

¹⁹Anɔ́ɔ ācɛnyā ā klla ka tū ɔ̄ kahíníī, “Eko nɛ̄ alɔ lā ajɛ Ujúda ā, alɔ gē yá igbō, ī ma ɔ́ bɛ̄ɛka ‘Ɔcányā kú ɔkpáncō’ ā, í kpó gwɛ́ɛya lɛ ɔ́. Alɔ klla ī le ɔtulālī kwu ɔlá, ī le ejé fu ajɛ lɛ ɔ́. Amáŋ ó ŋmá lɛ ō jé kú aɔ́bá alɔ, é kē cɛ̄ ɔ̄da nɛ̄ alɔ gē yá ɔ́ɔmā?”

²⁰Anɔ́ɔ n da odúúdú ācɛnyīlɔ mɛ́mla ācɛnyā nēé tū um ohi nyā ā kahíníī,

²¹“Aá gbɛlá ka Ɔwɔicō í jé lɛyíkwu ɔtulālī nɛ̄ aá mɛ́mla aádáádā aá, mɛ́mla aɔ́cɛ́ kú aá, mɛ́mla aótrɛ̄yí kú aá, mɛ́mla ācɛ kú ajɛ ɔlɛ́ aá gē le kwu ɔlá lɛ aɛ́cí ipú aígelī kú Ujúda mɛ́mla aúláyi kú Ujerúsālɛm ā, klla gbɛlá kwu ɔ́ ŋ́ nɛɛ?

²²Ícɛ nyā ajɛ ɔlɛ́ aá tá alácɛ̄ nɛ̄ ɔ̄cɛ dúúmā í lā anú ŋ́. Ó le pīya ɔdā nɛ̄ ācɛ gē bī le tá okónu lɛ īyī uwā, ohígbū ka Óndú ā ī leyīkwu ɔdōbɔ̄bí mɛ́mla ɔ́bíipú nɛ̄ aá ī yá ā kpɔ́ glá ɛ́ɛ́ gɛ ŋ́.

²³Ífi nōo yá aá ícɛ nyā, yá aá ohígbū ka aá bá ī gwɛ́ɛya lɛ aɛ́cí klla bá ī bī ɔ́bíipú lɛyíkwu Ɔwɔicō. Aá tá ō lɛyítáajɛ lɛ ɔ́ mɛ́mla odúúdú íne nōó tū ā.”

²⁴Anɔ́ɔ n da odúúdú ācɛ ā, kwu ācɛnyā ā, kahíníī, “Aá pó ɛlā kú Ɔwɔicō, odúúdú aá, nēe wɛ ācɛ kú Ujúda nēe bá Íjīpiti ā.

²⁵Uyáwɛ, Olɔfú fíyɛ́ dúú, nōo wɛ Ɔwɔicō nɛ̄ Ísrɛ̄lu gē gbɛ̄ɛ̄gbā ā kahíníī, “Aá mɛ́mla anyā aá le okónu ce ka aá ɔ́ɔ géē yi ɔtulalī ɔlá, klla í lɛ ejé fu ajɛ lɛ ɛcí nɔ̄nyā nēé hī ka ‘Ɔcányā kú ɔkpáncō’ ā, aá kē le yá lɛ ā ŋmá lɛ ucē kú aá ɛɛ́. Ó lɔhi! Aá nyɔ̄ gáā yá ɔdā nɛ̄ a cokónu nū lɛ ɔ́ ā mɛ́ɛnɛ. Aá nyɔ̄ í yá oji nɛ̄ aá hɛ́ ā mɛ́ɛnɛ

²⁶Amáŋ, odúúdú ācɛ Ujúda nēe lā Íjīpiti ā, aá pó oji nɛ̄ ami nōo wɛ Ɔwɔicō ā cē ā. N gbo īyī um ka ń gáā cɛ̄ lɛ ɔ̄cɛ dúúmā kú aá, ācɛ Ujúda nēe lā Íjīpiti ā, bī iyē kú um le cooji ɔhá gbóógbóō ɛ́ gɛ ŋ́. Ɔ̄cɛ dúúmā kú aá í gáā lɛ okónu hɛ́ ɔ̄ ka, ‘Ɔ́dāŋ́ ka Ɔwɔicō yɔ̄ ɔkwɛ̄yi’ ŋ́.

²⁷N géē héyītū aá ká n̄ yá aá ɔdōbɔ̄bí. N gáā yá aá lɔhi ɛ́ɛ́ gɛ ŋ́. Ɛfú géē lé aá, ámāŋ́ ɔkpɛtá géē kpó aá ŋmó jāā gbéeko nɛ̄ odúúdú aá nēe wɛ ācɛ Ujúda nēe lā Íjīpiti ā le pɛ́ gekwú mɛ.

²⁸Ācɛ nēe géē wi ŋmá ɛfú, í kwúcē nyɔ̄ Ujúda ā géē le lígíi ā. Cɛ́ɛ́ eko ɔ́ɔmā, odúúdú ācɛ Ujúda nēe hile wā í lā Íjīpiti ā géē jé ɛlā kú ɔ̄cɛ nōo lé ā, ka ɛlā kú uwá nɛɛ, kɛ̄ɛ ka ɛlā kú um.

²⁹Ɔdānyā géē wɛ ɔdōōcābɔ̄ lɛ aá ka aá jé ka n géē yá aá italā, í kpó aá yíífi Íjīpiti amānyā piíí, ɛ́gɛ́nɛ̄ n fu aá ɔnū ā.

³⁰Ami nōo wɛ Ɔwɔicō ā ka n géē je Uféro Uhɔ́fra, nōo wɛ ɔcɛ́ kú Íjīpiti ā tá ipú abɔ̄ kú aólɛlā kú nū, nēe tíne ō ŋmó ɔ̄ ā, ɛ́gɛ́nɛ̄ n je Usedekíya tá ipú abɔ̄ kú Unebúkádinēsa, ɔcɛ́ kú Ubábīlɔn, olɛlā kú nū, nōo tíne ō ŋmó ɔ̄ dúú ā.”