Read idoma UJƐRƐMÍYA 46 Bible Online

UJƐRƐMÍYA 46 - idoma bible

UJƐRƐMÍYA 46

¹Ɔwɔicō kɛlā lɛ Ujeremíya lɛyíkwu aéwɔhá ɛyɛ́ɛ́yɛ́yí. Ɛlā nōo ka ɛyɛ́ɛ́yí ā bá ā.

²Lɛyíkwu Íjīpiti. Ɔwɔicō ka ɛlā nyā lɛyíkwu aícɔ́ɔja kú Uféro Unéko, ɔcɛ́ kú Íjīpiti, nɛ̄ Unebúkádinēsa, ɔcɛ́ kú Ubábīlɔn yálé ɔgbɛ́fú, ipú Ukákēmisi nōo kwu ísu kú Uyúfrētīisi ajaajɛ ā, ipú iháyí ɔ́mɛnɛ nɛ̄ Ujɛhóyākim wɛ ɔcɛ́ kú Ujúda ā. Ó kahíníī,

³“Aótrɛ̄yí kú aícɔ́ɔja kú Íjīpiti tɔ́ɔna ka, ‘Aá lɛ ɔkplɛ́fú kú aá tútū ká aá ga ɔgbɛ́fú!

⁴Aá lɛ ɔnyā kú aá iyē ɛfú gbō ka aá gaá ce uwá. Aá gáā kwu ɔgbā kú aá kwú aódōkwɛyí kpɛ́fú í kpó kwu ɛyí. Aá lɛ óbō kú aá tūlé, ká a á lɛ úwé oje nēé ī bī le kpɛ́fú ā kpó wiyē.!’

⁵Amáŋ ami nōo wɛ Ɔwɔicō ā ka, ɔdí nɛ̄ n gē má yɔ̄ āa? É bá ī kwinya cīgbīhi mla ufi ɛɛ́. É bá ī yá aícɔ́ɔja kú uwā lé, é kē báyī yɛ ɔkwɔɔkwu ɛɛ́. Ufi í cɛ̄ lɛ uwá má igbīhi um. É bá ī kwinya cīgbīhi būū mla odúúdú ɔfú kú uwā.

⁶Nááná ācɛ nēe ī kwinya nɛ̄hi ā í kwu glá ŋ́. Aícɔ́ɔja nēe lɔfú nɛ̄hi ā í kē gáā wi ŋ́ dúú. É túgagá má gwōnū ɛhícō, kwu ísu kú Uyúfrētīisi ājaajɛ ā.

⁷Ɔ̄nyɛ cāŋjɛ yɔ̄ ī wā kwūūū bɛ̄ɛka ísu kú Unáyilu nōo le cēenyi ā yɔ̄ dúú?

⁸Íjīpiti yɔ̄ ī cāŋjɛ í wā kwūūū bɛ̄ɛka ísu kú Unáyilu á, bɛ̄ɛka ísu nōo kwú cēenyi klá ɛcɛ ā. Íjīpiti ka, anúɔ ɔɔ́ géē cāŋjɛ gaá klá odúúdú ɛcɛ bɛ̄ɛka éŋ́kpɔ̄ nōo ī cēenyi ā. N géē kpó aígelī mɛ́mla ācɛ nēe lā ipú uwā ā yíífi.

⁹Je ɔ́da lɛ ācɛ nēe cɔ̄nyā mɛ́mla ācɛ nēe ī pɛ́ aúgbɔ́ɔnya ā kéē nyɔ̄. Tū aícɔ́ɔja ɛhɔ̄ klá ɛcɛ, kwu ācɛ Itiyópīya mɛ́mla Ulíbīya nēe bī aɔ́kplɛ́fú, mɛ́mla ācɛ Ulídiya nēe ī tɔ́ɔyī nɛ̄hi ā.”

¹⁰Ɛ̄cī ɔ́ɔmā wɛ ɛ̄cī nɛ̄ Ɔwɔicō nōo lɔfú fíyɛ́ dúú ā géē gwō aólɛlā kú nū ɔ́ci. É géē bī ɔkpacaŋ́gelī ŋmó ācɛ jāā gbéeko nōó le jɛ̄ uwā. Oyī kú ācɛ í pɛ́ klá ɔkpacāŋ́gelī cakpaa jāā gbéeko nōo ī yɔ̄ ī pɛ́ kótó kótó wā ajɛ. Ɔwɔicō géē je uwā kpó ŋmó le gwɛ́ɛya, ɛhícō, kwu ísu kú Uyúfrētīisi ajaajɛ.

¹¹Ācɛ kú Íjīpiti, aá nyɔ̄ ga Ugílɛ̄di nyɔ̄ í da ɔ̄kā ɛcí. Amáŋ odúúdú ɛcí alɛwā nɛ̄ aá ī le tá īyī aá abɔ̄ ā, odúúmā kú uwá í hɛ́ aá tá glá gɛ ŋ́.

¹²Odúúdú aéwo lɛ ɔ̄kā kú uwēyī kú aá pó ɛɛ́. Ācɛ dóódu kē le ikwū nɛ̄ aá je ā pó ɛɛ́. Aícɔ́ɔja gwōnū klá īyī uwā, odúúdú uwá kē má gwōnū tɔ̄ɔhá.

¹³Eko nɛ̄ Unebúkádinēsa, ɔcɛ́ kú Ubábīlɔn wā í kpɛ́fú tú Íjīpiti ā, Ɔwɔicō kɛlā lɛ Ujeremíya kahíníī,

¹⁴“Lɛ ɔna tá ipú aígelī kú Íjīpiti nēé hī ka Umígidɔlu, mɛ́mla Umémfis, mɛ́mla Utapánhesi kahíníī, ‘Aá tútū kú aá kpɛ́fú kú aá nya īyī aá tá, ohígbū ka ɛfú géē je odúúdú ɔdā nēe bá ajɛ ɔlɛ́ ā kpó yíífi.

¹⁵Ɔdí yá nɛ̄ ɛcí nɛ̄hi kú aá nēé hī ka, ‘Ápīisi’ ā gwōnū āa? Ɔwɔicō lɛ odée gɔ́ ɔ̄ fīyɛ̄ ajɛ á.

¹⁶Aícɔ́ɔja kú aá túgagá klla gwōnū klá īyī uwā. É bá gē da īyī uwā kahíníī, ‘Aá cāŋ́jɛ fíyaa kú ālɔ̄ nyɔ̄ ɔlɛ́ ɛgiyí ācɛ ɔlɛ́ alɔ, cɛ́ɛ́ ká ālɔ̄ le kwu kú aólɛlā kú alɔ kéē ŋmó alɔ ŋ́!’

¹⁷“Kwú iyē ɛ̄yīpɛ̄ ú ce ɔcɛ́ kú Íjīpiti lé ka, ‘Agidigbé nōo ī yúuya, amáŋ nōo gē kpó īyī nū eko bónū’ ā.

¹⁸Ami, Uyáwɛ, olɔfú fíyɛ́ dúú ā wɛ ɔcɛ́ á. Abɔ̄ n yɔ̄ ā, ɛ́gɛ́nɛ̄ ɛfu kú Utábɔ jɛ̄ fíyɛ́ ɛfu dóódu ā, nɛ̄ ɛfu kú Ukámɛ̄lu hayi ɛgiyī ísu gɔ̄mm ā, ɛ́gɔ́ɔmā nɛ̄ ɔ̄cɛ nōo gē kpɛ́fú tú aá ā géē lɔfú fíyɛ́ aá lɛ á.

¹⁹Ācɛ kú Íjīpiti, aá lɛ iyó kpó le tútu kéē kpó aá aɔ́fiyɛ ga ajɛ ewɔhá. Umémfisi géē jé tá alácɛ̄ nɛ̄ ɔ̄cɛ dúúmā í gáā lā anú ŋ́, bɛ̄ɛka Ígbíli ā.

²⁰Íjīpiti lɔhi lɛbɛ̄ɛka ɛna nōo tū ɛgahi nɛ̄hi ā, amáŋ olɛlā éyi géē wā ŋmá ɛhícō gaá kpɛ́fú tú ɔ̄ lɛbɛ̄ɛka ɛ́gɛ́nɛ̄ iju gē hɛ́ ɛna lé ā.

²¹Kwu aícɔ́ɔja nēé kpó ŋmá ɛga ɔhá nááná í tá ɔ̄ abɔ̄ glá ŋ́, bɛ̄ɛka ɔyí ɛna nōó tá ɛ́nɛ́ nū abɔ̄ nū iju dúúmā glá ŋ́ mā. Odúúmā kú uwā í háyi kpɛ́fú glá ŋ́, odúúdú uwā lɛ igbīhi pīya lɛ inya kwu le yɛ. Ɛ̄cī ɔ́ɔmā wɛ ɛ̄cī nɛ̄ ámíyā géē yá Íjīpiti, nɛ̄ n klla ī yá uwā italā.

²²Abɔ̄ aícɔ́ɔja kú aólɛlā bá ī wā ɔfɔ́ɔ́fú kwūūū ā, ācɛ Íjīpiti bá ī kwinya, bɛ̄ɛka ɛgwā nōo yɔ̄ ī pi nyɔ̄ fūūū ā. Aólɛlā ā kpó āgā bá ī wā í tū uwā iyē bɛ̄ɛka ācɛ nēe gáā lɛ āgā hɛ́ ɔcí ā.

²³É géē ŋmó ācɛ Íjīpiti lɛbɛ̄ɛka ɔdā nēe bá í wúla ūpū nɛ̄hi tāajɛ ā. Ɛ́gɔ́ɔmā nēé gáā yá uwā á nááná, nɛ̄ uwā lɛwa bɛ̄ɛka ūpū nɛ̄ aɔ́cí kú nū lɛwa nɛ̄hi le jíla tɔ̄há tulúu ā. É lɛwa fíyɛ́ ɛwa kú aéfūma, é kē tōō gbaálūka mɛ ŋ́.

²⁴Uwēyī géē kwú ācɛ kú Íjīpiti. Ācɛ nēe ŋmá ajɛ ɛhícō géē yá uwá lé.”

²⁵Uyáwɛ, olɔfú fíyɛ́ dúú ā, nōo wɛ Ɔwɔicō nɛ̄ Ísrɛ̄lu gē gbɛ̄ɛ̄gbā ā kahíníī, “N géē yá Amɔn, nōo wɛ ɛcí kú Utébes ā italā, mɛ́mla Íjīpiti mɛ́mla aɛ́cí ɔhá kú nū ā, mɛ́mla aótrɛ̄yí kú nū. N kē í wā í yá uféro nōo wɛ ɔcɛ́ kú Íjīpiti ā mɛ́mla odúúdú ācɛ nēe kpɔ́tūce ɔ̄ italā.

²⁶N géē kpó odúúdú uwā lɛ ācɛ nēe gē tíne ŋmó uwā ā. N géē kpó uwā tū ipú abɔ̄ Unebúkádinēsa, ɔcɛ́ kú Ubábīlɔn mɛ́mla aícɔ́ɔja kú nū. Amáŋ igbīhāajɛ ā ācɛ géē lā Íjīpiti kpɔ́ ɛɛ́, ɛ́gɛ́nɛ̄ é tɛtɛ lā abɔ́ɔ gbɔbū ā. Ami Óndú ā ka á.”

²⁷“Ayááyí kú Ujékɔ́pu, ɔ̄cocɛ̄hɔ̄ kú um, aá yúúfi ŋ́. Ācɛ Ísrɛ̄lu, ufi kóō yá aá ŋ́. N géē nya aá tá ŋmá ajɛ ɛga oligbó ɔ́ɔmā, nɛ̄ aá wɛ aɔ́fiyɛ klla wɛ alagbá ā. Aá mɛ́mla ayí aá géē kwúcē wā ɔlɛ́, wā í lā ɛbɔ́, ɔ̄cɛ dúúmā í kē gáā tū aá ufi ɛ́ɛ́ gɛ ŋ́.

²⁸Aá híī yúufi ŋ́, ohígbū ka n yɔ̄ pī aá, ká n géē hɛ aá tá. N géē je odúúdú aéwo nɛ̄ n pa aá hīla nyɔ̄ ipú uwá ā kpó yíífi dúúdú. Amáŋ N gáā je aá yíífi dúúdú ŋ́. N géē lɛ itali kwu aá ɔkwu pííi, amáŋ n gáā yá ɔ̄ɔ̄ fíyɛ́ abɔ̄ ŋ́. Ami Óndú ā lɛ ɛlā ka ɛɛ́.”