Read idoma UJƐRƐMÍYA 48 Bible Online

UJƐRƐMÍYA 48 - idoma bible

UJƐRƐMÍYA 48

¹Olɛhɔ̄ nyā lɛyíkwu Umówābu. Uyáwɛ, nōo lɔfú fíyɛ́ dúú, nōo wɛ Ɔwɔicō nɛ̄ Ísrɛ̄lu gē gbɛ̄ɛ̄gbā ā kahíníī, “Ācɛ kú Unebo le jī ɛɛ́, ohígbū ka é kwú ɔlɛ́ uwá ú yíífi. É mīyɛ Ukiriyatéyim tābɔ̄ ɛɛ́, é kē kwú ɔdɔ nɛ̄hi kú ɔlɛ́ ā ú wúlatāajɛ, klá lɛ uwēyī kpó tū ācɛ kú ɔlɛ́ a ɛyi ɛɛ́.

²Ɛgahi kú Umówābu mɛ ɛɛ́. Aólɛlā a mīyɛ Uhɛ́sbɔn, klla lɛ ujɔ̄ tū ō je Umówābu yíífi ɛɛ́. Igelī nɛ̄ŋ́cɛ́ kú aójɛɛ́lɛ́ ā géē tá hímm, Aícɔ́ɔja ā gē cētū lɛyíkwu ɔ́.

³Ācɛ kú Uhoronéyim bá í dīíbáā ohígbū ɛ́gɛ́nɛ̄ é gáā je uwā yíífi, klla í je ɔlɛ́ uwā tá alácɛ̄ lɛ ā.

⁴É kwú Umówābu ú yíífi ɛɛ́. Jāhɔ̄ kú ā pó ayípɛ̄ bá ī jikwū.

⁵Po ɔkɔ kú uwá bá ī hɛ́ áganá tū ɛnwū tá ɔwɛ nōo yɛ gicō lɛyíkwu Uluhíiti ā. Ikwū kú ákanya nēé bá ī je, ī nyɔ̄ Uhoronéyim abɔ́ɔ á.

⁶É ka “Fíyaa, kwinya ohígbū oyēeyī kú uwɔ bɛ̄ɛka ogbo-ofaka ā.

⁷Ācɛ Umówābu, aá lɔtūce ɔfú mɛ́mla agbénú kú aá. É géē yá aá abɔ̄yī aá lé, klla í je Ukémosi, ɛcí kú ā, ga ajɛ éwɔhá. É géē kwú odúúdú ācogwɛ́ɛya mɛ́mla aígabɔ̄ kú ɛcí kú aá ɔ́ɔmā nyɔ̄ dúú.

⁸Igelī dúúmā í gáā hile nēé gáā je yíífi ŋ́ nɛɛ ŋ́. Kwu ɔpɛ́, kwu ajɛ kpátáá, é géē je odúúdú uwā yíífi. Ami, nōo wɛ Ɔwɔicō ā, ka ā á.”

⁹Aá lɛ únóji bu tá lɛ Umówābu, ohígbū ka é géē je ɔ́ yíífi ānāānā. Aígelī kú nū ā géē je pīya alácɛ̄, nɛ̄ ɔ̄cɛ dúúmā í gáā lā anú ŋ́.

¹⁰N le okónu tá lɛ ɔ̄cɛ dúúmā nōó yúklɔ́ kú Ɔwɔicō ŋmá odúúdú ɔtū mɛ́mla ɔfú kú nū ŋ́. N kē le okónu tá lɛ ɔ̄cɛ dúúmā nōó bī ɔkpacāŋ́gelī le gɔ̄ ācɛ klla le ŋmó ɔ̄cɛ ŋ́.

¹¹Ɔwɔicō kahíníī, “Ācɛ Umówābu húmáyī lā ɛbɔ́, nēé kpó uwā ga ajɛ kú ɔfíyɛ́ jéjée ɛ́ɛ́ ŋ́. Umówābu lɛbɛ̄ɛka ejé ɛ̄yīpɛ̄ nōo yɔ̄ í wú ipú ɔjá pɛ̄túuu ā nɛ. Ɔ̄cɛ dúúmā í lɛ éŋkpɔ̄ tū ɔ̄ ɛ́ɛ́ ŋ́, ohígbū ɔ́ɔmā, ó le ŋmá lɔhi, klla yɔ̄ ī kpóocu kú nū kpɔ́. Ɛ́gɔ́ɔmā nɛ̄ éwo kú aá yɔ̄ ī yá lɔhi, klla lɛ abɔ̄ flla tū ɔdōbɔ̄bí ō yá kpɔ́ á.

¹²Ohígbū ɔ́ɔmā ā. eko géē wā nɛ̄ n géē tū ācɛ ɛhɔ̄ wā í je ɔ̄ pīya klá ajɛ bɛ̄ɛka ejé ā ŋmá aɔ́já kú nū. É klla géē je aɔ́já ā kpó ca.

¹³Cɛ́ɛ́ ɛlā Ukémosi, ɔwɔ kú Umówābu ā, géē tū ācɛ Umówābu uwēyī, ɛ́gɛ́nɛ̄ ojibó kú ugóolu kú, ɔwɔ nɛ̄ Ísrɛ̄lu lɔtūce tɛtɛ ā, tū uwá uwēyī ā.

¹⁴Ācɛ Umówābu, ɔdí yá nɛ̄ aá hī īyī aá ka aɔ́békwū kú ɛfú ā, mɛ́mla aícɔ́ɔja olɔtū nōo wɛ ɔka kú ɛfú ō kpó ā mɛ́ɛ̄?

¹⁵É kwú Umówābu mɛ́mla aígelī kú nū í yíífi ɛɛ́. É kwú ayípōklóbīya kú nū, nēe wɛ ɛ́nɛ́nɛ̄ fíyɛ́ dúú ā í kpó ŋmó ɛɛ́. Ami, Ɔcɛ́ nōo lé ka Uyáwɛ nōo lɔfú fíyɛ́ dúú ā le ka ɛɛ́.

¹⁶Ífi nōo gáā yá Umówābu ā le kwu ajaajɛ ɛɛ́, unwalu kú nū kē ī wā ānānā.

¹⁷Aá nēe lā kwu Umówābu ajaajɛ ā, aá jikwū nū. odúúdú aá nēe tɛtɛ pó ofu nū ā, aá ka ka, ‘Ó tɛtɛ gē gbā ācɛ ɔhá mla íkwu nɛ̄hi, amáŋ ɛgahi mɛ́mla ɔfú nɛ̄hi kú nū ā í yɔ̄ ɛ́ɛ́ gɛ ŋ́.’

¹⁸Aá nēe lā Udíbɔn ā, aá wā ajɛ ŋmá ɛga ōjīlīma kú aá cɛ́ɛ́ ka aá gáā cīce ajɛ ipú ewo. Ācɛ nēe gáā je Umówābu yíífi ā ga gaá kpɛ́fú tú aá ɛɛ́. É kē í kpó aínɔ̄ɔda o lɔfú nɛ̄hi ā catāajɛ.

¹⁹Aá nēe lā Árōwɛ ā, aá gáā háyi ɔwɛ kú aá gbēyī. Eko nɛ̄ ācɛ nēe bá ī kwu ā wā gáā yɛ, aá da uwá ɔ̄kā ɔdā nōo yá ā.

²⁰É géē tá aá ohi kahíníī, ‘É lɛ Umówābu yálé ɛɛ́. Aá jikwū ohígbū ka uwēyī lɛ ɔ́ kwú ɛɛ́. Aá tɔ́ɔna okónu ísu kú Ánɔn kahíníī, ‘É kwú Umówābu ú yíífi ɛɛ́.’

²¹N lɛ italā yá aígelī kú Umówābu nēe bá ɛyí ɛfu pátáá ā, nēé hī ka Uhólon, mɛ́mla Ujása, mɛ́mla Uméfāati,

²²mɛ́mla Udíbɔn, mɛ́mla Unebo, mɛ́mla Ubɛ́tdiblátéyim,

²³mɛ́mla Ukiriyatéyim, mɛ́mla Ubɛ́tgamúl, mɛ́mla Ubɛ́tmeyɔn,

²⁴mɛ́mla Ukéríyɔtu, mɛ́mla Ubósra. N géē yá odúúdú aígelī kú Umówābu ā italā nyā, kwu aɛ́nɛ̄ e bá ligbó mɛ́mla aɛ́nɛ́ ē kwu ajaajɛ ā.

²⁵Íkwu kú Umówābu ā mɛ ɛɛ́. Ó kē lɔfú dúúmā gɛ ŋ́. É kwú ɔ̄ ú yíífi ɛɛ́. Ami, nōo wɛ Ɔwɔicō ā le ka ɛɛ́.”

²⁶Ɔwɔicō klla ka gɔbū kahíníī, “Ācɛ Umówābu, aá ka aá lɔfú fíyɛ́ um á nɛ. N géē da aéwɔhá kéē lɛ ejé je lɛ Umówābu kóō lɛ ɔ́ kwú. Cɛ́ɛ́ Umówābu géē yɔ̄ ī míya ipú agba kú nū nōo gba bá ajɛ ā, kú ācɛ kéē bá ī yɛhɛ tū ɔ̄.

²⁷Ācɛ Umówābu, aá blakwu ɛ́gɛ́nɛ̄ aá kpó ‘Uwúuu’ tū ācɛ kú Ísrɛ̄lu āa? Aá yá uwá ōwē bɛ̄ɛka aúwī nēé kwú bá ī wūwī ā.

²⁸Aá, ācɛ nēe lā ajɛ kú Umówābu ā, aá nyɛ̄ɛ̄ ŋmá ɔlɛ́ aá kú aá gáā lā ɛyí ɛcɔ̄. Aá lɛbɛ̄ɛka okóho nōo gē gwó ɔlɛ́ nū ce icō áklō ɛfu ā.

²⁹Ācɛ Umówābu gē yá ɔbɔ́cɛ nɛ̄hi. N kē pó ɛ́gɛ́nɛ̄ é gē gɔ̄, gē je īyī nū ka anúɔ wɛ ɔka nɛ̄hi, mɛ́mla ɛ́gɛ́nɛ̄ é je īyī uwā ce lɛ ā.

³⁰Ami nōo wɛ Óndú ā jé ɔbɔ́cɛ́ kú uwá mɛ́mla ɛ́gɛ́nɛ̄ é ī gɔ̄ ā. Amáŋ ɛ́gɛ́nɛ̄ é ī gwó ɔ́ɔmā wɛ áncā, é yá ɔdā dúúmā glá ŋ́.

³¹Ohígbū ɔ́ɔmā, n géē jikwū lɛ odúúdú ācɛ kú Umówābu mɛ́mla ācɛ kú Ukɛ́hɛ́rɛs ā.

³²N gē jikwū ācɛ kú Usíbma fíyɛ́ ācɛ kú Ujésa. Igelī kú Usíbma, ā lɛbɛ̄ɛka ɔcí ufáyin, nōo tá ābɔ̄ gla ísu kú ɔmā ā jāā gáā kwu Ujésa ā. Amáŋ ɔ̄cɛ nōo ī bīya odée ā kwú odúúdú īkpɔ́cí kú uwɔ í yíífi ɛɛ́.

³³Ɔtūnɛ̄hɛ́ mɛ́mla éeyē mɛ ŋmá ajɛ kú Umówābu ɛɛ́. N gáā cɛ̄ kéē yá ejé ɛ́ɛ́ gɛ ŋ́. Ɔ̄cɛ dúúmā í yɔ̄ nōo gē yá ejé ɛ́ɛ́ nōo gē tɔ́ɔga ohígbū éeyē gɛ ŋ́.

³⁴Ācɛ kú Uhɛ́sbɔn mɛ́mla Ɛlíle bá í jikwū. É kē pó ikwū kú uwá ā jāā gáā kwu Ujáhasi. Ācɛ kú Usóya kē pó dúú. É klla pó jāā kwu Uhorónéyim mɛ́mla Ɛglat Uselísīya. Ɔkpá kú Unímrim ā kwú ŋmó dúú ɛɛ́.

³⁵N géē je ācɛ kú Umówābu nēe ī gwɛ́ɛya, aíkpɛ́cí lɛ aɛ́cí kú uwá ā kpó yíífi. Ami nōo wɛ Ɔwɔicō ā ka á.

³⁶N yɔ̄ ī yá ɔtūnōbí ohígbū Umówābu mɛ́mla ācɛ kú Ukɛ́hɛ́rɛs, bɛ̄ɛka ɔ̄cɛ nōo yɔ̄ í tá ɛ́mula kú ijē kú ɛyíkwū ā. Ohígbū ka ɔdā dóódu nēé lɛ ā, le yíífi ɛɛ́.

³⁷Odúúdú uwá lɛ ɛyí púlla klla lɛ ɔnwū agba wā. Odúúdú uwá lɛ éwo wu klá ɛyi, lɛ īlī ekwu kpó wiyē ɛɛ́.

³⁸Ɛga dóódu kú Umówābu kwu ɛyí inu mɛ́mla ɔɔ́pu kú nū, odúúdú ācɛ ā bá ī yɔ̄tūnōbí. Ohígbū ka n kwú Umówābu ú ca klá ajɛ bɛ̄ɛka ɔjá nɛ̄ ɔ̄cɛ dúúmā í tíne gɛ ŋ́ mā.

³⁹Aá dīíbá, é kwú Umówābu ú catāajɛ bɛ̄ɛka ɔjá nēé i ca ɛɛ́. Uwēyī lɛ ācɛ Umówābu kwú. Ó kwú pīya ɛbɛ ohéyī nɛ̄ odúúdú aéwɔhá ā bá í yá ɔ̄ okónu ɛɛ́.”

⁴⁰Ami nōo wɛ Ɔwɔicō ā ka éwo éyi géē wā faaa lɛyíkwu Umówābu bɛ̄ɛka ɔgɔ nōo wā gáā je ɔyí ugwū ā.

⁴¹É í mīyɛ aígelī mɛ́mla aɔ́lɛ́ nēé gwó ɔdɔ tū uwā lɔfú nɛ̄hi kú nū ā tū abɔ̄. Ɛ̄cī ɔ́ɔmā, aícɔ́ɔja kú Umówābu géē yúufi bɛ̄ɛka ɔnyā nɛ̄ ɔma lɛ ɔ́ kwú ā.

⁴²É géē je Umówābu yíífi, nōó klla gáā wɛ éwo ɛ́ɛ́ gɛ ŋ́, ohígbū kóō yá īkpɛ̄yí olɔfú tá um.

⁴³Ɔdōōtūufi, mɛ́mla ɔ̄gɔ̄, mɛ́mla ukpa bá ī gbēyī ācɛ kú Umówābu á.

⁴⁴Ɔ̄cɛ dúúmā nōo tíne ō kwu hɛ ɔdōōtūufi ā tá géē je mīya tá ɔ̄gɔ̄. Ɔ̄cɛ dúúmā nōo kē lɛ icō tū bɛ̄cɛ ŋmá ipú ɔ̄gɔ̄ ā, ukpa í kwú ɔ̄. Ohígbū ka Óndú ā lɛ eko nēé í je Umówābu yíífi ā tū ɛɛ́.

⁴⁵Ācɛ nēe bā ī kwu ŋmá ɔlɛ́ uwā gaá dɔɔ̄ka ɛga nɛ̄ abɔ̄ í gáā kwu uwá ŋ́ mā gaajɛ kú Uhɛ́sbon, ɛga nɛ̄ Usihɔn tɛtɛ cɔɔcɛ́ ā, amaŋ é kwú ɔlɛ ā ú tɔ̄ɔlá.

⁴⁶Ācɛ Umówābu, aá nēe gē pā ɛcí nōo lé ka Ukémosi ā, aá le jí ɛɛ́. É kwú aá í yíífi klla kwú ayí uwā kpó kwú aɔ́fiyɛ ga ajɛ éwɔhá ɛɛ́.

⁴⁷Amáŋ ɛcí éyi ɛ̄cɔbū ā, ami nōo wɛ Ɔwɔicō ā géē yá ka Umówābu kóō kwúcē wɛ ahɔ̄ olɔhi kpɔ́.” odúúdú ɛ̄nyā wɛ ɛlā mla ɔdā nɛ̄ Óndú ā ka ka ɔɔ́ géē yá Umówābu á.” Odúúdú italā nēé gaá yá Umówābu ā yɔ̄ abɔ́ɔ ā.