Read idoma UJƐRƐMÍYA 49 Bible Online

UJƐRƐMÍYA 49 - idoma bible

UJƐRƐMÍYA 49

¹Olɛhɔ̄ nyā lɛyíkwu ācɛ Ámɔ̄ri. Ɔwɔicō kahíníī, “Ācɛ kú Ísrɛ̄lu lɛ ayí alɛwa nēe í lé úgwū ajɛ kú uwā. Ó lɛ ā, ɔdíyá nɛ̄ ācɛ nēe gē pā ɛcí nēé hī ka Umílkom ā mīyɛ ajɛ kú ipɔ́ɔma kú Ugádi tū abɔ̄, gaá má lā anú āa?

²Amáŋ eko géē wā nɛ̄ n géē tū ācɛ ɛhɔ̄ wā í kpɛ́fú tú igelī kú ācɛ Ámɔ̄ri nēé hī Urába ā. É kē géē je igelī ā wúlatāajɛ, nōó í tá alácɛ̄. É kē í kpó aípɔ́lɛ́ nēe yɛ ɔ́ jīla tá ā yɔɔlá tāajɛ. Eko ɔ́ɔmā Ísrɛ̄lu géē mīyɛ ajɛ kú uwá kwúcē ŋmá ɛgiyí ācɛ nēe mīyɛ uwá anú ā.

³Ācɛ kú Uhɛ́sbɔn géē dīíbá tá ɛcɛ ka é kwú Áyi í yíífi ɛɛ́! Anyā kú Urába, aá kwú īlī ekwu í wiiyē kú aá yēkwu. Aá kwinya gicō gajɛ kú aá jikwū. Ohígbū ka é kwú ɛcí nɛ̄ aá ī pā, nēe lé ka Umílkom ā ú abɔ̄fú ga ajɛ éwɔhá ɛɛ́. Kwu anú mɛ́mla ācogwɛ́ɛya mɛ́mla aígabɔ̄ kú nū.

⁴Aá, ācɛ nēe gē yá īkpɛ̄yí olɔfú nyā, ɔdíyá nɛ̄ aá gē gwō āa? Ɔfú kú aá yɔ̄ ī mɛ ɛ́ɛ́. Ɔdíyá nɛ̄ aá lɔtūce ágbénú kú aá, gē ka ka ɔ̄cɛ dúúmā ɔɔ́ kpɛ́fú tú aá glá ŋ́ mā?

⁵N géē kpó aéwo nēe lā kwu aá ajaajɛ biílí ā wā í yá aá ɔdōōtūufi. Odúúdú aá í pɛ́ kwu. Ɔnyɔ̄ɔnyɛ kú aá géē yɔ̄ ī kwinya kú oyēeyī kú nū, nɛ̄ ɔ̄cɛ dúúmā í gáā yɔ̄ nōo gáā tú ācɛ ɔlɛ́ aá nēe fíyákátā ā bá gɛ ŋ́.

⁶Amáŋ igbīhāajɛ ā, n géē yá kú ācɛ Ámɔ̄ri kéē kwúcē wā ahɔ̄ olɔhi nēé bá gbɔbū ā kpɔ́ ɛɛ́. Ami nōo wɛ Ɔwɔicō ā ka á.”

⁷Olɛhɔ̄ nyā lɛyíkwu Ɛ́dɔm. Ɔwɔicō, nōo lɔfú fíyɛ́ dúú ā kahíníī, “Ācɛ kú Ɛ́dɔm nēe lā Utɛ́man ā í klla jéeyī gɛ ŋ́. Ācɛ nēe gē nwū uwá ɛlā ā, í klla da uwá ɔdā nōo gáā yá ā ŋ́ nɛɛ?

⁸Ācɛ kú Udɛ́dan, aá kwinya nyɔ̄ í tayínū. N géē je ipɔ́ɔma kú Ísɔ yíífi ɛɛ́, ohígbū ka eko ga nɛ̄ n gáā yá uwā italā ɛɛ́.

⁹Eko dúúmā nɛ̄ ɔ̄cɛ gē wū aíkpɔ̄cí kí ufáyin, ó ge ma abɔ̄ aíkpɔ̄cí ōhī tá kwu ɔ́. Eko dúúmā nɛ̄ aúwī ga otú, é gé kpó ɔdā nēe he uwá ɔtū ōfōōfūnū nɛ.

¹⁰Amáŋ n kwú ayááyí kú Ísɔ ā í tóohɛ́ɛwa dúúdú, klla kwú ɛga otayínū kú uwá í tɛ́ɛcɛ, nēé klla gáā má ɛga dúúmā ɔhá o tayínū ɛɛ́ gɛ ŋ́. É kwú odúúdú ācɛ kú Ɛ́dɔm ā í kpó yíífi ɛɛ́. Odúúmā kú uwá í hile gɛ ŋ́.

¹¹Aá mā ayókwū kú aá tá gā um, n géē lɛ eyí kwu uwá. Anyōkwū kú aá kē lɔfú gboló ce um.

¹²Ɔ́dāŋ́ ka ācɛ ōhī nɛ̄ n cíkā ō yá uwā italā ŋ́, náána nɛ̄ n le italā yá, uwā yá aá italā má, aá gbɛlá ka ń gáā yá aá italā ŋ́ nɛɛ? N géē yá aá italā piíí bɛ̄ɛka ɛ́gɛ́nɛ̄ é gē pī ɔ̄cɛ ejé ā.

¹³N lɛ īyī um gbo, ka igelī nēe lé ka Ubósra ā géē je pīya ɛbɛ́ ohéyī, mɛ́mla ipú alácɛ̄. Ācɛ géē yá ɔ̄ okónū, klla í bī iyē kú nū le tá okónu lɛ ācɛ. Aípɔ́lɛ́ nēe kwu ɔ́ ajaajɛ ā géē je pīya ipú alácɛ̄ piyóó.”

¹⁴Ami nōo wɛ Ujeremíya ka n miyɛ olɛhɔ̄ ŋmá ɛgiyí Óndú ā ɛɛ́. Ó lɛ ɛhɔ̄ tū fu aéwo ā kéē lɛ aícɔ́ɔja kú uwá túbá kéē wā í kpɛ́fú tū Ɛ́dɔm ɛɛ́.

¹⁵Ɔwɔicō kahíníī, “N géē yá ká aá le nyɛ́ ipú aéwɔhá, nɛ̄ ɔ̄cɛ dúúmā í gáā ce aá ojīlīma ŋ́.

¹⁶Ɔbɔ́cɛ́ kú aá lɛ aá plá ka ācɛ ɔ́ɔ gē yúufi aá. Amáŋ ɔ̄cɛ dúúmā í yúúfi aá, ɛ́gɛ́nɛ̄ aá gbɛlá lɛ á ŋ́. Aá lá ɛplá ápátɛ́cɔ̄ icō ɛfu gēē. Ɔ́dāŋ́ ka aá kōō lā licō bɛ̄ɛka ɔlɛ́ igbáanɔ nōo lé ka okpé á nááná, ami nōo wɛ Ɔwɔicō ā géē bī aá wā ajɛ piií.”

¹⁷Óndú ā kahíníī, “Ɛ́gɛ́nɛ́ é géē je Ɛ́dɔm yíífi bɔ̄bí lɛ ā, géē wɛ ɛbɛ ohéyī, nōo géē yá ɔ̄cɛ dúúmā nōo gáā gla anú eyījii.

¹⁸Ɔ̄cɛ dúúmā í klla gáā lā abɔ́ɔ ɛɛ́ gɛ ŋ́, bɛ̄ɛka ɛ́gɛ́nɛ̄ ó yá Usɔ́dɔm mɛ́mla Ugomóra, eko nēé je uwá yíífi ā.

¹⁹N géē wā í nū ācɛ Ɛ́dɔm ŋmá ɔlɛ́ uwā achígilí lɛbɛ̄ɛka ágábá nōo yɔ̄ ī bɛ̄cɛ ŋmá ipu ūpū nɛ̄hi kú Ujɔ́dan wɛ̄ɛcɛ ā. Cɛ́ɛ́ ɔ̄cɛ dúúmā nōo he um ɔtū, n le fu kóō gbō ɔ̄. Ɔ̄nyɛ lɛbɛ̄ɛka ami ā glá? Ɔ̄nyɛ géē lɛ abɔ̄ gbo um ɔtū glá? Ɔcɛ́ nyá í bɛyíkwu um glá āa?

²⁰Ohígbū ɔ́ɔmā, jāhɔ̄ lɛ ojuju nɛ̄ n tū lɛyíkwu ācɛ Ɛ́dɔm mɛ́mla ɔdā nɛ̄ n gáā yá ācɛ kú igelī kú Utɛ́man ā. Kwu ayípɛ̄ ɔlɛ́ uwā, é géē kpó uwá pi nyɔ̄, é kē í je ajɛ ɔlɛ́ uwā yíífi dúúdú.

²¹Ɛ̄cī nēé géē je Ɛ́dɔm yíífi ā, uya kú nū géē nwuné bɛ̄ɛka ɔdā nɛ̄ odúúdú ɛcɛ yɔ̄ í jíliyē ā. Ācɛ géē pó uya kú ikwū nēé í je ā jāā kwu ísu igwɛ̄bɛ́ ā.

²²Aólɛlā ā géē wā í kpɛ́fú tú Ubósra lɛbɛ̄ɛka ɔgɔ nōo ī wu fíyoo wā í je úgwū ā. Ɛ̄cī ɔ́ɔmā, aícɔ́ɔja kú Ɛ́dɔm ā géē bá ī yúúfi bɛ̄ɛka ɔnyā nɛ̄ ɔma lɛ ɔ́ kwú ā.”

²³Olɛhɔ̄ nyā lɛyíkwu Udamáskɔ̄si. Ɔwɔicō kahíníī, “Ācɛ kú aígelī nēé hī ka Uhamati mɛ́mla Ápāadi bá ī yúúfi ohígbū ka é lɛ ɔ̄kā obɔ̄bí pó ɛɛ́. Ɔtū kō mɛ́mla ɔtū kpōokpōo yɔ̄ í yá uwā, nēé mlɛ́nyɔ́ glá ŋ́ bɛ̄ɛka ɛ́gɛ́nɛ̄ ísu í túgbagwú ā.

²⁴Abɔ̄ hɛ́ ācɛ kú Udamáskɔ̄si iyē, ufi klla yɔ̄ ī cɛ̄ lɛ uwá pɛ́ kwu ɛɛ́. É bá ipú ɔnɔ mɛ́mla ákanya bɛ̄ɛka ɔnyā nɛ̄ ɔma lɛ ɔ́ kwú ā.

²⁵Igelī nōo ācɛ pó ofu nū ɛbɛɛbɛ ā gaá tá alácɛ̄ ɛɛ́. Ó tɛtɛ wɛ ɛga nɛ̄ ācɛ bá ī gwéeyē nɛ̄hi.

²⁶É géē kpó ayípōklóbīya kú uwā ŋmó ipú aúláyi kú igelī ā, klla í kpó aícɔ́ɔja kú uwā yíífi.

²⁷N géē tū ɔdɔ kú Udamáskɔ̄si ɔlá, klla í tū aágblɔ̄cɛ́ kú Ubenhádādi, nōo wɛ ɔcɛ́ ā ɔlá.”

²⁸Olɛhɔ̄ nyā lɛyíkwu ipɔ́ɔma kú Ukéda mɛ́mla aájɔ̄cɛ́ nɛ̄ Uhásɔ gē leyīkwu, nɛ̄ Unebúkádinēsa, ɔcɛ́ kú Ubábīlɔn yálé ā. Óndú ā kahíníī, “Cāŋ́jɛ kú aá nuunu tá ācɛ kú Ukéda cɛ́ɛ́ ka á kwú ipɔ́ɔma kú ɛnɔ̄ɔ̄cī ɔ́ɔmā ú yíífi.

²⁹Mīyɛ aáklɔ̄kpɛ kú uwā mɛ́mla aɔ́dāajɛ kú uwá. Mīyɛ aílī nēe ī klá aáklɔ̄kpɛ kú uwā ā mɛ́mla odúúdú aíyó kú uwā. Mīyɛ aínyankwūlumī kú uwā. Ācɛ ā kē í bá ī dɛ̄ ka, ‘Ɔdōōtūufi bá ī yá ɛga dóódu mɛ́mla eko dóódu.

³⁰“Ācɛ kú Uhásɔ, ami nōo wɛ Ɔwɔicō ā gē pi aá ahɔ̄ ka aá kwinya nyɔ̄ í tayínū ɛga oligbó. A le jé ka Unebúkádinēsa, ɔcɛ́ kú Ubábīlɔn ā, lɛ ujɔ̄ nɛ̄hi tū tū aá ɛɛ́. Ó yá ojuju tū aá kahíníī,

³¹‘Aá wā ka alɔ nyɔ̄ í kpɛ́fú tú ācɛ nēe bá nyā, nēe gbɛlá ka aá ɔɔ́ bá ɛbɔ́ ā. É cē igá tū ɔlɛ́ uwá ŋ́ māa, ɛɛ́ nōó gē lɛ odūngwɔ̄wɛ mɛ́mla igodó dúúmā ŋ́. Ó tɔ́ɔtɛ́ foóó.’

³²Ami nōo wɛ Óndú ā kéē kwú odúúdú aíyankwūlumī mɛ́mla ɛna kú uwá í kpó. Ācɛ nēe géē wā aáklō kú ɛyí kú uwā ɔ́ɔmā, n géē pa uwá hīla ga ɛga dóódu. N kē í yá kú ífi kóō yá uwā ŋmá ɛga dóódu.

³³Uhásɔ géē je pīya ipú alácɛ̄ piyóó, nɛ̄ aɔ́gwú géē lā. Ɔ̄cɛ dúúmā í klla gáā lā abɔ́ɔ ŋ́.”

³⁴Eko éyi, abɔ̄ Usedekíya lé ɔcɛ́ kú Ujúda bōōbū ā, Ɔwɔicō kɛlā ga um lɛyíkwu Ɛ́lam.

³⁵Ó kahíníī, “Ami nōo wɛ Ɔwɔicō nōo lɔfú fíyɛ́ dúú ā géē je odúúdú ācɛ nēe ī tɔ́yī nɛ̄hi kú Ɛlam, nēe wɛ ɔfú kú nū ā kpó ŋmó.

³⁶N géē yá ka aólɛlā kéē kpɛ́fú tú Ɛ́lam ŋmá ɛga dóódu bɛ̄ɛka owu nōo yɔ̄ ī tá ŋmá ābɔ̄ dóódu ā. N géē yá lɛ ā jāā gbéeko nɛ̄ ācɛ kú nū kwú pahíla gáā tayínū ipú éwo dóódu kú ɛcɛ ā.

³⁷N géē yá ka ācɛ kú Ɛlam kéē yúúfi kú aólɛlā kú uwá, nēe tíne ō ŋmó uwá ā. N géē cɔ̄nū nɛ̄hi da uwá, géē je Ɛ́lam yíífi. N géē tū aícɔ́ɔja ɛhɔ̄ wā í kpɛ́fú tú uwā jāā gbéeko nēé kwú yíífi ŋmá ajɛ dúúdú.

³⁸N géē kpo aɔ́cɛ́ mɛ́mla aótrɛ̄yí kú uwá yíífi. Cɛ́ɛ́ n kwú pīya ɔcɛ́ abɔ́ɔ.

³⁹Amáŋ igbīhāajɛ ā, n géē yá ka ācɛ kú Ɛ́lam kéē klla kwúcē wā ahɔ̄ olɔhi nēé bá gbɔbū ā kpɔ́. Ami nōo wɛ Ɔwɔicō ā ka á.”