Read idoma UJƐRƐMÍYA 5 Bible Online

UJƐRƐMÍYA 5 - idoma bible

UJƐRƐMÍYA 5

¹Óndú ā kahíníī, “Awɔ, kwinya gicō gajɛ ipú ɛjɛ̄ɛ̄jī aúláyi mɛ́mla aɔ́pu kú Ujerúsālɛm. Leyīláajɛ ká aá tíne, ɔ́dāŋ ka a géē má ɔ̄cɛ ékpónú nōo ī yá ɔdā okpaakpa klla ī tíne ō yá ucē ɔkwɔ̄ɔ̄kwɛ̄yi ā glá. Ɔ́dāŋ ka a lɛ ɔ̄cɛ dúúmā ɛ́gɔ́ɔmā má, ayíka ami nōo wɛ Óndú ā í gáā yá ācɛ kú Ujerúsālɛm italā kú ɔ́bíipú nēé bī ā gɛ ŋ́.

²Nááná nēé gē bī iyē kú um le gbo ɔkpá ā, é gē yá ɛlā nēé ka ka aá géē yá ɔ́ɔmā ŋ́.”

³Anɔ́ɔ ami nōo wɛ Ujeremíya tóohi kahíníī, “Óndú, n jé cāā ka ā géē tíne ucē ɔkwɔ̄ɔ̄kwɛ̄yi. A yá ācɛ ɔlɛ́ uwɔ italā klla gáā kpó uwā ŋmó mɛ dúúdú ɛɛ́. Nááná é lɛ ɛlá wu ɔ́ ŋ́, é kē tá ō pīyabɔ̄ ŋmá ɔ́bíipú kú uwā.”

⁴Anɔ́ɔ n gbɛlá kahíníī, “Aɛ́nyā wɛ aólɛhɔ́cɛ, é kē wɛ ogwuda. É gē yá uce ólíla ohígbū ka é jé ɔdā nɛ̄ Óndú ā, nōo wɛ Ɔwɔicō kú uwā ā, tíne kéē yá ā ŋ́.

⁵N géē ga ɛgiyí aótrɛ̄yí kú uwā ā nyɔ̄ í kɛlā lɛ uwá. Ohígbū ka uwá ā cíkā ō jé ɔdā nɛ̄ Óndú ā, nōo wɛ Ɔwɔicō kú uwā ā ī tíne á.” Amáŋ uwá nááná ā tá ō lɛyítáajɛ lɛ íkwu kú Óndú ā dúú ɛɛ́.

⁶Ohígbū ɔ́ɔmā, aólɛlā géē wā í kpɛ́fú tú uwā bɛ̄ɛka aágábá néē ŋmá ipú ūpū ā. É klla í kpó uwā ŋmó bɛ̄ɛka aɔ́gwú néē ŋmá ipú ígbíli ā. Aólɛlā ɔ́ɔmā í bá ī gbō aígelī kú Ujúda gɛɛ bɛ̄ɛka aɛ́jɛ ā. É klla í ŋmó ɔ̄cɛ dóódu nōo le bɛ̄cɛ tá eyīyɛ̄ɛcɛ kú igá kú igelī nɛ̄hi ā. Ó géē yá uwā lɛ ā ohígbū ka íne nēé bīya ā lɛwa. É klla ī yíīkpɛ̄yí olɔfú tá Óndú ā igbalɛwa.”

⁷Óndú ā kahíníī, “N cíkā ō je íne nɛ̄ aá nēe wɛ ācɛ ɔlɛ́ um ā bīya ā yá aá ɛhi ŋ́ má. Aá nyɛɛ hɛ̄ um tá klla bá ī gbā aɛ́cí nēé wɛ ɔdā ɔ̄kwɛyí ŋ́ mā ɛ̄gbā. N je ɔdōlé lɛ aá nēe wɛ ācɛ ɔlɛ́ um jāā gbéeko nɛ̄ aá le lé lɛ ipú nū. Amáŋ ɔdā nēé le cíla um ulé mɛ́ɛ ā wɛ ka é bá ī gbaajā, ācɛnyīlɔ ā kē bá ī kwu ɔgba ɔlɛ́ aákwuna kéē gwutá mla uwá.

⁸É lɛbɛ̄ɛka aɔ́bá ɔnya nēe le ipú nū lɔɔlɔhi,ī tíne ɔnyā ō ce ā. Ɛ́gɔ́ɔmā nɛ̄ ɔnyɔɔnyɛ kú aá gē yúnwū ō cikpó ɔnyā ɔ́mpā nū á.

⁹Ami nōo wɛ Óndú ā cíkā ō yá ācɛ Ujúda italā ohígbū ɔdā ɔ́ɔmā piíí. N klla í gwō ɛdɔ ewo nyā ɔcí lɛ īyī um piíí.

¹⁰N géē tū aólɛlā ɛhɔ̄ wā í je ɛhɔ̄ ɔcí ufáyin[1] kú ācɛ ɔlɛ́ um ā wúlatāajɛ, amáŋ kéē híī kpó odúúdú aɔ́cí ufáyin ā yíífi ŋ́. N géē da uwá kéē kpó ābɔ̄ ā gwó bónū, ohígbū ka ābɔ̄ ɔ́ɔmā í wɛ ákú um ŋ́.

¹¹Ācɛ kú Ísrɛ̄lu mɛ́mla ācɛ kú Ujúda le ibīyāajɛ yá tū um dúúdú ɛɛ́.”

¹²Ācɛ kú Óndú ā le ɛ̄kɛ̄mgbɛ̄ kā ɛɛ́, kahíníī, “Óndú ā í gáā yá alɔ ɔdā dúúmā ŋ́. Óndú ā í gáā je unwalu dúúmā lɛ alɔ ŋ́. Ɛfú dúúmā í gáā kpó alɔ ɛ́ɛ́, nɛ̄ ɔkpɛtá dúúmā ī ŋmó alɔ ŋ́.

¹³Ācomɛ́ɛbɛ ā wɛ áncā. Óndú ā í kɛlā dúúmā lɛ uwā ŋ́. Ɔdā nēé ka ā géē yá uwā abɔ̄yī uwā á.”

¹⁴Ohígbū ɔ́ɔmā, Óndú ā, nōo wɛ Ɔwɔicō nōo lɔfú fíyɛ́ dúú ā da um kahíníī, “Ujeremíya, abɔ̄ ācɛ Ujúda mɛ́mla ācɛ Ísrɛ̄lu le ka ka ɛlā kú ācomɛ́ɛbɛ ɔ́ɔ wɛ áncā ā, n géē je ɛlā kú okónu kú uwɔ yá kóō lɛbɛ̄ɛka ɔlá ā. N klla í je ācɛ ā yá lɛbɛ̄ɛka ɔcí ā. Ɔlá kē í je uwá yi ŋmá ajɛ.

¹⁵Ācɛ kú Ísrɛ̄lu, n géē bī éwo olɔfú nɛ̄hi éyi ŋmá ɛga oligbó wā í kpɛ́fú tá aá. É wɛ éwo nōo húmáyī yɔ̄ ŋmá íkée. Aá kē gáā pó ucē kú uwā ɛ́ɛ́ nɛ̄ aá gē pó ɔdā nēé gē ka ā glá ŋ́.

¹⁶Ācotɔ́yī kú uwā wɛ aklógō kú aícɔ́ɔja nēé gē ményinyi ɔ̄cɛ ŋ́.

¹⁷É géē kpó īkpɔ̄dɛ̄hɔ̄ mɛ́mla ɔdōlé kú aá lé. É í kpó ayí aá ŋmó. É géē kpó aɛ́na mɛ́mla aálá kú aá kpó ŋmó lé. É klla í kpó aɛ́hɔ̄ kú ɔcí ufáyin mɛ́mla ɔcí ufigi kú aá yíífi. Aígelī kú aá nɛ̄ aá ce igá olɔfú tū uwā, nɛ̄ aá lɔtūce ā, é géē kpɛ́fú tú uwā í kpó uwā catāajɛ.”

¹⁸Óndú ā klla kahíníī, “Ipú aɛ́cī ɔ́ɔmā nááná ā, ń gáā cɛ̄ lɛ uwá je ācɛ ɔlɛ́ um ā kpó yíífi dúúdú ŋ́.

¹⁹Eko nɛ̄ uwá lɛ ɔ̄kā da ka ɔdí ɔ́ɔ yá ɛ́ɛ́ nɛ̄ amíyɔ yá aá aɔ́dā nēe bá āa, Ujeremíya, le da uwá ka, ɛ́gɛ́nɛ̄ e nyɛ̄ɛ̄ hɛ̄ um tá gaá bá ī gbā aɛ́cí kú aéwɔhá ipú ajɛ ɔlɛ́ uwā ɛ̄gbā ā, ka ɛ́gɔ́ɔmā nēé géē gbā ācɛ aéwɔhá ɛ̄gbā ipú ajɛ kú aéwɔhá dúú á.”

²⁰Óndú ā klla ka kpɔ́ kahíníī, “Le da ayááyí kú Ujékɔ̄pu, nēe wɛ ācɛ kú Ujúda ā kahíníī,

²¹“Aá jāhɔ̄, aólíla mɛ́mla aɔ́dāhá. Aá nēe lɛ eyī nááná, nēé mɛ́ɛbɛ ŋ́ mā. Aá nēé lɛ ahɔ̄ nááná nēé pó ɔdā dúúmā ŋ́ mā.

²²Ami wɛ Óndú ā, aá cíkā ō yɔ̄ ī yúúfi um. Aá cíkā ō bá ī fīyégbúlú ɛgiyí um. Ami bī úmúlā le tū ɛjī lɛ ísu, nɛ̄ ísu ā í glá anú glá ŋ́ má. Ó kōō cēenyi klla tá úgbagwú nɛ̄hi nááná, ó bū ɛjī ā wɛ̄ɛcɛ glá ŋ́.

²³Amáŋ aá nēe wɛ ācɛ ɔlɛ́ um ā lɛ ɔtū olɔfú, klla ī yíīkpɛ̄yí olɔfú. Aá nyɛ̄ɛ̄ hɛ̄ um tá nyɔ̄ í bá ī yá ɔdā ɔtū aá ɛɛ́.

²⁴Aá gbɛlá ō ce um ojīlīmā ŋ́, nááná nɛ̄ n gē tū ɔwɔ aflɛ́yí mɛ́mla ákú igbīhāajɛ klá īkpɔ̄dɛ̄hɔ̄ kú aá, nɛ̄ n gē je ɔdɛ̄hɔ̄ nɛ̄hi lɛ aá iháyí dóódu ā.

²⁵Ikɔkɔ ɔ́ɔmā, íne nɛ̄ aá bīya ā lɛ odúúdú ɔdā olɔhi nyā kpó ŋmá ɛgiyí aá.

²⁶“Ācobɔ̄bíipú lā ipú ācɛ ɔlɛ́ um. É ī kwāajɛ bá ī gbō ācɛ gɛɛ bɛ̄ɛka ofītɛ́ nōo ī kwāajɛ gbēyī ɛbɛ́ ā. É gē jē ukpa í kwú ācɛ bɛ̄ɛka ācɛ nēe ī jē ukpa tá ajɛ í le kwú aígbáanɔ ā.

²⁷Ɛ́gɛ́nɛ̄ ofītɛ́ gē ŋmó ɛbɛ́ mu obīlifu kú nū ā, nɛ̄ ɔlɛ́ uwā le mu mla iyó nēé plla ācɛ mīyɛ ŋmá abɔ̄ uwā ā. Ɔ́ɔma yá ɛ́ɛ́ nēé je gbagbénú klla je pīya ācɛ nɛ̄hi á.

²⁸É bá ī lé ɔdōlé abahi klla le jɔ̄kwū nɛ̄hi. Ɔ́bíipú nēé ī bī ā í lɛ ɛjī ŋ́. É gē hɛ́pɔ̄ okpaakpa ká ayókwū kéē le ɔdā nōo cíkā ō wɛ ákú uwā lɛ ŋ́. É klla gē cɛ̄pɔ̄ ācɛ nɛ̄ ācɛ ī pīyatū ā ŋ́.

²⁹Ami nōo wɛ Óndú ā géē yá ācɛ Ujúda italā ohígbū ɔdā ɔ́ɔmā piíí. N géē gwō ɛdɔ éwo nyā ɔ́ci kú abɔ̄ īyī um piíí.

³⁰Ɔdōbɔ̄bí nɛ̄hi mɛ́mla ɔdā otūufi nɛ̄hi le yá ipú ajɛ nyā ɛɛ́.

³¹Ācomɛ́ɛbɛ hile ukpɛ̄ ɛ̄kɛ̄mgbɛ̄ ō kā ofōōfūnū. Ācogwɛ́ɛya ā ī klla ī gbāajɛ ɛ́gɛ́nɛ̄ o he uwá ɔtū ā. Ācɛ ɔlɛ́ um kē tíne ká ɔdā nɛ̄ ācomɛ́ɛbɛ mɛ́mla ācogwɛ́ɛya ī yá ā kóō lɛ ā. Amáŋ, eko nɛ̄ ɔdā dóódu nyā le pīyɛyí tá, ɔdí nēé géē yá ā gɛ?”