Read idoma UJƐRƐMÍYA 50 Bible Online

UJƐRƐMÍYA 50 - idoma bible

UJƐRƐMÍYA 50

¹Ɔwɔicō kɛlā nyā lɛ Ujeremíya kóō ka lɛyíkwu Ubábīlɔn, mɛ́mla ācɛ Ubábīlɔn ā.

²Ɔwɔicō kahíníī, “Ka ɔ̄kā nyā lɛ éwo dóódu. Bī ɔ̄ tɔ́ɔna. Je otúta gicō kú ocābɔ̄, kú ā tɔ́ɔna. Ā je ɔdā dóódu tayínū ŋ́, amáŋ dɛ kahíníī, ‘É lɛ Ubábīlɔn yálé ɛɛ́! É lɛ uwēyī je lɛ aɛ́cí kú Ubábīlɔn nēé hī ka Ubɛ́lu mɛ́mla Umárdūk ā ɛɛ́. É kwú aójibó kú aɛ́cí kú Ubábīlɔn ā í kpó ca bónū ɛɛ́.

³Éwo éyi ŋmá ajɛ ɛhícō gā gáā kpɛ́fú tú Ubábīlɔn ɛɛ́. É kē í je ɔ́ tá alácɛ̄, nɛ̄ ɔ̄cɛ dúúmā í gáā lā anú ŋ́. Kwu ācɛ mɛ́mla aɛ́bɛ́ géē kwinya ŋmá abɔ́ɔ.”

⁴Óndú ā klla kahíníī, “Eko nɛ̄ eko ɔ́ɔmā gā, ācɛ Ísrɛ̄lu mɛ́mla ācɛ Ujúda géē kwúcē wā í bá ī jikwū, ī tíne ami, nōo wɛ Ɔwɔicō kú uwā ā.

⁵É géē bá ī tíne ɔwɛ nōo yɛ ga Usáyɔn ā, klla í bá ī nyɔ̄ ɔwɛ ɔ́ɔmā. É géē je īyī uwā pīya ācɛ ɔlɛ́ um, í gbɛka mla um, nōo géē yɔ̄ piyóó, nēé klla gáā bīya anú ɛ́ɛ́ gɛ ŋ́.

⁶Ācɛ ɔlɛ́ um lɛbɛ̄ɛka aálá nɛ̄ ācɛ nēe ī gbō uwā ā lɛ uwá bī gebí ɛyí aɛ́fu ā. É bá ī bí bɛ̄ɛka álá ā ŋmá ɛyí ɛfu éyi ga ɛyí ɛfu ɔhá. É kwú mlanyī ɛga nɛ̄ ɔlɛ́ uwā yɔ̄ ā.

⁷Odúúdú ācɛ nēe gē má uwā ā géē ŋmó uwá. Aólɛlā kú uwá géē ka ka, ‘É lɛ ɔbíipú bī tá Ɔwɔicō, nōo wɛ ɛga olúlé ɔkwɛ̄yi kú uwā, mɛ́mla ɔ̄cɛ nōo je eyīyōce lɛ aádáádā uwā ā. Ohígbū ɔ́ɔmā ɔdā dúúmā nɛ̄ alɔ yá uwá nááná í bɔ̄bí ŋ́.’

⁸Ācɛ kú Ísrɛ̄lu, aá kwinya ŋmá ajɛ Ubábīlɔn. Aá nyɛ̄ɛ̄ ŋmá éwo ɔ́ɔmā. Aá kóō wɛ ācɛ aflɛ́yí nēe géē nyɛ̄ɛ̄ ŋmá éwo ɔ́ɔmā ā.

⁹N yɔ̄ ī plla ígwu kú aéwo olɔfú nɛ̄hi ŋmá ajɛ ɛhícō kéē wā í kpɛ́fú tá Ubábīlɔn. É géē hɔ́ɔ́gba kú ɛfú lɛyíkwu ɔ́ klla í yá ɔ̄ lé. Ɔyī kú uwā í gē tááblɛ̄ ŋ́, bɛ̄ɛka ɔ̄cotɔ́yī nɛ̄hi, nɛ̄ ɔyī kú nū gē cē ɔdā dóódu nōó tíne ā.

¹⁰É géē je Ubábīlɔn wu. Ācɛ nēe í je ɔ́ wu ɔ́ɔmā, géē kpó ɔdā nōo he uwá ɔtū ā ŋmá Ubábīlɔn jāā nōo le jɛ̄ uwā. Ami nōo wɛ Ɔwɔicō ā ka á.”

¹¹Ɔwɔicō klla kahíníī, “Ācɛ kú Ubábīlɔn, ɔtū he aá abɔ̄ aá je acɛ ɔlɛ um wúlatāajɛ ā. Eko ɔ́ɔmā aá yɔ̄ ī tóómbli bɛ̄ɛka ɛna nōo yɔ̄ ī yɛ ɛyí igwú, yɔ̄ ī wū igwú a. Aá klla bá ī yúuya bɛ̄ɛka ɔbá ɔnya ā.

¹²Amáŋ igelī nɛ̄hi kú aá nēe lé ka Ubábīlɔn, nēe lɛbɛ̄ɛka ɛ́nɛ́ aá ā, é géē je uwēyī lɛ ɔ́ klla í tá ɔ̄ wā ajɛ. Ubábīlɔn géē wɛ éwo nōó cɛgbá ŋ́ fíyɛ́ dúú ipú ɛcɛ mɛ́ɛ̄ á. Ó kē géē je ŋmíkpākplā, í je pīya ígbíli.

¹³Ohígbū ícɔ̄nū kú um lɛyíkwu Ubábīlɔn, ɔ̄cɛ dúúmā í gáā lā anú ɛɛ́ gɛ ŋ́. Ó géē tá alácɛ̄, klla í yá ācɛ dóódu nōo gáā yɛ gla anú ā eyījii.

¹⁴Ācotɔ́yī, aá le hɔ́ɔgba kú ɛfú yɛ Ubábīlɔn jīla tá biílí. Aá tá odúúdú aɔ́yī kú aá klá Ubábīlɔn, ohígbū ka éwo ɔ́ɔmā lɛ ɔbíipú bī lɛyíkwu Ɔwɔicō.

¹⁵Aá dɛ̄gba ogwú yɛ igelī ā jīla tá. Ācɛ Ubábīlɔn cɔ̄nyā ɛɛ́. É kwú ɔdɔ kú igá nēé cē tū ɔ̄ ā ú wúlatāajɛ ɛɛ́. Ami nōo wɛ Ɔwɔicō ā yɔ̄ ī gwō Ubábīlɔn ɔ́ci. Ohígbū ɔ́ɔmā, aá gwō ɔ̄ ɔ́ci dúú. Aá yá ācɛ Ubábīlɔn ɛ́gɛ́nɛ̄ ācɛ Ubábīlɔn yá ācɛ ɔhá ā.

¹⁶Aá cɛ̄ lɛ ɔ̄cɛ dúúmā hɛ́hɔ̄ abɔ́ɔ, ɛ́ɛ́ nēé gē ce ɔdɛ̄hɔ̄ dúúmā abɔ́ɔ ŋ́. Odúúdú ācɛ éwɔhá nēe lā abɔ́ɔ ā, géē yúúfi kú aícɔ́ɔja nēe gē kpɛ́fú tú ācɛ Ubábīlɔn ā. Cɛ́ɛ́ ɔnyɔɔnyɛ le pɛ́ kwu ga ajɛ ɔlɛ́ nū.”

¹⁷Ɔwɔicō klla kahíníī, Ācɛ kú Ísrɛ̄lu lɛbɛ̄ɛka aálá nɛ̄ aágábá bá ī nū uwá inya, ī fíyá uwā ákátā ā. Aflɛ́yí ā, ɔcɛ́ kú Asírīya ā le ɛfú kpó tú uwá. Anɔ́ɔ Unebúkádinēsa, ɔcɛ́ kú Ubábīlɔn, klla wā í je uwá yíífi ámōmɛ á.

¹⁸Ohígbū ɔ́ɔmā, ami, Uyáwɛ, olɔfú fíyɛ́ dúú ā, nōo wɛ Ɔwɔicō nɛ̄ Ísrɛ̄lu gē gbɛ̄ɛ̄gbā ā géē yá Unebúkádinēsa, ɔcɛ́ kú Ubábīlɔn, mɛ́mla ācɛ ɔlɛ́ nū italā, ɛ́gɛ́nɛ̄ n yá ɔ̄cɛ́nɛ̄hi kú Asírīya italā ā.

¹⁹N géē kpó ācɛ Ísrɛ̄lu wā ajɛ ɔlɛ́ uwá lɛbɛ̄ɛka aálá nēe ī kwúcē wā ɛga olúlé kú uwā ā. É géē lé ɔdōlé nōo jɛ̄ ɛyí ɛfu kú ukámɛ̄lu mɛ́mla ɔpɛ́ kú ajɛ kú Ubássan ā. É géē lé ɛdɔ kú ɔdōlé dóódu nōo he uwá ɔtū, nēé ī jɛ̄ ipú ajɛ kú Ɛ́frem mɛ́mla ajɛ kú Ugílɛ̄di ā.

²⁰Eko ɔ́ɔmā, ami nōo wɛ Ɔwɔicō ā í gáā má ɔ́bíipú nɛ̄ ācɛ Ísrɛ̄lu bī ŋ́, ɛ́ɛ́ nɛ̄ n gē má ɔdōbɔ̄bí dúúmā nɛ̄ ācɛ Ujúda yá ŋ́. Ohígbū ka n géē je yá ācɛ nɛ̄ n yá kéē wi ā ɛhi.”

²¹Ɔwɔicō klla kahíníī, “Ācɛ nɛ̄ n fu kéē kpɛ́fú tú Ubábīlɔn ā, aá kpɛ́fú tú ācɛ kú Umerátéyim mɛ́mla ācɛ kú Upékɔ̄di ā. Aá lɛ uwá kpó ŋmó klla lɛ uwá kpó yíífi. Aá lɛ ɔdā dóódu nɛ̄ n da aá yá dúúdú.

²²Ācɛ bá ī pó uya kú ɛfú nēé bá ī kpó ā mɛ́mla ɛ́gɛ́nɛ̄ é bá ī yá ɔdéē ífi ipú ajɛ ā.

²³Ubábīlɔn lɛbɛ̄ɛka omútāga nōo je odúúdú ɛcɛ wúlatāajɛ. Amáŋ anú abɔ̄yī nū kwú cē, le yíla bónū icɛ ɛɛ́. Ɔdā nōo yá Ubábīlɔn nyā, yá ācɛ éwo dóódu eyījii.

²⁴Ubábīlɔn, aá nuunu tá ami nōo wɛ Ɔwɔicō ā. Amáŋ á jé ka ukpa nɛ̄ n jē ga uwɔ ā lɛ uwɔ kwú ɛɛ́ ŋ́.

²⁵N lɛ ɔwɛ kú ɛga nɛ̄ n kpó iyɛ́fú kú um bá ā nwūla ɛɛ́. N le cɔ̄nū lɛ uwá kpó ɛɛ́, ohígbū ka ami, Ɔwɔicō nōo lɔfú fíyɛ́ dúú ā, lɛ úklɔ́ ō yá ajɛ Ubábīlɔn.

²⁶Aá kpɛ́fú tá Ubábīlɔn ŋmá āyā dóódu kú aá kwú aɔ́bā nēé ī kpó aíkpɔ̄dɛ̄hɔ̄ tū igelī ā í kpó ca. Lɛ aíyó kú nū ā tīkwū klá ajɛ bɛ̄ɛka ɛ́gɛ́nɛ̄ é ī yá ikpɔ̄dɛ̄hɔ̄ ā. Aá lɛ Ubábīlɔn yíífi dúúdú, aá mā ɔdā dúúmā tá ipú nú ŋ́.

²⁷Lɛ odúúdú aícɔ́ɔja kú uwā kpó ŋmó kú a lɛ uwá kpó hɛ́ ɔkɔ. Ákú ācɛ Ubábīlɔn mɛ ɛɛ́. Eko ō yá uwá italā ga ɛɛ́.

²⁸Aá pó abɔ̄ ācɛ nēe kwu ŋmá Ubábīlɔn wā Ujerúsālɛm ā bá ī kā ɔ̄kā kú ɛ́gɛ́nɛ̄ Óndú ā gwō Ubábīlɔn ɔ́ci lɛ ā. Ɔwɔicō géē gwō Ubábīlɔn ɔ́ci ohígbū Agblīihɔ-nɛ̄hi kú nū nēé je yíífi ā.

²⁹Lɛ ka lɛ odúúdú ācotɔ́yī nɛ̄hi ā, kéē gáā kpɛ́fú tá ācɛ Ubábīlɔn. Aá le yɛ igelī ā jīla tá biílí, aá cɛ̄ lɛ ɔ̄cɛ dúúmā kwu ŋmá abɔ́ɔ ŋ́. Aá cílá anú ulé kú odúúdú ɔdā nōó yá ā. Aá yá ɔ̄ ɔdā nōó yá ācɛ ɔhá ā, ohígbū koó yá ɔbɔ́cɛ, lɛ aflūmā yá lɛyíkwu ami, Ɔwɔicō, nɛ̄ ɔdā dúú í tōō gbla um, nɛ̄ Ísrɛ̄lu gē gbɛ̄ɛ̄gbā ā.

³⁰Ohígbū ɔ́ɔmā, é géē kpó ayípōklóbīya kú ɔlɛ́ nū ā ŋmó ipú úláyi kú nū. É kē géē kpó odúúdú aícɔ́ɔja kú ɔlɛ́ nū yíífi ɛ̄cī ɔ́ɔmā.

³¹Ubábīlɔn, a le mu mla ɔbɔ́cɛ. Ohígbū ɔ́ɔmā ā, ami, Uyáwɛ, nōo wɛ Ɔwɔicō nōo lɔfú fíyɛ́ dúú ā, le ɛyí bú kwu uwɔ ɛɛ́! Eko gā nɛ̄ n géē yá uwɔ italā ɛɛ́.

³²A ī yá ɔbɔ́cɛ nɛ̄hi, Ubábīlɔn. Amáŋ a í lɛ ikpó gbo ajɛ klla í gwōnū. Ɔ̄cɛ dúúmā í kē gáā tá uwɔ abɔ̄ je uwɔ cāŋjɛ ŋ́. N géē tū aípɔ́lɛ́ kú ɔlɛ́ uwɔ ā ɔlá, ɔdā dóódu nōo yɔ̄ kwu uwɔ ajaajɛ ā géē je yɔɔlá.

³³Ɔwɔicō nōo lɔfú fíyɛ́ dúú ā klla kahíníī, “É le ācɛ kú Ujúda mɛ́mla Ísrɛ̄lu yáŋmó. Odúúdú ācɛ nēe kwú uwā aɔ́fiyɛ ā bá ī gbō uwá gɛɛ, í cɛ̄ lɛ uwá nyɔ̄ ŋ́.

³⁴Amáŋ ami, nɛ̄ iyē um lé ka Uyáwɛ, olɔfú fíyɛ́ dúú ā, géē nya uwá tá. N kē lɔfú nɛ̄hi. Ami abɔ̄yī um géē cɛ̄ɛpɔ̄ uwā. N klla ī cɛ̄ lɛ ɛbɔ́ yɔ̄ odúúdú ajɛ ɔlɛ́ uwā kpɔ́. Amáŋ n géē bī unwalu gé lɛ ācɛ Ubábīlɔn.”

³⁵Óndú ā klla ka gɔbū kahíníī, “Ɛfú kóō kpó ācɛ Ubábīlɔn. Ɛfú kóō kpó ācɛ nēe lā igelī nēe lé ka Ubábīlɔn ā. Ɛfú kóō kpó aótrɛ̄yí mɛ́mla aójéeyī kú Ubábīlɔn ā.

³⁶Ɛfú kóō kpó ācogwɛ́bā kú nū, kéē le pīya aólíla. Ɛfú kóō kpó aícɔ́ɔja kú nū, ufi géē kwú uwā nɛ̄hi.

³⁷Ɛfu kóō kpó aɔ́nya mɛ́mla aúgbɔ́ɔnya kú ɛfú kú nū. Ɛfú kóō kpó aícɔ́ɔja kú aéwɔhá nēé plla wā í tá uwá abɔ̄ ɔ́ɔmā ā. É géē je kwáahi lɛbɛ̄ɛka ācɛnyā ā. Ɛfú kóō kpó agbénú kú uwá, kéē kwú uwá ú uwi.

³⁸“Ɔwɔ kóō híī yā ajɛ ɔlɛ́ uwá, kú aɔ́kpá kú uwā kéē kwú kpó ŋmó. Ubábīlɔn wɛ ajɛ ɔlɛ́ ācɛ nēe ī pā aɛ́cí alɛwa, Aɛ́cí ā kē húmáyī lɛ ācɛ ā yá aólíla.

³⁹Ohígbū ɔ́ɔmā, aɛ́pā mɛ́mla aéwo ipácí mɛ́mla aígbáanɔ elihɔ̄ gáā lā Ubábīlɔn á. Ācɛ dúú í klla gáā lā Ubábīlɔn gbóógbóō ipú ɛcɛ nyā ɛɛ́ gɛ ŋ́.

⁴⁰Ɔdā ékpónú nōo yá Usɔ́dɔm mɛ́mla Ugomora mɛ́mla aígelī nēe bá kwu uwā ajaajɛ ā, eko nɛ̄ n je uwá kpó yíífi ā, anú gáā yá Ubábīlɔn á. Ɔ̄cɛ dúúmā í klla gáā lā Ubábīlɔn ɔhá ɛɛ́ gɛ ŋ́.”

⁴¹Ɔwɔicō klla kahíníī, “Áícɔ́ɔja nēe lɛwa nɛ̄hi bá ī wā ŋmá ajɛ ɛhícō. Éwo kú ācɛ nēe lɔfú nɛ̄hi éyí, mɛ́mla aɔ́cɛ́ kú aéwo alɛwa pīyatɔ̄há le tútū bá ī wā í kpɛ́fú ɛɛ́.

⁴²É kpó ɔtā mɛ́mla ōbō mɛ́mla ɔkpacāŋ́gelī tū abɔ̄. É lɔnɔɔtū, í klla í ményinyi ɔ̄cɛ ŋ́. É ce aɔ́nya kú uwá bá ī wā kwūūū bɛ̄ɛka úgbagwú kú ísu ā. É le tútū ɛfú ō kpó tú ācɛ Ubábīlɔn ɛɛ́.

⁴³Ɔcɛ́ kú Ubábīlɔn lɛ ɔ̄kā pó lɛyíkwu aícɔ́ɔja nyā, abɔ̄ kē hɛ́ ɔ́ iyē. Iyē kē le gbɔlá yōō lɛ ɔ́ bɛ̄ɛka ɔnya nɛ̄ ɔma lɛ ɔ́ kwú ā.

⁴⁴N géē wā í tū ācɛ Ubábīlɔn iyē bɛ̄ɛka ágábá nōo ī bɛ̄cɛ ŋmá ipú ūpū nɛ̄hi kú Ujɔ́dan ā gaá kwaá lɛ ɔwá kú aálá nēe bá ī lé ácí ɛ̄mɛ̄mɛ̄ kwu ísu kú Ujɔ́dan ā. Ācɛ Ubábīlɔn kē í kwinya igbledū ŋmá ipú ɔlɛ́ uwá. Cɛ́ɛ́ n kē lɛ otrɛ̄yí nōo he um ɔtū fu kóō gbō abɔ́ɔ. Ɔ̄nyɛ lɛbɛ̄ɛka ami ā glá? Ɔnyɛ kē lɛ abɔ̄ gbō um ɔtū glá āa? Ɔcɛ́ nyá kē bɛ̄yíkwu um glá ā?

⁴⁵Ohígbū ɔ́ɔmā jāhɔ̄ tá ojuju nɛ̄ n tū lɛyíkwu igelī kú Ubábīlɔn, mɛ́mla ɔdā nɛ̄ n mīya ka n gáā yá ācɛ ā a. É géē kpó ayípɛ̄ ɔlɛ́ uwá pi nyɔ̄, nɛ̄ ɔlɛ́ uwā kē í tá áncā dúúdú.

⁴⁶Eko nēé í je Ubábīlɔn yíífi ā, é géē pó uya kú nū ā jāā ga ɛga dóódu bɛ̄ɛka ɔdā nɛ̄ ɛcɛ jīliyē ā. Aéwo ɔhá kē í pó íbáā nēé ī bá ī dɛ̄ Ubábīlɔn ā.”