Read idoma UJƐRƐMÍYA 51 Bible Online

UJƐRƐMÍYA 51 - idoma bible

UJƐRƐMÍYA 51

¹Ujeremíya klla ka Ɔwɔicō ɔ́ɔ ka gɔbū kahíníī, “N géē bī owu nōo ī kpó ɔdā yíífi wā í je Ubábīlɔn mɛ́mla ācɛ Ubábīlɔn yíífi.

²N géē tū aéwɔhá wā í je Ubábīlɔn yíífi ɛ́gɛ́nɛ̄ owu gē kpo ácí bónū ā. Eko nɛ̄ ɛ̄cī nēé géē je ɔ́ yíífi ā gā, é géē kpɛ́fú tá Ubábīlɔn ŋmá āyā dóódu kē í je ajɛ ā tá áncā.

³Ā je ɛga lɛ aícɔ́ɔja kú uwá tá ɔyí ɛ́ɛ́, nēé gē kpó uwé ɛfú dúúmā wiyē ŋ́. Ā hɛ́ ayípōklóbīya dúúmā kú uwá tá ŋ́. Kwú odúúdú aícɔ́ɔja kú uwá ú kpó yíífi dúúdú ŋmáajɛ.

⁴É géē yá uwá ágbe nēé géē pɛ́ kwú ipú aúláyi kú ipú aígelī kú Ubábīlɔn.

⁵Ācɛ Ísrɛ̄lu mɛ́mla ācɛ Ujúda lɛ ɛpɔ̄bí lé iyɔ̄bū ami, Uyáwɛ olɔfú fíyɛ́ dúú ā, nōo wɛ Ɔwɔicō nēé ī gbɛ̄ɛ̄gbā ā. Amáŋ ami nōo wɛ Ɔwɔicō, nɛ̄ ɔdā dúú í tōō le gbla um ŋ́ mā, nɛ̄ Ísrɛ̄lu gē gbɛ̄ɛ̄gbā, í cigbīhi kwu uwá ŋ́.

⁶Aá kwinya ŋmá Ubábīlɔn. Aá kwinya kú oyēeyī kú aá. Aá yá kéē kwú aá í kpó ŋmó ohígbū ɔ́bíipú kú ācɛ Ubábīlɔn ŋ́. Eko nyā, n yɔ̄ ī gwó uwā ɔ́ci, klla ī yá uwā italā nōo cíkā lɛ uwā ā.

⁷Ācɛ Ubábīlɔn lɛbɛ̄ɛka íkókwū kú ugóolu ā ipú abɔ̄ kú um ā. N kē cɛ̄ lɛ odúúdú ācɛ kú ɛcɛ le ejé gwá ŋmá anú. Ejé ā kē le uwá kwú, odúúdú aéwo ā kē kwú jɛɛ́lɛ́ ɛɛ́. Ɛ́gɔ́ɔmā nɛ̄ n bī ācɛ Ubábīlɔn le yá aéwo kú ɛcɛ ā italā ohígbū ɛ́gɛ́nɛ̄ n cɔ̄nū da aéwo ā lɛ ā á.

⁸Amáŋ é le ācɛ kú Ubábīlɔn yálé klla kwú uwā ú kpó yíífi igbledu ɛɛ́. Aá jikwū ohígbū Ubábīlɔn. Aá bī ɛcí wā í tū uwā ágbe. Ekoōhī ágbe kú uwā lɔfú jé glá.

⁹Aéwɔhá nēe lā abɔ́ɔ ā kahíníī, ‘Alɔ cēyītīkwū kú alɔ tá ācɛ kú Ubábīlɔn abɔ̄ amáŋ ó tōo yá gɛ ŋ́. Ālɔ̄ mabɔ̄ uwā tá kú ɔnyɔ̄ɔ̄nyɛ kóō nyɔ̄ ɔlɛ́ nū mɛ́ɛnɛ. Italā nɛ̄ Ɔwɔicō yɔ̄ ī yá ācɛ kú Ubábīlɔn le nwuné fíyɛ́ abɔ̄. Ó kōō tōō ka ŋ́.’”

¹⁰Ācɛ Ísrɛ̄lū dɛ̄gba kahíníī, “Ɔwɔicō le ɛpɔ̄hi hɛ́ lɛ alɔ ɛɛ́. Alɔ nyɔ̄ gáā tɔ́ɔ́na ɔdā nɛ̄ Ɔwɔicō yá nyā lɛ ācɛ kú Ujerúsālɛm.

¹¹Óndú ā lɛ aɔ́cɛ́ kú Umédiya plla tū ācɛ Ubábīlɔn ɛɛ́, ohígbū kóō tíne ō je ācɛ Ubábīlɔn yíífi. Ɛ́gɛ́nɛ̄ Óndú ā tínē ō gwō ɔcí kú Agblīihɔ-nɛ̄hi kú nū nɛ̄ ācɛ Ubábīlɔn je yíífi ā yɔ̄ abɔ́ɔ á. Anɔ́ɔ ó je ɔ́da lɛ uwá kahíníī, “Aá lɛ ɔyī kú aá tūlé! Aá kwú aɔ́kplɛ́fú kú aá kpó!

¹²Aá le otúta je gicō kú aá cābɔ̄ kéē kpɛ́fú tú ɔdɔ kú Ubábīlɔn. Aá lɛ aícɔ́ɔja kpó gbāajɛ fíyɛ́. Aá lɛ ácɔ́ɔja nēe ī gbāajɛ kpó kéē bá ī gbō igelī ā gɛɛɛ. Aá lɛ aícɔ́ɔja kpó kwāajɛ tayínū ipácí. Ami nōo wɛ Ɔwɔicō ā géē yá ɔdā nɛ̄ n miya ka n géē yá Ubábīlɔn ā.

¹³Ubábīlɔn, aá lɛ ísu alɛwa mɛ́mla agbénú nɛ̄hi, amáŋ eko ō kwú kú aá ga ɛɛ́. Ɔ́ŋgbá nōo bī oyēeyī kú aá kwú hɛ́ ɛɛ́.

¹⁴Ami, Ɔwɔicō nōo lɔfú fíyɛ́ dúú, tókónu ka abɔ̄ ami wɛ Ɔwɔicō ā, n géē kpó aícɔ́ɔja kú aólɛlā nēe lɛwa bɛ̄ɛka ɔ́wá kú efūma ā, wā í kpɛ́fú tú aá, ācɛ Ubábīlɔn. É klla í tɔ́ɔga ka aá le Ubábílɔn yálé ɛɛ́, ipú Ubábīlɔn.

¹⁵Ɔwɔicō bī ɔfú mɛ́mla íjéeyī kú nū yá ɛcɛ, klla nā ɔkpáncō daa á.

¹⁶Anú gē je ɔ́da ɛɛ́ nɛ̄ ɔwɔ gē gwō á, Ó kllla ī bī ojuja wā ŋmá oŋmɛ́yí kú odúúdú ɛcɛ. Anú yá ɛɛ́ nɛ̄ ɔwɔ gē límanya eko ɔwɔ á. Anú klla ī tá owu nɛ̄hi wā ɛcɛ ŋmá ɛga nōo ī kpó ɔ̄ tū ā á.

¹⁷Ɛgiyí nū, odúúdú ācɛ wɛ aólíla, é kē jé ɔdā dúúmā ŋ́. Ācɛ nēe gē má ojíbó kú aɛ́cí ā wɛ aólíla, bɛ̄ɛka aɛ́cí ā. Ohígbū ka aɛ́cí nēé yá ɔ́ɔmā, wɛ ɔdā ɛ̄kɛ̄mgbɛ̄, é kē lɛ oyēeyī ŋ́.

¹⁸Aɛ́cí ī tīile dúúmā ŋ́. Ɔ̄cɛ dóódu í cíkā ō lɛ ɛlá wu uwá ŋ́. Eko nɛ̄ Ɔwɔicō le tútū ō yá uwā italā, ó géē je uwá kpó yíífi.

¹⁹Amáŋ Ɔwɔicō kú ācɛ Ísrɛ̄lu, ayááyí kú Ujékɔ̄pu ā í lɛbɛ̄ɛka aɛ́cí ā ŋ́. Anú yá ɔdā dóódu á. Ó kē le Ísrɛ̄lu fu ka ɔ́ɔ̄ wɛ ákú anúɔ abɔ̄yī anúɔ ɛɛ́. Iyē nū lé ka Uyáwɛ nōo lɔfú fíyɛ́ dúú ā.

²⁰Ɔwɔicō kahíníī, “Ubábīlɔn, awɔ wɛ omútāgā mɛ́mla iyɛ́fú kú um á. N bī uwɔ le ca aéwo mɛ́mla aájɔ̄cɛ́ alɛwa tāajɛ.

²¹N bī uwɔ le wúla aɔ́nya mɛ́mla ācocɔnya tāajɛ. N klla bī uwɔ le wúla aúgbɔ́ɔnya mɛ́mla ācɛ nēe gē pɛ́ uwā ā tāajɛ,

²²N bī uwɔ le ca ācɛ tāajɛ, kwu ācɛnyīlɔ mɛ́mla ācɛnyā, kwu anyākwɔ́cɛ mɛ́mla ayípɛ̄, kwu ayípōklóbīya mɛ́mla ayípɔ̄ncɛ́nyā.

²³N bī ɔ̄ le cā ācogbāálá mɛ́mla aálá kú uwá tāajɛ. N klla bī uwɔ le ca ācohɛ́hɔ̄ mɛ́mla aɛ́nā nēé ī bī le hɛ́hɔ̄ ā tāajɛ. N kē bī uwɔ le ca aígbómina mɛ́mla aótrɛ̄yí tāajɛ.

²⁴Ɔwɔicō klla kahíníī, “Aá géē leyīkwu cāāā bá ī mā um abɔ̄ n yɔ̄ ī cílá ajɛ Ubábīlɔn mɛ́mla ācɛ Ubábīlɔn ulé kú ɔdōbɔ̄bí dóódu nēé yá Ujerúsālɛm ā.

²⁵Ubábīlɔn, ā lɛbɛ̄ɛka ɛfu nōo kpó odúúdú aéwo kú ipú ɛcɛ yíífi ā. Amáŋ ami, nōo wɛ Ɔwɔicō ā, wɛ ɔlɛlā kú uwɔ. N géē lɛ abɔ̄ bī uwɔ í je uwɔ míya ŋmá icō ɛga nɛ̄ a ce ā. Eko nɛ̄ n le yá mɛ mla uwɔ, a géē je pīya ewo áncā klá ajɛ.

²⁶É klla gáā bī ɛcɔ̄ kú alácɛ̄ kú uwɔ ā le gwó ɔlɛ́ ɔhá dúúmā glá ɛɛ́ gɛ ŋ́. A géē tá alácɛ̄ piyóó. Ami nōo wɛ Ɔwɔicō ā ka á.

²⁷Lɛ otúta je gicō kú ɛfú kóō gbɔɔ́. Lɛ opo tá kú éwo dóódu kéē pó. Lɛ aéwo ā tútū kéē kpɛ́fú tú ācɛ Ubábīlɔn. Da aɔ́cɛ́ kú Árārati, mɛ́mla Umíni, mɛ́mla Áskɛ́nāsi kéē wā í kpɛ́fú ā dúú. Lɛ otrɛ̄yí éyi fu kóō wɛ ogbēnjūwā kú ɛfú ā. Lɛ aɔ́nya kú ɛfú kpó wā lɛwa bɛ̄ɛka efūma ā.

²⁸Lɛ aéwo ā tútū kéē kpɛ́fú tā ācɛ Ubábīlɔn. Lɛ ɛhɔ̄ tū fu aɔ́cɛ́ kú Umédīya, mɛ́mla aótrɛ̄yí mɛ́mla aígabɔ̄, mɛ́mla aícɔ́ɔja kú aéwo nɛ̄ uwā í gbō ā.

²⁹Ɛcɛ yɔ̄ ī jīliyē gbudugbudu, ohígbū ka ami nōo wɛ Ɔwɔicō ā gbɔɔ́ ā yá ɔdā nɛ̄ n miya tū ō je Ubábīlɔn yíífi, je ɔ́ tá alácɛ̄ bɛ̄ɛka ígbíli, ɛga nɛ̄ ɔ̄cɛ dúúmā í gáā lā gɛ ŋ́.

³⁰Aícɔ́ɔja kú Ubábīlɔn kwú kwu ŋmá ɛfú gáā tayínū ɛɛ́. É kwú gbogodo ipú ufi bɛ̄ɛka ācɛnyā ā. Aólɛlā ā kwu odūngwɔ̄ɔwɛ kú igá kú igelī kú uwā ú ca ɛɛ́. É klla kwú aɔ́lɛ́ uwā ú tū ɔlá.

³¹Ācocɛ̄hɔ̄ gaá yɔ̄ ī cɛ̄hɔ̄ nyā lɛ ɔcɛ́ kú Ubábīlɔn cɔhɔ́ɔ́há ka ɛfú ɔ́ɔ yɔ̄ ī kpó ācɛ ɔlɛ́ nū ŋmá āyā dóódu ɛɛ́.

³²Aícɔ́ɔja kú aólɛlā ā gaá mīyɛ aɛ́ga nēé ī bū behé kú ísu ā, klla kwú ɛga nɛ̄ aácí bū kwu ɔtɔ kú okónu ɔkpá ā ú tū ɔlá ɛɛ́. Ufi lɛ aícɔ́ɔja kú Ubábīlɔn ipú gbogodo ɛɛ́.

³³Ami wɛ Uyáwɛ, olɔfú fíyɛ́ dúú, nōo wɛ Ɔwɔicō nɛ̄ Ísrɛ̄lu gē gbɛ̄ɛ̄gbā ā. N le ka ɛ́ɛ ka eko kpíi ā, é géē hɛ́ Ubábīlɔn klla ajɛ bɛɛ̄ɛ̄, klla í wú uwá bɛ̄ɛka ɛ́gɛ́nɛ̄ é gē wu igwu ā.”

³⁴Ācɛ Ujerúsālɛm kahíníī, “Unebúkádinēsa, ɔcɛ́ kú Ubábīlɔn ā, lɛbɛ̄ɛka ɛbɛ́ obɔ̄bí ā. Ó lɛ alɔ wā, klla kwú alɔ í kpó lé. Ó kwú agbénú kú alɔ í wu lé, nɛ̄ alɔ gaá tá áncā bɛ̄ɛka ɔja nɛ̄ ɔdā dúúmā í yɔ̄ anú ŋ́ mā. Ó kwú ɔdā dúúmā nōo he ɔ́ ɔtū ā kpó, anɔ́ɔ ó kwú ohile ā í ú kpó bónū.

³⁵Ācɛ kú Ujerúsālɛm kéē ka kahíníī, “Ɔdā ɔ́bíipú dóódu nɛ̄ Ubábīlɔn yá alɔ ā kóō mīyɛ ulé nū. Ācɛ ɔlɛ́ alɔ nēé ŋmó ā, oyī kú uwā kóō ce Ubábīlɔn ɛyí.”

³⁶Ohígbū ɔ́ɔmā, Óndú ā da ācɛ kú Ujerúsālɛm kahíníī, “N géē cɛ̄pɔ̄ aá, kē í yá ka aólɛlā kú aá kéē cílá ulé kú ɔdā dóódu nēé yá aá ā. N gēe je ísu mɛ́mla aɔ́kpá kú Ubábīlɔn dóódu ā kpo ŋmó ŋmá ajɛ.

³⁷Ɔlɛ́ ɔ́ɔmā géē je pīya alácɛ̄, nɛ̄ aéwō ipácí ōfōōfū uwá géē lā anú á. Ó géē tūūfi nɛ̄hi ō má. Ɔ̄cɛ dúúmā í gáā lā anú ŋ́.

³⁸Odúúdú ācɛ kú Ubábīlɔn bá í tōoji bɛ̄ɛka ágábá ā, kllá bá í tíifu bɛ̄ɛka ayí nɛ̄ŋcɛ́ kú ágábá ā.

³⁹Abɔ̄ uwá bá ī yá ɛmiyɛ nɛ̄hi ā, n géē yá ucɛ lɛ uwá. É kē í lé, klla í gwá ejé kóō le uwá kwú nēé í bá ī gwéeyē. É géē gbiyɔ̄lā nēé klla gáā héyī ŋmá iyɔ̄lā ā glá gbógóōō ɛɛ́ gɛ ŋ́.

⁴⁰N géē kpó uwā nyɔ̄ gáā ō hɔ́ɔkɔ bɛ̄ɛka ayí álá, mɛ́mla aɛ́wū mɛ́mla aómlede ā.

⁴¹Óndú ā kɛlā lɛyíkwu Ubábīlɔn kahíníī, “É lɛ Ubábīlɔn nɛ̄ odúúdú ɛcɛ gē cɛ̄tra anú ā ú yálé ɛɛ́. Ubábīlɔn le pīya ɛbɛ ohéyī lɛ odúúdú aéwo.

⁴²Ísu kwu cēenyi klá Ubábīlɔn ɛɛ́. Úgbagwú kú ísu ā kwú ɔ̄ u mulɛ ɛɛ́.

⁴³Aígelī kú ajɛ Ubábīlɔn kwú pīya alácɛ̄,nōó tōō má eyī ŋ́. Ó kwú pīya ajɛ íkpākplā bɛ̄ɛka ipú ígbíli, nɛ̄ ɔ̄cɛ dúúmā í lā anú, ɛ́ɛ́ nēé gē bū ɔ̄ ipú ŋ́.

⁴⁴N géē yá Ubélu, ɛcí nɛ̄ Ubábīlɔn ī pā ā, italā. N klla í yá kóō kpó aíyó nóō kpó uwī ɔ́ɔmā kwúcē. Ācɛ aéwo ā í klla gáā nyɔ̄ í pā ɔ̄ gbóógbóō ɛ́ɛ gɛ ŋ́. Ɔdɔ kú Ubábīlɔn kwú catāajɛ ɛɛ́.

⁴⁵Ācɛ kú Ísrɛ̄lu, aá kwinya ŋmá abɔ́ɔ. Aá kwinya kú oyēeyī kú aá ŋmá ipú nū ohígbū ɛ́gɛ́nɛ̄ n cɔ̄nū nɛ̄hi gáā je ɔ́ yíífi ā.

⁴⁶Ɔ̄kā dúúmā nɛ̄ aá gē pó ā kóō tū aá ufi, ɛ́ɛ́ nɛ̄ ɔtū kú aá gē gbenyi ŋ́. Aá géē bá ī pó ɔ̄kā kú ɛfú okpó iháyí dóódu. Ɔcɛ́ éyi géē yɔ̄ í kpɛ́fú tú ɔcɛ́ ɔhá.

⁴⁷Ohígbū ɔ́ɔmā, eko géē wā, nɛ̄ n géē yá aɛ́cí kú Ubábīlɔn italā. Uwēyī géē kwú odúúdú éwo ā, é kē í kpó odúúdú ācɛ ɔlɛ́ uwá ŋmó.

⁴⁸Ɛcɛ mla ɔkpáncō mɛ́mla aɔ́dā nēe bá ipú uwā ā géē tɔ́ɔga kú éeyē eko nɛ̄ aólɛlā kú Ubábīlɔn, nēe géē ŋmá ajɛ ɛhícō ā géē wā í je ɔ́ yíífi.

⁴⁹Ubábīlɔn ŋmó ācɛ Ísrɛ̄lu alɛwa, ó kē ŋmó ācɛ ɛbɛɛbɛ ipú ɛcɛ, ohígbū ɔ́ɔmā, é géē je Ubábīlɔn yíífi á.

⁵⁰Óndú ā da ācɛ ɔlɛ nū nēe bá Ubábīlɔn a kahíníī, “Aá le wi ŋmá ikwū kú ɛfú ɛɛ́. Aá nyɔ̄ mɛ́ɛ̄ u, aá gbēyī ŋ! Náaná nɛ̄ aá bá ligbó ŋmá ɔlɛ́ aá, aá gbɛlá kwu ami, nōo wɛ Ɔwɔicō ā, kú aá blakwu Ujerúsālɛm dúú.

⁵¹Aá géē ka ka, ‘É lɛ uwēyī je lɛ alɔ lɛ alɔ yá ɛflɛ́ɛfu ɛɛ́. Alɔ í yá ɔdā dúúmā glá ɛɛ́ gɛ ŋ́, ohígbū ka ācɛ aéwɔhá le behé tá aɛ́ga otīhɔ kú ipú Agblīihɔ-nɛ̄hi kú Ɔwɔicō ā ɛɛ́.’

⁵²Ohígbū ɔ́ɔmā, ami nōo wɛ Ɔwɔicō ā ka eko géē wā nɛ̄ n géē yá mɛ́mla aɛ́cí kú Ubábīlɔn, klla í yá ācɛ kú Ubábīlɔn ágbe nɛ̄ é géē bá éē tíifu ɛbɛɛbɛ, ipu ajɛ ɔlɛ́ uwā.

⁵³Ɔ́dāŋ́ ka Ubábīlɔn kōō lɛ icō tū ga ɔkpáncō gāa lɛ ɔlɛ́ gwó, lɛ igá nɛ̄hi ce tū ɔ̄ abɔ́ɔ nááná, n gēe tū ācɛ ɛhɔ̄ nyɔ̄ abɔ́ɔ gaá je uwá yíífi. Ami nōo wɛ Ɔwɔicō ā ka á.”

⁵⁴Ɔwɔicō klla kahíníī, “Aá jāhɔ̄ kú aá pó ikwū nēé bá ī je ipú ajɛ kú Ubábīlɔn. É bá ī jikwū kú ɛ́gɛ́nɛ̄ é je ajɛ kú Ubábīlɔn yíífi ā.

⁵⁵N géē je Ubábīlɔn yíífi, klla ī je ɔ́ tá áncā hímm. Aícɔ́ɔja kú aólɛlā ā bá ī wā klla bá ī dɛ̄gba kwūūū bɛ̄ɛka ugbagwu kú ísu ā, wā í kpɛ́fú tá ɔ̄.

⁵⁶É géē wā gáā je Ubábīlɔn yíífi. É géē kwú aícɔ́ɔja kú nū, klla kwú uwā ɔtā ú cē bá uwā ɔtū ɛɛ́. Ami ā wɛ Ɔwɔicō nōo gē cílā ɔ̄cɛ ulé kú ɔdōbɔ̄bí nōó yá. N kē í yá Ubábīlɔn italā nōo cíkā lɛ ɔ́ ā.

⁵⁷Ami nōo wɛ ɔcɛ́, nɛ̄ iyē um lé ka Uyáwɛ, nōo lɔfú fíyɛ́ dúú ā, ka n géē yá kú ejé kóō lɛ aɔ́cɛ́,mɛ́mla aígabɔ̄, mɛ́mla aícɔ́ɔja mɛ́mla aójéeyī kú uwā kpó kwú. É géē gbiyɔ̄lā nēé gáā héyī ŋmá anú glá gɛ ŋ́.

⁵⁸É géē wúla ɔdɔ kú Ubábīlɔn nɛ̄hi ā tāajɛ, klla í je odūngwɔ̄ɔwɛ nɛ̄hi kú igelī kú nū gɔ̄mm ā yɔɔlá tāajɛ. Odúúdú úklɔ́ nɛ̄ aéwo ā yá ā wɛ áncā. Ɔdā nēe yúklɔ́ kú nū kpɛ́mm ā géē kpó yɔɔlá. Ami, Ɔwɔicō nōo lɔfú fíyɛ́ dúú ā ka á.”

⁵⁹Ɔ̄cɛ nōo gē cɛ̄ Usedekíya, ɔcɛ́ kú Ujúda ā, ɛhɔ̄ ā wɛ Useráya, ɔyí kú Uneríya, ɔyɔ́ɔ́yí kú Umahséya. Ipú iháyí ɔ́mɛnɛ nɛ̄ Usedekíya wɛ ɔcɛ́ kú Ujúda ā, Useráya yɔ̄ ī nyɔ̄ Ubábīlɔn mɛ́mla anú, anɔ́ɔ Ujeremíya lɛ ɔ́da ōhī je lɛ ɔ́ á.

⁶⁰N lɛ ɔkpá tá lɛyíkwu ɛdɔ ífi ámíyā nōo gáā yá Ubábīlɔn ā, mla aɔ́dā ohile ɔhá ā lɛyíkwu Ubábīlɔn ā.

⁶¹Anɔ́ɔ n da Useráya kahíníī, “Eko dúúmā nɛ̄ a le tá Ubábīlɔn, yá kú ā lɛ odúúdú ɔdā nɛ̄ n tá tū ɔkpá ɔ́ɔmā jé tɛ́ɛcɛ gbōmgbōm lɛ ācɛ dóódu.

⁶²Cɛ́ɛ́ a lɛ ɔkɔ gbā kahíníī, ‘Óndú, a le ka ka anúɔ géē je amānyā yíífi píii, nɛ̄ ɔdā dúúmā ɔɔ́ gáā lā anú gɛ ŋ́, kwu ācɛ, kwu aɛ́bɛ́. Ka ɔ́ɔ klla géē tá alácɛ̄ bɛ̄ɛka ígbíli ā piyóó.’

⁶³Useráya, eko nɛ̄ a lɛ ɔkpá nyā jé lɛ ācɛ ā kwɛyí ā, cɛ́ɛ́ a lɛ ɔkpá ā gbo tɔ̄há mɛ́mla ɛcɔ̄ éyi, cɛ́ɛ́ kú ā kwú ɔ̄ ú tá ga ipú ísu kú Uyúfrétīisi

⁶⁴Eko nɛ̄ a le yá lɛ ā, cɛ́ɛ́ a kahíníī, “Ɔdā nyā géē yá Ubábīlɔn á. Ó géē bī,í klla gáā tū bɛ̄cɛ igbɔhá gbóógbóō ɛ́ɛ́ gɛ ŋ́, ohígbū ífi nɛ̄ Óndú ā géē yá kóō yá ɔ̄ ā.” Ɛlā nɛ̄ Ujeremíya ka ā kwɛyí amānyā.