Read idoma UJƐRƐMÍYA 52 Bible Online

UJƐRƐMÍYA 52 - idoma bible

UJƐRƐMÍYA 52

¹Usedekíya wɛ iháyí ofu céyi ɛ́ɛ́ nōó lé ɔcɛ́ kú Ujúda á. Ó cɔcɛ́ Ujerúsālɛm iháyí igwóléyi. Ɛ́nɛ́ nū wɛ Uhamutálu, ɔyínɔ̄nyā kú Ujeremíya nōo lā igelī nɛ̄hi nēé hī ka Ulíbna ā.

²Usedekíya nyā yá ɔdōbɔ̄bí nɛ̄hi lɛyíkwu Ɔwɔicō, ɛ́gɛ́nɛ̄ Ujehóyākim, nōo tɛtɛ wɛ ɔcɛ́ ā, yá ā.

³Ɔwɔicō le cɔ̄nū da ācɛ kú Ísrɛ̄lu mɛ́mla ācɛ kú Ujúda ā, anɔ́ɔ ó le uwá nū ŋmá ipéyī nū á. Usedekíya le īkpɛ̄yí olɔfú yá tá Unebúkádinēsa, ɔcɛ́ kú Ubábīlɔn ā.

⁴Anɔ́ɔ ɛ̄cī ɔ́migwó kú ɔyā ɔ́migwó kú iháyí ɔ́mahāanɛ nɛ̄ Usedekíya cɔcɛ́ ā, Unebúkádinēsa, ɔcɛ́ kú ācɛ Ubábīlɔn ā, le odúúdú aícɔ́ɔja kú nū kpó tɔ̄kwu gaá gbɔɔ́ ō kpɛ́fú tú ācɛ Ujerúsālɛm. É le aáklɔ̄kpɛ kú ɛfú kú uwā kpó cēce eyīyɛ̄ɛcɛ kú igelī ā. É klla le ɔdɔ ɔhá hɛ́ tū igá kú igelī nɛ̄hi ā jīlatá biílí.

⁵É le íbɔm cē tū uwā le uwá hɛ́tū lɛ ā, jāā gbó iháyí ɔ́migwóléyi nɛ̄ Usedekíya cɔcɛ́ ā.

⁶O piyóó ā, anɔ́ɔ ɛ̄cī ɔ́mahāanɛ kú ɔyā ɔ́mɛnɛ kú iháyí ɔ́ɔmā ā, ɔkpɛtā le kwú ācɛ ā iyē nɛ̄hi. Ācɛ ɔlamu nēe bá ipú igá ā í má ɔdā dúúmā lé ɛɛ́ gɛ ŋ́.

⁷Anɔ́ɔ aícɔ́ɔja ā kwú ɔdɔ kú igelī nɛ̄hi ā ú ca behé, nááná nɛ̄ ācɛ kú Ubábīlɔn le íbɔm cē tū igelī nɛ̄hi āa. Odúúdú aícɔ́ɔja kú ācɛ kú Ujerúsālɛm bá ī pɛ́ kwu otú ɔ́ɔmā. É kwu bū ɔwɛ kú ɛhɔ̄ kú ɔlɔ́ɔ́cɛ́, ɛga nɛ̄ ɔdɔ ɛpa lɛyíkwu ɔhá ā. É kwu lɛyíkwu ɔpɛ́ kú Ujɔ́dan ā.

⁸Amáŋ aícɔ́ɔja kú Ubábīlɔn ā le jé igbīhāajɛ, anɔ́ɔ é kwú nū Usedekíya ɔcɛ́ ā, jāā gbéeko nēé gáā lɛ ɔ́ kwú, ipú ajɛ kpátáá nōo kwu pīyɛ Ujérīko ā. Odúúdú aícɔ́ɔja kú ɔlɛ́ nū ā le fíyákátā hɛ̄ ɔ̄ tá ga ɛbɛɛbɛ.

⁹É le Usedekíya bī gē lɛ Unebúkádinēsa, nōo yɔ̄ igelī nɛ̄hi kú Uríbla, ipú ajɛ kú Uhámáti eko ɔ́ɔmā ā. Anɔ́ɔ Unebúkádinēsa le ɛpɔ̄bí ŋmó ɔ̄ abɔ́ɔ á.

¹⁰Unebúkádinēsa le ayí kú Usedekíya kpó ŋmó ipéyī nū. Ó klla le aótrɛ̄yí kú ācɛ Ujúda kpó ŋmó dúú.

¹¹Igbīhi ɛ̄nyā ā, ó kwú Usedekíya eyī ɛplɛ́ɛpa ú kpó pu. Anɔ́ɔ ó kwú agbá ú kwu ɔ́, anɔ́ɔ ó kwú ú bī ga Ubábīlɔn á. Usedekíya tá agbá Ubábīlɔn abɔ́ɔ jāā gbó ɛ̄cī nōó kwú.

¹²Ɛ̄cī igwó kú ɔyá ɛhɔ̄, kú iháyí ɔ́migwáahāanɛ nɛ̄ Unebúkádinēsa cɔcɛ́ kú Ubábīlɔn ā, Unebusárādan, otrɛ̄yí kú aícɔ́ɔja kú Ubábīlɔn, nōo klla ī nwū ɔcɛ́ ɛlā, le behé tá Ujerúsālɛm.

¹³Ó kwū Agblīihɔ-nɛ̄hi kú Óndú ā, mɛ́mla agblɔ̄cɛ́ mɛ́mla aɔ́lɛ́ kú ācɛ nɛ̄hi ɔhá dóódu kú Ujerúsālɛm ú kpó tū ɔlá.

¹⁴Aícɔ́ɔja kú ɔlɛ́ nū klla kwú ɔdɔ kú igelī nɛ̄hī ā ú wúlatāajɛ.

¹⁵Anɔ́ɔ Unebusárādan kwú ācɛ ohile kú Ujúda ā mɛ́mla ācoyúklábɔ̄ mɛ́mla odúúdú ācɛ nēe cɔ̄nyā klla pɛ́kwu ga ɛgiyí ācɛ Ubábīlɔn ā, ú kpó ga Ubábīlɔn á.

¹⁶Amáŋ ó habɔ̄ ācɛ ogbɛhá nēé lɛ agbénū dóódu ŋ́ mā tá Ujúda. Ó le uwá kpó bá cɛ́ɛ́ kéē hɛ́ɛ́hɔ̄ kú ufáyin mɛ́mla ɔdɛ̄hɔ̄ ɔhá dúú.

¹⁷Anɔ́ɔ ācɛ kú Ubábīlɔn kwu aúpíla kú oje ɔdɔ mɛ́mla aɔ́dā o lɛ akā nēé ī kpó éŋkpɔ̄ ce nēe bá ipú Agblīihɔ-nɛ̄hi ā, mɛ́mla okpómōlóolo olɛ éŋkpɔ̄ tū ɔ̄ kú oje udɔ ā í kpó ca nyɛŋɛnyɛŋɛ á. Anɔ́ɔ é kwú oje udɔ kú uwā ā í kpó ga ajɛ Ubábīlɔn á.

¹⁸É kwú Aúsɔ́bɛ̄lu mɛ́mla aócíbú nēé gē bī gwu éwo kú ede ā ú kpó dúú. Kwú ɔdā dóódu nēé gē bī yúklɔ́ kú agege kú Agblīihɔ-nɛ̄hi, mɛ́mla aócíbú nēé gē bī pīya oyī kú ɛya nēé ī gwó tū ɔ̄ ā, mɛ́mla aócíbú kú ɔtulalī nēé ī le kwu ɔlá ā, mɛ́mla odúúdú aíyo kú oje (ugóolu) ɔdɔ ɔhá dóódu nēé gē bī yúklɔ́ ipú Agblīihɔ-nɛ̄hi ā.

¹⁹Ɔdā dúúmā nēé bī ugóolu mɛ́mla oje udɔ yá ā, é kwú kpó nyɔ̄. Kwú aócibú nɛ̄ŋ́cɛ́ nɛ̄ŋ́cɛ́, mɛ́mla aócíbú obī fú ɔlá ā, kwu aócíbú nēe gē bī oyī kú ɛya nēé gē gwó ā. Kwu aɔ́dā ōle Aágege ce ɔ́ ā, mɛ́mla aócíbú kú ɔtulalī, mɛ́mla aócíbú nēé gē bī pīya ejé klá ɛyí ede ā, é kwú kpó nyɔ̄ dúú.

²⁰Odúúdú aódée kú oje ɔdɔ nɛ̄ Usólōmɔn yá bá ipú Agblīihɔ-nɛ̄hi ā í tōō mīyɛ ogbɛnú kú uwā ŋ́. Aódée ɔ́ɔmā wɛ aúpíla ɛpa ā, okpómōlóolo ole éŋkpɔ̄ tū ɔ̄ ā, mɛ́mla aɛ́na kú oje udɔ igwɛ́ɛpa nēe bī ɔ̄ ā, mɛ́mla aɔ́dā olɛ akā nēé ī kpó éŋkpɔ̄ ce ā.

²¹Aúpíla ɛpa kú oje udɔ ā, éyééye kú nū olicō kú nū wɛ ɔkɛkɛ́ abɔ̄ igwáahātá. Olɔwá kú nū wɛ ɔkɛkɛ́ abɔ̄ igwɛ́ɛpa. Ocɔkpɛ́nú kú nū kē wɛ ekābɔ̄ ɛnɛ.

²²Oje udɔ nōo kē pīya cíla uwá icō ɔtāhɛ̄ ā, olikpō kú nū wɛ ekābɔ̄ ɛhɔ̄, é lɛ ijābɔ̄ kú oje udɔ kú īkpɔ̄cí kú upɔmegrɛ́nēeti he tū ɔ́.

²³Aíkpɔ̄cí kú upɔmegrɛ́nēeti ofɛnɛ cigwɛ́ɛhīlī yɔ̄ abɔ̄ kú nū dóódu. Opīyatɔ̄há kú odúúdú aíkpɔ̄cí upɔmegrɛ́nēeti nēé bī hijā tū ɔ̄ ā wɛ ofɛhɔ̄.

²⁴Oŋmá ɔ́ɔmā ā, Unebusárādan, otrɛ̄yí kú aícɔ́ɔja ā, klla lɛ Useráya, otrɛ̄yí kú ācogwɛ́ɛya ā, mɛ́mla Usɛfaníya, ɔ̄cogwɛ́ɛya nōo kpó okónu ce ɔ́ ā, mɛ́mla aígabɔ̄ ɛtá ɔhá kú Agblīihɔ-nɛ̄hi ā nēe cɛgbá nɛ̄hi ā kpó alagbú.

²⁵Ó lɛ otrɛ̄yí kú aícɔ́ɔja kú Ujúda ā kpó ŋmá igelī ā, mɛ́mla ācɛ nēe ī nwū ɔcɛ́ ɛlā ahāapa nēe bá ipú igelī ā, mɛ́mla ɔ̄cɛ nōo kpó okónu ce otrɛ̄yí kú aícɔ́ɔja ā, nōo kē gē leyīkwu ɔkpá kú aícɔ́ɔja ā, mɛ́mla ācɛ kpɔ́cí kpɔ́cí ofɛtá ɔhá.

²⁶Unebusárādan lɛ uwá kpó gé lɛ ɔcɛ́ kú Ubábīlɔn nōo klá Uríbla,

²⁷ipú ajɛ kú Uhamáti eko ɔ́ɔmā ā. Ɔcɛ́ ā cɛ̄ lɛ uwá lɛ uwá gɔ́ abɔ́ɔ klla lɛ uwá kpó ŋmó. Anɔ́ɔ é kwú ācɛ kú Ujúda ā í kpó aɔ́fiyɛ ŋmá ajɛ ɔlɛ́ uwā ga ajɛ éwɔhá á.

²⁸Áluka kú ācɛ nɛ̄ Unebúkádinēsa kpó aɔ́fiyɛ ā yɔ̄ á. Ipú iháyí ɔ́mahāapa nōo wɛ ɔcɛ́ ā, ó kpó ācɛ úlā ahāapa ce ofu igwɛ́ɛpa ce ācɛ ɛtá (3,023).

²⁹Ipú iháyí ɔ́migwáahatá nōo wɛ ɔcɛ́ ā, ó kpó ācɛ úla ɛpa ce ofu cigwɛ́ɛpa (832) ŋmá Ujerúsālɛm.

³⁰Ipú iháyí ɔ́mofu cɛtá nɛ̄ Unebúkádinēsa wɛ ɔcɛ́ ā, Unebusárādan, otrɛ̄yí kú aícɔ́ɔja kú Ubábīlɔn ā kē kpó ācɛ ulá ce ofigwáahāapa (745) nyɔ̄. Odúúdú áluka kú ɛwa kú ācɛ Ujerúsālɛm mɛ́mla ācɛ Ujúda nɛ̄ Unebúkádinēsa kpó ga Ubábīlɔn ā wɛ úlā igwóléyi ce ofigwó (4,600).

³¹Ipú iháyí nɛ̄ Ifīlmɛ́rɔ̄daki lé ɔcɛ́ kú Ubábīlɔn ā, ó gbonɛnɛ lɛ Ujɛhóyākim, nōo tɛtɛ wɛ ɔcɛ́ kú Ujúda ā. Anɔ́ɔ ó lɛ ɔ́ hɛ́tá ŋmá agbá á. Ɔdānyā yá ipú ɛ̄cī ofu cɛhɔ̄ kú ɔyā igwɛ́ɛpa kú iháyí ɔ́mofu cigwáahāapa ŋmá iháyí nēé kwú Ujɛhóyākim gaá tá agbá Ubábīlɔn ā.

³²Ifīlmɛ́rɔ̄daki gbonɛnɛ lɛ ɔ́ kllla lɛ āhɔ̄ kú ojīlīmā nɛ̄hi je lɛ ɔ́ fíyɛ́ ɛ́gɛ́nɛ̄ ó je lɛ aɔ́cɛ́ ɔhá nēe bá aɔ́fiyɛ Ubábīlɔn pī ɔ̄ ā.

³³Anɔ́ɔ ó lɛ ɛga je lɛ Ujɛhóyākim kóō lɛ īlī kú agbá kú nū púla, cɛ́ɛ́ kóō lé ɔdōlé mɛ́mla ɔcɛ́ ā ɛplá eko ohile kú oyēeyī kú nū ā.

³⁴Ɛ̄cī dóódu, jāā gbéeko nōó kwú ā, é gē je ije nōo gē jɛ̄ ɛgbá kú ɛ̄cī kú nū ā lɛ ɔ́.