Read idoma UJƐRƐMÍYA 8 Bible Online

UJƐRƐMÍYA 8 - idoma bible

UJƐRƐMÍYA 8

¹Óndú ā klla kɛlā gɔbū kpɔ́ kahíníī, “Eko nōo í wā ɔ́ɔmā, aólɛlā géē kpó aíkpokwú kú aɔ́cɛ́ mɛ́mla aígabɔ̄ kú Ujúda, mɛ́mla aíkpokwú kú ācogwɛ́ɛya mɛ́mla ācomɛ́ɛbɛ, mɛ́mla ákú odúúdú ācɛ ɔhá nēe lā Ujerúsālɛm ā bū klá ɛcɛ ŋmá aúnóji kú uwā.

²É géē pa aíkpokwú ā hīla bɛ́ɛcɛ nɛ̄ ɛnɔ, ɔyā mɛ́mla aínyílɔ́wɔ géē cɛ̄ uwā. Eko nɛ̄ ācɛ ɔ́ɔmā béeyī ā, ɛnɔ mɛ́mla ɔyā mɛ́mla aínyílɔ́ɔwɔ ɔ́ɔmā he uwá ɔtū nēé ī gbā, klla í pā, gē gbɔ̄ɔkɔ lɛ uwá á. É gáā tá aíkpokwú ā bá kéē kpó uwā nyī ŋ́. Aíkpokwú ā géē bá ɛcɛ áncā bá ī wā tāajɛ bɛ̄ɛka īmū ā.

³Ācɛ kú ewo obɔ̄bí nyā géē hile, nēe ī lā ipú aájɛ nɛ̄ n gáā pa uwá hīla nyɔ̄ ā. Amáŋ ikwū géē he ācɛ nēe í hile ɔ́ɔmā ɔtū fíyɛ́ oyeeyī á. Ami nōo wɛ Óndú ā nōo lɔfú fíyɛ́ dúú ā le ka ɛɛ́.”

⁴Óndú ā da um ka amíyɔ̄ da ācɛ ɔlɛ́ anúɔ kahíníī, “Ɔ́dāŋ́ ka ācɛ má gwōnū, ń ka é gē cāŋjɛ ŋmá ajɛ ŋ́ nɛɛ? Ɔ́dāŋ́ ka ɔ̄cɛ gebí ŋmá ɔwɛ nōó yɔ̄ ī yɛ ā, nōó le jé, ń koó gē kwúcē wā ɔwɛ okpaakpa ā ŋ́ nɛɛ?

⁵Ó lɛ ā, ɔdíyá nɛ̄ aá, ācɛ ɔlɛ́ um ā nyɛ̄ɛ̄ ŋmá ɛgiyí um, nɛ̄ aá kwúcē wā ɛgíyi um ŋ́ mā? Aá lɛ abɔ̄ flá tū aɛ́cí ɛ̄kɛ̄mgbɛ̄ ká aá ká, bá ī gbā uwā ɛ̄gbā. Anɔ́ɔ aá tá ō kwúcē wā ɛgiyí um.

⁶N jāhɔ̄ lɔɔlɔhi, amáŋ aá kɛlā ɔkwɔ̄ɔ̄kwɛyi ŋ́ Ɔ̄cɛ dúúmā kú aá í hiíjémā kú ɔ́bíipú nōo bī ā ŋ́, ɛ́ɛ́ nōó gē ka ka, ‘Kpáyii, má ɔdōbɔ̄bí nɛ̄ n yá ā oo ŋ́. Ɔnyɔ̄ɔnyɛ ká aá yɔ̄ ī nyɔ̄ gɔbū ipú ucē nōo ī yá ā, bɛ̄ɛka ɔnya kú ɛfú nōo yɔ̄ ī kwinya gā ɔgbɛ́fú ā.

⁷Aígbáanɔ-enyi nɛ̄hi jé eko kú iháyi nēé ī wā mɛ́mla eko nēé ī pīyɛyí nyɔ̄ ɛga nēé ŋmá ā. Aókóōhō ɔkpɔkpɔ̄ mɛ́mla Aákpáŋdēde jé eko ō pīyɛyí ga ɔlɛ́ uwā dúú. Amáŋ ācɛ ɔlɛ́ um ā í jé ɔdā nɛ̄ n tíne kéē yá ā ŋ́

⁸Aá gē ka ka aá jéeyī ohígbū kā aá jé íne kú um ā. Amáŋ ācotɔ́kpá nēe ī cɔ̄ɔwɔ íne ā kwú íne kú um ā ú pīya ɛ̄kɛ̄mgbɛ̄ ɛɛ́.

⁹Uwēyī géē kwú ācojéeyī ká aá nēe ī cɔ̄ɔwɔ ɔ́ɔmā ā. Ufi géē kwú uwā, é klla í kpó uwā kwú í je pīya ɔfiyɛ. Abɔ̄ é tá ɛlā kú um ɛɛ́ ā, é lɛ íjééyī ɔhá dúúmā gɛ ŋ́.

¹⁰Ohígbū ɔ́ɔmā, n géē kpó anyā uwā lɛ ācɛnyīlɔ ɔhá. N klla í kpó ajɛ ɛhɔ̄ kú uwā lɛ ācɛ nēe í gaá mīyɛ ɔkwu uwā ā. Kwu ācɛnɛ̄ŋcɛ́ kwu ācɛnɛ̄hi ī tíne ō bī ɔwɛ újí le lɛ agbénú. Kwu ācomɛ́ɛbɛ mɛ́mla ācogwɛ́ɛya gē plla ācɛ dúú

¹¹Ācomɛ́ɛbɛ mɛ́mla ācogwɛ́ɛya nēe bá ɔ́ɔmā gē yá bɛ̄ɛka ɔdā nɛ ágbe nɛ̄hi kú ācɛ ɔlɛ́ um ā í wɛ ɔdā dóódu ŋ́ mā. É bá ī ka ɔdā dóódu ɔ́ɔ le lɔhi ɛɛ́, nááná nɛ̄ ɔdā dúúmā í lɔhi ŋ́ mā

¹²É cíkā ō yá uwēyī ohígbū aɔ́dā īcííci nɛ̄hi nēé yá ā. Amáŋ é yá uwēyī dúúmā ɛ́ɛ́ nēé kōō jɛ́yí ō le kwaajɛ ŋ́. Ohígbū ɔ́ɔmā, é géē pɛ́ kwú bɛ̄ɛka ācɛ ohile nēe géē kwú ā. Eko nɛ̄ n géē yá uwā italā ā, n géē kpó uwā yíífi dúúdú. Ami nōo wɛ Óndú ā le ka ɛɛ́.”

¹³N tínē ká ā lɛ ācɛ ɔlɛ́ um túbá bɛ̄ɛka ɛ́gɛ́nɛ̄ ɔgllɛjí gē wū ikpɔ̄cí kú nū gē tú ɔ̄ bá ɛgéégéyi ā. Amáŋ é lɛbɛ̄ɛka ɔcí ufáyin ámāŋ ka ɔcí Ufíigi nōó gwá ikpō ŋ́ mā a. Ēpū kú kú ɔcí ā náánā kwú kpó wúla dúúdú ɛɛ́. Ohígbū ɔ́ɔmā, n le ɛga je lɛ aéwɔhá kéē mīya ajɛ ā ɛɛ́.”

¹⁴Ācɛ kú Ujúda da īyī uwā kahíníī, “Alɔ í cíkā ō cīce icííci kpɔ́ ŋ́. Aá wā ka ālɔ̄ kwinya ga aígelī nɛ̄hi nēé cē igá olɔfú tū uwā ā, cɛ́ɛ́ ká alɔ gáā gbēyī ō pɛ́ kwú abɔ́ɔ. Abɔ̄ alɔ lɛ ɔ́bíipú bī tū Óndú ā, nōo wɛ Ɔwɔicō nɛ̄ alɔ ī gbā ā, ó lɛ alɔ ŋmɛ́pɔ̄bí ká ālɔ̄ pɛ́ kwú ɛɛ́. Ohígbū ɔ́ɔmā ó le ɛnɛ̄ tū alɔ kú ālɔ̄ le pɛ́kwú ɛɛ́.

¹⁵Alɔ leyīce kú odée kóō lɔhi lɛ alɔ, amáŋ ɔdā dúú í lɔhi lɛ alɔ ŋ́. Alɔ bá ī leyīce kú ɔdōbɔ̄bí nōo ī yá alɔ ā kóō mɛ. Amáŋ ikoko ɔ́ɔmā ɔdōōtūufi nɛ̄hi yɔ̄ ī yá alɔ á.

¹⁶Aólɛlā kú alɔ ā gā igelī kú Udáni nōo yɔ̄ ɛhícō ā ɛɛ́. Alɔ bá ī pó ɛgba kú aɔ́nya kú ɛfú kú uwā. Odúúdú alɔ nēe lā ipú ajɛ kú Ujúda ā bá ī fīyégbúlú ohígbū ufi eko nɛ̄ aɔ́nya kú ɛfú kú uwā bá ī yúuya ā. Aólɛlā ā wā gáā je ajɛ ā mɛ́mla ɔdā dóódu nēe bá ipú nū ā kpó yíífi. Kéē jé igelī nɛ̄hi nēé hī ka Ujerúsālɛm ā mɛ́mla odúúdú alɔ nēe lā ipú nū ā kpó yíífi.”

¹⁷Anɔ́ɔ Óndú ā kahíníī, “Aá leyī kwɛcɛ! Ohígbū ka n géē tū aólɛlā obɔ̄bí wā ipú aá gaá nuunu tú aá. É lɛbɛ̄ɛka aɛ́gwā olɔnɔ nɛ̄hi nɛ̄ ɔ̄cɛ í bī ɔdā dúú le tá úwā ɛyí wāajɛ glá ŋ́ mā.”

¹⁸Ujeremíya ka ɔtūnōbí kú anúɔ í loō mɛ ŋ́, ó ka ɔtū kú anúɔ ɔ́ɔ kē le bīya nɛ̄ɛ̄nɛ̄hi.

¹⁹Ó klla kahíníī, “Aá jahɔ̄ ká aá pó íbáā nɛ̄ ācɛ ɔlɛ́ um bá ī dɛ̄ ŋmá ɛga dóódu ipú odúúdú ajɛ ā. É bá ī ka kahíníī, ‘Óndú ā nyɛ̄ɛ̄ hɛ̄ Usáyɔn tá nɛɛ? Ɔcɛ́ kú Usáyɔn í klla yɔ̄ abɔ́ɔ gɛ ŋ́ nɛɛ?’ Anɔ́ɔ Óndú ā tóohi ka, ‘Ɔdíyá nēé kē yá um cɔ̄nū ŋmá lɛ aójíbó nēé yá mɛ́mla aɛ́cí kú aéwɔhá nēé gē pá āa?”

²⁰Ācɛ ā dɛ̄gba tɛ́ɛcɛ kahíníī, “É le ɔdɛ̄hɔ̄ cē mɛ ɛɛ́, ɔnɔ̄ kē le fa ɛɛ́, amáŋ é kē nya alɔ tá ɛ́ɛ́ ŋ́ kpɔ́.”

²¹Ɔtū kú um le bīya, ohígbū ka é kwú ācɛ ɔlɛ́ um ú bīyatāajɛ. N yɔ̄ ekwu, ɔtū kú um le gbenyi dúúdú.

²²Ɛcí kú ōcē dúúmā í yɔ̄ Ugílɛ̄di ŋ́ nɛɛ?[3] Óbócí kē yɔ̄ abɔ́ɔ gɛ ŋ́ dúú nɛɛ? Ɔdíyá nēé hɛ́ ācɛ ɔlɛ́ um tá ŋ́ mā?