Read idoma UJƐRƐMÍYA 9 Bible Online

UJƐRƐMÍYA 9 - idoma bible

UJƐRƐMÍYA 9

¹Ujeremíya klla yɔ̄ ī kɛlā gɔbū kpɔ́ kahíníī, “Eyī yá um ká ɛyí kú um kóō wɛ obugā kú éŋkpɔ̄, ké eyī kú um kóo wɛ njɔlɔ ká agīje. Cɛ́ɛ́ ká n̄ géē yɔ̄ ī jikwú kwu otú kwu ɛnɔ, ohígbū ācɛ ɔlɛ́ um nēé kpó ŋmó ā.

²Eyī yá um ká n̄ lɛ ɛga éyi má ipú ígbíli nɛ̄ n géē nyɔ̄ í tayínī ŋmá ācɛ ɔlɛ́ um. É kpɔ́tūce Óndú ā ŋ́, anɔ́ɔ é bá ī pīyeyī má aɔ́wɔ ɔhá kpɔ́. É klla wɛ ígwu kú ācɛ nēe ī yá ibīyāajɛ tū ɔ̄cɛ.

³Ɛ́gɛ́nɛ̄ ɔ̄cɛ ī kpó ɔtá ŋaaŋa ā, ɛ́gɔ́ɔmā nɛ̄ ígblɛ́nyi kú uwā lɛ ā á. É le tútū ō kɛ̄mgbɛ̄ eko dóódu. Ɛ̄kɛ̄mgbɛ̄ nēé gē bī le lɔfú ipú ajɛ kú uwā á. Ó wɛ ka uwā le kpaakpa ŋ́. Óndú ā kahíníī, “Ācɛ ɔlɛ́ um bá ī yá ɔdōōbɔ́bí éyi ga ɔdōbɔ̄bí ɔhá. É kōō cɛ̄ jé ka amíyɔ̄ wɛ Ɔwɔicō kú uwā ŋ́.”

⁴Ɔnyɔ̄ɔnyɛ kóō leyīkwu ɛcɛ gɛɛ ohígbū ɔyā nū. Ɔ̄cɛ dúúmā kóō kē lɔtūce ɔyínɛ́ nū ŋ́. Ohígbū ka ɔyínɛ dóódu yɔ̄ í plla ɔyínɛ́ nū bɛ̄ɛka Ujékɔ̄pu ā. Ɔnyɔ̄ɔnyɛ kē yɔ̄ ī bī ɛ̄kɛ̄mgbɛ̄ le híla ɔya nū.

⁵Ɔnyɔ̄ɔnyɛ yɔ̄ ī plla ɔ́mpā nū. Ɔ̄cɛ dúúmā í kɛlā ɔ̄kwɛ̄yí ŋ́. É le ɛ̄kɛ̄mgbɛ̄ ōkā kllɔcɛ́ lɔɔlɔhi. É kē mā ɔ́bíipú ō yá tá glá ŋ́.

⁶É bá ī yá ācɛ ɔhá ŋmó klla bá ī plla ācɛ ɔhá eko dóódu. Amáŋ é tá ō jé ka amíyɔ̄ wɛ Ɔwɔicō kú uwā ā.

⁷Ohígbū ɔ́ɔmā, ami nōo wɛ Óndú ā nōo lɔfú fíyɛ́ dúú ā, géē bī italā nɛ̄hi le já ācɛ ɔlɛ́ um má ká n̄ lɛ uwá yá yēŋēē, bɛ̄ɛka ɛ́gɛ́nɛ̄ é gē le oje tá ɔlá gē ja ɔ́ kéē na ɔ́ ā. Ohígbū ka, ɔdā ɔhá dóódu í yɔ̄ nɛ̄ n géē yá lɛyíkwu ɔ́bíipú kú ācɛ ɔlɛ́ um ɛ́ɛ́ gɛ ŋ́ mā?

⁸Ɛlā nōo ī ŋmá okónu kú uwā ā bɔ̄bí nɛ̄hi lɛbɛ̄ɛka ɔyī nēé lɛ gwɛ̄ɛ́fa ā. É gē kɛ̄mgbɛ̄ eko dóódu. É bī okónu gē kɛlā kú ɛbɔ́ lɛ īyī uwā, amáŋ é gē miya kéē nyɔ̄ í kwāajɛ ɔwɛ gbēyī ɔ́mpa uwā.

⁹Ami nōo wɛ Óndú ā cíkā ō yá ācɛ Ujúda italā, ohígbū ɔdā ɔ́ɔmā piíí.

¹⁰N géē jikwāidɔ, klla í yēkwu ohígbū aɛ́fu ā mɛ́mla ipácí nɛ̄ aɛ́bɛ́ gē lúlé ā. N géē yá lɛ ā ohígbū ka aácí kwú kpó ŋmó ŋmá ajɛ ɛɛ́. Ohígbū ɔ́ɔmā ɔ̄cɛ dúúmā í gē bū ipú nū gɛ ŋ́. Ɛna dúúmā í kē yɔ̄ abɔ́ɔ ɛ́ɛ́ nēé ī po uya kú uwā abɔ́ɔ gɛ ŋ́. Kwu aígbáanɔ mɛ́mla aɛ́bɛ́ kwú pɛ́ kwu ŋmá ajɛ ā le yɛ ɛɛ́.

¹¹Amáŋ Óndú ā kahíníī, “N géē je Ujerúsālɛm wúlatāajɛ í gaá hile ɛcɔ̄ kú aɔ́lɛ́ kú nū nēe í tīkwū klá īyī uwā icííci ā. Cɛ́ɛ́ ó kwú pīya ɛga nɛ̄ aéwo ipácí gē lā. N géē yá kú aígēlī kú Ujúda ā kéē le kpó pīya ipú alácɛ̄. Ɔ̄cɛ dúúmā í gáā lā ipú uwá gɛ ŋ́.

¹²N da Óndú ā ɔ̄kā kahíníī, “Óndú, ɔdíyá nɛ̄ ajɛ ā je catāajɛ klla má táncá bɛ̄ɛka ígbíli nɛ̄ ɔ̄cɛ dúúmā í yɛ anú glá ŋ́ mā? Ɔ̄cɛ dóódu í jéeyī jɛ̄ nōo ī jé ɔdā nōo yá ā glá ŋ́. Á ka ɛyí nū lɛ ɔ̄cɛ dúúmā nōó gē ka lɛ ācɛ ɔhá ŋ́.”

¹³Óndú ā tóohi kahíníī, “Ɔdā nōo yɔ̄ nyā yá ohígbū ka ācɛ ɔlɛ́ um tá íne nɛ̄ um jé lɛ uwā ā. É tá ō lɛyítáajɛ ga um. É kē cɛ̄ ō yá ɔdā nɛ̄ n tū uwá ukɔ́ nū ā ŋ́.

¹⁴Ikɔkɔ ɔ́ɔmā, é bī ikpɛ̄yí olɔfú ō gē yá ɔdā kú ɔtū uwā. É klla ī pā aɛ́cí nēé hī ka ubáalu ā, ɛ́gɛ́nɛ̄ aádáádā uwā nwū uwā kéē pā ā.

¹⁵Ohígbū ɔ́ɔmā, ɔdā nɛ̄ ami Óndú ā, nōo lɔfú fíyɛ́ dúú, nōo wɛ Ɔwɔicō nɛ̄ ācɛ kú Ísrɛ̄lu gē gbɛ̄ɛgbā ā géē yá ā yɔ̄ á. N géē je ɔcí ohɔ́nɔ lɛ ācɛ ɔlɛ́ um kéē lé, klla í je ɔdōgwá nōo í ŋmó ɔ̄cɛ lɛ uwá kéē gwá.

¹⁶N géē yá kéē kpó uwā ŋmá amānyā gaá lā ipú aéwɔhá ɛyɛ́ɛ́yí, nɛ̄ aádáádā uwā ámāŋ, uwá abɔ̄yī uwā í jé jéjée ɛ́ɛ́ ŋ́ mā. N géē yá kéē kpɛ́fú tá uwā ɛga dúú nēé nyɔ̄, jāā gbéeko nɛ̄ n kwú uwā ú yíífi ŋmá ajɛ dúúdú.”

¹⁷Óndú ā nōo lɔfú fíyɛ́ dúú ā klla ka gɔbū kahíníī, “Aá leyī yɛ ɔdā nōo yɔ̄ ī yá ā. Aá lɛ ācɛnyā nēe jé ō yɔ́tūnōbí nɛ̄hi ɛyíkwū ā kpó hīkwú wā.”

¹⁸Ācɛ ā tóohi kahíníī, “Da uwá kée wā fíyaa gaá gwííjē elihɔ kú ikwū lɛ alɔ, jāa gbéeko nɛ̄ alɔ gbɔɔ́ ō jikwū pɛ́ agīje cakpaa.”

¹⁹Jāhɔ̄ ká ā pó ikwū nɛ̄ ācɛ bá ī je Usáyɔn ā. É bá ī dɛ̄ kahíníī, “É kwú alɔ í yíífi ɛɛ́. Uwēyī kē lɛ alɔ kwú dúúdú ɛɛ́. Alɔ géē nyɛ̄ɛ̄ ŋmá ajɛ ɔlɛ́ alɔ piíí, ohígbū ka aólɛlā kwú aɔ́lɛ́ alɔ í wúlatāajɛ ɛɛ́.”

²⁰Ācɛnyā, aá jāhɔ̄ lɛ ɛlā nɛ̄ Óndú ā gē ka ā. Aá jāhɔ̄ lɛ ɛlā kú nū. Aá nwū ayínɔ̄nyā kú aá ɛ́gɛ́nɛ̄ é gē yɔ́tūnōbí lɛ ā. Aá nwū ácɛ́nyā aá ijē elihɔ nɛ̄ é í gwó ɛyíkwū ā.

²¹Aá í yá lɛ ā ohígbū ka ikwū le bū uwíndo ká alɔ wā ipú aɔ́lɛ́ ká alɔ nɛ̄ alɔ gwó lɔfú nɛ̄hi ā ɛɛ́. Ikwū yɔ̄ í kpó ayípɛ̄ ŋmó ŋmá aúláyi ā. Ó klla yɔ̄ ī ŋmó aɛ́drɔ́ ŋmá aɔ́pu ā.”

²²Óndú ā ka amíyɔ̄ klla da ācɛ ā kahíníī, “Aókwū kú alɛɛcɛ géē bá ajɛ ɛga dóódu bɛ̄ɛka īmū kú ɛyí éétutulu ā. É géē tīkwū klá ajɛ lɛbɛ̄ɛka ocikāpā nēé le hɛ́ klá ajɛ ā. Ɔ̄cɛ dúúmā í kē gáā kpó aókwū ā ŋmá ajɛ ŋ́.”

²³Óndú ā kahíníī, “Ācɛ nēe jéeyī ā kéē híī bī ijéeyī kú uwā gwō ŋ́. Ācɛ nēe lɔfú ā kéē bī ɔfú kú uwā gwō ŋ́. Aólɔdu kéē kē híī bī agbénú kú uwā gwō ŋ́.

²⁴Ɔ́dāŋ́ ka ɔ̄cɛ dúúmā tíne ō gwō, kóō gwō ka anúɔ jé um klla jé ipú um. Ó lɔfú gwō ka anúɔ jé ka ācɛ ī he um ɔtū piyóó, ka n gē yá ɔdā nōo wɛ ɔkwɔ̄ɔ̄kwɛ̄yi mɛ́mla ɔdā nōō le kpaakpa ā ipú ɛcɛ nyā a. Ohígbū ka aɔ́dā nēe bá abɔ́ɔ ā he um ɔtū á.”

²⁵Óndú ā klla kahíníī, “Mɔ́ɔ̄, ɛ̄cī éyi géē wā nɛ̄ n géē yá odúúdú ācɛ nēe gē hɛ́ apī ɛ́gɛ́nɛ̄ ɛka kú um ka lɛ ā, amáŋ nɛ̄ ucē kú uwā í kwu ɛka ā ŋ́ mā italā. Ācɛ ɛ́gɔ́ɔ́mā lɛbɛ̄ɛka ɔdā nēé hɛ́ apī ŋ́ mā tū um.

²⁶Ācɛ Íjīpiti, ācɛ Ujúda, ācɛ Ɛ́dɔm, ācɛ Ámɔ̄ri, ācɛ Umówābu, mɛ́mla ācɛ éwo éyi nēe lā ipú ígbíli, nēe gē wá ákló kú ɛyí kú uwā tāajɛ dúúdú ā, wɛ ɛdɔ̄ ācɛ ɛ́gɔ́ɔ́mā. Odúúdú aéwo nēe bá nyā, í hɛ́ apī tū um ohígbū ka é lɛbɛ̄ɛka, odúúdú ācɛ kú Ísrɛ̄lu ā, ɔtū kú uwā í pīyabɔ̄ nēé ī lɛyítāajɛ lɛ ɛka kú um ŋ́.”