Read idoma IKWŪAYIDƆ 1 Bible Online

IKWŪAYIDƆ 1 - idoma bible

IKWŪAYIDƆ 1

¹Wōō, Ujerúsālɛm yɔ̄ áā? Anú nōo tɛtɛ le mu mla ācɛ āa, tá áncā ōfōōfūnū céé abālɔbányā yɔ̄ áā? Anú nōo tɛtɛ nwuné klla lɛ ojīlīmā ipú aéwo dóódu ā. Ó lɛbɛ̄ɛka ɔnyōkwū nōo yēkwu ōfōōfūnū ā abālɔbányā. Anú nōo tɛtɛ wɛ ɔcɛ́ kú aígelī nɛ̄hi dóódu ā, klla kwú pīya bɛ̄ɛka ɔfiyɛ ícɛ ɛɛ́.

²Ó gē jikwū nɛ̄hi ɔtú gbɔ́ɔ̄cī, agīje le ɔ́ ɔtū gwā cɛnyi, ipú aɔ́ya nū ā, odúúmā kú ūwā í yɔ̄ nēe gē tá ɔ̄ ɔtū lé gɛ ŋ́, aɔ́ya nū ā le ibīyajɛ yá tū ɔ̄. É kwú pīya aólɛlā kú nū ɛɛ́.

³Aólɛla le ācɛ kú Ujúda nēe yɔ̄ Ujerúsalɛm ā, kpó abɔ̄fú ŋmá ɔlɛ́ ūwā ga ajɛ kú éwɔhá, abɔ̄ é lɛ otábɔ̄ dúú gɛ ŋ́ mā. É kōō lɛ ajɛ dúú nēé ī hī ákú ūwā gɛ ŋ́. Aólɛlā kú ūwā ā le uwá yɛjīlatá biílí, é kē lɛ ɔwɛ nēé ī kwu glá ŋ́.

⁴Ɔwɛ nōo yɛ ga Agblīihɔ-nɛ̄hi nōo yɔ̄ ɛfu kú Usáyɔn ā le ŋmó klīīlī klla le cɔ̄nū bɛɛ̄ka ācɛ o yēkwu nēe bá ɛyíkwū ā. Ohígbū ka ɔ̄cɛ dúúmā í wā í yɛ nyɔ̄ í tá Ɔwɔicō ahínyá ipú Agblīihɔ-nɛ̄hi ā, ɛ̄cī nēé je tá ā gɛ ŋ́. Acogwɛ́ɛya ā ba í tíifu klla bá ī hīla ifu. Áncɛ́nyā nēe gē gwíije abɔ́ɔ ā, é lɛ uwá kpó pi le yɛ ɛɛ́. Okómpinu ō yɛ ga ipú igelī ā táncā icííci, Usáyɔn yɔ̄ ipú ɔnɔ nɛ̄hi.

⁵Aólɛ̄la kú ācɛ Ujerúsālɛm le uwá yálé klla kwú pīya otrɛ̄yí kú ūwā ɛɛ́. Óndú ā cɛ̄ lɛ uwá móōwē ohígbū íne alɛwa nēé bīya ā. É le ayí uwā kpó kwú abɔ̄fú le kpó nyɔ̄.

⁶Ɛgahi mɛ́mla ɔhi kú Ujerúsālɛm wɛ ɔdā kú íkée mɛ́ɛ́nɛ. Aígabɔ̄ mɛ́mla aótrɛ̄yí kú uwá lɛbɛ̄ɛka ebóo, nɛ̄ ó má ɔdōlé lé ŋ́, nōo yɔ̄ ī kwinya ŋmá ɛgiyí aófītɛ́ nēe bá ī nū ɔ̄ inya ā.

⁷Ācɛ kú Ujerúsālɛm le blakwu, aɔ́dā nēe he uwá ɔtū nɛ̄hi íkée ā, eko nēé bá ī móōwē, ákanya mla ɔnɔ ō jé mɛ́mla eko kú ɔtūnōbí kú ūwā. Eko nɛ̄ aólɛlā kú ācɛ kú Ujerúsālɛm yá ūwā lé ā, é má ɔ̄cɛ dúúmā tá lɛ uwá abɔ̄ ŋ́. Aólɛlā nēe yá ūwā lé ā bá gē yɛɛhɛ tū ūwā, ohígbū abɔ̄ nōo je nyɛ́ lɛ uwá ā.

⁸Ācɛ kú Ujerúsālɛm le íne kú Ɔwɔicō bīya nɛ̄ɛ̄nɛ̄hi, ohígbū ɔ́ɔmā, é kwú tēelihɔ iyē nɛ̄hi ɛgiyí Óndú ā. Ojīlīmā kú ūwā mɛ dúúdú ɛgiyí odúúdú ācɛ nē e tɛtɛ gē le ojīlīmā ce uwā ā. É kwú eyī í gwo uwā bónū ícɛ ɛɛ́ ohígbū kē é le ohɛ́ɛwa kú ācɛ Ujerúsālɛm má ɛɛ́. Ācɛ kú Ujerúsālɛm abɔ̄yi ūwā yɔ̄ ī tíifu, klla kwú abɔ̄ í klá eyī ipú uwēyī.

⁹Ɔdā nōo je ɔ́ tēelihɔ ā bá īlī kú nū piyɔlɔɔ klla tɛ́ɛcɛɛcɛ cāā nɛ̄ ācɛ ī má ɔ̄ pélúú, amáŋ ó kōō lɛ ɛlá wu ɛga nɛ̄ ó gáā ŋmɛ́yí tá ā ŋ́. O yálé nēé yá ɔ́ lé ā bɔ̄ɔ̄bí nɛ̄hi, ó kōō má ɔ̄cɛ dúú wā í tá ɔ́ ɔtū lé ŋ́. Aólɛlā kú nū le ɔ́ yálé ɛɛ́. Anɔ́ɔ ó le ikwū je klá Óndú ā kóō ményinyi nū.

¹⁰Aólɛlā kú nū le odúúdú agbénú kú nū kpó uwī le yɛ ɛɛ́. É kōō klla má ɔ̄ abɔ̄ nɛ̄ ó bēé ga ipú Agblīihɔ-nɛ̄hi ā, Ɛga nɛ̄ Óndú ā le aílɔ́wá gwū ŋmá anú kéē híī lɛ ikpó da ɔ́ ŋ́ mā.

¹¹Ācɛ kú Ujerúsālɛm bá ī tíifu abɔ̄ nēé bá ī tíne ɔdā nēé í lé ā. É bá ī kpó agbénú kú uwā cabɔ̄ o yá ɛ́ɛ́ kéē lɛ ɔdōlé má kwú lé. Cɛ́ɛ́ kéē lɔfú yēeyī. “Má um Óndú ā, káā klla má um ɛ́ɛ́, má um ipú ákanya mɛ́mla ōwē kú um.”

¹²“Aá má ɔ̄ ɛɛ́, ó wɛ ɔdā dúúmā tū aá nēe wā ī yɛ ā ŋ́ nɛ̄ɛ?[1] Ɔ̄cɛ dúúmā í jé ɛdɔ ɔnɔ kú um nyā ŋ́. Ɔnɔ nɛ̄ óndū ā bī wā í kllá um, eko nɛ̄ ó le cɔ̄nū nɛ̄ īkpēyī kú nū le kplá yōō bɛ̄ɛka ɔlá ákpa ā.

¹³Ó le ɔlá tū klá um ŋmá icō, nōo yɔ̄ ī yi um ŋmá ikpokwú wɛ̄ɛcɛ, bɛ̄ɛka iyē ōkwɔ́lá kú eko nɛ̄ ɔfú gē yá ɔ̄cɛ ā. Ó lɛ ukpa jē tá ajɛ gbēyī um, lɛ um kwú, klla le um hɛ́ wāajɛ gblugudu, le um kwúcē igbīhi. Ɔwɔicō nyɛ̄ɛ̄ gwū um tá, anɔ́ɔ n yɔ̄ ipú ɔnɔ piyóó á.

¹⁴Ó lɛ ɛlá kwu odúúdú íne nɛ̄ um bīya ā, ó klla le odúúdú ūwā gbō tɔ̄ɔ̄há. Ó kwú ɔ̄ ú pla um ɔkɔ, anɔ́ɔ ogbɛnú kú nū yɔ̄ gē pi um wāajɛ á. Óndú ā kwú um ú tū aólɛlā kú um abɔ̄, ń kē fū ūwā iyē ŋ́.

¹⁵Óndú ā lɛ odúúdú aícɔ́ɔja nɛ̄ n lɛ, nēe lɛ ɔtū nɛ̄hi ā jijitēyī klla le uwá kpó yá begebege. Ó le aícɔ́ɔja ɔhá tɛ̄hɔ̄ kéē lɛ ayípōklóbīya kú ɔlɛ́ um kpó yíífi. Óndú ā le ācɛ ɔlɛ́ um wú ŋinii ɛ́gɛ́nɛ̄ ɔ̄cɛ gē wú igwu ā.

¹⁶Ɔdā nōo yá ɛɛ́ nɛ̄ eyī kú um le cēnyi mla agīje ā yɔ̄ á. Ɔ̄cɛ dúúmā í yɔ̄ nōo ī tá um ɔtū lé glá ŋ́, ɔ̄cɛ dúúmā í lɔfú tá um ɔtū kwu ɔtū glá ŋ́. Olɛlā ā, lɛ um yálé ɛɛ́, ācɛ ɔlɛ́ um í klla lɛ ɔdā dúúmā nōo hile tá ajɛ gɛ ŋ́.

¹⁷N le abɔ̄ kú um nā daa, kú ɔ̄cɛ éyi kóō tá um abɔ̄, amáŋ ɔ̄cɛ dúúmā í yɔ̄ nōo ī tá um abɔ̄ ŋ́. Óndú ā le aálajógbe kú um piíí ā pīya aólɛlā kú um, ó klla le uwá tū kla um, ŋmá ɔ́kíkā dóódu. Aólɛlā kú um ā gē yá um bɛ̄ɛka ɔdā nɛ̄ um le tēelihɔ iyē ā, nēé lɛ abɔ̄ kwu um glá gɛ ŋ́.

¹⁸“Óndú ā le ɛpɔ̄hi kú ɔdā nōo yá um ā lé gbóó. Ohígbū ka n tá kóō lɛyítáajɛ lɛ ɔ́. Amáŋ aá jāhɔ̄ gā um, ācɛ kú ɛga dóódu. Aá má um, ipú ɔnɔ nɛ̄ n yɔ̄ ī jé ā. É le ayípōklóbīya mɛ́mla ayípɔ̄nɔ̄nyā kú ɔlɛ́ um kpó kwú ga ajɛ kú ɔfiyɛ ɛɛ́.

¹⁹N hī ayípōklóbīya kú ɔlɛ́ um igwú, amáŋ é lɛ um plla klla tá kéē tá um abɔ̄. Ācogwɛ́ɛya mɛ́mla anyākwɔ́cɛ kú ɔlɛ́ um le pɛ́ gekwú ipú úláyi, eko nɛ̄ ē bá ī yɛ ipú úláyi yɔ̄ gē tíne ɔdōlé nōo géē tá oyēeyī kú ūwā gɔbū ā.

²⁰Ó Óndú ā, móōwē mɛ́mla ɔnɔ nɛ̄ n yɔ̄ ī má ā, má ɔtūnōbí kú odo kú um, Ɔtū kú um le bīya ohígbū ɔtūnōbí kú um lɛyíkwu íne nɛ̄ n bīya ā. Ipú úláyi kú ɔlɛ́ um dóódu, é yɔ̄ ī ŋmó ācɛ bónū, ikwū klla kōō yɔ̄ ipú inu dúú.

²¹Jāhɔ̄ ká ā pó ifu kú ɔnɔ nɛ̄ n yɔ̄ ī tá mɛ́mla ōwē nɛ̄ n yɔ̄ ipú nū ā. Ɔ̄cɛ dúúmā ī yɔ̄, nōo ge tá um ɔtū lé ŋ́. Ɔtū le he odúúdú aólɛlā kú um ohígbū unwalu mɛ́mla ífi nēé bī wā í klá um ā. Óndú ā, lɛ ɛ̄cī nāa cokónu nū ā bī wā, cɛ́ɛ́ ká ā lɛ ōwē yá aólɛ̄la kú um, ɛ́gɛ́nɛ̄ n má dúú ā.

²²“Lɛ aólɛlā kú um ŋmɛ́pɔ̄bí, ohígbū ɔdōbɔ̄bí, mɛ́mla ucē kú ɔ́bíipú kú uwá dóódu. Lɛ italā yá ūwā ɛ́gɛ́nɛ̄ a yá um ohígbū íne nɛ̄ n bīya ā. N yɔ̄ ī tíifu ipú owē, mɛ́mla unwalu. Ɔtū kú um le gbenyi.”