Read idoma IKWŪAYIDƆ 2 Bible Online

IKWŪAYIDƆ 2 - idoma bible

IKWŪAYIDƆ 2

¹Óndú ā, ipú ícɔ̄nū kú nū, le Ujerúsālɛm fɔnū ka anúɔ í yá ɔ̄ italā. Aɔ́dā nōo he ācɛ kú Ísrɛ̄lu ɔtū nɛ̄hi ā, ó kwú ɔ̄ ú píya ɔdā kú ífi. Eko nɛ̄ Óndú ā cɔ̄nū ā, ó kwú igbīhi í cē kwu Ujerúsalɛm nōo lɛbɛ̄ɛka ɔdā ō lɛ ikpó ce kú nū ā.

²Óndú ā ipú íwɔtū kú nū ā ó ményinyi Ujúda ŋ́, le ɛjɛ̄ɛ̄jī aígelī nɛ̄hi kú ūwā dóódu kpó yíífi tāajɛ. Ó le ɛga nōo yɔ̄ nɛ̄ ācɛ gē kwu nyɔ̄ eko nēé gē kpɛ́fú tú ūwā ā wúla tāajɛ ipú ícɔ̄nū kú nū. Óndú ā le ajɔ̄ɔ̄cɛ́ kú Ujúda mɛ́mla aɔ́cɛ́ kú nū tú wāajɛ í bá ɛhájɛ ācɛ o hile.

³Ó kwú ɔfú ú kpó ŋmá iyē kú ācɛ Ísrɛ̄lu ipú ícɔ̄nū nɛ̄hi kú nū. Ó tá kóō tá alɔ abɔ̄, eko nɛ̄ aólɛlā kú alɔ wā í kpɛ́fú tá alɔ ā. Óndú ā abɔ̄yī nu yɔ̄ ī hɛ́ klá alɔ blublu bɛ̄ɛka ɔlá ā. Ó le ɔdā dóódu kú alɔ kpó yíífi.

⁴Ó kpábɔ̄ ɔtā ŋaŋaa lɛyíkwu alɔ bɛ̄ɛka olɛ̄la kú alɔ ā. Ó le odúúdú ācɛ nēe he alɔ ɔtū fíyɛ́ dúú ā kpó ŋmó. Ujerúsālɛm amānyā a, ícɔ̄nū kú Óndú ā cɛ̄ klá alɔ bɛ̄ɛka ɔlá ā.

⁵Óndú ā kwú pīya bɛ̄ɛka olɛ̄la ā, ó kwú Ísrɛ̄lu u yíífi ŋmá ajɛ. Ó kwú agblɔ̄cɛ́ kú nū mɛ́mla ɔdɔ olɔfú ō gwutayínū ā ú pīya alácɛ̄. Ó lɛ ɔtūnōbí, íwɔ́tū mɛ́mla agīje nɛ̄ ó lɛ oōmɛ ŋ́ mā, bī wā í klá ācɛ kú Ujúda.

⁶Ó le Agblīihɔ-nɛ̄hi kú nū nɛ̄ alɔ gē gbā ɔ̄ ɛ̄gbā ipú nū ā, wúla tāajɛ ɛ́gɛ́nɛ̄ ɔ̄cɛ ī ca áklɔ̄kpɛ nēé cē ce ipú ɛhɔ̄ tāajɛ ā. Ó lɛ ɛ̄cī kú usábāti, mɛ́mla ucɛ otīihɔ kú nū ipú Ujerúsalɛm ā bī wā oŋmɛ́ɛyí ipú ícɔ́nū nɛ̄hi kú nū. Ipú ícɔ̄nū kú nū ā, ó kwú igbīhi ú cē kwu aɔ́cɛ́ mɛ́mla ācogwɛ́ɛya.

⁷Óndú ā tá kóō mīyɛ ɛya nēé gē bī wā ede ā, klla kwú igbīhi ú cē kwu Agblīihɔ-nɛ̄hi kú nū. Ó cɛ̄ lɛ aólɛlā le ɔdɔ kú Agblīihɔ-nɛ̄hi ā wúla tā ajɛ. Aólɛlā ā gbogwú ipú Agblīihɔ-nɛ̄hi ā nɛ̄ alɔ gē gbā Óndú ā ɛ̄gbā tɛtɛ ā, eko nēé le alɔ yálé ā.

⁸Óndú ā le abɔ̄ kwɔtū ɔtū kóō lɛ ɔdɔ kú Ujerúsalɛm ā wūlatāajɛ piíí. Óndú ā le ɔ́ŋgbá miya ɔdɔ kú igá ā cɛ́ɛ́, kóō má ka é kwú ɔ̄ ú wúlatāajɛ piíí. Ó klla kwú aólɛlā ā tū ŋmá o je ɔdɔ ā wúlatāaj ŋ́. Ó le igá nɛ̄ ó gē cɛ̄ lɛ aólɛlā má ɛga gaajɛ ācɛ kú Ujerúsālɛm glá ŋ́ mā wúlatāajɛ, anɔ́ɔ ɔdɔ kú igá ā yɔ̄ ī jikwū bɛ̄ɛka ɔ̄cɛ ɔlamu ā.

⁹Aódómgwɔ̄ɔwɛ nɛ̄hi nēé ī bū ga ipú igelī nɛ̄hi ā le kpó fu tá ipú īmū, aígbɔ́cí nēé bī lɛ gwū ūwā ā kwú kpó cē nyɛŋɛnyɛŋɛ. É le ɔcɛ́ mɛ́mla aígabɔ̄ kú nū ā kpó bɛ̄ɛka aólagbá kú ɛfú ga ajɛ éwɔhá ɛɛ́. Ācɛ nōo ī nwū íne ā í klla yɔ̄ gɛ ŋ́, ācomɛ́ɛbɛ ā i gē má ɔdā dúúmā ŋmá ɛgiyí Ɔwɔicō gɛ ŋ́.

¹⁰Anyākwɔ́cɛ kú Ujerúsālɛm cīce ajɛ lɛ abɔ̄ ca agba cíí ba ī mɛ́ɛbɛ. É lɛ ewo wu klá ɛyí klla le īlī ekwu kpó wu iyē. Ayípɔ̄nɔ̄nyā kú Ujerúsālɛm le okwúukwu kwaajɛ, túkpɛɛ́, le údɔ̄bū kwaajɛ.

¹¹Ɛ̄jɛ̄ kú agīje le jɛ̄ eyī kú um ɛɛ́. Odo kú um yɔ̄ ipú ɔnɔ. N le gbagbafú ipú ɔtūnōbí ohígbū ācɛ ɔlɛ́ um. Ayípɛ̄nɛ̄ŋ́cɛ́ mɛ́mla ayí olugwulugwu bá ī hɛ́kwú ipú úláyi kú Ujerúsālɛm.

¹²É jikwū klá ɛ́nɛ́ ūwā ohígbū ɔdā nēé í lé mɛ́mla ɔdā nēé í gwá. É bá ī wā ajɛ gblugudu ipú úláyi bɛ̄ɛka ācɛ nēé le uwá yágbe ā. Cɛ́ɛ́, é gē kwú ɛmɛɛma tū ɛ́nɛ́ ūwā abɔ̄.

¹³Ujerúsālɛm, Ujerúsālɛm ohe um ɔtū, ɔdí nɛ̄ n gē ka ohígbū uwɔ āa? Ɔwɛ nyá nɛ̄ n lɔfú tá uwɔ ɔtūlé glá āa? Ayípɔ̄nɔ̄nyā nēe jé ācɛnyīlɔ ŋ́. Ɛ́gɛ́nɛ̄ itekwú ī cēnyi klɛ́ɛcɛ gē je úkɔngɔ̄ kú nū lé ā, ɛ́gɔ́ɔmā nɛ̄ ífi kú Ujerúsālɛm lɛ á. Ɔ̄cɛ dúú í tú uwɔ gwó glá gɛ ŋ́.

¹⁴Ācomɛ́ɛbɛ kú aá í lɛ ɔdā dúúmā nēé ī ka lɛ aá ŋ́, Ɔna kú ɛlā Ɔwɔicō nēé ī tá lɛ aá gē plla aá, ohígbū kōó gē ca ɔ́bíipú ká aá ā tɛ́ɛcɛ ŋ́. É gē cɛ̄ lɛ aá gē gbɛlá kú aá í cɛgbá ōpīyabɔ̄ ŋ́.

¹⁵Odúúdú ācɛ nēe wā í yɛ ɔwɛ ā ge cíla okwúlu tū aá. É gē tɔ́ɔcɔ́ klla ī mī ɛyí jigijigi tū Ujerúsālɛm. É gē ka kahíníī, “Igelī nɛ̄hi nɛ̄ ó lɛ ɛcá dúúmā ŋ́ mā nōo klla lɔhi nɛ̄hi ā yɔ̄ āa? Odúúdú ācɛ kú ɛcɛ gwéeyē ohígbū Ujerúsālɛm.”

¹⁶Odúúdú aólɛlā kú uwɔ, gē cōkónu cúúu kwu uwɔ. É klla ī cōkónu gbɛdɛ le ɔcɔ́ tá gē ka, alɔ kwú ɔ̄ í yíífi ŋmá ajɛ ɛɛ́, Aháa. Ɛ̄nyā wɛ ɛ̄cī nɛ̄ alɔ húmáyī gbēyī á. Ó gā ɛɛ́, alɔ kē le ɔ́ má ɛɛ́.

¹⁷Ɔdā nɛ̄ Óndú ā húmáyī fu alɔ ɔnū ka anúɔ í yá ā, ó le ɔ́ yá piíí ɛɛ́. Ó ményinyi alɔ ŋ́ le alɔ kpó yíífi ŋmá ajɛ. Ɛ́gɛ́nɛ̄ ó tɛtɛ le alɔ ahɔ̄ pi táajɛ gbɔbū ka anúɔ í yá ā. Ó cɛ̄ lɛ aólɛla kú alɔ kéē lɛ alɔ yálé, ó klla cɛ̄ lɛ uwá gwéeyē ohígbū ɔdā nōo wā í klá alɔ ā.

¹⁸Ujerúsālɛm, cɛ̄ lɛ ɔtū kú uwɔ piíí ā jikwū klá Óndú ā,[2] Agīje kú uwɔ kóō pɛ́ otú mɛ́mla ɔ́lɛ́ɛnɔ ɛ́gɛ́nɛ̄ ísu gē pɛ́ ā. Ikwū ō je mɛ́mla ɔtūnōbí ō yá kóō lɛ aá gbagbafú.

¹⁹Otú gbɔ́ɔ̄cī ā, cāŋjɛ igbo alɛwa cɛ́ɛ́ kú ā jikwū klá Ɔwɔicō. Lɛ ɔtū kú uwɔ piya klá ɛcɛ, cɛ́ɛ́ kú ā gbɔ̄ɔkɔ kéē ményinyi kú ayí uwɔ. Ayípɛ̄ nɛ̄ ɛmiyɛ yɔ̄ ī kpó ūwā ŋmó bónū, ipú ɔ́kíka dóódu kú úláyi ā.

²⁰Pīyeyī kú ā má ɔ̄ ɛ́, ó Óndū, Leyī yi ɔ̄cɛ nāa yá ɔdā ɛ́gɛ́nyā ā. Aɛ́nɛ́ nēe ma ayí cíka ō kpó okwū kú ayípɛ̄ ɔlɛ́ ūwā lé gɛɛ, ayí nēé bī jɛ̄ ipú ihɔtū leyīkwu uwá gɛɛ ā. É bá yɔ̄ ī kpó ācogwɛ́ɛya mɛ́mla ācomɛ́ɛbɛ ā ŋmó ipú Agblīihɔ-nɛ̄hi abɔ̄yī nū ā.

²¹Okwū kú anyākwɔ́cɛ mɛ́mla ayípōklóbīya bá ipú úláyi gbɔnɔgbɔnɔ. Ayípōklóbīya mɛ́mla ayípɔ̄nɔ̄nyā nɛ̄ aólɛla bī ɔkpacaŋgelī ŋmó ā. Á ményīnyi uwá ŋ́, a le uwá kpó ŋmó ɛ̄cī kú ícɔ̄nū kú uwɔ.

²²A le aólɛla kú um hīgwú bɛ̄ɛka ācɛ nēé gē hīgwú ga ɔ anú ucɛ ā, kéē wā í kpɛ́fú tá alɔ ŋmá ɔ́kíkā dóódu. Ɛ̄cī nɛ̄ Óndú cɔ̄nū nɛ̄hi ɔ́ɔmā, ó lɛ ɔ̄cɛ dúúmā nōo kwu ámāŋ ka oyēeyī glá ŋ́. Ayí um nɛ̄ n bī jɛ̄, nēe klá hi um ɔtū nɛ̄hi ā, aólɛla le uwá kpó ŋmó.