Read idoma IKWŪAYIDƆ 3 Bible Online

IKWŪAYIDƆ 3 - idoma bible

IKWŪAYIDƆ 3

¹“Ami wɛ ɔ̄cɛ nōo tá ɔkpá nyā á. Ami klla wɛ ɔ̄cɛ nɛ̄ Ɔwɔicō yá italā nɛ̄hi eko nɛ̄ ó cɔ̄nū nɛ̄hi aā.

²Ó le um bī ga ɛga odobū nɛ̄hi klla cɛ̄ ga um yɛ ɔwɛ nōo dobū nɛ̄ ó lɛ ɔlá ŋ́.

³Ó ŋmó um ijē, ó klla ŋmó um ijē, tū um akwū nɛ̄ ó ményinyi um ŋ́.

⁴Ó kwú ɔkpíyē mɛ́mla ɛ́nɛ́bɛ́ kú iyē kú um ú kpó fā klɛ́ɛcɛ. Ó klla le ikpokwú kú um kpó ca tīipú.

⁵Ó kwú um tá ipú agbá kú ōwē, ɔnɔ, mɛ́mla ɔtūnōbí.

⁶Ó le um yá ká n̄ lā ipú obū bɛ̄ɛka obū nɛ̄ ācɛ nēe kwú gbojī ɛɛ́ mā lā a.

⁷Ó le ɔdɔ hɛ́ tū um, klla le agbá kpó kwu um báajɛ, n kwú pīya olagbá nɛ̄ ó kwu gbógbóō glá ŋ́.

⁸N jikwū gbōmgbōm, klla dɛ̄gba kú otábɔ̄, amáŋ Óndú ā tá kóō pó ɔkɔ nɛ̄ n gbā a.

⁹Ó bī ɛcɔ̄ ō gbā le ɔwɛ ŋmó tū um, ó klla le ɔwɛ kú um yá kóō híī tōō yɛ ga um glá ŋ́.

¹⁰Ó yɔ̄ ī gbēyī um bɛ̄ɛka ɔgwú nōo gē gbēyī ɛwū a, Ó le wu gaá kwu um kwaá, bɛ̄ɛka ágábá ā.

¹¹Ó le um nū ga ipácí klla le um hɛ́ klá ajɛ nyɛŋɛnyɛŋɛ, anɔ́ɔ ó habɔ̄ um tá abɔ́ɔ á.

¹²Ó kpó abɔ̄ ɔtā kú nū ŋaŋa le um yá ɛkɔ̄ ō kwu ɔyī.

¹³Ó le ɔyī kú nū tá kwu um iyē kli.

¹⁴Ācɛ ba, í yɛhɛ tū um eko dóódu. N klá kwu pīya ɔdā ō bī hijā kú odúúdú ūwā.

¹⁵Ó le um pi kú um lɛ ōwē má bɛ̄ɛka ɔ̄cɛ nēé pi abɔ̄fú kóō kwú ɔdā ō hɔ́nɔ nɛ̄hi ú mulɛ ā.

¹⁶Ó cɛ̄ gā um le ɛcɔ̄ lé mla ayīnu nōo cɛ̄ le ayīnu kú um kwu kpócē tū um ipú okónu. Ó klla cɛ̄ ga um má gwutá ipú úmúlá kóō mafú ka ń wɛ ɔdā dóódu ŋ́.

¹⁷N kwú mlanyī ɔdā nɛ, ɔbɔ́lā, éeyē mɛ́mla ɛbɔ́ wɛ ā.

¹⁸Ń kōō gáā yēeyī gbojī ajɛ ɛ́ɛ́ gɛ ŋ́, eyī nɛ̄ n kpóce Óndú ā mɛ ɛɛ́.

¹⁹Ɛlá ō gbo kwu ɔnɔ kú um, mɛ́mla ɔlɛ́ nɛ̄ ń lɛ ŋ́ má, hɔ́ɔnɔ tū um bɛ̄ɛka ɛcí ō ŋmó ɔ̄cɛ.

²⁰N gē gbɛlá kwu ɔ́ eko dóódu, anɔ́ɔ odo kú um kwú gbenyi tū um iyē.

²¹Nááná n gē lɛ eyīyōce eko nɛ̄ n le blakwu ɔdā ékpónú nyā,

²²Ihɔtū mɛ́mla eyīnyinyi nɛ̄ Óndú ā lɛ nɛ̄ ó gē tɔ́ɔlá ŋ́ mā yɔ̄ piyóó ipú ɛcɛ nyā.

²³É wɛ ɛ̄yīpɛ̄ ɔ̄cɔ̄ɔ̄cī dóódu, awɔ Ɔwɔicō nɛ̄ ācɛ gboló ce glá á.

²⁴Odo kú um ka Óndú ā wɛ ɛjɛ̄ɛ̄jī ɔdā dóódu nɛ̄ um lúgwū nū á, ohígbū ɔ́ɔmā n kwú ɔtū kú um í kpó ce ɔ́.

²⁵Óndú a lɔhi lɛ ācɛ dóódu nōo lɛ ɔtūce ɔ́ klla lɛyí táajɛ lɛ ɔ́ ā.

²⁶Ó lɔhi ká ālɔ̄ gbēyī cíí, yɔ̄ i gbēyī Óndú ā kóō lɛ alɔ nyatá.

²⁷Ó kē lɔhi ka ɔ̄cɛ kóō nwū ogbēyī cíí nyā eko kú ɔyípōklóbīya kú nū.

²⁸Eko dúúmā nɛ̄ alɔ ī móōwē, ālɔ̄ lɛ ɔtūlé ká alɔ cīce cíí.

²⁹Ká ālɔ̄ túkpɛɛ́ lɛ okwúukwu kwaajɛ ipú o tú iyī alɔ wāajɛ lɛ Óndú ā, alɔ lɛ eyīyōce ka ó í nya alɔ tá kpɔ́ ɛ́ɛ́.

³⁰É ŋmó alɔ ijē klla cá alɔ ɛcá nááná, alɔ mīyɛ odúúdú ijē mla ɛcá ā.

³¹Óndú ā gē ményinyi ɔ̄cɛ, ó gáā tá alɔ piyóó ŋ́.

³²Amáŋ, nááná nɛ̄ ó bī ɔtūnōbí gé lɛ alɔ klla yá alɔ ōwē ā, ó géē ményinyi alɔ ohígbū ka ācɛ ɔlɛ́ nū he ɔ́ ɔtū nɛ̄hi.

³³Ó klla wɛ ɔdā ō he ɔ́ ɔtū kóō yɔ̄ ī yá alɔ ōwē cɛ́ɛ́ kú alɔ yɔ̄ ī jé ɔnɔ ŋ́ má.

³⁴Eko nēé lɛ ikpó da odúúdú aálagbá kú éwo éyi tāajɛ,

³⁵Óndú ā jé eko nɛ̄ ācɛ nyá alɔ ukpɛ̄ nɛ̄ ó je lɛ alɔ ā ipéyī nū.

³⁶Eko nēé le ɛpɔ̄ újí ka únɛ́pɔ̄, Óndú ā jé.

³⁷Ɔdā nōo wɛ olekwu mɛ́mla ɔtū kú Óndú ā ōfōōfūnū nɛ̄ alɛɛcɛ gē bī lɛ yúklɔ́ eko dóódu á.

³⁸O ŋmá lɛ ɔ́da kú Óndú ā nɛ̄ ɔdōbɔ̄bí mɛ́mla ɔdōlɔhi lɔfú yá glá á.

³⁹Ɔdíyá nɛ̄ alɔ cíka ō ka iŋini, eko dúúmā nēé le alɔ yá italā ohígbū íne nɛ̄ alɔ bīya āa?

⁴⁰Ālɔ̄ lɛ ɔwɛ kú alɔ jila má, ká ālɔ̄ má ɔ́, cɛ́ɛ́ ká ālɔ̄ kwúcē wā ɛgiyí Óndú ā.

⁴¹Ālɔ̄ lɛ ɔtū kú alɔ nwūla lɛ Ɔwɔicō nōo yɔ̄ ɔkpancō ā, ká alɔ gbɔ̄ɔkɔ lɛ ɔ́ kahíníī.

⁴²“Alɔ le íne kú uwɔ bīya klla bɛ́yí kwu uwɔ, Óndú, anɔ́ɔ á kē je yá alɔ ɛhi ŋ́ má.

⁴³A nū alɔ inya, le alɔ kpó ŋmó. Á kwú eyīnyinyi kú uwɔ ú tayínū ipú íwɔ́tū kú uwɔ.

⁴⁴A kwu ojuuja nōo cɔkpɛ́nú nɛ̄hi í hā tū iyī uwɔ, nɛ̄ ó cɛ̄ lɛ ɔkɔ nɛ̄ alɔ ī gbā ā gaajɛ uwɔ glá ŋ́.

⁴⁵A kwú alɔ í píya ɛyétutulu kú odúúdú ɛcɛ.

⁴⁶“Odúúdú aólɛlā kú alɔ bá ī cá alɔ ɛcá, klla bá ī yá alɔ okónu.

⁴⁷Alɔ le bū ipú ufi, ɔtū ō wuklíicō mɛ́mla ífi ɛɛ́. Aólɛlā kú alɔ le alɔ kpó ŋmó klla le odúúdú aɔ́dā nɛ̄ alɔ lɛ ā í kpó bīya.

⁴⁸Eyī kú um le cēenyi mla agīje, ohígbū ācɛ ɔlɛ́ um nēé kpó yíífi ŋmá ajɛ ā.

⁴⁹“Agīje kú um géē yɔ̄ ī pɛ́ bɛ̄ɛka ɔkpá nɛ̄ ó gē ŋmó ŋ́ mā,

⁵⁰jāā gbéeko nɛ̄ Óndú ā pīyeyī wāajɛ ŋmá ɔkpáncō lɛ alɔ má.

⁵¹Ɔtū le bīya gā um eko nɛ̄ n lɛ ɔdā nēé yá ācɛnyā kú igelī nɛ̄hi kú Ujerúsālɛm ā má ā.

⁵²Aólɛlā kú um, nɛ̄ ī wɔ́tū um nááná nɛ̄ ń yá ūwā ɔdā dúúmā mā, le um kwú ukpa bɛ̄ɛka ígbáanɔ ā.

⁵³É lɛ um tɛ́ɛcɔ̄ oyēeyī ga ipú ɔ̄gɔ̄, anɔ́ɔ é kwú ɛcɔ̄ í míya gwū okónu ɔ̄gɔ̄ ā.

⁵⁴Éŋkpɔ̄ gbɔɔ́ ō pɛ́ klá um abɔ́ɔ, anɔ́ɔ n gbɛlá ka ikwū gā ɛɛ́.

⁵⁵“N jikwū klá uwɔ Óndú, ŋmá ɔkɛklɛ kú ɔ̄gɔ̄ abɔ́ɔ.

⁵⁶Eko nɛ̄ n kē le ɔkɔ gbā gā uwɔ ā, a le ɔkɔ kú um pó.

⁵⁷A le ohi tá um, a klla da um ka amiyɔ̄ yúufi ŋ́.

⁵⁸“Óndú, a wā í le abɔ̄ tá um, anɔ́ɔ a klla le oyēeyī kú um nyatá.

⁵⁹Lɛ ɛpɔ̄hi hɛ́ ga um, ohígbū ka a jé ɔdōbɔ̄bí nēé yá um ā.

⁶⁰A jé ɛ́gɛ́nɛ̄ aólɛ̄la kú um wɔ́tū um lɛ klla le ujɔ̄ tū tū um kéē je um ŋmó ā.

⁶¹“A pó, abɔ̄ nēé cá um ɛcá ā dúú, Óndú. A kē jē ujɔ mɛ́mla ojuju kú uwá lɛyíkwu um dúú.

⁶²O ŋmá ɔ̄cɔ̄ɔ̄cī jāā gbótú, é bá ī kɛlā lɛyíkwu um, klla bá ī tū ojuju tū um.

⁶³Ɛga dúúmā nēé bá, ɔdā dúúmā nēé gē yá, ami wɛ ijē nēé bī okónu yɔ̄ ī gwó á.

⁶⁴Óndú, lɛ italā yá ūwā ohígbū ɔdā nēé yá ā.

⁶⁵Lɛ okónu tá lɛ uwá, klla lɛ uwá ɔtū yúufiifi, cɛ́ɛ́ ká ā lɛ okónu tá lɛ uwá.

⁶⁶Lɛ uwá nū inya ipú ícɔ̄nū kú uwɔ káā lɛ uwá kpó yíífi, ŋmá ajɛ Óndú ā.”