Read idoma IKWŪAYIDƆ 4 Bible Online

IKWŪAYIDƆ 4 - idoma bible

IKWŪAYIDƆ 4

¹Ugóolu ā nōo le yāŋāāā je kpó cá yɔ̄ áā? Ugóolu ā je pīyabɔ̄ yɔ̄ áā? Aɛ́cɔ̄ otīīhɔ kú Agblīihɔ-nɛ̄hi kú Óndú ā wɛ ó pahīla klɛ́ɛcɛ ɛga dóódu.

²Ayípōklóbīya kú Usáyɔn ā cɛgbá klla gbɔɔ́lá lɛ alɔ bɛ̄ɛka ugóolu ā, amáŋ é je uwá abālɔbányā bɛ̄ɛka ɛtɛ́ ɔmɛ icííci ā.

³Ɔgwú nááná gē je amɛ̄ lɛ ɔyí nū gwá, amáŋ ācɛ ɔlɛ́ um bɔ̄bíipú lɛ ayí ūwā bɛ̄ɛka okokoŋkofí ā.

⁴É gē cɛ̄ lɛ ijēnyi mɛ́mla ɛmiyɛ gē kpó ayí ūwā ŋmó. Ayí ūwā bá ī ba ɔdōlé, nɛ̄ ɔ̄cɛ dúúmā í kē gáā cɛ̄ jē lɛ uwá ŋ́.

⁵Ācɛ nēe tɛtɛ ī lé ɔdōlé nōo lɔhi fíyɛ́ dúú ā, nɛ̄ ɛmiyɛ yɔ̄ ī ŋmó bónū ipú úláyi á. Ācɛ nēé tɛtɛ bī jɛ̄ ipú abahi ā bá ī nyā ɔdōlé lé ŋmá ɛyétutulu.

⁶Italā nēé yá ācɛ ɔlɛ́ um ā fíyɛ́ ákú ācɛ kú Usɔ́dɔm nēe kwú ikwū acígilí abɔ̄ kú Ɔwɔicō náāná ā.

⁷Aɔ́cɛ́ ogbājɛ[3] kú ɔlɛ́ alɔ tɛtɛ le yēŋēē, í klla lɛ ɛcá dúúmā ŋ́. É tɛ́ɛ́hɛ́ bɛ̄ɛka áfū ā, klla le kplákplá iyē nɛ̄hi.

⁸Abālɔbányā é kwú pīya okwū gwutá ipú úmúlá lɛ eyī tóbí fiyuu bɛ̄ɛka ɔkwu ɛ̄hī ā. Ɔ̄cɛ dúúmā í klla jé uwā glá gɛ ŋ́. Ɔkpíyē kú uwá kwú ŋmó bɛ̄ɛka ɔcí ōŋmókókó ā, ó klla kwú ŋmó ɔkpá bá ikpokwú kú uwá kɔ́ngɔ́ɔ́ɔ́.

⁹Ācɛ nēé ŋmó ɔgbɛ́fú ā nɛ̄ ó klla lɔhi lɛ uwá fíyɛ́ ācɛ nēe bá ī kwú igbīhi ajɛ nyā á. Ācɛ nɛ̄ ɔkpɛtá yɔ̄ ī kpó ŋmó ga ɔlékwū ɛmɛɛma, nēé má ɔdā dúúmā lé ɛ́ɛ́ kéē yēeyī ŋ́ mā.

¹⁰Ífi nōo wā í klá ɔ̄cɛ ɔlɛ́ um cɛ̄ lɛ uwá lɛ ɛbɛ océyī má, Eko nɛ̄ ɔkpɛtā yɔ̄ ī ŋmó ācɛ ɔlɛ́ um ā, aɛ́nɛ́ ogbonɛnɛ kwú ayí abɔ̄yī ūwā ú kpó he lé kwɛyí ɔdōlé. Ɔdā nɛ̄ eyī ī gē má ŋ́ má, nɛ̄ ōwē mɛ́mla ífi mɛ́mla ákanya nyā kpó wā i klá ācɛ ɔlɛ́ um á.

¹¹Óndú ā le odúúdú ícɔ̄nū kú nū pīya klá alɔ dúúdú. Ó le ɔlá hɛ́ kwu Ujerúsālɛm, ɔlá ā kwú ɔ̄ í yi tāajɛ dúúdú.

¹²Ɔ̄cɛ dúúmā ī yɔ̄ ipú ɛcɛ nyā, kwu aɔ́cɛ́ kú aéwo ɔhá, í cɛ̄ ká olɛ̄la ɔ́ɔ lɔfú bēé igá kú Ujerúsālɛm gā ipú ɔlɛ́ ā glá ŋ́.

¹³Ɛ̄nyā le yá, ohígbū ká ācomɛ́ɛbɛ le íne bīya anɔ́ɔ ācogwɛ́ɛya ā klla le ɛpɔ̄bí lé ohígbū ācɛ nēé lɛpɔ̄bí ŋ́, nēé ŋmó icííci ā.

¹⁴Aótrɛ̄yí kú Ujerúsālɛm bá ī lɛ abɔ̄ ma ajɛ yɔ̄ ī yɛ ipú uláyi ā bɛ̄ɛka aópeyī ā. É le īyī ūwā iye tēelihɔ mla oyī nɛ̄hi, nɛ̄ ɔ̄cɛ dúúmā í cē lɛ abɔ̄ kwu úwé kú uwā ŋ́.

¹⁵Ācɛ bá ī dɛ̄gba tū uwā kéē nyɛ̄ɛ̄ ŋmá ɛgiyí aá, kēé wɛ ācɛ nēe le iyī ūwā iyē tēelihɔ. Ké ē híī lɛ abɔ̄ kwu uwá ŋ́. Anɔ́ɔ é bá ī yɛ ŋmá éwo éyi ga éwɔhá, ɔ̄cɛ dúúmā í kē cɛ̄ mīyɛ uwá ŋ́.

¹⁶Óndú a í klla lɛ ɛlá wu uwá ɛ́ɛ́ gɛ ŋ́. Anú abɔ̄yī nū pa uwá hīla á. Ó klla lɛ ojīlīma cɛ ācogwɛ́ɛya mɛ́mla aígabɔ̄ kú alɔ ɛ́ɛ́ gɛ ŋ́.

¹⁷Alɔ lɛ eyī táajɛ gbóógbó, bá ī gbēyī Óndú ā kóō wā í tá alɔ abɔ̄, ó kē wā ŋ́. Alɔ bá ī gbēyī éwɔhá nɛ̄ ó tá alɔ abɔ̄ glá ŋ́ mā, kéē wā í tá alɔ abɔ̄.

¹⁸Olɛlā ká alɔ ā, bá yɔ̄ ī kwāajɛ gbēyī alɔ, alɔ í kōō yāwu ipú ɔlɛ́ ā glá gɛ ŋ́. Ɛ̄cī kú alɔ mɛɛ́, ikwū gā ɛɛ́, oŋmɛ́yí kú alɔ ga ɛɛ́.

¹⁹É nū alɔ inya maálá bɛ̄ɛka ucē nōo ī wu ŋmá icō wāajɛ í je ugwū ā. É nū alɔ jāā ga ɛyí ɛfu. É lɛ alɔ kwú igbledū ipú ígbíli.

²⁰Ɔwɔicō le ɔcɛ́ kú alɔ fu lɛ alɔ, anú ā kē wɛ ɔ̄cɛ nōo ī je oyēeyī lɛ alɔ á. Ɔ̄cɛ nɛ̄ alɔ kpɔ́tūce ka ó gē gbō alɔ ŋmá abɔ̄ kú aólɛ̄la ā.

²¹Aá yɛhɛ mɛ́ɛnɛ, ācɛ kú Ɛ́dɔm, mla Úus. Ɔtū kú aá kóō wɛ ɛnɛ̄hɛ́, ɛ́gɛ́ dúú nɛ̄ ɔtū he aá lɛ ā, ífi ká aá géē wā dúú nɛ. Aá géē bá ī ga ɔwɛ ga ácí, tá ohɛ́ɛwa mla uwēyī dúú.

²²Ujerúsālɛm lɛ ulé kú íne nēé bīya ā gbā ɛɛ́, Óndú ā í klla gáā mā alɔ tá ipú ajɛ kú ɔfiyɛ ɛ́ɛ́ gɛ ŋ́. Amáŋ, Óndú ā géē yá Ɛ́dɔm italā piíí, ó géē ka ɔdōbɔ̄bí nɛ̄ ó yá ā tɛ́ɛcɛ piíí.