Read idoma ISÍKƐ̄LU 10 Bible Online

ISÍKƐ̄LU 10 - idoma bible

ISÍKƐ̄LU 10

¹N pīyeyī má ɔdā nōo yɔ̄ ɛyí kú aɔ́dā ɔlɛ́ acá oōbī wu ā, anɔ́ɔ n má odée bɛ̄ɛka akpa kú ɔcɛ́ nēé bī ɛcɔ̄ ōgbɔɔ́lá yá ā.

²Anɔ́ɔ Ɔwɔicō da ɔ̄cɛ nōo lɛ īlī nɛ̄hɛ́ wiiyē ā kahíníī, “Nyɔ̄ ga ɛháajɛ kú aákā nēe bá ɛháajɛ kú aɔ́dā ō lɛ acá oōbī wu ā, cɛ́ɛ́ ká ā lɛ ahɔ̄lá fú tū abɔ̄ omōomu ŋmá abɔ́ɔ, cɛ́ɛ́ ká ā lɛ ɔ́ pahīla klá odúúdú igelī ā.” N mā ɔ̄ abɔ̄ ó yɔ̄ ī nyɔ̄.

³Aɔ́dā ō lɛ acá oōbī wu ā háyi ɛháajɛ kú Agblīihɔ-nɛ̄hi ā, eko nɛ̄ ó nyɔ̄ ipú inu ā. Anɔ́ɔ ódūdū kwú mu odúúdú ipú Agblīihɔ-nɛ̄hi ā.

⁴Anɔ́ɔ ofíyáajɛ kú ɛgahi nɛ̄hi kú Óndú ā nyɛ̄ɛ̄ ŋmá ɛyí kú aɔ́dā ōlɛ acá oōbī wu ā, klla i yɛ ga Okónpinu kú Agblīihɔ-nɛ̄hi ā. Ódūdū ā le mu odúúdú Agblīihɔ-nɛ̄hi ā, anɔ́ɔ ofíyáajɛ kú ɛgahi nɛ̄hi kú Óndú yɔ̄ ī fíyāajɛ ɛga dóódu kú eyīpú ɔlɛ́ ā á.

⁵Uya nɛ̄ acá kú aɔ́dā ōlɛ acá oōbī wu ā bá ī yá ā, é pó jāā kwu eyīyɛcɛ kú ipú Agblīihɔ-nɛ̄hi ā. Uya ā lɛbɛ̄ɛka ɔkɔ kú Ɔwɔicō, nōo lɔfú fíyɛ́ dúú ā.

⁶Eko nɛ̄ Óndú ā da ɔ̄cɛ nōo lɛ īlī nɛ̄hɛ́ wu iyē ā ka o nyɔ̄ gáā fú ahɔ̄lá ŋmá ɔtāhɛ kú akā nēe bá ɛháajɛ kú aɔ́dā ō lɛ acá oōbī wu ā, ɔ̄cɛ ā le yɛ gáā háyi ɛgiyí éyi kú akā ā.

⁷Éyi kú aódée ā lɛ abɔ̄ kú nū wu ɔlá, lɛ ahɔ̄lá fú kwú kpó tū ɔ̄ abɔ̄. Anɔ́ɔ ɔ̄cɛ obī īlī nɛ̄hɛ́ ɔ́ɔmā mīyɛ klla nyɛ̄ á.

⁸Anɔ́ɔ n má ka éyééye kú aɔ́dée ā lɛ abɔ̄ bɛ̄ɛka ákú ɔ̄cɛ ā ɛháajɛ acá kú uwā.

⁹N má ka aákā ɛnɛ ā gbla īyī uwā. Éyééye kú uwá yɔ̄ pi éyééye kú aódée ɛnɛ ō lɛ acá oōbī wu ā. Aákā ā lɛbɛɛka ɔdā nɛ̄ aákā ɔhá hɛ́ uwā igbó ā.

¹⁰Aákā ā bá ī ceyī bɛ̄ɛka ɔ́tángbédē ā. Ɔnyɔ̄ɔnyɛ kú uwá klla lɛ akā ɔhá nēe hɛ́ uwá igbó áklō.

¹¹Eko dúúmā nɛ̄ aódée ā gē yɛ, uwá í gē pīyeyī ɛ́ɛ́ nēé gē yɛ ga ābɔ dóódu nōo hi uwá ɔtū ā ŋ́. Ābɔ̄ dóódu nɛ̄ e tíne ō nyɔ é gē nyɔ tɔɔhá, í cɛgbá ō pīyeyī ga ābɔ dúúmā ŋ́.

¹²Ikpēyī klá uwá iyē, igbīhi, abɔ̄ acá, mɛ́mla akā kú uwá ā.

¹³Aákā nēe bá nyā wɛ ɛdɔ éékpó mla ɛ̄nɛ̄ n má bá ipú ɛbɛ aflɛ́yi kú um ā.

¹⁴Ɔnyɔ̄ɔnyɛ kú aɔ́dée ā lɛ eyī ɛnɛ. Éyi wɛ eyī kú ɔ̄cɛ, ɔ́mpa wɛ eyī kú ɛna, ɔ́mɛtá wɛ eyī kú ágábá, ɔ́mɛnɛ kē wɛ eyī kú okpé.

¹⁵Uwá wɛ aódée pií nɛ̄ n má okónu ísu kú Ucɛ́ba aflɛ́yí ā á. Eko dúúmā nɛ̄ aɔ́dée nyā le fu ŋmá ajɛ ga ipú owu, gē yɛ

¹⁶aákā ā gē fu mla uwá. Eko dúúmā nēé lɛ acá nāńdaa ge wu nɛɛ, akā a gē yɛ mla uwá.

¹⁷Eko nēé māháyi, aákā ā kē māháyi. Eko nēé le wu, aákā ā kē ī yɛ mla uwá. Ohígbū ka aódée ā ī bī aákā ā yúklɔ́ á.

¹⁸Anɔ́ɔ ofíyáajɛ kú ɛgahi nɛ̄hi kú Óndú ā nyɛ̄ɛ̄ ŋmá okónpīinu kú Agblīihɔ-nɛ̄hi ga ɛhícō kú aodée ɛnɛ o yēeyī nēe lɛ acá oōbī wu ā.

¹⁹É kwú acá kú uwá ú nāńdaa kwu wu ŋmá ajɛ, abɔ̄ n yɔ̄ ī má uwā ā, aákā ā kē nyɔ mɛ́mla uwá dúú. É māháyi kpiíí ɔwɛ kú ɛnɔ̄ɔ̄cī kú Agblīihɔ-nɛ̄hi ā, ofíyáajɛ kú ɛgahi nɛ̄hi kú Óndú ā yɔ̄ ɛhícō kú uwā.

²⁰N má ka a ódée nyā wɛ odée ōlɛ acá oōbī wu pií nɛ̄ n má ɛháajɛ kú Ɔwɔicō kú Ísrɛ̄lu, okónu ísu kú Ucɛ́ba ā á.

²¹Ɔnyɔ̄ɔnyɛ kú uwā lɛ eyī ɛnɛ, acá ɛnɛ, mɛ́mla ɔdā nēe lɛbɛ̄ɛka abɔ̄ kú ɔ̄cɛ ā ɛháajɛ éyééyé acá kú uwá.

²²Eyī kú uwá wɛ eyī ékpónú mla ɛ̄nɛ̄ n má okónu ísu kú Ucɛ́ba ā. Ɔnyɔ̄ɔnyɛ kú odée ā le yɛ kpaakpa nyɔ̄ ɔbū.