Read idoma ISÍKƐ̄LU 11 Bible Online

ISÍKƐ̄LU 11 - idoma bible

ISÍKƐ̄LU 11

¹Anɔ́ɔ Alelékwū kú Óndú ā kwú um ú ŋmá abɔ́ɔ ga ɛgiyí ɔwɛ kú ɛnɔ̄ɔ̄cī kú Agblīihɔ-nɛ̄hi ā. Abɔ́ɔ ā, n má ācɛ ofu cɛ̄hɔ̄ nɛ̄ Ujaananáya, ɔyí kú Ássɔ mɛ́mla Upetaláya, ɔyí kú Ubenaíya, nēe wɛ aótrɛyí kú éwo ā, wɛ ipú uwā.

²Anɔ́ɔ Ɔwɔicō da um kahíníī, “Ācɛ nēe bá nyā gē yá ojuju obɔ̄bí klla ī nwū ācɛ igelī nyā ɔdōbɔ̄bí á.

³É gē ka ka, ‘Alɔ klla í gbɔɔ́ ō gwó ɔlɛ́ igbɔhá ānāānā. Igelī nyā lɛbɛ̄ɛka ɛ̄hī nɛ̄ é le ce ɔlá ā, alɔ kē lɛbɛ̄ɛka ɛbɛ́ nēé kpó tū ɔ̄. Amáŋ nááná ó kē cɛ̄ lɛ ɔlá ā fu alɔ ŋ́.’

⁴Ohígbū ɔ́ɔmā, ɔlɛcɛ, ka ɛbɛ obɔbí tɛ́ɛcɛ lɛyíkwu uwá. Ka ɛbɛ obɔbí tɛ́ɛcɛ lɛyíkwu uwá.”

⁵Alelékwū kú Óndú ā kwú um, anɔ́ɔ Óndú ā da um ka ami ɔ́ɔ lɛ ɛhɔ̄ nyā cɛ̄ lɛ uwá kahíníī, “Ācɛ kú Ísrɛ̄lu, n jé ɔdā nɛ̄ aá ī ka mɛ́mla ɔdā nɛ̄ aá ī mīyɛ ā.

⁶Aá ŋmó ācɛ igelī ā gbóógbó nɛ̄ odúúdú uláyi le mu mla okwū ɛɛ́.

⁷Ohígbū ɔ́ɔmā, ɛ̄nyā wɛ ɔdā nɛ̄ ami, Óndú ā nōo lɔfú fíyɛ́ dúú a gē ka lɛ aá á. Igelī nyā lɛbɛɛka ɛ̄hī ō yá ɔdōlé gbóó. Amáŋ okwū kú ācɛ nɛ̄ aá ŋmó ā wɛ ɛbɛ́ ā nɛ̄. Ó wɛ aá ŋ́. Ń gáā mā aá tá amānyā ŋ́. N géē tá aá ɛcɔ̄ bɛ̄cɛ ŋmá ipú igelī ā.

⁸Aá gē yúufi ɔkpacaŋgelī. Ācɛ nēe bī ɔkpacaŋgelī ā nɛ̄ n kē gáā kpó wā í kpɛ́fú tá aá á.

⁹N géē kpó aá ŋmá ipú igelī nyā í kpó aá tū ipú abɔ ācɛ aéwɔhá. Cɛ́ɛ́ kéē ē lɛ aá yá ōwē kú ɛpɔ̄bí nɛ̄ n ŋmó aá ā.

¹⁰É géē je aá kpó ŋmó ɔgbɛ́fú ɛfú ipú ajɛ kú aá nyā piíí ā. Cɛ́ɛ́ odúúdú aá le jé kú ami ɔ́ɔ wɛ Óndú ā á.

¹¹Igelī nyā í gáā gbō aá ɛ́gɛ́nɛ̄ ɛ̄hī gē gbō ɛbɛ́ nēe bá ipú nū ā ŋ́. Ɛga dúúmā nɛ̄ aá géē bá ipú ajɛ kú Ísrɛ̄lu ā, n yá aá italā.

¹²Aá géē jé ka ami ɔ́ɔ wɛ Óndú á. ka aá tá ō yá íne kú um klla tá ō lɛyítáajɛ gā um. Ka ikoko ɔ́ɔmā aá yɔ̄ ī yá ucē kú aéwɔhá nēe lā kwu aá ā.”

¹³Eko nɛ̄ n yɔ̄ ī ka ɛbɛ ā tɛ́ɛcɛ ɛɛ́ mā, Upelátīya, ɔyí kú Ubɛnáya ā gekwú wā ajɛ wɔɔlɔ. N má gwutá ajɛ gblugudu lɛ eyī pīya klá ajɛ lɛ íbá dɛ̄ kahíníī, “Eléélelé! Óndú, ā gáā je odúúdú ācɛ nēe hile Ísrɛ̄lu ā kpó ŋmó nɛɛ?”

¹⁴Óndú ā da um ka,

¹⁵“Ɔlɛcɛ, ācɛ nēe lā Ujerúsālɛm ā bá ī kɛlā lɛyíkwu uwɔ mla ācɛ kú Ísrɛ̄lu aɔ́mpa uwɔ nēe bá ipú ajɛ kú ɔfiyɛ, Ubábīlɔn ā. É gē ka ka, ‘Ācɛ nɛ̄ bá ajɛ kú ɔfiyɛ ā le ligbó fíyɛ́ ɔdā nēé ī gbā Óndú ɛgbā. Ó kwú ajɛ nyā ú lɛ alɔ kú ɔ wɛ ákú alɔ ɛɛ́.

¹⁶Ohígbū ɔ́ɔmá le ka lɛ aɔ́mpa uwɔ nēe bá ajɛ kú ɔfiyɛ mla awɔ ā ka, ami wɛ ɔ̄cɛ nōo tū uwā nyɔ̄ ipú ajɛ oligbó ā, klla pa uwá hīla nyɔ̄ ipú aájɛ aéwɔhá á. Nááná ɛplá ɛko nēé gaā bá abɔ́ɔ ā, n géē yɔ̄ mla uwá ipú ajɛ nēé nyɔ̄ ɔ́ɔmā.

¹⁷Le da uwá ka ami, Óndú ā nōo wɛ Ɔwɔicō ā, ka n géē tá uwá bá ŋmá ipú aéwo nɛ̄ n pa uwá hīla nyɔ̄ ā. N klla í je ajɛ kú Ísrɛ̄lu a kwúcē igbīhi lɛ uwá.

¹⁸Eko dúúmā nēé pīyɛyí, é géē kpó odúúdú aójibó kú aɛ́cí nēé gē ma ā bónū.

¹⁹N géē je ɔtū mɛ́mla odo ɛ̄yīpɛ̄ lɛ uwá. N géē je ɔtū kú uwā nōo lɔfu bɛ̄ɛka ɛcɔ̄,ī cɛ lɛ uwā yá īkpɛyí olɔfú ā ŋmá ipú kú uwā. N klla í je ɔtū luwɔluwɔ bɛɛka ɛ́nɛ́bɛ́, nōo ī cɛ lɛ uwā lɛyítáajɛ ā lɛ uwá.

²⁰Cɛ́ɛ́ uwá géē le odúúdú íne kú um a tū, klla í lɛyítáajɛ gā um. Uwá géē wɛ ācɛ ɔlɛ́ um, n kē í wɛ Ɔwɔicō kú uwā.

²¹Amáŋ ācɛ nɛ̄ aójibó otīihilɛ kú aɛ́cí he uwá ɔtū ō gbā ā, n géē je ōwē lɛ uwá. N géē je ōwē kú ɔdā nēé yá ā lɛ uwá. Óndú ā nōo wɛ Ɔwɔicō ā i ka ɛɛ́.”

²²Anɔ́ɔ aɛ́bɛ́ ɛnɛ ā gbɔɔ́ ō wu nyɔ̄ mla aákā kú uwá ā. Ofíyáajɛ kú ɛgahi nɛ̄hi kú Ɔwɔicō kú Ísrɛ̄lu ā klá uwá.

²³Anɔ́ɔ ofíyáajɛ kú ɛgahi nɛ̄hi kú Óndú ā nyɛ̄ɛ̄ ŋmá igelī ā ga ɛyí ɛfú nōo yɔ̄ ɛnɔ̄ɔ̄cī kú nū ā.

²⁴Ipú ɛbɛ kú um ā, alelékwū kú Óndú ā klla kwú um cīgbīhi wā Ubábīlɔn, ɛgiyí ācɛ nɛ̄ bá ajɛ kú ɔfīyɛ̄ ā. Anɔ́ɔ ɛbɛ ā mɛ ŋmá eyī kú um péee á.

²⁵Anɔ́ɔ n le ɔdā dóódu nɛ̄ n má ā ka lɛ odúúdú ācɛ nēe bá ajɛ ɔfiyɛ mɛ́mla um ā á.