Read idoma ISÍKƐ̄LU 12 Bible Online

ISÍKƐ̄LU 12 - idoma bible

ISÍKƐ̄LU 12

¹Óndú ā da um kahíníī,

²“Ɔlɛcɛ, a lā ipú ācɛ ō yá īkpɛ̄yí olɔfú. É lē eyī amáŋ e má ɛbɛ ŋ́, é lɛ ahɔ̄, amáŋ é pó ɛla ŋ́, ohígbū ka é wɛ ācɛ oyá īkpɛ̄yí olɔfú.

³Ó lɛ ā, ɔlɛcɛ, lɛ iyó kú uwɔ gwó ɔlɛ́ɛnɔ bɛɛka ɔ̄cɛ nōo ī ga éwɔhá ā. Cɛ́ɛ́ ká ā gbɔɔ́ ō ga ɛga ɔhá ipéēyī uwā ka é má uwɔ. Eko ōhī, é lɛ īkpɛ̄yí olɔfú náaná ā, e géē jé ɔdā nāa yá nyā.

⁴Ɔlɛ́ɛnɔ péee, lɛ iyó kú uwɔ gwó bɛ̄ɛka ɔcɛ nōo ī nyɔ̄ ajɛ kú ɔfiyɛ ā, cɛ́ɛ́ ká e má uwɔ. Yá ké e má uwɔ ɔnɔ̄nɛ̄ yɔ̄ ī nyɔ̄ bɛ̄ɛka a gē ga ajɛ kú ɔfiyɛ ā.

⁵Abɔ̄ é kpéyī klá uwɔ ā, lɛ ɔdɔ kú inu ɔlɛ́ uwɔ a hɛ́bū, cɛ́ɛ́ ká a lɛ iyó kú uwɔ kpó bū ɔ ga ɛcɛ.

⁶Kwú iyó a u kpó ce ɔkɔ ajɛ odobū ɔ́ɔmā ká a nyɛ̄. Lɛ eyī kú uwɔ gbō cɛ́ɛ́ ka á má ɛga nāa gē nyɔ ā ŋ́. N kwú uwɔ ú yá ɔ̄dōōcābɔ̄ lɛ ācɛ kú Ísrɛ̄lu.”

⁷Anɔ́ɔ n le yá ɛ́gɛ́nɛ̄ Óndú da um ā á. N kwú iyó kú um ú gwó ɔlɛ́ɛnɔ̄ bɛɛka ɔcɛ nōo ī ga ajɛ ɔfiyɛ ā. Ɔ̄nɔ̄nɛ̄ ɔ́ɔmā n bī abɔ̄ kú um lɛ ɔdɔ ā hɛ́bū kwú iyó kú um ú kpó bū ɔ́ ga ɛcɛ klla kwú uwá u kpó ce acá ipéyī uwá.

⁸Ɔ̄cɔ̄ɔcī oŋmɔ́ɔ̄cī nū, Óndú gaá da um ka,

⁹“Ɔlɛcɛ, abɔ ācɛ Ísrɛ̄lu oyíkpɛ̄yí olɔfú ɔ́ɔmā gbɔɔ́ ō da uwɔ ɔ̄kā ɔdā nāa yɔ̄ í yá ā ɛɛ́ mā.

¹⁰Da uwá ka, ‘Ɛ̄nyā wɛ ɛlā nɛ̄ Óndú ā nōo wɛ Ɔwɔicō ā ka á. Olɛhɔ̄ nyā wɛ ákú ɔcɛ́ kú Ujerúsālɛm, mɛ́mla odúúdú ācɛ Ísrɛ̄lu nɛ̄ ē bá abɔ́ɔ ā.

¹¹Da uwá ka anúɔ wɛ ɔdōōcābɔ̄ lɛ uwā. Ka ɛ́gɛ́nɛ̄ anúɔ ɔ́ɔ yá ā, ɛ́gɔ́ɔmā nēé gáā yá aá dúú á. Ká ē géē ga ajɛ kú ɔfiyɛ, é kē í kwú uwā.

¹²Ɔcɛ́ nōo ī gbō uwā ā géē kpó iyó kú nū ce ɔkɔ ajɛ odobū, klla í kwu bū ɔ̄gɔ̄ nēé géē bū tá ɔdɔ lɛ ɔ́ ā. Ó géē gbō eyī kú nū cɛ́ɛ́ ka ó má ajɛ ā gɛ ŋ́.

¹³N géē tá ɛ́yá kú um klá ɔ́, klla í kwú ɔ̄. N géē bī ɔ̄ ga Ubábīlɔn, ipú ajɛ kú ācɛ Ucaldīyān. Abɔ́ɔ nɛ̄ ó í kwú ā, amáŋ ó gáā má ɔ̄ ŋ́.

¹⁴N gē fíyá odúúdú ācɛ nēe bá pī ɔɔ ā ákátā ga ɛbɛɛbɛ. Kwu aígab kú nū, ācɛ o nwū ɔ̄ ɛlā mɛ́mla aícɔ́ɔja nēe gē gbō ɔ ɛyí ā. N klla í fu ācɛ kwu uwá kéē tíne uwā kéē ŋmó uwā.

¹⁵Eko dúúmā nɛ̄ n kwú uwā ú kpó pahīla ga ipú aéwɔhá, uwá géē jé ka ami ɔ́ɔ wɛ Óndú ā á.

¹⁶Amáŋ N géē nya ācɛ ōhī kú uwā lígíi ŋmá ɔkpɛtā, ɛfú mɛ́mla ōcē obɔ̄bī ā. Cɛ́ɛ́ ipú aéwo dóódu nēé géē nyɔ̄ í bá ā, é géē lɛ okónu cē aúcē obɔ̄bí nēé yá ā. Eko ɔ́ɔmá uwá géē jé ka ami ɔ́ɔ wɛ Óndú ā á.”

¹⁷Óndú ā gáā da um kahíníī,

¹⁸“Ɔlɛcɛ, fīyégbúlú, abɔ̄ a géē yɔ̄ i lé ɔdōlé ā, ká ā yɔ̄ ī fīyɛ kpákpákpá ohígbū ufi, abɔ̄ a géē yɔ̄ ī gwá éŋkpɔ̄ ā.

¹⁹Le ka lɛ odúúdú ācɛ kú Ísrɛlu kahíníī, “Ɛ̄nyā wɛ ɔdā nɛ̄ Óndú ā nōo wɛ Ɔwɔicō ā ka lɛyíkwu ācɛ nɛ̄ ē lā Ujerúsālɛm ipú ajɛ kú ācɛ Ísrɛ̄lu á. Uwá géē le ɔdōlé kú uwá ipú ɔtū ō hɛ́ko, klla í gwá éŋkpɔ̄ apīicē. É géē je odúúdú ajɛ kú uwá yíífi tá áncā ohígbū ucē ɔnɔɔtū kú odúúdú ācɛ nēe bá abɔ́ɔ ā.

²⁰Aígelī nɛ̄ ācɛ lā anú lɛwa ā géē je tá alácɛ̄ áncā. Eko ɔ́ɔmā, é géē jé ka ami ɔ́ɔ wɛ Óndú ā á.”

²¹Óndú ā klla gaá da um kahíníī,

²²“Ɔlɛcɛ, ɔdí wɛ ita nyā, nɛ̄ ācɛ Ísrɛlu gē kwu ā ka, ‘Eko yɔ̄ ī yɛ, ɛbɛ nēé má ā kē yɔ̄ ī je pīya áncā?”

²³Le da uwá ka, ami, Óndú ā nōo wɛ Ɔwɔicō ā ká n géē ŋmó ita ɔ́ɔmā ɛyí. Ɔ̄cɛ dúúmā í kē gáā kwu ita ɔ́ɔmā Ísrɛ̄lu gɛ ŋ́. Amáŋ le ka lɛ uwá ka eko ā gā ɛɛ́ nɛ̄ ɛbɛ dóódu nēé má ā géē cɛ̄.

²⁴Ohígbū ka ɛbɛ oōmá ɛ̄kɛ̄mgbɛ̄ mla abajá ō pllá ācɛ ō má í gáā yɔ̄ ipú ajɛ kú Ísrɛ̄lu gɛ ŋ́.

²⁵Amáŋ ami, Óndú ā, géē ka ɔdā nɛ̄ n tíne ā. Ó kē í yá ɛ́gɛ́nɛ n ka ā bōōbū. Ó lɛ eko ō kpó bónū gɛ ŋ. Da ācɛ o yíkpɛ̄yí olɔfú ɔ́ɔmā ka eko kú uwā nēé yēeyī nyā, ɔdā dóódu nɛ̄ ami Óndú ā nōo wɛ Ɔwɔicō ā ka ā, n géē yá ɔ̄.” Abɔ̄ ami Óndú ā ka lɛ á.

²⁶Óndú ā kɛlā gā um igbɔhá kahíníī,

²⁷“Ɔlɛcɛ, ācɛ Ísrɛ̄lu bá gē ka ka ɛbɛ nāa gē má ā mɛ́mla olɛhɔ̄ nāa gē ka tɛ́ɛcɛ ā lɛyíkwu iháyí alɛwa nōo gē wā ā.

²⁸Ohígbū ɔ́ɔmā le da uwá ka ami, Óndú ā nōo wɛ Ɔwɔicō ā kɛlā kú um dúúmā í gáā gbojī ɛ́ɛ́ ká o yá gɛ ŋ́. Ɔdā dúúmā nɛ̄ n ka ā géē yá jīla piíí. Ami, Óndú nōo wɛ Ɔwɔicō ā le kā ɛɛ́.”