Read idoma ISÍKƐ̄LU 13 Bible Online

ISÍKƐ̄LU 13 - idoma bible

ISÍKƐ̄LU 13

¹Óndú da um kahíníī,

²“Ɔlɛcɛ, ka ɛbɛ obɔbí tɛ́ɛcɛ lɛyíkwu ācomɛ́ɛbɛ kú Ísrɛlu nēe bá ī kɛlā kú odo mɛ́mla ɛlá ōgbo kú ɔtū kú uwā áncā ka aá gē mɛ́ɛbɛ ā. Da uwá kéē pó ɛlā nɛ̄ ami, nōo wɛ Óndú ā ka ā.

³Ami, Óndú ā nōo wɛ Ɔwɔicō ā ka ācomɛ́ɛbɛ olíla nēé má ɔdā dúúmā ŋ, amáŋ yɔ̄ ī ka ákú odo kú uwā ā le jí ɛɛ́.

⁴Ācɛ Ísrɛ̄lu, ācomɛ́ɛbɛ kú aá ā lɛbɛ̄ɛka ɔgwú nōo lā ipú alácɛ̄ ā.

⁵É gē gbō ɛga nɛ̄ ɔdɔ nēé ī cē igá tū igelī ā ca ā ŋ́. Ɛ́ɛ́ nēé ī nyɔ̄ gáā tá ɔdɔ ā gwó ŋ́. Ohígbū ɔ́ɔmā Ísrɛlu í tōō gbō eko kú ɛfú nōo ī wā ɛcī nɛ̄ um gē kɛpɔ̄ tū ācɛ ā ŋ́.

⁶Ɛbɛ ōmá mla ɛbā ōgwó kú uwā ā wɛ áncā mla ɛ̄kɛ̄mgbɛ̄. Uwá gē ka ka aá ɔ́ɔ bá ī cɛ̄ olɛhɔ kú um, nɛ̄ ń tū uwā ɛhɔ̄ dúúmā ŋ́ mā. Náaná é gē kpéyīce ka ɛlā kú aá ɔ́ɔmā ɔ́ɔ géē cɛ̄ kpɔ́.

⁷N da uwā kahíníī, “Ɛ́bɛ ɛ̄kɛ̄mgbɛ̄ nɛ̄ aá gē má á. Ɛbā ɛ̄kɛ̄mgbɛ̄ nɛ̄ aá klla ī gwó ā. Aá géē ka ka ɛlā kú um nɛ, amáŋ ń kɛlā dúúmā lɛ aá ŋ́.”

⁸Ohígbū ɔ́ɔmá, ami Óndú ā, nōo wɛ Ɔwɔicō ā ka, abɔ̄ a gē kɛlā ɛ̄kɛ̄mgbɛ̄ klla ī mɛ́ɛbɛ ŋ́kɛ̄mgbɛ̄ ā, n kwú ɛyí bú kwu aá ɛɛ́.

⁹Aá, ācomɛ́ɛbɛ nēe gē mɛ́ɛbɛ ɛ̄kɛ̄mgbɛ̄ klla ī gwɛ́bā ɛ̄kɛ̄mgbɛ̄ ā, n géē yá ɛlā nɛhi. Aá klla gáā wɛ ojīleyī kú ācɛ ɔlɛ́ um ɛɛ́, nēe géē tá iyē kú aá tū ipú aíyē kú ācɛ kú Ísrɛ̄lu gɛ ŋ́. Aá kē gáā kwūcē ga ipú ajɛ kú Ísrɛ̄lu gbóógbóō ɛ́ɛ́ gɛ ŋ́. Eko ɔ́ɔmā, aá géē jé ka ami Óndú ā, ɔ́ɔ wɛ Ɔwɔicō á.”

¹⁰Ācomɛ́ɛbɛ ɔ́ɔmā gē kpó ācɛ ɔlɛ́ um nyíleyī. É géē da uwá ka ɛbɔ́ ɔ́ɔ yɔ̄, nááná nɛ̄ ɛbɔ́ í kē yɔ̄ ŋ́ mā. Ucē kú uwā nyā lɛbɛɛka ɔdā nɛ̄ ācɛ ɔlɛ́ um lɛ ɔdɔ nɛ̄ ó lɔfú ŋ́ gwó, anɔ́ɔ ācomɛ́ɛbɛ ā lɛ áfū nɛ̄hɛ́ kpó pllá anú kóō bī ɔ̄ háyi.

¹¹Le da ācɛ ɔ́ɔmā nēe kpó áfū plla ɔdɔ ā ka ɔdɔ ā géē catāajɛ. Ɔwɔ nɛhi géē wúla, ɛcɔ̄ɔwɔ yā í klá ɔ́, owu nɛ̄hi kē í tá klá anú.

¹²Eko dúúmā nɛ̄ ɔdɔ ā kwú wúla wāajɛ, ācɛ géē da uwɔ ɔ̄kā ka ɔdí ɔ́ɔ wɛ itene kú áfū nāa kpó plla anú āa?”

¹³Ohígbū ɔ́ɔmā, Óndú ā nōo wɛ Ɔwɔicō ā ka anúɔ géē tū owu nɛ̄hi, ɔwɔ nɛ̄hi mla ɛcɔ̄ɔwɔ wā í klá ɔdɔ ā, í je ɔ́ ca tāajɛ.

¹⁴Ó ka anúɔ géē ca ɔdɔ nēé lɛ áfū nɛ̄hɛ́ nyā ɔ́ ɔ́ɔmā, í je ɔ́ wúla tāajɛ, klla í je ɔ́ pahīla ka aɛ́cɔ̄ kú etikpa kú nū ká e gaá tɛ́ɛcɛ áncā. Ka ɔdɔ ā géē je wúla klá uwá, í je odúúdú uwā kpó ŋmó. Cɛ́ɛ́ ācɛ dóódu le jé ka anúɔ ɔ́ɔ wɛ Óndú ā á.

¹⁵Ó ka ɔwɛ ɔ́ɔmā nɛ̄ anúɔ géē cɔ̄nū í yá ɔdɔ ā mɛ́mla ācɛ nēe lɛ áfū nya ɔdɔ ā ɛlā. Ka anúɔ géē da uwɔ ka ɔdɔ ā mla ācɛ nēe lɛ áfū nya ɔ́ ā le pɛ́ le yɛ ɛɛ́.

¹⁶ācɛ nēe lɛ áfū nya ɔdɔ ā ɔ́ɔmā ɔ́ɔ wɛ ācomɛ́ɛbɛ nēe gē da ācɛ Ísrɛ̄lu ka ɛbɔ́ ɔ́ɔ yɔ̄, eko nɛ̄ ɛbɔ́ dúúmā í yɔ̄ ŋ́ mā. Ka Óndú ā nōo wɛ Ɔwɔicō ā i ka ɛɛ́.”

¹⁷Isíkēlu ka Óndú ā da anúɔ kahíníī, “Ɔlɛcɛ, lɛ eyī hɛ́tū ācɛnyā kú ipú ācɛ ɔlɛ́ uwɔ nɛ̄ ē gē mɛ́ɛbɛ ɛ̄kɛ̄mgbɛ̄ ā. Ka ɛbɛ obɔbí tɛ́ɛcɛ lɛyíkwu uwá.

¹⁸Da uwá ɔdā nɛ̄ ami, Óndú ā, nōo wɛ Ɔwɔicō ā gē da uwá ā. Ó ka ɔ́ɔ ka anúɔ da uwá kahíníī, “Ācɛnyā, ohóō lɛ aá, ákú aá mɛ ɛɛ́. Aá lɛ ɔdā imabɔ̄ ole wabɔ yá lɛ odúúdú ācɛ, klla lɛ adíko kú imabɔ̄ gɔ̄ lɛ odúúdú ācɛ ka ē le gbō ɛyí, o yá kéē lɔfú lɛyíkwu oyēeyī kú ācɛ ɔhá. Aá tíne ka aá lɛ ɔfú kú oyēeyī mla ikwū lɛyíkwu ācɛ ɔlɛ́ um, cɛ́ɛ́ ka aá bī ɔ́ le yá ɔdā dúúmā nēe he aá ɔtū kú itene kú aá.

¹⁹Aá gē jé uwēyī gā um īyɔ̄bū ācɛ ɔlɛ́ um, cɛ́ɛ́ ka é je umu lígíí mla igbō lígíí lɛ aá. Aá bī ɛ̄kɛ̄mgbɛ̄ nɛ̄ aá ī ka lɛ ācɛ ɔlɛ́ um ā bá ī le ŋmó ācɛ nēé cíkā ō kwú ŋ́ mā, kē gē habɔ̄ ācɛ nēé cíkā ō yēeyī ŋ́ mā tá kéē yēeyī, ohígbū ká uwá kē ī cɛɛlā kú aá.”

²⁰Ó klla ka ohígbū ɔ́ɔmā, Óndú ā nōo Ɔwɔicō ɔ́ɔ ka ɔtū ɔ́ɔ le wú anúɔ lɛyíkwu ɔdā nɛ̄ aá le bá abɔ̄ ká aá lɛ ɔfú ŋmó klla le oyēeyī tū glá. Ka anúɔ géē kpó aɔ́dā ɔ́ɔmā wī ŋmá uwā abɔ̄, klla ī hɛ́ ācɛ nɛ̄ uwá kwú klla lɛ ɔfú lɛyíkwu uwá ā tá ŋmá abɔ̄ kú uwā.

²¹Ka anúɔ géē kpó adíko imabɔ̄? Kú uwā fu ŋmá uwá ɛyí, klla ī cɛ̄ lɛ ācɛ ɔlɛ anúɔ je kpó hɛ́tá ŋmá abɔ̄ uwā piyóó. Ka eko ɔ́ɔmā ɛ́ɛ géē jé ka ami ɔ́ɔ wɛ Óndú ā á.

²²Ka ɛ́ɛ bī ɛ̄kɛ̄mgbɛ̄ kú uwā gē je ɔtū kú ācɛ okpaakpa nɛ̄ anúɔ í tíne ō bīya uwā ɔtū ŋ́ mā ā gbenyi. Ɛ́ɛ kē ī lɛ ɔfú tū ācobɔ̄bíipú ā iyē nɛ̄ ō ī yá ká e híī pīyabɔ ŋmá ucē obɔ̄bí kú uwá ŋ mā ā.

²³Ohígbū ɔ́ɔmā ɛbɛ ɛ̄kɛ̄mgbɛ̄ ōmá, mɛ́mla ɛbā ō kpó ācɛ nyíleyī kú aá ɔ́ɔmā mɛ ɛɛ́. N géē hɛ́ ācɛ ɔlɛ́ um tá ŋmá abɔ̄ aá, cɛ́ɛ́ kú aá le jé ka ami ɔ́ɔ wɛ Óndú ā á.”