Read idoma ISÍKƐ̄LU 14 Bible Online

ISÍKƐ̄LU 14 - idoma bible

ISÍKƐ̄LU 14

¹Ɛcī éyi, ami nōo wɛ Isíkēlu ā, yājɛ ɔlɛ́ um. Anɔ́ɔ ācɛ ōhī ipú anyākwɔ́cɛ kú Ísrɛ̄lu ā wā gaá yājɛ iyɔbū um gē tíne ō jé olekwu kú Óndú ā á.

²Anɔ́ɔ Óndú da um kahínī,

³“Ɔlɛcɛ̄, ācɛ nēe bá nyā kwú ɔtū kú uwá ú lɛ ɛcí ɛɛ́, bá ī cɛ̄ lɛ aójībó kú uwā ī yá ká ɛ́ɛ̄ bɔbíipú tōōtɔɔ. Uwá gbɛlá ka ami ɔ́ɔ géē tá aá ohi nɛɛ?

⁴Kɛlā lɛ uwá ká ā da uwá ɔdā nɛ̄ ami, Óndú ā nōo wɛ Ɔwɔicō ā géē ka lɛ uwá ā. Ka ɔ̄cɛ kú Ísrɛ̄lu dóódu nōo kwú ɔtū kú nū ú lɛ ɛcí, ī cɛ̄ lɛ aójībó ā ī yá ká ɔ̄ bɔbíipú tōōtɔɔ, lɔfú wā í da ɔ̄comɛ́ɛbɛ kú um ɔ̄kā lɛyíkwu olekwu kú um. Amáŋ ami abɔ̄yī um géē tá ɔ̄ ohi nōo cíkā lɛ aójībó kú nū ā.

⁵Aójībó kú ɛcí ɔ́ɔmā kwú odúúdú ācɛ kú Ísrɛ̄lu í kpó pīyeyī ŋmá ɛgiyí um ɛɛ́. Amáŋ n gbɛlá ō bī ohi kú um ā le pīya uwá ɛyí wā ɛgiyí um.

⁶Ohígbū ɔ́ɔmā, le ka lɛ ācɛ Ísrɛ̄lu ka ami, Óndú ā nōo wɛ Ɔwɔicō ā, ɔ́ɔ ka ɛ́ɛ le pīyabɔ̄. Ká ɛ̄ kwúcē ŋmá ipú ɛ̄cī ōpá kú uwā, ká ɛ̄ klla lɛ eyī pīya ŋmá ɛgiyí aójībó otīihilɛ kú uwā ɔ́ɔmā.”

⁷Óndú ā klla da um ka n̄ da uwá ka, eko ōhī ɔ̄cɛ Ísrɛ̄lu dúúmā, amáŋ ka ɔ̄cɛ éwɔhá dúúmā nēe lā ipú ācɛ Ísrɛ̄lu, lɔfú mā ō gbā um tá, gaá kwú ɔtū kú nū ú lɛ ɛcí, ī cɛ̄ lɛ aójībó ā ī yá ká ɔ́ bɔbíipú tōōtɔɔ. Ka ɔ́dāŋ nɛ̄ ɔ̄cɛ ɛ́gɔ́ɔmā klla gaá lɛ ɔ̄kā da ɔ̄comɛ́ɛbɛ ká ō pó ɛlā ŋmá ɛgiyí anúɔ, Óndú ā ka anúɔ géē ta ɔ̄ ohi abɔ̄yī anúɔ á.

⁸Ó ka anúɔ géē nuunu tá ɔ̄cɛ ɔ́ɔmā, klla ī je ɔ́ yá ɔdōcābɔ̄, klla í je ɔ́ ŋmá ipú ācɛ ɔlɛ́ anúɔ ā, cɛ́ɛ́ ka ɛ́ɛ̄ jé ka anúɔ ɔ́ɔ wɛ Óndú ā á.

⁹Óndú ā klla ka ɔ́dāŋ́ ka é lɛ ɔ̄comɛ́ɛbɛ ā plla, nōo lɛ ohi nōo wɛ ɛ̄kɛ̄mgbɛ̄ tá nɛɛ, ayíka anúɔ nōo wɛ Óndú ā, ɔ́ɔ plá ɔ̄comɛ́ɛbɛ ā je ohi ɔ́ɔmā á. Anúɔ kē géē je ɔ́ ŋmá ipú ācɛ Ísrɛ̄lu.

¹⁰Ó ka italā nɛ̄ anúɔ géē yá ɔ̄comɛ́ɛbɛ ā mɛ́mla ɔ̄cɛ nɔ́ɔ wā í da ɔ́ ɔ̄kā ā ɔ́ɔ géē wɛ ɔdā éékpónú.

¹¹Óndú ā ka anúɔ géē yá ɛ̄nyā cɛ́ɛ́ ká anúɔ lɛ ācɛ Ísrɛ̄lu kwú tū ŋmá ō kwu hɛ̄ anúɔ tá, mɛ́mla ō je īyī uwā iyē tēelihɔ mla ɔbíipú kú uwá ā. Cɛ́ɛ́ ká uwá ká ɛ̄ wɛ ācɛ ɔlɛ́ anúɔ, ka anúɔ kē wɛ Ɔwɔicō kú uwá. Óndú nōo lɔfú fíyɛ́ dúú ā lɛ ɛlā ka ɛɛ́.

¹²Óndú ā klla lɛ ɛlā ka gā um igbɔhá.

¹³Ó kahíníī, “Ɔlɛcɛ, ɔ́dāŋ́ ka éwo dúúmā lɛ ɔbíipí bī, nēé yɛce um kpaakpa ŋ́, n géē na abɔ̄ kú um daa gáā je ɔdōlé kú uwá kpó yíífi. N géē tū ɔkpɛtā klla uwá klla í je ācɛ ā mɛ́mla aɛ́bɛ́ dóódu ā kpó ŋmó.

¹⁴Ɔ́dāŋ́ ka Unówa, Udánīyɛlu, mɛ́mla Ujóbu lā abɔ́ɔ nááná, oyēeyī kú abɔ̄yī uwā ofōōfūnū, nɛ̄ olɔhi kú uwā gáā nyā tá á.” Óndú ā nōo lɔfú fíyɛ́ dúú ā le ka ɛɛ́.

¹⁵Óndú ā klla ka anúɔ lɔfú lɛ aɛ́bɛ́ obɔ̄bí tɛ̄hɔ̄ gáā bá ī ŋmó ācɛ ā, klla kwú ajɛ ā ú pīya ɛga otūufi nɛ̄ ɔ̄cɛ dúúmā í gáā lɛ ɔtū yɛ anú ŋ́.

¹⁶Ɔ́dāŋ́ ka ācɛ ɛtá ɔ́ɔmā lā abɔ́ɔ nááná, ɛ́gɛ́nɛ̄ anúɔ, Óndú ā nōo wɛ Ɔwɔicō, ɔ́ɔ yēeyī ā, uwá í gáā lɔfú dúúmā nyā ayí nɔ̄nyīlɔ amáŋ ayí nɔ̄nya kú abɔ̄yī uwā tá glá ŋ́. Oyēeyī kú uwá ofōōfūnū nɛ́ɛ gaá nyatá glá á, amáŋ odúúdú ajɛ ā géē je pīya alácɛ̄.

¹⁷Ó ka anúɔ ɔ́ɔ lɔfú bī ɛfú wā í kpó ācɛ ā mɛ́mla odúúdú aɛ́bɛ́ ŋmó bónū.

¹⁸Ka ɔ́dāŋ́ ka ācɛ ɛtá ɔ́ɔmā ɔ́ɔ lā abɔ́ɔ náaná, ɛ́gɛ́nɛ̄ anúɔ, Óndú ā nōo wɛ Ɔwɔicō ā, ɔ́ɔ ā yēeyī ā, ɛ́ɛ gáā nyā ayí abɔ̄yī uwā tá glá ŋ́, ayíka īyī uwá ofōōfūnū.

¹⁹Ó klla ka anúɔ lɔfú lɛ ōcē obɔ̄bí tū klá éwo ɔ́ɔma yɔ̄ ī kpó ācɛ ā mɛ́mla odúúdú aɛ́bɛ́ ŋmó.

²⁰Ka ɔ́dāŋ́ ka Unówa, Udánīyɛlu mɛ́mla Ujóbu lā abɔ́ɔ nááná, ɛ́gɛ́nɛ̄ anúɔ, Óndú ā nōo wɛ Ɔwɔicō ā, ɔ́ɔ yēeyī ā ɛ́ɛ́ gáā nyā ayí abɔ̄yī uwá tá glá ŋ́. Ka olɔhi kú uwá ɔ́ɔ géē nya oyēeyī kú iyī uwá tá ofōōfūnū.”

²¹Ɛ̄nyā wɛ ɔdā nɛ̄ Óndú ā nōo wɛ Ɔwɔicō ā, gē ka á. “Ó ka anúɔ géē tū italā obɔ̄bí nɛ̄hi ɛnɛ kú anúɔ nēe wɛ ɛfú, ɔkpɛtā, aɛ́bɛ́ obɔ̄bí, mɛ́mla ōcē obɔ̄bí ā, gaá klá ācɛ Ujerúsālɛm, géē wā í je odúúdú ācɛ mɛ́mla aɛ́bɛ́ kú Ujerúsālɛm kpó yíífi tɔ̄há.

²²Ka ɔ́dāŋ́ ka ɔ̄cɛ dúúmā nōo hile, klla lɛ ayí nū nyatá, Óndú ā ká ɛ́ɛ má uwá eko nēé gā ɛgiyí uwā. Ɛ́ɛ géē má ɛ́gɛ́nɛ̄ ucē kú uwá ɔ́ɔ bɔ̄bí lɛ a, cɛ́ɛ́ ɛ́ɛ géē ma ka italā nɛ̄ anúɔ bī wā í klá ācɛ Ujerúsālɛm ā le kpaakpa.

²³Ó ka eko ɔ́ɔmā ɛ́ɛ géē jé ká ɔ́ɔ lɛ ɔdā nōo yá ɛ́ɛ́ nɛ̄ anúɔ yá ɔdā dóódu nɛ̄ anúɔ yá ā. Óndú ā nōo lɔfú fíyɛ́ dúú ā lɛ ɛlā ka ɛɛ́.