Read idoma ISÍKƐ̄LU 16 Bible Online

ISÍKƐ̄LU 16 - idoma bible

ISÍKƐ̄LU 16

²Ó kahíníí, “Ɔlɛcɛ, le aúcē ɛbí nɛ̄hi nɛ̄ Ujerúsālɛm yá ā mafú lɛ ɔ́.

³Le ka lɛ Ujerúsālɛm, ɔdā nɛ̄ ami, Óndú ā nōo wɛ Ɔwɔicō ā gē ka lɛ ɔ́ ā. Da ɔ́ ka, ‘É ma uwɔ ipú ajɛ kú Ukénan. Ádā uwɔ wɛ ɔ̄cɛ kú Ámɔn, ɛ́nɛ́ uwɔ kē wɛ ɔ̄cɛ kú Uhɛ́ti.

⁴Eko nēé ma uwɔ ā, ɔ̄cɛ dúúmā í hɛ́ uwɔ údūlō ɛ́ɛ́ nēé gé gwá uwɔ iyē, lɛ ɔmā nya uwɔ iyē, ɛ́ɛ́ nēé kōō ī pīya īlī klá uwɔ iye ŋ́.

⁵Ɔ̄cɛ dúúmā í má eyīnyinyi kú uwɔ jɛ̄, nɛ̄ ó gē yá ɔdā dúúmā nēe bá nyā ga uwɔ ŋ́. Eko nēe ma uwɔ á, he ɔ̄cɛ dúúmā ɔtū ŋ́, é kwú uwɔ ú tá tónū ɛcɛ ipácí.

⁶Anɔ́ɔ n wā gáā yɛ, lɛ uwɔ má yɔ̄ ī nyā ipú oyī kú uwɔ nōo klá uwɔ iyē cɛkpɛɛ ā. Amáŋ, ń cɛ̄ gā uwɔ kwú ŋ́. N da uwɔ ka ā yēeyī.

⁷N yá ká a le jɛ̄ gām bɛ̄ɛka ɔcí nōo lɔfú iyē ā. A kwú jɛ̄ licō klla lɔfú bɛ̄ɛka ɔyípɔ́ncɛ̄nyā nōo lɔhi nɛ̄hi ā. A le yá bɛ̄ɛka ɔyípɔ́ncɛnyā nōo lɛ amɛ̄ tū gwɛɛ́ gwɛɛ́ klla lɛ īnyīlɛ́yí bū nɛ̄hi ā, amáŋ a tá ohɛ́ɛwa nōbí nōbí.

⁸Abɔ̄ n wā í yɛ igbɔhá ā, n má ka, eko ga ga uwɔ nāa le jɛ̄ ō lɛ ɔbá ɛɛ́. N kwú īlī kú um ú pīya klá iyē kú uwɔ nōo tá ohɛ́ɛwa ā. N lɛ okónu ce gā uwɔ ka n géē yɔ̄ ī yíihɔtū tá uwɔ. Anɔ́ɔ n le okónu kú ɔbá mla ɔnya ce mla uwɔ, anɔ́ɔ a kwú pīya ɔnyā um á.” Abɔ̄ Óndú ā nōo wɛ Ɔwɔicō ā ka lɛ á.

⁹Anɔ́ɔ n lɛ̄ éŋkpɔ̄ hɛ́ lɛ oyī ā na ŋmá uwɔ iyē, lɛ anɔ̄ kú ɔcí nɛ̄ é hī ólīfu ā kpó nyā uwɔ iyē á.

¹⁰N le uwɔ yá ifa mla īlī nēé he ijā tū ɔ, lɛ áblákpá kpó wu uwɔ ikpó klla lɛ adíko ɛ́nɛ́nɛ̄ mla uwé usílíki kpó gā uwɔ.

¹¹N lɛ aɛ́cɛ, aɔ́ká ōtū abɔ̄ mla agbá ōtū ɔkɔ kpó tū uwɔ iyē.

¹²N kwú ɔdā opla ɛnwū mla ɔdā opla ahɔ̄ í kpó gā uwɔ, klla kwú ɔfulā ohɛ́yīfuú ú klá uwɔ ɛyí.

¹³A lɛ ɔtángbédē kú ugóolu (oje ɔdɔ) mɛ́mla oje nɛ̄hɛ́ klla ī lɛ īlī ohéyīfuú nēé lɛ ifa yá tū ɔ̄ɔ̄ alɛwa ōtū eko dóódu. A gē lé igbō ɛ́nɛ́nɛ̄, klla lɛ ɛnwú, mɛ́mla anɔ̄ ɔcí nɛ̄ é hī ólīfu ā ō lé. Á kwú jɛ̄ ɔ́ncɛ̄nyā héyīfuú nɛ̄hi, klla kwú pīya ɔ̄cányā.

¹⁴Ohígbū ɔhi nɛ̄hi kú uwɔ ā, odúúdú aéwo bá ī pó ofu uwɔ. Ohígbū ka ami wɛ ɔ̄cɛ nōo yá uwɔ jɛ̄ ɔ́ncɛ́nyā nyā á. “Abɔ̄ Óndú ā ka lɛ á.

¹⁵Óndú ā klla ka gɔbū lɛ ācɛ Ujerúsālɛm kahíníí, “Amáŋ a lɛ abɔ̄ bá ɔhi mla ɔ́ncɛ́nyā nāa jɛ̄ nɛ̄hi nyā gē cɛ̄ ɔ̄cɛ dúúmā nōo tíne ō kwú uwɔ ɔya ká ō cikpó uwɔ.

¹⁶A lɛ ōhī kú aílī kú uwɔ ā kpó le yá aíkpɛ́cí kú uwɔ ifa. Bɛ̄ɛka akwuna ā, a ī cɛ̄ ī gwutá mla ɔ̄cɛ dóódu nōo wā.

¹⁷A kwú ije nɛ̄hɛ́ mɛ́mla ugóolu (oje ɔdɔ) nɛ̄ n kpó gā uwɔ ā í kpó ma aójībó kú ācɛnyīlɔ, klla yɔ̄ ī gbaajā tú uwá.

¹⁸Īlī nēé hi ijā tū ɔ̄, nɛ̄ n kpó gā uwɔ ɔ̄, a kwú ɔ u pīya klá aójībó ā, klla kwú anɔ̄ ólifu mɛ́mla ɔtulalī nɛ̄ n je gā uwɔ ā ú kpó gwɛ́ɛya lɛ uwá.

¹⁹N jē ɔdōlé gā uwɔ, kwu anɔ̄, umu mɛ́mla ɛnwú olɔhi fíyɛ́ dúú ā. Amáŋ a kwú uwá ú kpó gwɛ́ɛya lɛ ɛcí, yɔ̄ ī tíne ó má eyī olɔhi kú aɛ́cī kú uwɔ ā.” Abɔ̄ Óndú ā ka lɛ á.

²⁰Ayí nāa ma gā um ā, a kwú uwá í kpó gwɛ́ɛya oōyɔlá dúúdú lɛ ɛcí. Ajā ōgbo kú uwɔ ā í wɛ ɔdōbɔ̄bí jɛ̄ uwɔ ɛ́ɛ́ ŋ́,

²¹anɔ́ɔ a yɔ̄ í kpó ayí um gáā gwɛ́ɛya lɛ ɛcí áa?

²²Eko kú oyēeyī otīihilɛ kú akwuna nāa yɔ̄ ī lā ɔ́ɔmā, á blakwu eko kú ɔyípɛ̄ kú uwɔ nāa tá ohɛ́ɛwa nōbí nōbí yɔ̄ ī míya ipú oyī kú uwɔ ā ɛ́ɛ́ gɛ ŋ́.

²³Óndú ā nōo wɛ Ɔwɔicō ā kahíníī, “Ákú uwɔ mɛ ɛɛ́, ohóō gā uwɔ. A le odúúdú ɔ́bíipú nyā bī,

²⁴a klla lɛ aíkpɛ́cí gwó ce icō úláyi mɛ́mla ɔ́ɔpu dóódu.

²⁵Okónɔ̄wɛ dóódu, a yɔ̄ ī yó ucē akwuna, lɛ ɔhi mla ɔ́ncɛ́nyā ōjɛ̄ kú uwɔ ā yá ɛflɛ́ɛfu. A gē gbaajā tá ɔ̄cɛ dóódu nōo gē wā í yɛ ā. A yɔ̄ ī yá akwuna tōōtɔ̄ɔ̄ ɛ̄cī dóódu.

²⁶Á cɛ̄ lɛ ācɛ kú Íjīpiti, aóladóogbe kú uwɔ nēe ī yunwū ɔnyā nɛ̄hi ā, ge gwutá mla uwɔ. A bī akwuna oōyá kú uwɔ nyā í yá um ɛlā íwɔ́tū.

²⁷Abālɔbányā n kwú abɔ̄ kú um ú gicō gē yá uwɔ italā ɛɛ́, n yɔ̄ ī je ukpɛ̄ kú ɔhā nɛ̄ n hɛ́ ce uwɔ ā ŋmá ɛgiyí uwɔ. N kwú uwɔ ú tá ipú abɔ̄ ācɛ kú Ufilístiya ɛɛ́, nɛ̄ ucē icííci kú uwɔ gē tū uwā ihilɛ ā.

²⁸Abɔ̄ ācɛ ɔhá a í jé uwɔ ŋ́ mā, a klla kwinya nyɔ̄ ī gbajā tá ācɛ kú Asírīya. A wɛ akwuna kú uwá, uwá gwutá mla uwɔ nááná o kē jɛ̄ uwɔ ŋ́ dúú.

²⁹A tɛtɛ wɛ akwuna kú ācɛ kú Ubábīlɔn nēe wɛ ewo kú ācɛ ō yá obé ije nɛ̄hi ā dúú. Amáŋ ó jɛ̄ uwɔ ŋ́ dúú.”

³⁰Ɛ̄nyā wɛ ɔdā nɛ̄ Óndú ā nōo wɛ Ɔwɔicō ā ka á. Ó kahíníī, “Ó wɛ ɛdɔ odo icííci nāa lɛ ā nó ŋ! A ī yá ɔdā dóódu nyā bɛ̄ɛka akwuna nōo lɛ uwēyī dúúmā ɛyí ŋ́ mā.

³¹Uláyi dóódu, a lɛ inu ɛcí gwó ka ā pá ɛcí ipu akwuna ooyá kú uwɔ ā. Amáŋ a kōō ī yá bɛ̄ɛka aákwuna ohile nēe gē mīyɛ ije ā ŋ́.

³²A lɛbɛ̄ɛka ɔnyā nōo gé gbaajā tá aúgbɔga, ikɔkɔ ɔbá nū ō gwutá mla anú ā.

³³É géē cíla akwuna ulé kú úklɔ́ kú nū, amáŋ awɔ ā gē je ɛhi mɛ́mla omíci lɛ aɔ́ya uwɔ kéē ŋmá ɛga dóódu wā í gwutá mla uwɔ alahá.

³⁴Ɛdɔ akwuna ákú uwɔ ā wɛ ɛyɛ́ɛ́yí. Ɔ̄cɛ dúúmā í kwu uwɔ bá ɔ̄ ka a pīya akwuna ŋ́. Ācɛnyīlɔ í gē cíla uwɔ ulé ŋ́, amáŋ awɔ ā gē cíla uwá ulé ka e wā ī gbo mla uwɔ á. Ohígbū ɔ́ɔmā a wɛ ɛdɔ akwuna ɛyɛ́ɛ́yí gbóó.”

³⁵Aá nēe wɛ ācɛ, Ujerúsālɛm nōo kwú pīya akwuna ā, pó ɛlā nɛ̄ Óndú ā ge ka ā.

³⁶Óndú ā nōo wɛ Ɔwɔicō ā kahíníī, “A ī plla īlī tá ohɛ́ɛwa bɛ̄ɛka akwuna ā ī je iyī uwɔ tá lɛ aɔ́ya uwɔ ā, mla aɛ́cí nāa ī pā ā. A klla ī ŋmó ayí uwɔ ī kpó gwɛ́ɛya lɛ aɛ́cí ā.

³⁷Ohígbū ɔ́ɔmā, n géē kpó odúúdú ācɛ nēe gē cikpó uwɔ kpɛ́mm ā wā í tɔ̄há, kwu aɛ́nɛ̄ e he uwɔ ɔtū mɛ́mla aɛ́nɛ̄ e he uwɔ ɔtū ŋ mā. N géē kpó uwá wā í jīla tū uwɔ klla í je īlī plá ŋmá uwɔ iyē ká a má tá ohɛ́ɛwa, cɛ́ɛ́ ka odúúdú uwá kā e má ohɛ́ɛwa nōbí nōbí kú uwɔ ā.

³⁸N géē ŋmó uwɔ ɛpɔ̄bí kú ajā ōgbo mɛ́mla ɔ̄cɛ ō ŋmó. N géē bī ícɔ̄nū mla ánya kú um le ikwú cíla uwɔ ulé.

³⁹N géē je uwɔ tá ipú abɔ̄ uwā, cɛ́ɛ́ é géē je inu nāa gwó gē yá akwuna klla gē pá ɛcí ipú nū ɔ́ɔmā wúla tāajɛ. É géē je īlī mla ɔdā ifa dóódu kú uwɔ ā kpó, klla í je uwɔ tá ohɛ́ɛwa nōbínobi.

⁴⁰É géē tū ɛwa kú ācɛ okónu ká e tá ɛcɔ̄ klá uwɔ. É klla í bī aɔ́kpacaŋgelī kú uwā je uwɔ hɛ́ nyɛŋɛnyɛŋɛ.

⁴¹É géē je aínu kú ɔlɛ́ uwɔ tū ɔlá, klla í yá uwɔ ōwē ipéēyī anyā alɛwa. N klla géē yá ka a yá akwuna ɛ́ɛ́ gɛ ŋ́. N géē ci uwɔ o je ɛhi lɛ aɔ́ya uwɔ ká ē wā í gbo mla uwɔ ā.

⁴²Eko ɔ́ɔmā, ɔnū kú um géē mɛ, ɔtū kú um klla í wā ajɛ. Ɔtū í klla gáā wú um ɛɛ́, nɛ̄ n gē je ányā giicō gɛ ŋ́.

⁴³Abɔ̄ nɛ̄ n kwú mlanyī ɔdā nɛ̄ n yá ga awɔ eko ɔyípɛ̄ kú uwɔ ā, klla lɛ um yá cɔ̄nū nɛ̄hi mla odúúdú ucē ō yá kú uwɔ ɔ́ɔmā mla ɔdā dóódu nāa yá ā. Ɔdā ɔ́ɔmā yá ɛ́ɛ́ nɛ̄ n cílá ulé kú odúúdú nū á. Ɔdí yá nāa klla nyɔ̄ ī gbaajā kwu odúúdú ucē ɛbí nɛ̄hi ɔhá nāa yɔ̄ ī yá āā?” Óndú ā nōo wɛ Ɔwɔicō ā le ka ɛɛ́.

⁴⁴Óndú ā klla kɛlā gā um gɔbū ka amíyɔ̄ ka lɛ Ujerúsālɛm. Ó kahíníī, “Ujerúsālɛm ācɛ géē bá ī kwu uwɔ ita nyā, ka ‘ɛ́gɛ́nɛ̄ ucē kú ɛ́nɛ́ lɛ ā nɛ̄ ákú ɔyínɔ̄nyā kú ɔlɛ́ nū lɛ dúú ā.’

⁴⁵A wɛ ɔyínɔ̄nyā kú ɛ́nɛ́ ā uwɔ ɔkwɛ́yi. Ɛ́nɛ́ uwɔ wɔ́tū ɔbá únū mla ayí nū. A lɛbɛ̄ɛka ayínɛ́ uwɔ nɔ̄nyā, nēe gē wɔ́tū ɔbá mla ayí uwā dúú ā. Awɔ, mla ayínɛ́ uwɔ nɔ̄nyā nēe kwɛyí aígelī nɛ̄hi ɔhá ā, lɛ ɛ́nɛ́ nōo wɛ ɔ̄cɛ Uhɛ́ti, ádā aá kē wɛ ɔ̄cɛ Ámɔn.

⁴⁶Adá uwɔ wɛ Usamɛ́rīya nōo yɔ̄ ɛhíícō ā mla aípɔ́lɛ́ kú nū ā. Ɔyínɛ́ uwɔ nɔ̄nyā nɛ̄ŋcɛ́ mla aípɔ́lɛ́ kú nū ā wɛ Usódom nōo yɔ̄ ɛháajɛ ā á.

⁴⁷Ucē ɛbí nɛ̄hi kú uwá nāa kpó abɔ̄ uwá ā í jɛ̄ uwɔ ŋ má. Amáŋ eko kpií awɔ ā klla gbɔɔ́ ō yá ucē mɛ́mla ɔdōbɔ̄bí fíyɛ́ odúúdú uwā mɛ́ɛ̄ á.”

⁴⁸Óndú ā nōo wɛ Ɔwɔicō ā klla da Ujerúsālɛm kahíníí, “Ɛ́gɛ́nɛ̄ n yēeyī ā, ɔyínɛ́ uwɔ Usódom mɛ́mla aípɔ́lɛ́ nɛ̄ŋcɛ́ kú nū ā í yá ɛdɔ kú ɔdōbɔ̄bí nɛ̄hi nɛ̄ awɔ mɛ́mla aípɔ́lɛ́ nɛ̄ŋcɛ́ kú uwɔ ā yá ā ŋ́.

⁴⁹Ɔ́bíipú kú ɔyínɛ́ uwɔ, Usɔ́dɔm wɛ ka anú mla ayīnu nɔ̄nyā yá ɔbɔ́cɛ, ohígbū ka é gē má lé, ī má gwá klla lā ipú abahi mɛ́mla ɛbɔ́. Amáŋ é lɛ ɛlá kwu aógbɛhá mla ācocābɔ̄nyɛ́ ŋ́.

⁵⁰É gɔ̄, yá īkpɛyí olɔfú klla yá aɔ́dā nēe gē wú um ɔtū ā. Anɔ́ɔ n kwú uwá í yíífi ɛ́gɛ́nɛ̄ awɔ abɔ̄yī uwɔ jé dúú ā.

⁵¹Usɛmérīya í yā āyā éyi kú ɔ́bíipú nāa yá ā ŋ́. Ɔ́dāŋ́ ka é le ucē ɛbí nɛ̄hi nɛ̄ ayá ā miya ákú ayínɛ́ uwɔ, ó géē lɛbɛ̄ɛka ɔdā nēé yá ɔdōbɔ̄bí dúúmā ŋ́ mā.

⁵²Awɔ nɛ̄ uwēyī gáā kwú mɛ́ɛ̄ ā ohígbū ka ɔ́bíipú nɛ̄hi kú uwɔ ā cɛ̄ lɛ ayínɛ́ uwɔ lɛbɛ̄ɛka é yá ɔdōbɔ̄bí ŋ́ mā. Le tútū uwēyī ō kwú uwɔ mɛ́ɛnɛ, ohígbū ka a yá ka ayínɛ́ uwɔ kéē lɛbɛ̄ɛka é le kpaakpa ā.”

⁵³Óndú ā klla da Ujerúsālɛm ka anúɔ géē yá Usódom mɛ́mla Usɛmérīya mɛ́mla aípɔ́lɛ́ nɛ̄ŋcɛ́ kú uwā ā ka é gbagbénú igbɔhá kpɔ́ ɛɛ́. Ka anúɔ géē yá ka Ujerúsālɛm abɔ̄yī nū kóō gbagbénú dúú.

⁵⁴Ka amáŋ Ujerúsālɛm ɔ́ɔ géē tū īyī nū uwēyī. Uwēyī kú nū ā ɔ́ɔ klla í yá ka ayínɛ́ nū ā kā e má īyī uwā ka aá lɔhi fíyɛ́ ɔ̄.

⁵⁵Óndú ā ka gɔbū kahíníī, “Ayínɛ́ uwɔ, Usɔ́dɔm mla Usamérīya mɛ́mla aípɔ́lɛ́ nɛ̄ŋcɛ́ kú uwā, géē gbagbénú igbɔhá ɛɛ́. Awɔ mla aípɔ́lɛ́ nɛ̄ŋcɛ́ kú uwɔ gē gbagbénú dúú.

⁵⁶A bī Usódom ī le kwu ita eko nāa gē yá ɔbɔ́cɛ́,

⁵⁷gbɔbū ɛ́ɛ́ ká ē je ɔ́bíipú nāa bī ā tɛ́ɛcɛ ā. A kwú lɛbɛ̄ɛka anú ā dúú ɛɛ́. A kwú pīya ɔdā obī kwu ita kú ācɛ Ɛ́dɔm, Ufilístiya, mɛ́mla aóladóogbe kú uwɔ ɔhá nēe gē wú ɔtū uwɔ ā.

⁵⁸A géē móōwē kú ɔdā icííci mɛ́mla ucē ɛbí nāa yá ɔ́ɔmā.” Óndú ā lɛ ɛlā ka ɛɛ́.

⁵⁹Óndú ā nōo wɛ Ɔwɔicō ā klla kɛlā lɛ Ujerúsālɛm gɔbū kpɔ́. Ó kahíníī, “N géē yá uwɔ ɛ́gɛ́nɛ̄ o cíkā gā uwɔ ā, ohígbū ka a kwú mlanyī okónu oōce kú um, klla lɛ ɔ́ bīya.

⁶⁰Amáŋ n géē yá okónu nɛ̄ n cē mla uwɔ eko ɔyípɛ̄ kú uwɔ ā. N kē í cokónu nōo gē yɔ̄ piyóó ā mla awɔ.

⁶¹A géē blakwu ɛ́gɛ́nɛ̄ a yá ucē lɛ a, o géē tū uwɔ uwēyī, eko nɛ̄ adá uwɔ, mɛ́mla ɔyínɛ́ uwɔ nɔ̄nyā nɛ̄ŋcɛ́ kwúcē wā ɛgiyí uwɔ. N géē kpó uwá gā uwɔ bɛ̄ɛka ayí uwɔ nɔ̄nyā ā, nááná nɛ̄ ɛ̄nyā í wɛ āyā kú okónu nɛ̄ n ce gā uwɔ ā ŋ́ mā.

⁶²N géē cokónu ā mla awɔ ɛ̄yīpɛ̄ ɔhá, cɛ́ɛ́ a le jé ka ami ɔ́ɔ wɛ Óndú ā á.

⁶³N géē je odúúdú obɔ̄bí nāa yá ā, yá uwɔ ɛhi, amáŋ a géē yɔ̄ ī blakwu ɔɔ́, nɛ̄ uwēyī í gáā cɛ ga uwɔ nwūla okónu ka ɔdā dúúmā ɔhá gɛ ŋ́.” Óndú a nōo wɛ Ɔwɔicō ā le ka ɛɛ́.