Read idoma ISÍKƐ̄LU 17 Bible Online

ISÍKƐ̄LU 17 - idoma bible

ISÍKƐ̄LU 17

¹Óndú ā da um ka,

²“Ɔlɛcɛ, lɛ ācíije tá lɛ ācɛ kú Ísrɛ̄lu.

³Cɛ́ɛ́ ká uwá kéē le ɔdā nɛ̄ ami, Óndú ā nōo wɛ Ɔwɔicō ā gē ka lɛ uwá ā jé. Da uwá ka idu nɛ̄hi éyi yɔ̄, nōo bū efū ohéyīfuú nɛ̄hi. Acá kú nū nwuné, lɔwá klla líkpō. Ó le wu ga ɛyí ɛfu kú Ulɛ́bānɔn gáā bī ābɔ̄ ágēné gēne kú ɔcí nēé hi Usédar (ulóko) ā.

⁴Ó lɛ īkpō ɔkɔ cē ŋmá abɔ́ɔ kwú ɔ ú bī nyɔ̄ ga ajɛ nɛ̄ ī tɔ́sú. Ó kē kwú ɔ̄ ú kwu igelī kú ɔlɛ́ ācɛ o tá ɔ́sú.

⁵Ó klla gáā lɛ ɔcí obene fu ŋmá ipú ajɛ kú Ísrɛ̄lu gáā lɛ ɔ́ tāajɛ olɔhi ɛga nɛ̄ éŋkpɔ̄ gē yɔ̄ eko dóódu, klla yɔ̄ ī yá ká ō jɛ̄ ā.

⁶Ɔcí ā kwú hɛ́ ce ŋmá ajɛ. Ó jɛ̄ nɛ̄hi ŋ́, o kwú kwu ābɔ̄, kwú pīya ugrépu. Ābɔ̄ kú nū le jɛ̄ lɛyíkwu ɛgiyí idu ā. Ó kē le ɛgba ta lipú nɛ̄hi. Ufáyin nyā kwu ābɔ̄ klla lɛ ēpū nɛ̄hi.

⁷Idu ɔhá nōo nwuné nɛ̄hi klla yɔ̄. Acá mla ēfū kú nū nwuné nɛ̄hi. Anɔ́ɔ ɔcí ufáyin nyā gbɔɔ́ ō tá ɛgba lɛyíkwu ɛgiyí nū klla ī pīya ēpū kú nū lɛyíkwu ɔ́ ā. Ɔcí ufáyin ā leyīce ka ɔ́ɔ gē je éŋkpɔ̄ lɛ anúɔ fíyɛ́ okónu éŋkpɔ̄ nɛ̄ anúɔ kwu yɔ̄ ī jɛ̄ ā.

⁸Amáŋ ó tɛtɛ kwu ɛga olɔhi, nōo yɔ̄ i má éŋkpɔ̄, nɛ̄ ó gē jɛ̄ klla i lū, klla gwá īkpō ɛɛ́. Cɛ́ɛ́ kú ō le pīya ɔcí ufáyin onwuné nɛ̄hi.”

⁹Anɔ́ɔ Óndú ā nōo wɛ Ɔwɔicō ā lɛ ɔ̄kā da á. Ó kahíníī, “Ɔcí ufáyin nyā í yēeyī klla í jɛ̄ gílú ā a? Idu ká aflɛ́yí ā í gáā fu ɔ̄ ŋmá aje tɛgba tɛgba klla kpó īkpō nū wúla ŋmá anú, lɛ abɔ̄ nū wúla cɛ́ɛ kóō kwú ŋmaɔ́lá ŋ́ nɛɛ. Aewo o lɔfú í kō gáā cɛgbá ɔfú nɛ̄hi ɛ́ɛ́ kéē fu ɔ́ ŋmá aje ŋ́.

¹⁰Eko nēé lɛ ɔ́ tū ɛga ɔhá, ó gáā yēeyī klla jɛ̄ ŋ́. Eko nɛ̄ owu ɔnɔ̄ gā, ó géē je ŋmó. Ó géē kwú ɛga nōo kwu gē jɛ̄ ā.

¹¹Anɔ́ɔ Óndú ā da um ka,

¹²Da ācɛ oyá īkpɛ̄yí olɔfú nyā ɔ̄kā ɔdā nɛ̄ ɛyí kú ita nyā wɛ ā. Da uwá ka ɔcɛ́ kú Ubábīlɔn gā Ujerúsālɛm gáā lɛ ɔcɛ́ ā mla aígabɔ̄ kú nū ā kpó kwúcē ga Ubábīlɔn mla anú.

¹³Ó kwu ɔ̄cɛ éyi ú ŋmá ipɔ́ɔnū ɔlɛ́ ɔcɛ́, lɛ okónu ce mla anú klla yá ɔ̄ ká ō lɛ ɔkpá gwá ka anúɔ í lɛyítáajɛ lɛ ɔ́. Ó kwú odúúdú ācɛ ocɛgbá ā ú kpó ŋmá Ujerúsālɛm,

¹⁴o yá ɛɛ́ ká ajɛ ā ká ō je gicō igbɔhá gɛ ŋ́ má, ka é klla lɛyítáajɛ lɛ ɔ́ ā.

¹⁵Amáŋ ɔcɛ́ kú Ujúda ā yí īkpɛ̄yí olɔfú tá ɔ, klla lɛ ācɛ tɛ̄hɔ̄ ga Íjīpiti nyɔ̄ í ba ɔnyā okpɛ́fú mla aícɔ́ɔja alɛwa ŋmá ɛgiyí uwā. Ó géē yálé ēē? Ó géē bīya okónu ōce nyā í nyɔ̄ áncā lɛ a glá ā? Ó gáā lɛ a ŋ́.

¹⁶Ɛ́gɛ́nɛ̄ ami, Óndú ā Ɔwɔicō nōo yēeyī ā, n ka ɔcɛ́ ɔ́ɔmā géē kwú Ubábīlɔn, ɛga nɛ̄ ɔcɛ́ nōo je ɔ́ ce ɔcɛ́ ā lā ā. Ohígbū ka ó lɛ okónu nɛ̄ ó ce mla ɔcɛ́ kú Ubábīlɔn ā bīya.

¹⁷Eko nɛ̄ ācɛ Ubábīlɔn géē wā í ce íbɔm tū ɔ, kéē kpó ācɛ alɛwa ŋmó ā, aícɔ́ɔja olɔfú nɛ̄hi kú ɔlɛ́ ɔcɛ́ kú Íjīpiti ā nááná í gáā lɔfú tá ɔ̄ abɔ̄ glá ŋ́.

¹⁸Anú bīya okónu nēé ce mla anú klla tá ɔkpá nōo gwá ā je ɔ́ tēelihɔ á. Ohígbū odúúdú ɔdā nōo yá nyā, ó gáā kwu hɛ ɔ̄ abɔ̄ tá glá ŋ́.”

¹⁹Óndú ā nōo wɛ Ɔwɔicō ā kahíníī, “Ɛ́gɛ́nɛ̄ ami wɛ Ɔwɔicō nōo yēeyī ā, n géē je ōwē lɛ ɔ́ kú okónu nɛ̄ ó bī iyē kú um gbo ɛka ka anɔ́ɔ géē le tū, nōo klla je bīya ā.

²⁰N géē na ɛ́yá kú ofítɛ̄ daa í kwú ɔ́. N géē je ɔ́ ga Ubábīlɔn nyɔ̄ í je ōwē lɛ ɔ́ abɔ́ɔ, ohígbū ɛyí nɛ̄ ó le tá ajɛ ga um ŋ́ mā.

²¹É géē ŋmó aícɔ́ɔja ɔlɛ́ nū nēe lɔfu fíyɛ́ dúú ā ɔgbɛ́fú. Aóhile kú uwá ā géē kpó pahīla klá ɛga dóódu. Eko ɔ́ɔmá ā géē jé ka ami nōo wɛ Óndú ā lɛ ɛlā ka ɛɛ́.

²²Ɛ̄nyā wɛ ɔdā nɛ̄ Óndú ā nōo wɛ Ɔwɔicō ā ka á. Ó kahíníī, “N géē cē íkpɔ̄ɔkɔ kú ɔcí kú Usedar (ulóko) éyi ŋmá ágēnēgēnē kú nū. N géē tū ɔ̄ ɛyí ɛfu

²³kú Ísrɛ̄lu nōo licō fíyɛ́ dúú ā. Ó géē jɛ̄, í kwu ābɔ̄, klla í gwá īkpō. Ó klla í nwuné nɛ̄hi. Ɛdɔ aígbáanɔ dóódu géē wā í mulɛ́nyɔ̄ abɔ̄ nū, klla gwó ɔlɛ́ ce ɔ́.

²⁴Odúúdú ɔcí kú ipú ajɛ nyā géē jé ka ami ɔ́ɔ wɛ Óndú á. Ami gē tá ɔcí nōo jɛ̄ licō nɛ̄hi ā wā ajɛ, klla í yá ka ɔcí nɛ̄ŋcɛ́ ā ká ō jɛ̄ bɛ̄ɛka ulóko ā á. Ami gē je ɔcí ɛ̄mɛ̄ɛ̄mɛ̄ ŋmókókó á, klla ī je ɔcí oŋmókókó yá ɛ̄mɛ̄ɛ̄mɛ̄ á. Ami, Óndú ā lɛ ɛlā ka ɛɛ́. N kē í yá ɔdā nɛ̄ n ka ka n géē yá ā.”