Read idoma ISÍKƐ̄LU 18 Bible Online

ISÍKƐ̄LU 18 - idoma bible

ISÍKƐ̄LU 18

¹Óndú ā klla kɛlā gā um kpɔ́.

²Ó kahíníī, “Ɔdí wɛ ɛyí ita nyā nēé gē kwú Ísrɛ̄lu piyóó ā ɛ́ɛ́? É ī ka ka, ‘Aɛ́nɛ́ mla aádā lé ugurepu oōmākáká á. Amáŋ ayīnu kú ayí uwā kē kwú ijile á.’”

³Óndú ā nōo wɛ Ɔwɔicō ā klla kɛlā kahíníī, “Ɛ́gɛ́nɛ̄ ami wɛ Ɔwɔicō nōo yēeyī ā, aá gáā kwu ita nyā ɔhá ipú ajɛ kú Ísrɛ̄lu ā gɛ ŋ́.

⁴Oyēeyī kú ɔ̄cɛ dóódu wɛ ákú um, kwu oyēeyī kú aɛ́nɛ́ mla aádā, mɛ́mla ákú ayí uwā. ɔ̄cɛ dúúmā nōo lɛ ɔ́bíipú bī, ɔ̄cɛ ɔ́ɔmā géē kwú á.

⁵ɔ̄cɛ olɔhi éyi lɔfú yɔ̄ nōo le kpaakpa klla wɛ ɔ̄cɛ ɔkwɔ̄ɔ̄kwɛ̄yi.

⁶Ó gē pá ɛcí kú ācɛ Ísrɛ̄lu ā ŋ́, ɛ́ɛ́ nɛ̄ ó gē lé ɛya nēé gwó lɛ ɛcí ā ŋ́. Ó klla gē cikpó ɔnyā ɔ̄cɛ ɔhá ŋ́, ámāŋ ka ó gē gwutá mla ɔnyā nōo yɔ̄ ī tēelihɔ ŋ́.

⁷Ó gē hɛ́ ɔ̄cɛ dúúmā lé, ɛɛ́ nɛ̄ ó gē wī ɔ̄cɛ dúúmā uwī ŋ́. Ɔdā dúúmā nēé le ce ɔ́ abɔ̄, ó gē je kwúcē lɛ óndú nū. Ó gē je ɔdōlé lɛ ācɛ nɛ̄ ɛmiyɛ gē ŋmó uwá ā klla í lɛ īlī tū ācɛ nēe tá ohɛ́ɛwa ā ohí.

⁸Ó géē je ije kú nū tū akwunugba ŋ́. Ó ī tā kā o bī ɔ́bíipú klla í trrá ɛlā kpaakpa eko dóódu nɛ̄ áafú yɔ̄.

⁹Ɔ̄cɛ ɔ́ɔmā gē lɛ ɛyí tā ajɛ lɛ íne kú um klla ī yá ɔdā nɛ̄ n da ɔ́ ká ɔ̄ yá ā. Ɔ̄cɛ ɛ́gɔ́ɔmā ā le kpaakpa, ó géē yēeyī.” Abɔ̄ Óndú ā nōo wɛ Ɔwɔicō ā ka lɛ á.

¹⁰Amáŋ ɔ̄cɛ okpaakpa nyā lɔfú lɛ ɔyí, nɛ̄ o gē wūwī klla í ŋmó ɔ̄cɛ, ámāŋ ka ó gē yá odúúmā kú aɔ́dā nēe bá nyā,

¹¹nɛ̄ ádā nū i yá ŋ́ mā. Ó gē pá ɛcí klla ī lé ɔdōlé kú ɛya nēé gwó lɛ ɛcí, klla í cikpó anyā ācɛ.

¹²Ó ge hɛ́ aólɛhá lé, ge wūwī, klla ī bī ɔdā dóódu nēé gáā le ce ɔ́ abɔ̄ ā, í klla ī je lɛ óndú nū gɛ ŋ́. Ó gē nyɔ̄ ikpɛ́cí gaá pā ɛcí,

¹³klla gē je ijē tū akwunugba. Ó géē yēeyī nɛɛ? Ehée! Ó gáā yēeyī ŋ́. Abɔ̄ ó gē yá odúúdú aúcē ɛbí nyā á, ó géē kwú. Anú ŋmó īyī nū á.

¹⁴Ɔ̄cɛ ɔ́mpa nyā lɔfú lɛ ɔyínɔ̄nyīlɔ eyí. Ɔyī nyā lɔfú má odúúdú ɔ́bíipú nɛ̄ ádā nū yá ā. Amáŋ ó yɛce ucē kú ádā nū ā ŋ́.

¹⁵Ó pa aɛ́cí kú ācɛ Ísrɛ̄lu ɛ́ɛ́ nɛ̄ ó gē lé ɔdōlé kú ɛya nēé gwó lɛ ɛcí ā ŋ́. O kē ce ikpó anyā ācɛ ŋ́.

¹⁶Ó pīya ɔ̄cɛ dúúmā tū ŋ́, Ó wī ɔ̄cɛ dúúmā uwī ŋ́. Ɔdā dúúmā nēe bī gáā ce ɔ abɔ̄ ā, ó gē je kwúcē lɛ óndú uwā. Ó gē je ɔdōlé lɛ aógbɛhá klla lɛ īlī tū ācɛ nēe tá ohɛ́ɛwa ā ohí.

¹⁷Ó tá ka ó yá ɔdōbɔ̄bí, í klla ī je ije tū akwunugba ŋ́. Ó gē lɛ íne kú um tū, klla í lɛyítáajɛ lɛ ɔ́da dóódu nɛ̄ n je ā. Ó gáā kwú ohígbū ɔ́bíipú kú ádā nū ā ŋ́. Ó géē yēeyī piíí.

¹⁸Amáŋ abɔ̄ ádā nū gē hɛ́ ācɛ lé, ī wūwī ā, klla ī yá ācɛ dóódu ɔdōbɔ̄bí ā, ohígbū ɔ́ɔmā ádā nū gekwú ohígbū ɔ́bíipú nɛ̄ ádā ā abɔ̄yī nū bī ā.

¹⁹Amáŋ aá géē dɔɔ̄kā ka, ‘Ɔdí yá ɛ́ɛ́ nɛ̄ ɔyí nyā í móōwē kú ɔ́bíipú kú ádā nū ŋ́ mā?’ Ohi kú ɔ̄kā ā wɛ ka, ɔyí ā yá ɔdōlɔhi mla ɔdā okpaakpa. Ó klla lɛ íne kú um tū klá yɛce ɔ́ kpaakpa. Ohígbū ɔ́ɔmā ó géē yēeyī.

²⁰Ɔ̄cɛ nōo bī ɔ́bíipú ā géē kwú á. Ɔyí í gáā móōwē kú ɔ́bíipú kú ádā nū ŋ́, ɛ́ɛ́ nɛ̄ ádā gē móōwē kú ɔ́bíipú kú ɔyí nū ŋ́. É géē cílá ɔ̄cɛ olɔhi ulé kú olɔhi kú nū, ɔ̄cōbɔ̄bíipú ā géē mīyɛ ulé kú ɔ́bíipú kú nū.

²¹Ɔ́dāŋ́ ka ɔ̄cōbɔ̄bíipú mā ɔ́bíipú nɛ̄ ó bī ā tá, nɛ̄ ó lɛyítáajɛ lɛ íne gbɔɔ́ ō yá ɔdōlɔhi mla ɔdā okpaakpa, ó gáā kwú ŋ́ amáŋ ó géē yēeyī.

²²É géē je odúúdú ɔ́bíipú kú nū yá ɔ̄ ɛhi. Ohígbū ka ó lɛ ɔdā nɛ̄ olɔhi ā yá, ó géē yēeyī.”

²³Óndú ā nōo wɛ Ɔwɔicō ā kahíníī,” Ikwū kú ɔ̄cōbɔ̄bíipú í gē lɔnyɛ tū um ŋ́, amáŋ ó gé ē he um ɔtū ka ó le pīyabɔ̄ ka ó yēeyī.

²⁴Amáŋ ɔ́dāŋ ka ɔ̄cɛ o yá ucē okpaakpa ā kwú pīyabɔ̄ ŋmá olɔhi oōyá, klla gbɔɔ́ ō bī ɔ́bíipú mla ɛdɔ ucē ɛbí nɛ̄ ācōbɔ̄bíipú ɔhá gē yá ā, ó géē yēeyī kɛ̄ɛ? Ehée! É klla gáā blakwu odúúdú olɔhi kú nū dúúmā nɛ̄ ó tɛtɛ yá ā gɛ ŋ́. Ó géē kwú ohígbū ɔ́bíipú kú nū mɛ́mla abɔ̄ ó yá ucē ɔkwɔ̄ɔ̄kwɛyi ŋ́ mā.

²⁵Amáŋ, aá gē da um ka, ‘Ɔdā nɛ̄ Óndú ā ge yá nyā í kpaakpa ŋ́. ‘Aá jāhɔ̄ gā um, ācɛ kú Ísrɛ̄lu. Aá gē gbɛlá ka ɔwɛ nɛ̄ n gē yá odée kú um ā, í le kpaakpa ŋ́. Amáŋ ɔwɛ kú aá a í kpaakpa ŋ́ má.

²⁶Ɔ́dāŋ́ ka ɔ̄cɛ okpaakpa ma abɔ̄ olɔhi ō yá kú nū ā tá, anɔ́ɔ ó klla gbɔɔ́ ō bī ɔ́bíipú á, anɔ́ɔ ó gekwú ā, ayíka ó kwú ohígbū ɔ́bíipú nɛ̄ ó bī ɔ́ɔmā.

²⁷Eko nɛ̄ ɔ̄cobɔ̄bíipú mā obɔ̄bí kú nū tá, anɔ́ɔ ó gbɔɔ́ ō yá ɔdōlɔhi mla ɔdā nōo le kpaakpa ā, ó géē nya oyēeyī kú nū tá.

²⁸Abɔ̄ ó lɛ ɔ́bíipú nɛ̄ ó yɔ̄ ī bī ā jé klla mā ɔ̄ tá ō yá ɛɛ́ mā, ó géē yēeyī gbóó, ó gáā kwú ŋ́.

²⁹Nááná, ācɛ Ísrɛ̄lu, aá gē ka ka, ‘Ɔdā nɛ̄ Óndú ā yá a í lē kpaakpa ŋ́. ‘Aá gbɛlá ka ɔwɛ kú um ɔ́ɔ́ le kpaakpa ŋ́, amáŋ ɔwɛ kú aá í le kpaakpa ŋ́ má.

³⁰Ohígbū ɔ́ɔmā ami, Óndú ā nōo wɛ Ɔwɔicō ā gē da aá, ācɛ Ísrɛ̄lu, ka n géē ka ɛpɔ̄ tū ɔnyɔ̄ɔnyɛ ɛ́gɛ́nɛ̄ ɔdā nōo yá ā lɛ a. Aá le pīyabɔ̄ ká aá kwúcē ŋmá ɔdōbɔ̄bí nɛ̄ aá gē yá ā. Aá cɛ̄ lɛ ɔdōbɔ̄bí nɛ̄ aá gē yá ā ká ō je aá yíífi ŋ́.

³¹Aá maabɔ̄ odúúdú ɔdōbɔ̄bí nɛ̄ aá gē yá ā tá, cɛ́ɛ́ ka aá lɛ ɔtū mla odo ɛ̄yīpɛ̄ lɛ. Ācɛ Ísrɛ̄lu, ɔdíyá nɛ̄ aá tíne ō kwú āa?”

³²Óndú ā nōo wɛ Ɔwɔicō ā klla kahíníí, “Ń tíne ka ɔ̄cɛ dúúmā ká ō kwú ŋ́. Aá kwúcē ŋmá ɔ́bíipú kú aá ka aá yēeyī.”