Read idoma ISÍKƐ̄LU 2 Bible Online

ISÍKƐ̄LU 2 - idoma bible

ISÍKƐ̄LU 2

¹Anɔ́ɔ Ó da um kahíníī, “Ɔlɛcɛ, cāŋjɛ háyi icō. N tíne ō kɛlā gā uwɔ.”

²Abɔ̄ ó yɔ̄ ī kɛlā ā Alelékwū kú Ɔwɔicō ā gā ipú um, anɔ́ɔ ó kwú n cāŋjɛ háyi icō á. N pó ba ó yɔ̄ ī kɛlā gā um gɔbū kpɔ́ ā.

³Ó kahíníī, “Ɔlɛcɛ, n gē tū uwɔ ɛhɔ̄ fu ācɛ kú Ísrɛ̄lu. É wɛ éwo nōo lɛ īkpɛ̄yí olɔfú yá tá um ɛɛ́. Uwá lɛbɛ̄ɛka aádáádā uwá nēe húmáyī yā īkpɛ̄yí olɔfú tá um ā.

⁴Ācɛ nɛ̄ n gē tū uwɔ ɛhɔ̄ fu uwá nyā lɛ īkpɛyí olɔfú, é klla pó ahɔ̄ um ŋ́. Ohígbū ɔ́ɔmā n tū uwɔ ɛhɔ̄ kú ā nyɔ̄ í le da uwá ɔdā nɛ̄ ami nōo wɛ Óndú ā nōo wɛ Ɔwɔicō ā yɔ̄ ī ka lɛ uwā ā.

⁵Ɔ́dāŋ́ ka ācɛ ɔ́ɔmā nēe bá gē yá īkpɛ̄yí olɔfú ā jāhɔ̄, amáŋ ka é jāhɔ̄ ŋ nááná, é géē jé ka ɔ̄comɛ́ɛbɛ ɔ́ɔ tɛtɛ le yɔ̄ ipú aá ɛɛ́.

⁶Amáŋ awɔ ā, á híī yúufi uwā ŋ́ ámāŋ ka ɔdā nēé géē ka ā. Ucē ō yá kú uwā lɛyíkwu uwɔ géē lɛbɛ̄ɛka a yɔ̄ ipú uje ámāŋ ka lā ipú aɛ́na ocɛ̄ ɔ̄cɛ ā náaná ā, ā yúufi ɔdā nɛ̄ āce o yá īkpɛ̄yí olɔfú ɔ́ɔmā géē ka ā, ɛ́ɛ́ nāa gēe yúufi eyī kú uwá ŋ́.

⁷Kɛlā kú um lɛ uwá kpɔ́, ɔ́dāŋ ka é po, amáŋ ka é tá ká é pó nááná. A kē jé ká é wɛ ācɛ nēe gē yīkpɛ̄yí olɔfú.

⁸Amáŋ, ɔlɛcɛ, awɔ ā kóō pó ɛlā nɛ̄ n gē ka ga uwɔ ā. Ā yá īkpɛ̄yí olɔfú bɛ̄ɛka uwá ā ŋ́. Lɛ okónu kú uwɔ nwūla cɛ́ɛ́ ká a lɛ ɔdā nɛ̄ n gáā je gā uwɔ nyā lé.”

⁹N pīyeyī, anɔ́ɔ n má abɔ̄ kú ɔ̄cɛ le nāndaa wā ɛgiyí um bī ɔkpá éyi nēé le hā tū.

¹⁰Abɔ̄ ā lɛ ɔkpá ā wí, lɛ ɔ́ nwula, anɔ́ɔ n má ka ābɔ̄ ɛplɛɛpa kú nū, é lɛ ɛlā kú ikwū oōje, mɛ́mla ekwu ōyɔ̄ mɛ́mla íbáā tá tū ɔ̄ dúúdú á.