Read idoma ISÍKƐ̄LU 20 Bible Online

ISÍKƐ̄LU 20 - idoma bible

ISÍKƐ̄LU 20

¹Ɛ̄cī igwó kú ɔya ɛhɔ̄ kú iháyí ɔ́mahāapa nɛ̄ alɔ bá ipú ajɛ ɔfiyɛ ā. Anyākwɔ́cɛ kú ācɛ Ísrɛ̄lu ā wā gaá da um ɔ̄kā lɛyíkwu ɔdā nɛ̄ Óndú ā tíne kú ē yá ā. Anɔ́ɔ é má cīce iyɔ̄bū um á.

²Óndú ā lɛ ɛlā ka gā um.

³Ó kahíníī,” Ɔlɛcɛ,lɛ ɔdā nɛ̄ ami, Óndú ā nōo wɛ Ɔwɔicō ā, gē ka ā da aótrɛyí kú ācɛ Ísrɛ̄lu nēe bá ā. Da uwá ka amíyɔ ɔ́ɔ ka ɛ́gɛ́nɛ̄ ami wɛ Ɔwɔicō, nōo yēeyī ɔkwɛ̄yi ā, n gáā cɛ̄ gā uwɔ da um ɔ̄kā dúúmā ŋ́. Ami Óndú ā nōo lɔfú fíyɛ́ dúú ā le ka ɛɛ́.”

⁴“Ɔlɛcɛ, a le tútū kú ā kɛpɔ̄ tū uwā ɛɛ́? Ayíka a lɛ ɛpɔ̄ ka tū uwā. Tá uwá ɛlá kwú aúcē ɛbí nɛ̄hi nɛ̄ aádáádā uwá yá ā.

⁵Lɛ ka lɛ uwá ɔdā nɛ̄ n géē ka nyā a: ‘Eko nɛ̄ n fu ācɛ Ísrɛ̄lu ā, N lɛ okónu ce lɛ uwá. N lɛ īyī um mafú lɛ uwá Íjīpiti klla le ka lɛ uwá ka ami, Óndú ā wɛ Ɔwɔicō kú uwá á.

⁶Eko ɔ́ɔmā n cokónu lɛ uwá ka n géē kpó uwā bɛ̄cɛ ŋmá ajɛ kú Íjīpiti, ga ipú ajɛ nɛ̄ n géē je lɛ uwá ā. Ajɛ nōo lɔhi nɛ̄hi lɛ ɔdɛ̄hɔ̄ mla ɔdāajɛ oōbī fíyɛ́ odúúdú ajɛ ɔhá ā, nɛ̄ n je lɛ uwá ā.

⁷N da uwá ká ē kwú aɛ́cí nēé ī pā ā kpó bónū, cɛ́ɛ́ ka uwá ká e je īyī uwā iyē tēelihɔ mla aɔ́wɔ ɛ̄kɛ̄mgbɛ̄ kú Íjīpiti ā ŋ́, ohígbū ka ami Óndú á wɛ Ɔwɔicō kú uwá á.

⁸Amáŋ é tá ō lɛyítáajɛ lɛ ɛlā kú um ā. É kpó aɛ́cí ōtīihilɛ kú uwá ā bónū, ɛɛ́ nēé gē ma aójibó kú Íjīpiti tá ŋ́. N le tútū ō yá uwā ɛlā ohígbū ka n le cɔ̄nū mla uwā ipú Íjīpiti abɔ́ɔ.

⁹Amáŋ ohígbū nɛ̄ ɔ́ɔmā géē bīya um ojīlīmā a, n yá lɛ ā ŋ́. Ohígbū ka ipéyī kú ācɛ nēé lā ipú uwā ā, n lɛ ɔna tá lɛ ācɛ Ísrɛ̄lu, ka n géē kpó uwá bɛ̄cɛ ŋmá Íjīpiti ɛɛ́.

¹⁰Anɔ́ɔ n lɛ uwá kpó bɛ̄cɛ ŋmá Íjīpiti wā ipú ígbíli ā.

¹¹N lɛ ɔ́da kú um je lɛ uwá klla lɛ íne kú um, nōo i bī oyēeyī gē lɛ ɔ̄cɛ dúúmā nēe géē lɛyítáajɛ lɛ ɔ́ ā nwū uwā.

¹²N klla le íne kú ɛ̄cī nɛ̄ uwá í gáā yúklɔ́ ŋ́ mā je lɛ uwá kóō wɛ ɔdōōcābɔ̄ kú okónū nɛ̄ n ce mla uwá ā. Cɛ́ɛ́ ká aɛ́cī ɔ́ɔmā kóō blatū uwā ka ami nē o wɛ Óndú ā fu uwá kéē wɛ ákú um ofōōfū um á.

¹³Amáŋ é tá ō lɛyítáajɛ gā um ipú ígbíli ā dúú. É tá ō lɛ íne mɛ́mla ɔ́da kú um, nēe ī bī oyēeyī gé lɛ ɔ̄cɛ dúúmā nōo ī lɛyítáajɛ lɛ uwá ā tū. É klla lɛ aɛ́cī nɛ̄ uwā í cíkā ō yúklɔ́ ŋ mā tá tēelihɔ dúúdú. N le tútū ō yá uwā italā ipú ígbíli abɔ́ɔ ohígbū ka n le cɔ̄nū lɛyíkwu uwá.

¹⁴Amáŋ ohígbū nɛ̄ ɔ́ɔmā géē bīya um ojīlīmā ɛgiyí aéwo nēe má um kpó uwá bɛ̄cɛ ŋmá Íjīpiti ā, n yá lɛ ā ŋ́.

¹⁵Anɔ́ɔ n lɛ okónu ce ipú ígbíli abɔ́ɔ ka, ń klla gáā bī uwá ga ipú ajɛ olɔhi lɛ ɔdɛ̄hɔ̄ mɛ́mla ɔdāajɛ fíyɛ́ dúú, nɛ̄ n cokónu nū lɛ uwá ka n géē kpó uwá nyɔ̄ ā ɛ́ɛ́ gɛ ŋ́ má.

¹⁶N cokónu nyā ohígbū ka uwá tá íne kú um, lɛ ɔ́da mla Usábāti kú um tá nyílá. Ɛcí he uwá ɔtū ō pā fíyɛ́ ō yɛce um á.

¹⁷Amáŋ n le eyīnyinyi uwā má. Ń tíne ō kpó uwá ŋmó ipú ígbíli abɔ́ɔ ŋ́.

¹⁸Ikɔkɔ ɔ́ɔmā, n pi ayípɛ̄ ɔlɛ́ uwā ahɔ̄ ka, ‘Aá yɛce íne nɛ̄ aádáádā aá tū ā ŋ́. Aá yá uculo kú uwā ɛ́ɛ́ nɛ̄ aá gē je īyī aá īye tēelihɔ mla aɛ́cí nēé pā ā ŋ́.

¹⁹Ami, Óndú ā, wɛ Ɔwɔicō kú aá á. Aá lɛyítáajɛ lɛ ɔ́da mɛ́mla íne kú um.

²⁰Aá lɛ ɛ̄cī Usábāti tīihɔ, cɛ́ɛ́ ká ō géē wɛ ɔdōocābɔ̄ kú okónu nɛ̄ alɔ ce ā. Ó klla ī blatū aá ka ami, Óndú ā, wɛ Ɔwɔicō kú aá á.

²¹Amáŋ, ayí kú ɔlɛ́ uwā ɔ́ɔmā tá ō lɛyítáajɛ gā um dúú. É tá ō lɛ íne mla ɔ́da kú um, nōo gē bī oyēeyī gē lɛ ɔ̄cɛ dúúmā nōo gē lɛyítáajɛ lɛ ɔ́ ā tū. É klla lɛ aɛ́cī nēé ī yúklɔ́ ŋ mā tá nyílá. N le tútū ō yá uwá ɛlā abɔ́ɔ ohígbū ka n le cɔ̄nū mla uwá, cɛ́ɛ́ ká n̄ kwú uwá ú kpó ŋmó ipú ígbíli.

²²Amáŋ ń yá lɛ a ŋ́, ohígbū nɛ̄ ɔ́ɔmā géē bīya um ojīlīmā ipú aéwo nēe má um, kpó uwá bɛ̄cɛ ŋmá Íjīpiti ā.

²³Anɔ́ɔ n lɛ okónu ɔhá ce lɛ uwá abɔ́ɔ, lɛ ɔkpá gbo, ka n géē pa uwá hīla tū ipú aéwo ɔhá kú ipú ɛcɛ ā piíí á.

²⁴N yá ɔ́ɔmā lɛ a, ohígbū ka é tá ō yá íne mɛ́mla ɔ́da kú um, lɛ aɛ́cī nɛ̄ n kéē yúklɔ́ ŋ mā tá nyílá, klla bá ī pā aɛ́cí nɛ̄ aádáádā uwá gē pā ā.

²⁵Anɔ́ɔ n lɛ íne nɛ̄ olɔhi ŋ́, mla ɔ́da nɛ̄ ó gē bī oyēeyī gé lɛ ɔ̄cɛ ŋ́ mā je lɛ uwá á.

²⁶N cɛ̄ lɛ uwá kwú īyī uwā iyē ú tēelihɔ mla aɔ́kplá kú uwá nēé ī kpó gwɛ́ɛya lɛ ɛcí ā. N yá ɔ́ɔmā ká n je ōwē lɛ uwá, ká n̄ mafú lɛ uwá ka ami wɛ Óndú á.”

²⁷“Abālɔbányā, ɔlɛcɛ, le ɔdā nɛ̄ ami Óndú ā, nōo wɛ Ɔwɔicō ā gē da ācɛ Ísrɛ̄lu ā ka lɛ uwá ka ɛnyā wɛ ɔwɛ ɔhá nɛ̄ aádáádā uwā cá um ɛcá mla á le kpaakpa kú uwā ā ŋ́ má.

²⁸N lɛ uwá kpó wā ipú ajɛ nɛ̄ n cokónu ka n géē je lɛ uwá ā. Eko nēé gáā lɛ aɛ́fu nɛ̄hi mla aɔ́cí ɛ̄mɛ̄ɛ̄mɛ̄ kú ajɛ ā má ā, é gbo ɛya oōgwo ɛgiyí odúúdú uwā. É yá um cɔ̄nū nɛ̄hi mla ɛya nēé ī yɔlá mɛ́mla ejé nēé ge le fu ajɛ lɛ ɛcí ā.

²⁹N da uwá ɔ̄kā ka, ‘Ɔdí wɛ ɛyí aɛ́ga olicō nɛ̄ aá ge nyɔ̄ nyā a?’ Ohígbū ɔ́ɔmā, é hī aíkpɛ́cí ā kahíníī, “aɛ́ga olicō” jāā kwu ícɛ.

³⁰Lɛ ɔdā nɛ̄ ami, Óndú ā nōo wɛ Ɔwɔicō ā ge ka lɛ ācɛ Ísrɛ̄lu ā ka lɛ uwá. Da uwá kahíníī, “Ɔdíyá nɛ̄ aá géē bá ī bī ɔ́bíipú ékpónú nɛ̄ aádáádā aá bī, klla bá ī kwinya ce aɛ́cí otīihilɛ kú uwā ā ɔkwu āa?

³¹Ícɛ nyā nááná ā, aá ge gwɛ́ɛya lɛ aɛ́cí ɔ́ɔmā piíí, klla bá ī je īyī aá iyē tēelihɔ mla ayí aá ō kpó gwɛ́ɛya oōyɔlá lɛ aɛ́cí ā. Nááná ācɛ Ísrɛ̄lu, aá gē wā í da ɔ̄kā ɔdā nōo wɛ ɔtū kú um mɛ́mla ɔdā nɛ̄ n tíne ā. Ɛ́gɛ́nɛ̄ ami Óndú ā, nōo wɛ Ɔwɔicō ā, wɛ Ɔwɔicō nōo yēeyī á, ń gáā cɛ̄ lɛ aá da um ɔ̄kā dúúmā ŋ́.

³²Aá le ŋmótá ipú ɔtū kú aá ka aá ɔ́ɔ géē lɛbɛ̄ɛka aéwɔhá ā mɛ́mla ācɛ ɔhá nēe gē pā aɔ́cí mɛ́mla aɛ́cɔ̄ ā. Amáŋ ɔ́ɔmā í gáā yá glá gbógbóó ŋ́.

³³Ɛ́gɛ́nɛ̄ ami Óndú ā, nōo wɛ Ɔwɔicō ā wɛ Ɔwɔicō oyēeyī ā, n gē pi aá ahɔ̄ ka, ipú ícɔ̄nū kú um, n géē bī abɔ̄ olɔfú kú um le gbō aá.

³⁴N géē ma abɔ̄ ɔfú mɛ́mla ícɔ̄nū kú um fú lɛ aá, eko nɛ̄ n géē tá aá bá klla í kpó aá kwúcē ŋmá odúúdú ipú ajɛ aéwo ɔhá nɛ̄ n pa aá hīla nyɔ̄ ā.

³⁵N géē kpó aá wā ipú ‘ígbíli kú aéwo ā.’ Abɔ́ɔ ā, n kē ī ŋmó aá ɛpɔ̄bí ipéēyī aá cāā.

³⁶N géē ŋmó aá ɛpɔ̄bí, ɛ́gɛ́nɛ̄ n ŋmó aádáádā aá ɛpɔ̄bí, ipú ígbíli kú Usínāyi ā.” Abɔ̄ Óndú ā nōo wɛ Ɔwɔicō ā ka lɛ a á.

³⁷Óndú ā klla ka gɔbū kahíníī, “N géē lɛ abɔ̄ bī aá lɔfú, kú aá lɛyítáajɛ gā um, ipú okónu nɛ̄ ami mɛ́mla aá ce lɛ iyī alɔ ā.

³⁸N géē kpó ācɛ nēe gē yí īkpɛ̄yí olɔfú, klla gē yá ucē ɔ́bíipú ā, ŋmá ipú aá. N géē kpó uwá ŋmá ipú ajɛ aéwɔhá, ɛga nēé lā abālɔbányā ā. Amáŋ n gáā cɛ̄ lɛ uwá kwúcē wā ipú ajɛ kú Ísrɛ̄lu gɛ ŋ́. Eko ɔ́ɔmā, aá géē jé ka ami ɔɔ́ wɛ Óndú ā á.”

³⁹Óndú ā, nōo wɛ Ɔwɔicō ā kahíníī, “Ācɛ Ísrɛ̄lu, odúúdú aá kóō yá ɔdā dúúmā nōo he aá ɔtū. Aá nyɔ̄ ī pā aɛ́cí kú aá. Amáŋ n gē pi aá ahɔ̄ ka, igbīhi ɛ̄nyā, n gáā cɛ̄ lɛ aá bá ī je uwēyī lɛ iyē otīihɔ kú um mla ɛ̄gbā nɛ̄ aá ī gbā aójibó kú aá gɛ ŋ. Amáŋ aá géē lɛyítáajɛ ga um piíí.

⁴⁰Ipú ajɛ abɔ́ɔ, ɛyí ɛfu otīihɔ kú um ā, ɛfu nɛ̄hi kú Ísrɛ̄lu ā, nɛ̄ odúúdú aá, ācɛ Ísrɛ̄lu ā géē gbā um ɛ̄gbā á. Ɔtū ī he um mla aá, n klla í lɛ eyī ce aá ō bī ɛya mla ɛ̄gbā olɔhi fíyɛ́ dúú mɛ́mla ɛhi otīihɔ ā gē um.

⁴¹Eko nɛ̄ n lɛ aá kpó bɛ̄cɛ ŋmá ajɛ aéwɔhá nɛ̄ n pa aá hīla nyɔ̄ ā, nɛ̄ n klla lɛ aá túbá tɔ̄há, n géē mīyɛ ɛya oōyɔlá kú aá. Cɛ́ɛ́ odúúdú aéwɔhá le má ka ami ɔ́ɔ tīihɔ.

⁴²Eko nɛ̄ n lɛ aá kpó cīgbīhi wā Ísrɛ̄lu, ipú ajɛ nɛ̄ n cokónu ka n géē je lɛ aádáádā aá ā, eko ɔ́ɔmā, aá géē jé ka ami ɔ́ɔ wɛ Óndú ā á.

⁴³Eko ɔ́ɔmā, aá géē blakwu ɔdā uwēyī nɛ̄ aá yá, eko nɛ̄ aá je īyī aá iyē tēelihɔ ā. Aá kē í tū īyī aá uwēyī kú aɔ́dā otīihilɛ nɛ̄ aá yá ā.

⁴⁴Eko nɛ̄ n lɛ odée yá ká n lɛ ojīlīmā kú um tū a, aá ācɛ Ísrɛ̄lu, géē jé ka, ami ɔɔ́ wɛ Óndú ā á. Ohígbū ka ń yá mla aá ɛ́gɛ́nɛ̄ ɔ́bíipú kú aá lɛ ā ŋ́, mɛ́mla ɛ́gɛ́nɛ̄ ucē obɔ̄bí kú aá cɛgbá ā ŋ́.” Óndú ā nōo wɛ Ɔwɔicō ā le ka ɛɛ́.

⁴⁵Óndú ā klla da um kahíníi,

⁴⁶“Ɔlɛcɛ, pīyeyī má ɛháajɛ. Tɔ́ɔna obɔ̄bí lɛyíkwu ɛháajɛ mɛ́mla ūpū kú ɛháajɛ ā.

⁴⁷Da ūpū kú ɛháajɛ, nēé hī ka Unɛ́gɛbu ā, kóō pó ɛlā nɛ̄ ami, Óndú ā, nōo wɛ Ɔwɔicō ā gē ka ā. Da ɔ́ ka n yɔ̄ ī tū ɔlá ɛɛ́, ó kē í je ɔcí dóódu, kwu oōŋmó kwu ɛ̄mɛ̄ɛ̄mɛ̄ kú ipú nū ā kpó yi. Ɔdā dúúmā í gáā mí ɔlá ɔ́ɔmā ā glá ŋ́. Ɔlá ā í nyīla ŋmá ɛháajɛ ga ɛhícō, ohɔ́lá kú ígblɛ́nyī ɔlá ā kē í fu ɔ̄cɛ dóódu.

⁴⁸Odúúdú uwā géē má ka ami ɔ́ɔ wɛ Óndú ā, nōo tū ɔlá nyā á, ka ɔ̄cɛ dúúmā í gáā nyí ɔlá nyā glá ŋ́.”

⁴⁹Amáŋ n tá kahíníī, “Óndú ā, nōo wɛ Ɔwɔicō ā, ā yá ká n̄ cɛ̄hɔ̄ nyā ŋ́. Odúúdú ācɛ bá ī ka iŋini ka ami ɔ́ɔ géē kɛlā ipú ita mla ācīije eko dóódu.”