Read idoma ISÍKƐ̄LU 21 Bible Online

ISÍKƐ̄LU 21 - idoma bible

ISÍKƐ̄LU 21

¹Óndú da um ka,

²“Ɔlɛcɛ, kɛlá klá Ujerúsālɛm, kɛlá klá ɛga nɛ̄ ācɛ gē gbɛ̄ɛ̄gbā ā. Pi ajɛ Ísrɛ̄lu ahɔ̄

³ka, ami, Óndú ā, gē ka ka n kwú pīya olɛlā kú uwā ɛɛ́. Ka n géē pi ɛ̄wā kú um ŋmá apɛ́ je odúúdú aá kpó ŋmó, kwú ācɛ olɔhi mla ācɛ obɔ̄bí.

⁴N géē bī ɔkpacaŋgelī kú um le ŋmó odúúdú ācɛ kwu ācɛ okpaakpa mɛ́mla ācobɔ̄bíipú ŋmá ɛháajɛ jāa ga ɛhícō kú ajɛ ā.

⁵Odúúdú ācɛ géē jé ka ami ɔ́ɔ nōo wɛ Óndú ā lɛ ɔkpacaŋgelī kú um pi ɛɛ́, ka ń kē gáā je ɔɔ́ wu apɛ́ gɛ ŋ́.

⁶Ɔlɛcɛ, tá ifu bɛ̄ɛka ɔdā nɛ̄ Ɔtūnobí le nwuné fíyɛ́ uwɔ abɔ́ ā. Tá ifu ipú ɔtūnōbí, ɛga nɛ̄ odúúdú ācɛ a géē má uwɔ.

⁷Eko dúúmā nēé lɛ ɔ̄kā da uwɔ kahíníī, “Ɔdíyá nāa ge tá ifu ā? Da uwá ka, anɔ́ɔ yɔ̄ ī tíifu ohígbū ɔ̄kā nɔ́ɔ yɔ̄ ī wā ā. Eko dúúmā nɛ̄ ɔ̄kā ā gā, ipú kú odúúdú uwā géē je gbogodo, abɔ̄ í hɛ́ uwā iyē, ɔtū kú uwá í je gbenyi, okwúukwu kú uwá klla í fīyégbúlú. Eko le yá ɛɛ́, eko ā gā ɛɛ” Óndú ā nōo wɛ Ɔwɔicō ā i ka ɛɛ́.

⁸Óndú ā da um kahíníī,

⁹“Ɔlɛcɛ, le ɔdā nɛ̄ Óndú a yɔ̄ ī ka a ka lɛ ācɛ ā. Da uwā ka, “É lɛ ɔkpacaŋ́gelī éyi tūlé klla lɛ ɔ́ nya pálúú ɛɛ́.

¹⁰É tū ɔ̄ ulé ká ō ŋmó ɔ̄cɛ, é tū ɔ̄ ulé pálúú kóō ceyī bɛ̄ɛka ɔwolímanya ā. Éeyē dúúmā í gáā yɔ̄ ŋ́, ohígbū ka ācɛ ɔlɛ́ um a i jāhɔ̄ lɛ ahɔ̄ dúúmā nɛ̄ n pi uwá anú ā mɛ́mla itali nɛ̄ n le kwu uwá ɔkwu ā ŋ́.

¹¹É bá ī tū ɔkpacaŋ́gelī ā ulé ká ē bī ɔ̄ yúklɔ́. É tū ɔɔ́ ulé ká ē je ɔ tá ipú abɔ̄ kú ɔ̄cɛ oŋmó ɔ̄cɛ.

¹²Ɔlɛcɛ, tíifu ipú ɔtūnōbí. Ohígbū ka é tū ɔkpacaŋ́gelī ā ulé lɛyíkwu ācɛ ɔlɛ́ um, mɛ́mla odúúdú aótrɛ̄yí kú Ísrɛ̄lu ā nɛ. É gēe kpó uwá mɛ́mla odúúdú ācɛ ohile ā ŋmó. Lɛ abɔ̄ fíyɛ́ ɔtū ŋmá lɛ ɔtūnōbí.

¹³N yɔ̄ ī jé ācɛ ɔlɛ́ um má, ɔ́dāŋ ka é gbɛlá pīyabɔ̄ ŋ́, ɔdā dóódu nōo yɔ̄ nyā géē yá uwá.”

¹⁴“Ɔlɛcɛ, kɛlā ā tɛ́ɛcɛ, gwó abɔ̄, ɔkpacaŋ́gelī ā kē í gɔ̄ ācɛ klla gɔ̄ uwā igbo alɛwa. Ɔkpacaŋ́gelī nyā gē ŋmó ɔ̄cɛ, ó gē tū ufi, ó klla ī hɛ́ ɔ̄cɛ ɔkɔ.

¹⁵Ó kē ī cɛ̄ lɛ ɔtū kú ācɛ ɔlɛ́ um je gbenyi, nɛ̄ é klla í bá ī gwōnū. N géē bī ɛ̄wā nōo lulé, ī ceyī bɛ̄ɛka ɔwolímanya ā, klla ī ŋmó ɔ̄cɛ ā géē le tū igelī kú ācɛ ɔlɛ́ um ā ufi.

¹⁶Ɔkpacaŋ́gelī olulé, gɔ̄ ācɛ paá paá paá, ga abɔ̄lɔ́ná mla abɔ̄lúfīyē mɛ́mla ɛga dóódu nāa pīyeyī kwu.

¹⁷Ami ā, n kē í yɔ̄ ī gwō abɔ̄ kú um dúú. Cɛ́ɛ́ ícɔ̄nū kú um ū í mɛ. Ami nōo wɛ Óndú ā le ka ɛɛ́.”

¹⁸Óndú klla lɛ ɛlā ka gā um.

¹⁹Ó kahíníī “Ɔlɛcɛ, lɛ ɔwɛ ɛpa nɛ̄ ɔcɛ́ kú Ubábīlɔn gē bī ɔkpacaŋ́gelī kú nū wā ā, mīya tá ajɛ. Ɛplɛ́ɛpa kú ɔwɛ ā géē gbɔɔ́ ŋmá ajɛ ékpónú. Kwú ɔdōocābɔ̄ ú kwu ɛga nɛ̄ ɔwɛ ā nyā ɛpa ā.

²⁰Éyi géē ma ɔwɛ nōo yɛ ga igelī kú ācɛ Ámɔn nēé hī ka Urabbá ā fu lɛ ɔcɛ́ kú Ubábīlɔn. Ɔhá gē ma ɔwɛ nōo yɛ ga Ujúda mɛ́mla Ujerúsālɛm, igelī nēé lɛ igá cē tū ɔ̄ ā fú lɛ ɔcɛ́ kú Ubábīlɔn.

²¹Ɔcɛ́ kú Ubábīlɔn ā géē gáā māháyi pīyɛ̄ ɛga nɛ̄ ɔdōocābɔ̄ ā kwu ajɛ ɔnyɛ̄pa kú ɔwɛ ā. Cɛ́ɛ́ ká ō má ɔwɛ nɛ̄ é géē nyɔ̄ ā, ó klla í tá ahámgbā kú nū ce acá. Ó í da ɛcí kú nū ɔ̄kā, klla í jila anyī kú ɛbɛ́ nōo le gwɛ́ɛya lɛ ɛcí kú nū ā má.

²²Abālɔbányā, abɔ̄ kú nū gáā bī ɔyī nēé tá iyē kú Ujerúsālɛm tū ɔɔ́ ā. Ɔ́ɔmā ī da ɔ́ ka ɔɔ̄ lɛ ɛgba kú ɛfú dɛ̄, kéē nyɔ̄ í gbɔɔ́ ō ca ɔdɔ kú Ujerúsālɛm. Ká ō kwú otúta kú ɛfú ā ú kwu ɔwɛ kú igá kú igelī ā, cɛ́ɛ́ ká ō lɛ ɔ̄gɔ̄ bū tū ɔ̄ lɛ íbɔm ce tū ɔ̄.

²³Ācɛ Ujerúsālɛm í gáā cɛ̄ ka ɛ̄nyā ɔ́ɔ géē yá glá ŋ́, ohígbū okónu kú ɛbɔ́ nēé ce mla uwá ā. Amáŋ ɛbɛ oōmá nyā géē bla ɔ́bíipú nēé bī ā tū uwá, klla í pi uwā ahɔ̄ kéē géē kpó uwā kwú.

²⁴Ohígbū ɔ́ɔmā ɛ̄nyā wɛ ɔdā nɛ̄ ami, Óndú ā, nōo wɛ Ɔwɔicō ā gē ka á. Ɔ́bíipú kú aá má tɛ́ɛcɛ ɛɛ́, ācɛ dóódu kē lɛ ɛpɔ̄bí kú aá má ɛɛ́. Aá gē ma ɔ́bíipú kú aá fú, ipú ucē oōyá kú aá dóódu. Aá lɛ ɛpɔ̄bí lé, é kē géē kpó aá kwú bɛ̄ɛka aálagbá ā.

²⁵Ɔcɛ́ kú ācɛ Ísrɛ̄lu, awɔ, ɔ̄cobɔ̄bíipú, nɔ́ɔ wɛ ákú Ɔwɔicō ŋ́ ma. Ɛ̄cī kú uwɔ nēé gáā yá uwɔ ōwē ā ga ɛɛ́.

²⁶Ami, Óndú ā nōo wɛ Ɔwɔicō ā lɛ ɛlā ka ɛɛ́. Kwú ɔfulā mla ahilíki ogbō ɛyí kú uwɔ í plá bá ajɛ. Ɔdā dúúmā í klla gáā lɛ ɛ́gɛ́nɛ̄ é tɛtɛ lɛ ā ɛɛ́ gɛ ŋ́. É géē je aógbɛhá ce ɔcɛ́ klla í mīyɛ ācɛ nēe cɔcɛ́ ā ɔfú.

²⁷Ífíífi nɛ̄ n géē je Ujerúsālɛm yá ā. Amáŋ ɛ̄nyā í gáā yá ŋ́ jāā gbéeko nɛ̄ ɔ̄cɛ nɛ̄ n fu ká ō je ōwē lɛ igelī ā gā. Eko ɔ́ɔmā, n géē je igelī ā lɛ ɔ́, ka ó je ɔɔ́ yíífi.

²⁸Ɔlɛcɛ, tɔ́ɔna ka ɔdā nɛ̄ ami, Óndú ā, nōo wɛ Ɔwɔicō ā gē ka lɛ ācɛ Ámɔn nēe ge cá ācɛ Ísrɛ̄lu ɛcá ā. Da uwá kahíníī, “É lɛ ɔkpacaŋ́gelī tútū ō le yá ācɛ ífi ɛɛ́. É lɛ ɔ́ nya palúú kóō ŋmó ɔ̄cɛ klla ceyī bɛ̄ɛka Ɔwolímanya ā.

²⁹Ɛbɛ nɛ̄ aá gē má mɛ́mla ɔdā nōo géē yá ɛ̄cɔ̄bū nɛ̄ aá gē ka ɔ́ɔmā wɛ ɛ̄kɛ̄mgbɛ̄. Aá bɔ́bíipú, klla ī yá ɔdōbɔ̄bí, ɛ̄cī nēé í ŋmó aá ɛpɔ̄bí klla í yá aá italā kē yɔ̄ ī wā ɛɛ́. Ɔkpacaŋ́gelī wā gáā je āa ɔkɔ hɛ́ ɛɛ́.

³⁰Kwú ɔkpacaŋ́gelī ā ú wu apɛ́. N géē kɛpɔ̄ tū aá ɛga nēé yá aá piíí ā. Ipú ajɛ nɛ̄ ɛ́nɛ́ ma aá ā, abɔ́ɔ nɛ̄ n géē kɛpɔ̄ tū aá á.

³¹N géē yá ɛlā ŋmá lɛ ícɔ̄nū kú um. Ó géē lɛbɛ̄ɛka ɛ́gɛ́nɛ̄ ɔlá kú útuló gē yi ɔ̄cɛ ā. N géē je aá tá abɔ̄ ācobɔ́bíipú nɛ̄hi, ācɛ nēe wɛ ɔka kú odée ō je yíífi.

³²Ɔlá géē je aá yíífi, é géē ŋmó aá bónū ajɛ ɔlɛ́ aá piíí ā. Ɔ̄cɛ dúúmā í gáā blakwu aá, ɔhá ɛɛ́ gɛ ŋ́.” Óndú ā lɛ ɛlā ka ɛɛ́.