Read idoma ISÍKƐ̄LU 22 Bible Online

ISÍKƐ̄LU 22 - idoma bible

ISÍKƐ̄LU 22

¹Ígbɔhá Óndú ā klla ka ɛlā ga um kpɔ́.

²Ó kahíníī, “Ɔlɛcɛ, a lē tútū ō kɛpɔ̄ tū igelī nɛ̄ ācoŋmócɛ wɛ omōōmu nū ɛ̄ɛ̄? Lɛ odúúdú ucē ɛbí nēé yá ā ka lɛ uwa.

³Le ka lɛ ācɛ ipɔ́lɛ́ ɔ́ɔmā ɔdā nɛ̄ ami, Óndú ā, nōo wɛ Ɔwɔicō ā yɔ̄ gē ka ā ka, ‘Abɔ̄ aá lɛ ācɛ alɛwa kú ɔlɛ́ aá piíí ā kpó ŋmó, klla le iyī aá íye tēelihɔ mla ɛcí nɛ̄ aá ī pa ā, eko ōwē kú aá gē wā ɛɛ́.

⁴Aá lɛ ɛpɔ̄bí lé ohígbū ācɛ nɛ̄ aá ŋmó ɔ́ɔmā, aá klla lɛ iyē kú aá tēelihɔ ohígbū ɛcí nɛ̄ aá gē pā ā. Ohígbū ɔ́ɔmā eko nēé í kpó aá yíífi ā gē wā ɛɛ́. Eko nēé je lɛ aá mɛ ɛɛ́. Ɔdā nōo ya ɛ́ɛ́ nɛ̄ n cɛ̄ lɛ odúúdú aéwɔhá géē yá aá okónu klla ī cē okónu tá aá gbɛdɛɛ ā yɔ̄ abɔ́ɔ á.

⁵Aéwo nēe kwu aá ajaajɛ mɛ́mla aéwo nēe bá ligbó lɛ aá ā, géē kpó ɛnwū tū aá, ohígbū ɛ́gɛ́nɛ̄ aá géē lā ipú ákanya mɛ́mla ígbájí lɛ aā.

⁶Odúúdú aótrɛ̄yí kú Ísrɛ̄lu lɛ ɔtū kpó ce ɔfú kú abɔ̄yī uwā, anɔ́ɔ é gē ŋmó ācɛ á.

⁷Aá nēe lā ipú igelī ā í lɛ ojīlīmā ce aɛ́nɛ́ aá mɛ́mla aádā aá ŋ́. Aá gē yá aúgbɔga nēe lā ipú aá ŋmó. Aá klla gē yá ayíyókwū mla anyōkwū ucē obɔ̄bí, ī pīya uwá tū.

⁸Aá gē lɛ eyī gwō aɛ́ga otīihɔ kú um bónū klla ī yá aɔ́dā nɛ̄ aá cíkā ō yá aɛ́cī nɛ̄ n tū ka aá yúklɔ́ ŋ́ mā.

⁹Aóhī kú aá gē cīije bá ācɛ ɔhá o yá ɛ́ɛ́ kú e lɛ uwá kpó ŋmó bónū. Ācɛ ōhī kú aá gē lé ɔdōlé nēe le gwɛ́ɛya lɛ ɛ̄cī ā, aíkpɛ́cí ā. Aɔ́há klla ī yúnwū ī cikpó iyī uwā ɔwɛ nōo lɔhi ŋ́ eko dóódu.

¹⁰Ipú aá ā, ācɛ ōhī bá ī cikpó ɔnyā kú ádā uwá, aōhī klla bá ī cikpó anyā nēe bá eko oōnyílá kú uwā.

¹¹É i yá ɔdā ihilɛ mla ɔnyā ɔ́mpa uwā, ācɛ ōhī i yá unwū ɔnyā tá ɔyí ádā uwā nɔ̄nyā, aɔ́há í gē tēelihɔ anyā ayí uwā ŋ́.

¹²Ipú aá a, ācɛ bá i lé ómíci ce oyī kú ācɛ ɔhá oōpiya bónū, iyē kú aá lɛ itene abɔ̄ ɔfú ō lé jé ŋmá ɛgiyí ɔ́mpa aá ɛɛ́, anɔ́ɔ aá kwú mlanyī um á. Óndú ā ka á.

¹³Má ɔ̄! N lɛ abɔ̄ fíyɛ́ ɔhá lɛyí kwu itene īnyī nɛ̄ aá i lé mla oyī kú ācɛ nōo ī pɛ́ ɔtāhɛ̄ aá ā.

¹⁴Aá géē lɛ ɔtū kpɔ́ ɛ́ɛ́ nɛɛ ámāŋ lɔfú je abɔ̄ kú aá gicō gla eko nɛ̄ n le yá kweyí mla aá glla āa? Ami, nōo wɛ Óndú ā le ka ɛɛ́, n ke i yá ɔ̄.

¹⁵N géē pa aá hīla ga ipú aéwo ā, cɛ́ɛ́ n lɛ eyī gwō aá bónū ɛyí ajɛ ā.

¹⁶É géē tēelihɔ iyē kú aá ɔtāhɛ̄ kú aéwo ɔhá, cɛ́ɛ́ aá géē jé ka ami ɔ́ɔ wɛ Óndú ā á.

¹⁷Óndú da um kahíníi,

¹⁸“Ɔyí ɔ̄cɛ; ācɛ Ísrɛ̄lu ā í lɛ ilē dúúmā gā um ŋ́. É lɛbɛ̄ɛka o ímíyóŋjō kú oje, udɔ, ugóolu (oje ɔdɔ), mla oje nɛhɛ nēé gē mā ɔ̄ tá bá ipú ɔlá kú útuló ā nɛ̄.

¹⁹Ami Óndú ā, nōo wɛ Ɔwɔicō ā gē da uwá ka é lɛ ile dúúmā ŋ́ bɛ̄ɛka ímíyóŋjō ā. N géē kpó odúúdú uwá wā ɔtāhɛ̄ kú Ujerúsālɛm.

²⁰Ɔwɛ ékpónú nēé gē kpó ímíyóŋjō kú oje, udɔ, ugóolu (oje ɔdɔ) mla oje nɛhɛ bá ipú ɔlá kú útuló ā. Íwɔ́tū mla ɔnū kú um í je uwá ja, ɛ́gɛ́nɛ̄ ɔlá kú útuló ī je ímíyóŋjō kpó ja ipú nū ā.

²¹Īī, n géē kpó uwā wā Ujerúsālɛm, géē gwɔ́ɔ́lá kwu uwá ɔkwu, kllá ī je uwá kpó ja bónū ipú íwɔ́tū kú um abɔ́ɔ.

²²É géē je ja ŋmá ajɛ Ujerúsālɛm, ɛ́gɛ́nɛ̄ oje gē je ja ipú ɔlá kú útuló ā; eko ɔ́ɔmā, uwá géē jé ka aá bá ī jɛ̄ ɔlá kú íwɔ́tū kú um.”

²³Óndú ā kɛlā ga um igbɔhá kahíníī.

²⁴Ɔyí ɔ̄cɛ, le ka lɛ ācɛ Ísrɛ̄lu ka ajɛ kú uwá a, í tīhɔ gɛ ŋ́. Ohígbū ɔ́ɔmā, n géē je ōwē lɛ ɔ́ ipú íwɔ́tū mla ɔnū kú um.

²⁵Aótrɛ̄yí kú uwá a lɛbɛ̄ɛka ágábá nōo yɔ̄ ī tū oji giyí ɛbɛ́ nɛ̄ ó ŋmó ā. É lɛ ācɛ a kpó ŋmó, kwú odúúdú ije mla agbénú kú uwá nēé glá ā ú kpó. Ipú ācɛ oōŋmó kú uwá a, é kwú anyā alɛwa ú pīya anyōkwū.

²⁶Ācogwɛ́ɛya kú uwā ā kwú íne kú um u nyílá, é klla lɛ ojīlīma ce ɔdā otīihɔ kú um ā ɛ́ɛ́ gɛ ŋ́. É kllá jé ɛyɛ́ɛ́yí kú ɔdā otīihɔ mla ɔdā nōo tīhɔ ŋ́ má gɛ ŋ́. É klla jé ɛyɛ́ɛ́yí kú ɔdā oyēŋēē mla ɔdā oblínyī gɛ ŋ́. É lɛ ɛlá wu ɛ̄cī usábāti kú um ā ŋ́, ohígbū ɔ́ɔmā, ācɛ Ísrɛ̄lu í lɛ ojīlīma ce um gɛ ŋ́.

²⁷Aótrɛ̄yí kú igɛ́mɛ́nti a lɛbɛ̄ɛka ɔgwú nōo yɔ̄ ī híla ɛbɛ́ nōo ŋmó ā cɛ́kɛ̄cɛkɛ̄ ā. É ba í ŋmó ācɛ, o yá ɛ́ɛ́ ké ē kwú gbo agbénú mla ɔdu.

²⁸Ācomɛ́ɛbɛ ā kwú íne nɛ̄ é bīya nyā ú kpó tayínū bɛ̄ɛka ɔ̄kā kú ɔ̄cɛ nōo ge lɛ áfū nɛ̄hɛ́ nya ɔdɔ nōbí iyē ā. E gē mɛ́ɛbɛ ɛ̄kɛ̄mgbɛ̄ klla í kɛlā ɛ̄kɛ̄mgbɛ̄ áncā. Nááná, é ka aá ɔɔ́ kē ba ī kɛlā kú Óndú ā, nōo wɛ Ɔwɔicō ā. Amáŋ ami, nōo wɛ Óndú ā í ka ɔdā dúúmā lɛ uwá ŋ́.

²⁹Ipú ɔdu mla agbénú kú uwā ā, é gē hɛ́ ācɛ lé klla ī wūuwi. É gē yá aógbɛhá ɔdōbɔ̄bí klla í pīya aéwɔhá tū.

³⁰N yɔ̄ í tíne ká n̄ má ɔ̄cɛ éyi nōo lɔfú hɛ́ ɔdɔ, nōo géē māháyi ɛga nɛ̄ ɔdɔ je wúla wā ajɛ ā, nōo géē cɛ̄pɔ̄ ajɛ ā, eko nɛ̄ ɔnū mla íwɔ́tū kú um gáā je ajɛ ā yíífi. Amáŋ ń má ɔ̄cɛ dúúmā lɛ á ŋ́.

³¹Ohígbū ɔ́ɔmā, íwɔ́tū kú um géē je wī wā í klá uwá bɛ̄ɛka ɔlá ā. Ó géē je uwá kpó yíífi ohígbū ɔdā nēé yá ā.” Ami, Óndú ā, nōo wɛ Ɔwɔicō ā lɛ ɛlā ka ɛɛ́.