Read idoma ISÍKƐ̄LU 23 Bible Online

ISÍKƐ̄LU 23 - idoma bible

ISÍKƐ̄LU 23

²Ó kahíníī, “Ɔlɛcɛ, ayínɛ́ nɔ̄nyā ɛpa éyi bá.

³Eko nēé wɛ ayípɛ̄ ā, é lā Íjīpiti. Eko ɔ́ɔmā é lɛ ācɛnyīlɔ jé, klla kwú pīya aákwuna.

⁴Iyē kú ɔnyakwɔ́cɛ ā lé ka Ohóla, nōo kwɛyí Usɛmérīya ā. Iyē kú ɛnɛ̄ŋcɛ́ ā lé ka Oholíba, nōo kwɛyí Ujerúsālɛm ā. N lɛ uwá lɛ anyā um, é klla ma ayí gā um.

⁵Nááná nɛ̄ Ohóla wɛ ákú um ā, ó yɔ̄ í yá akwuna kpɔ́ klla yɔ̄ ī yúnwū aɔ́ya nū nēe wɛ ācɛ Asírīya ā.

⁶Odúúdú uwá nɛ̄ ó gē gbō ajā tá uwá ā wɛ aótrɛ̄yí kú aícɔ́ɔja alɛwa. É jōklóbīya, le gbo héyīfuú héyīfuú, klla ī ce aɔ́nya.

⁷Ó wɛ akwuna nɛ̄ odúúdú aótrɛyí kú aícɔ́ɔja kú Asírīya ā bá ī cikpó nū. Unwū ācɛnyīlɔ nɛ̄ ó ī yá ā klla lɛ ɔ́ bī nyɔ̄ í lɛ īyī nū iyē tēelihɔ ŋmá lɛ aɛ́cí kú Asírīya ō pā.

⁸Ó yɔ̄ ī ya akwuna kú nū nɛ̄ ó gbɔɔ́ ŋmá Íjīpiti, ɛga nēé jé ɔ̄ ɔnyā ā kpɔ́. Ŋmá eko nōo gbo ɔɔ́ ō híkpó amɛ̄ ā, nɛ̄ ācɛnyīlɔ gbo ɔ́ ō cikpó nū, klla gbɔɔ́ ō yá mla anú ɛ́gɛ́nɛ̄ é ī yá mla akwuna ā á.

⁹Ohígbū ɔ́ɔmā n kwú ɔ́ ú lɛ ācɛ Asírīya, nēe he ɔ́ ɔtū ō gbajā tá uwá nɛ̄hi ā.

¹⁰É kwú ɔ̄ ú tá ohɛ́ɛwa, bī ɔkpacaŋ́gelī lɛ ɔ́ ŋmó, klla kwú ayí nū í kpó kwú. Ɛga dóódu ācɛnyā bá ī kɛlā kú nū lɛyíkwu ɔdā nōo yá ɔ̄ ŋmá lɛ ɛpɔ̄ nēé ka tū ɔ̄ ā.

¹¹Nááná nɛ̄ ɔyínɛ́ nū, Oholíba, má ɔdā nōo yá Ohóla ā, ó yɛce ucē obɔ̄bí kú nū ɔ́ɔmā kpɔ́. Anū klla bɔ̄bí ipú únwū ācɛnyīlɔ mɛ́mla akwuna oōyá fíyɛ́ Ohóla á.

¹²Ó klla gbo unwū ācɛnyīlɔ ō yá tá ācɛ nɛ̄hi mɛ́mla aótrɛ̄yí kú aícɔ́ɔja mɛ́mla aícɔ́ɔja kú Asírīya, kwu aɛ́nɛ̄ e ī ce aɔ́nya. Odúúdú uwā le gbō héyīfuú heyīfuú klla jōklóbiya.

¹³N le má ka ɔyínɛ́ nɛ̄ŋcɛ̄ ā le bīya bɛ̄ɛka ɔyínɛ́ nū nɔ̄nyā nɔ̄nyākwɔ́ɔcɛ ā dúú. Uwá wɛ ɔdā ékpónú.

¹⁴Ohóliba klla yɔ̄ ī nyɔ̄ lipú lipú, ipú unwū ācɛnyīlɔ nɛ̄ ó ī yá ā mɛ́mla ajā nɛ̄ ó ī gbō ā. Ó lɛ ifotó kú aótrɛyí kú ācɛ kú Ubábīlɔn nēé kpó tū ɔdɔ, nēé lɛ ɛwɔ́ nɔ̄wá nya ɔ́ ā má.

¹⁵Ācɛ ɔ́ɔmā lɛ ɔkpá ō gbō ɛ́nyɔ́ gbō ɛ́nyɔ́, klla lɛ ɔdée oheyīfuú gbo ɛyí bɛ̄ɛka aótrɛyí kú aícɔ́ɔja o ce ɔnya kú ācɛ Ubábīlɔn ā.

¹⁶Obōōbū nɛ̄ ó lɛ ɔ́ má, únwū uwā gbɔɔ́ ō ŋmó ɔ̄. Anɔ́ɔ ó lɛ ɛhɔ̄ tū fu uwá, ajɛ Ubábīlɔn.

¹⁷Ācɛ Ubábīlɔn ā ga gáā lɛ ikpó nū ce. É ce ikpó nū gbóógbó, klla le ɔ́ iyē tēelihɔ gbóógbó gbéeko nɛ̄ uwá kwú ce ɔ̄ eyī.

¹⁸Abɔ̄ ó kwú īyī nū ú tɛ́ɛcɛ péee, cɛ́ɛ́ ká odúúdú ācɛ kéē má ka ɔ́ɔ wɛ akwunaā, ó kwú ce um eyī bɛ̄ɛka ɔyínɛ́ nū ā.

¹⁹Ohóliba í kwɛjī abɔ́ɔ nó ŋ. Ó klla gbɔɔ́ ō yá ɛ́gɛ́nɛ̄ ó yá eko nōo wɛ ɔyípɔ̄nɔ̄nyā, nɛ̄ ó wɛ akwuna ajɛ Íjīpiti ā.

²⁰Ó gbɔɔ́ ō yá únwū kú ācɛnyīlɔ nɛ̄ apī kú uwā nwuné lɛbɛ̄ɛka apī kú ijakī, nɛ̄ e ī tá iyē láyí bɛ̄ɛka ákú ɔbá ɔnya ā.

²¹Oholíba, a tíne ō gbajá ɛ́dɔ obɔ̄bí ɛ́gɛ́nɛ̄ a tɛtɛ yá ajɛ Íjīpiti ā. Abɔ́ɔ nɛ̄ ācɛnyīlɔ lɛ abɔ̄ ma uwɔ amɛ̄ klla je uwɔ ɔnyā ā.”

²²Anɔ́ɔ Ayisáya da Ohóliba ka ohígbū ɔdā nōo yá ā, Óndú ā, nōo wɛ Ɔwɔicō ā, ɔ́ɔ da anúɔ ka anúɔ lɛ ɛnyā da ɔ́. Kahíníī, “Eyī kú ācɛ nēe gē cikpó uwɔ ɔ́ɔmā le cā uwɔ ɛɛ́, amáŋ ami, Óndú ā nōo wɛ Ɔwɔicō ā, géē yá kéē le cɔ̄nū lɛyíkwu uwɔ, klla wā í le jīla tū uwɔ biílí.

²³N géē kpó odúúdú ayípōklóbīya ācɛ nɛ̄hi nēe jōklóbīya ā mɛ́mla aótrɛ̄yí kú aícɔ́ɔja o ī ce ɔnya kú ācɛ Ubábīlɔn mɛ́mla ācɛ Ucaldíi nēe ŋmá Upékodu, Ussówa, mɛ́mla Ukowa ā, klla mɛ́mla ákú Asírīya ā wā í jīla tū uwɔ.

²⁴Uwá géē wā ŋmá ɛhícō wā í kpɛ́fú tá uwɔ, mla aícɔ́ɔja lɛwa lɛwa, nēe bī aúgbɔ́nya okpɛ́fú mɛ́mla okpíyó alɛwa. É bī ɔdā okwɛyí kú oje mla ɔkplɛ́fu gbō iyī uwā, é géē wā ī jīla tū uwɔ. N géē je uwɔ tá ipú abɔ̄ uwā, uwá kē í bī íne kú uwá le kɛpɔ̄ tū uwɔ.

²⁵Abɔ̄ n kwú cɔ̄nū lɛyíkwu uwɔ ɛɛ́ mā, n géē cɛ lɛ uwá yá mla awɔ ipú ícɔ̄nū kú uwā. É géē kpó uwɔ ɛnwū mɛ́mla ahɔ̄ hɛ́, klla í bī ɔkpacaŋ́gelī ŋmó ācɛ ɔlɛ́ uwɔ dúúma nēe hile oyēeyī. É géē kpó ayí uwɔ kwú aɔ́fiyɛ, klla í je ācɛ ɔlɛ́ uwɔ ohile kpó tū ɔlá oyēeyī.

²⁶É géē kpó aílī kú uwɔ híla ŋmá uwɔ iyē, klla í je agbá ōtū ɔkɔ mɛ́mla ɔdā ōtū abɔ̄, mɛ́mla ɔdōplahɔ̄ kú uwɔ kpó.

²⁷Unwū ācɛnyīlɔ mɛ́mla akwuna nāa húmáyī yá ŋmá ajaajɛ, eko nāa yɔ̄ Íjīpiti ā, géē mɛ. Á klla gáā má aɔ́dā ɔ́ɔmā ɛbɛ cīkpɔ̄ɔkɔ ɛɛ́ nɛ̄ a gē gbɛlá kwu Íjīpiti gɛ ŋ́.”

²⁸Óndú ā, nōo wɛ Ɔwɔicō ā ka anúɔ géē je uwɔ lɛ ācɛ nēe gē wú uwɔ ɔtū, nɛ̄ eyī uwā klla le cá uwɔ ā.

²⁹Uwá kē ī wɔ́tū uwɔ dúú, géē je odúúdú agbénú mla iyō kú uwɔ nāa yúklɔ́ kú nū ipú oyēeyī kú uwɔ ā kpó, klla géē pllá īlī ŋmá uwɔ iyē, je uwɔ ɔkwu tɛ́ɛcɛ bɛ̄ɛka akwuna ā. Únwū ācɛnyīlɔ mɛ́mla akwuna ō yá kú uwɔ ā

³⁰kē bī ɛ̄nyā gē lɛ uwɔ á. A le pīya akwuna lɛ aéwɔhá ā, klla kwú īyī uwɔ iyē ú tēelihɔ mla ɛcí kú uwā.

³¹Ɛdɔ̄ ucē kú ɔyínɛ uwɔ nāa ī yá á, ohígbū ɔ́ɔmā, n géē bī okoolo kú ōwē nɛ̄ n miya lɛ ɔyínɛ́ uwɔ ā i miya gā uwɔ dúú.”

³²Óndú ā, nōo wɛ Ɔwɔicō ā kahíníī, “A géē gwá ŋmá okoolo kú ōwē kú ɔyínɛ uwɔ ɔ́ɔmā. Okoolo ɔ́ɔmā lɔwá klla lipú. Odúúdú ācɛ géē yá uwɔ okónu klla í yɛhɛ tū uwɔ, ohígbū ka okoolo ā le mu.

³³A géē gwá ŋmá okoolo kú ɔdā ufi mɛ́mla ocatāajɛ kú ɔyínɛ́ uwɔ, Usamérīya, ɔ́ɔmā.

³⁴A í gwá ɔ̄ mɛ dúúdú, í ca ɔ̄, klla ī bī ācáŋjɔ̄ kú nū le fā iyī uwɔ amɛ̄. Ami, Óndú ā, nōo wɛ Ɔwɔicō ā le ka ɛɛ́.”

³⁵Ɛ̄nyā wɛ ɔdā nɛ̄ Óndú ā, nōo wɛ Ɔwɔicō ā gē ka á, “Abɔ̄ a kwú ɛlá um gwō, kwú igbīhi ú ce kwú um ā, a géē móōwē kú unwū ācɛnyīlɔ mla akwuna nāa yá ā.”

³⁶Óndú ā da um kahíníī, “Ɔlɛcɛ, a le tútū kú ā kɛpɔ̄ tū Ohóla mɛ́mla Ohólība ɛɛ́ ɛ̄ɛ̄? Le ɛlā kú ucē ɛbí nēé yá ā kpó ce uwá.

³⁷É lɛ ajā gbo klla lɛ ɔ̄cɛ ŋmó ɛɛ́. É gbaajā ŋmá lɛ aɛ́cí nēé pā ā. É kē ŋmó ayí nēé ma gā um ā. É lɛ ayí um ā gwɛ́ɛya lɛ aɛ́cí.

³⁸Ó wɛ ɔ́ɔmā ōfōōfūnū nēé yá ā ŋ́. É lɛ Agblīihɔ-nɛ̄hi kú um nyílá,klla lɛ aɛ́cī nɛ̄ n tū kéē híī yúklɔ́ ŋ mā tá nyílá.

³⁹Ɛ̄cī ékpónú piíí nēé ŋmó ayí um kpó uwā gwɛ́ɛya lɛ aɛ́cí ā, nēé wā í je Agbliihɔ-nɛ̄hi kú um tēelihɔ á.

⁴⁰Igbɛ alɛwa é gē pla ācɛnyīlɔ ŋmá ɛga oligbó wā, ācɛnyīlɔ ā kē pɛ́ wā. Ayínɛ́ ɛpa nyā gē gwīiyē klla í kpo ɛwɔ́ mɛ́mla ɔtanjilé mɛ́mla ukpamkéeke tū eyī kú uwá, klla í kpó agbá otɔ̄ɔkɔ mɛ́mla ɔdā otābɔ mɛ́mla ɔdōplahɔ̄ mɛ́mla ɛnwū tū iyē.

⁴¹É ī gáā cīce agōdō olɔɔlɔhi, klla lɛ utéblu tá iyɔ̄bū uwā lɛ ɔtulalī mɛ́mla anɔ̄ nɛ̄ n je lɛ uwá ā, kpó ce ɛyí nū.

⁴²Inu ɔlɛ́ uwā le mu eko dóódu mla ɛwa kú ācɛ ɛflɛ́ɛfu nēé kpó ŋmá ígbíli wā, bá ī yá uya klla bá ī gwá ejé. É kwú aóje otābɔ̄ í kpó tū anyā ā abɔ̄, klla kwú aɔfūlā ohéyīfuú í kpó kwu uwá ɛyí.

⁴³Anɔ́ɔ n da īyī um ka, anyā nɛ̄ ācɛ lɛ ikpo uwā ce kwɛyí le gbokwū ɛɛ́ mā, nɛ̄ ācɛ ā ī tíne ō cikpó uwā á. Ó lɛ a, kéē yá mɛ́ɛnɛ.

⁴⁴É nyɔ̄ í cikpó uwá, klla nyɔ̄ í cikpó uwá agōdō. É klá kwúcē wā í cikpó Ohóla mla oholíba, anyā ō yá unwū ācɛnyīlɔ ā.

⁴⁵Ācɛ okpaakpa géē ŋmó uwā ɛpɔ̄bí kú ajā nēé gbo ā, mɛ́mla ācɛ nēé ŋmó ā, ohígbū ka uwá gē gbaajā, é kē lɛ ācɛ ŋmó.”

⁴⁶Óndú ā, nōo wɛ Ɔwɔicō ā kéē lɛ ɛwa kpó wā í tū uwá ufi klla hɛ́ uwā éjulúgwu.

⁴⁷Ɛwa ā géē tá ɛcɔ̄ klá uwá, í kpó ɔkpacaŋgelī le ŋmó uwā, í kpó ayí uwā ŋmó, klla í tū ɔlɛ́ uwá ɔlá.

⁴⁸Oŋmá lɛ ɔdā nɛ̄ n géē yá uwā ā, n géē je ɔdā icííci oyá ŋmɛ́yí ŋmá ipú odúúdú ajɛ ā. Odúúdú ācɛnyā í nwū ɛlā ŋmá ɔ́ɔmā nɛ̄ odúúmā í klla gáā gbaajā bɛ̄ɛka uwá ā gɛ ŋ́.

⁴⁹Aá, ayínɛ́ nɔ̄nyā ɛpa nyā, n gē je ōwē lɛ aá ohígbū ajā nɛ̄ aá gbo ā, mɛ́mla ɔ́bíipú nɛ̄ aá bī ŋmá lɛ ɛcí nɛ̄ aá pá ā. Cɛ́ɛ́ aá le jé ka ami ɔ́ɔ wɛ Óndú ā, nōo wɛ Ɔwɔicō á.”