Read idoma ISÍKƐ̄LU 24 Bible Online

ISÍKƐ̄LU 24 - idoma bible

ISÍKƐ̄LU 24

¹Ɛ̄cī ɔ́migwó kú ɔya ɔ́migwó kú iháyí ɔ́mahāanɛ nēé kpó alɔ abɔ̄fú ga ajɛ Ubábīlɔn ā, Óndú le ɛlā ka gā um.

²Ó kahíníī, “Ɔlɛcɛ, lɛ ɛ̄cī kú ícɛ tá tāajɛ, ohígbū ka ícɛ wɛ ɛ̄cī nɛ̄ ɔcɛ́ kú Ubábīlɔn gáā gbɔɔ́ ō ce íbɔm tū Ujerúsālɛm á.

³Lɛ ita nyā kwú lɛ ācɛ ɔlɛ́ um nēe ī yíkpɛ̄yí olɔfú ā. Da uwá ka ami, Óndú ā, nōo wɛ Ɔwɔicō ā ɔ́ɔ kahíníī, “Kwú ɛ̄hī ú ce ɔlá ká ā lɛ éŋkpɔ̄ hɛ́ tū ɔ̄ omōōmu.

⁴Kwú átákwū mɛ́mla abɔ̄, nōo wɛ ɛga olɔhi fíyɛ́ dúú kú ɛbɛ́ ā í kpó tū ɔ, mɛ́mla aíkpokwú nēe lɔhi fíyɛ́ ā dúú.

⁵Álá nōo lɔhi fíyɛ́ dúú ā nāa géē ŋmó á. Lɛ ɔlá gwó tū ɛ̄hī ɔkwu cɛ́ɛ́ ká ɛbɛ́ mɛ́mla íkpokwú ā kā é wú, klla le jé.”

⁶Ɛlā nyā nɛ̄ Óndú ā, nōo wɛ Ɔwɔicō ā gē ka á. “É í je Ujerúsālɛm yíífi piíí ohígbū kóō wɛ igelī kú ācɛ o ŋmó ācɛ. Ó lɛbɛ̄ɛka ɛ̄hī nɛ̄ ipú nū le tɛ́kla nēé kē na ɛ́kla ā ŋmá anú ŋ mā. É gē kpó ɛbɛ́ a ŋmá anú éyééye gbéeko nɛ̄ odúúmā í gáā hile ipú ɛ̄hī ā ŋ́.

⁷Ācɛ Ujerúsālɛm gē ŋmó ācɛ ipú igelī ā. É gē pīya oyī kú ācɛ nēé ŋmó ā bá ajɛ ɛga nēé géē tá úmúlá klá ɔɔ́ ā ŋ́. Amáŋ é mā oyī ā tá ɛyí ápátɛ́cɔ̄ nɛ̄ ācɛ í má ɔ̄ cāā ā.

⁸N ma oyī ā tá abɔ́ɔ, ɛga nōo gáā tayínū glá ŋ́ mā. Cɛ́ɛ́ ká ā gē má ɔ̄, o yá ká ɔtū kóō wú um nɛ̄ n géē gwō ɔ̄ ɔ́ci ā.”

⁹Ɛlā nyā nɛ̄ Óndú ā nōo wɛ Ɔwɔicō ā gē ka á. Ó kahíníī “Igelī kú ācɛ o ŋmó ācɛ nyā géē je yíífi piíí. Ami abɔ̄yī um gáā tū ɛfú kú ɔlá īkwū bá ajɛ láyí á.

¹⁰Aá kpó ɛfú ā wā í tū ɔlá, ká aá mu owu tū ɔlá ā. Lɛ ɛbɛ́ ā ce ɔlá ā kóō le he lɔɔlɔhi. Lɛ ɔ́ ce ɔlá jāā nɛ̄ ó kwú kpó yɔɔlá bónū.

¹¹Kwú ɛ̄hī udɔ nɛ̄ ɛbɛ́ ā yɔɔlá ŋmá anú, nōo tá áncā ɔ́ɔmā ú ce ɔlá ká ō le kwɔ́lá yōō. Cɛ́ɛ́ ká īnyī mɛ́mla ɛ́kla kú nū ā kéē le ja bónū, cɛ́ɛ́ kóō le yá yēŋēē.

¹²Ɔdā dúú nɛ̄ ɔ̄cɛ yá nááná í kwú ɔ̄ ŋ́. Īnyī mɛ́mla ɛ́kla ā í yɔɔlá bónū ŋmá anú dúúdú ŋ́.

¹³Ācɛ Ujerúsālɛm, ɛyí īnyī kú ɛ̄hī ɔ́ɔmā wɛ ucē ɔdā icíci mɛ́mla ajā nɛ̄ aá gbo ā, nōo kwú aá iye í tēelihɔ ɛɛ́ mā. Nááná nɛ̄ n yá ká n lɛ aá na yēŋēē ā, aá le nyíliyē kpɔ́. Aá klla gáā le yēŋēē gɛ ŋ́, jāā gbéeko nɛ̄ n lɛ ōwē yá aá jɛ̄ ɛ́gɛ́nɛ̄ n cɔ̄nū lɛyíkwu aá lɛ ā.

¹⁴Ami Óndú ā, nōo wɛ Ɔwɔicō ā lɛ ɛlā ka ɛɛ́. Eko le yá nɛ̄ n gáā cāŋjɛ yá ɛlā nɛ̄ n ka ā ɛɛ́. Ń gáā lɛ eyī gwō ɔ́bíipú kú aá bónū, ɛ́ɛ́ nɛ̄ n gē ményinyi aá ŋ́. N géē je ōwē kú ɔdā nɛ̄ aá yá ā lɛ aá.” Óndú ā, nōo wɛ Ɔwɔicō ā lɛ ɛlā ka ɛɛ́.

¹⁵Óndú ā klla lɛ ɛlā ka gā um igbɔhá. Ó ka,

¹⁶“Ɔlɛcɛ, n géē je ɔ̄cɛ nōo he uwɔ ɔtū fíyɛ́ dúú ā ŋmó acígilí. A ka iŋini dúúmā ɛ́ɛ́ nāa gē jikwū, pɛ́ agīje dúúmā ŋ́.

¹⁷A lɔfú tíifu amáŋ ā cɛ̄ ká ɔ̄cɛ dúúmā ká ō pó ŋ́. Ā híī mā ɛyí kú uwɔ tɛ́ɛcɛ klla lɛ ikpó bá ajɛ yɔ̄ ī mafú ka anúɔ yēkwu ŋ́. Ā lɛ īlī klá okónu ɛ́ɛ́ nāa ge lé ɔdōlé nɛ̄ ācɛ o yēkwu gē lé ā ŋ́.

¹⁸Anɔ́ɔ n le ɛlā ā ka lɛ ācɛ ā ɔ̄cɔ̄ɔ̄cī á. Ɔ̄nɔ̄ɔ̄nɛ̄ kú ícíícɛ ɔ́ɔmā, ɔnyā um gekwú. Oŋmɔ́cī nū n le yá ɛ́gɛ́nɛ̄ Óndú ā da um ā.

¹⁹Anɔ́ɔ ācɛ ā da um ɔ̄kā kahíníī, “Ɔdíyá nāa gē yá lɛ ā?”

²⁰Anɔ́ɔ n da uwá kahíníī, “Óndú kɛlā gā um ka,

²¹ami ɔ́ɔ lɛ ɛhɔ̄ nyā cɛ̄ lɛ aá ka, ‘Aá bá ī yá ɔbɔ́cɛ kú ɔfú kú Agblīihɔ-nɛ̄hi kú um ā. Ó he aá ɔtū ō má, kú aá klla ga ipú nū. Amáŋ n gáā je ɔ́ bīya ɛɛ́. Ayí aá nēe hile ipú ajɛ kú Ísrɛ̄lu ā, é gē je uwá kpó ŋmó ipú ɛfú.’

²²Eko ɔ́ɔmā, aá géē yá ɔdā nɛ̄ n yá ohígbū ikwū kú ɔnyā um ā. Aá gáā lɛ īlī klá okónu, ɛɛ́ nɛ̄ aá gē lé ɔdōlé nɛ̄ ācɛ nēe yēkwu gē lé ā ŋ́.

²³Aá gáā lɛ ɛyí tɛ́ɛcɛ, ɛ́ɛ́ nɛ̄ aá gē lɛ ikpó bá ajɛ áncā bá ī yɛ ŋ́; ɛ́ɛ́ nɛ̄ aá gē yēkwu klla í jikwū ŋ́. Aá géē je kpó nyinyi ŋmá ajɛ, klla í ba ī tíifu ɛga īyī aá, ohígbū ɔ́bíipú kú aá ā.

²⁴Eko ɔ́ɔmā, n géē wɛ ɔdōcābɔ̄ lɛ aá. Aá klla í yá ɔdā nɛ̄ n yá ā. Óndú ā klla kahíníī, ‘Eko nɛ̄ ɔdā nyā le yá aá, cɛ́ɛ́ aá géē jé ka ami ɔ́ɔ wɛ Óndú ā nōo wɛ Ɔwɔicō ā á.’

²⁵Anɔ́ɔ Óndú ā klla da um kpɔ́ kahíníī, “Ɔlɛcɛ, n géē je Agblīihɔ-nɛ̄hi kú uwā nēé kpɔ́tūce, nōo he uwá ɔtū ō má nɛ̄hi klla he uwá ɔtū ō nyɔ̄ ipú nū ɔ́ɔmā yíífi ŋmá ipú uwā. N klla géē kpó ayí uwā ŋmá abɔ̄ uwá dúú.

²⁶Ɛ̄cī nɛ̄ n géē yá ɛ̄nyā, ɔ̄cɛ éyi nōo géē kwú ŋmá ipú ífi ā géē wā ī ka uwɔ ɔ̄kā nū.

²⁷Ɛ̄cī ékpónú ɔ́ɔmā, ɛlā nāa ka glá ŋ mā, a géē lɔfú gbɔɔ́ ō ka. A géē ka ɛlā mla ɔ̄cɛ ɔ́ɔmā. Ɔwɛ nyā nāa ī wɛ ɔdōcabɔ̄ lɛ ācɛ ā á. Cɛ́ɛ́ é géē jé ka ami ɔ́ɔ wɛ Óndú ā á.”