Read idoma ISÍKƐ̄LU 25 Bible Online

ISÍKƐ̄LU 25 - idoma bible

ISÍKƐ̄LU 25

¹ Igbɔhá Ōndú ā klla le ɛlā ka ga um.

²Ó kahíníī, “Ɔlɛcɛ, lɛ eyī pīya kwu ajɛ Ámɔn ká a ka ɛbɛ obɔ̄bí lɛyíkwú éwo ɔ́ɔmā.

³Da uwá ka ē jāhɔ̄ lɛ ɛlā nɛ̄ ami, Óndú ā, nōo wɛ Ɔwɔicō ā gē ka lɛ uwá ā. Da uwá ka ɔtū ɔ́ɔ he uwá eko nɛ̄ ācɛ bá ī je Agblīihɔ-nɛ̄hi kú um ā tēelihɔ, nēé je ajɛ Ísrɛ̄lu tá alácɛ̄, klla kpó ācɛ kú Ujúda nyɔ̄ ga ajɛ kú aéwɔhá abɔ̄fú ā.

⁴Abɔ̄ aá gwéeyē tá uwá, n géē yá ka aéwo kú ɛnɔ̄ɔ̄cī ā ká e wā í lɛ aá yálé. É géē kwú aádɛ́fú kú uwá ipú ajɛ ɔlɛ́ aá klla í bá ipú aá abɔ́ɔ. É géē je īkpɔ̄cí mɛ́mla amɛ̄ ɛna nōo cíkā o wɛ ákú aá ā kpó lé, klla kwú gwá.

⁵N géē je igelī nēé hī ka Urába ā kpó pīya ɛga o kpó aínyankwūlūmī gaá lúlé, klla í je odúúdú ajɛ kú Ámɔn pīya ɛga o kpó aálá gaá lúlé. Cɛ́ɛ́ aá le jé ka ami ɔ́ɔ wɛ Óndú ā á.

⁶Ɛlā nɛ̄ Óndú ā, nōo wɛ Ɔwɔicō ā gē ka ā yɔ̄ á. Ó kahíníī, “Aá gwō abɔ̄ klla tá ómbili gicō, ká aá gwéeyē, ohígbū ka aá wɔ́tū Ísrɛ̄lu nɛ̄hi.

⁷Ohígbū ɔdā nɛ̄ aá yá ɔ́ɔmā ā, n géē je aá tá ipú abɔ̄ aéwɔhá, nēe géē wī aá uwī klla í je aá iyó kpó wu. N géē je aá yíífi dúúdú, nɛ̄ a á klla gáā wɛ éwo kú abɔ̄yī aá gbóógbóō ipú ɛcɛ ɛ́ɛ́ gɛ ŋ́. Cɛ́ɛ́ aá le jé ka ami ɔɔ́ wɛ Óndú ā á.”

⁸Óndú ā, nōo wɛ Ɔwɔicō ā klla lɛ ɛlā ka gā um. Ó kahíníī, “Ācɛ Umówābu ka ka Ujúda ɔ́ɔ lɛbɛ̄ɛka aéwɔhá dóódu ā.

⁹Ohígbū ɔ́ɔmā n géē yá ká ē kpɛ́fú tú aígelī nɛ̄hi kú Umówābu nēé cē igá tū uwā gē gbāajɛ nū ā, mɛ́mla aígelī nɛ̄hi kú ɔlɛ́ nū nɛ̄ ē lɔhi fíyɛ́ dúú nēé hī ka Ubɛ́tjéssīmɔtu, Ubaalmēyɔn mɛ́mla Ukiriyatáyim ā.

¹⁰N géē yá ka ācɛ kú aéwo kú ɛnɔ̄ɔ̄cī ā kéē lɛ ācɛ Umówābu yálé mɛ́mla ācɛ Ámɔn tɔ̄há. Cɛ́ɛ́ Umówābu í klla gáā wɛ éwo gbóógbóō gɛ ŋ́.

¹¹N géē je ōwē lɛ Umówābu, é kē í jé ka ami ɔ́ɔ wɛ Óndú ā á.”

¹²Óndú ā, nōo wɛ Ɔwɔicō ā, klla ka kpɔ́ kahíníī, “Ācɛ Ɛ́dɔm bī ɔnɔɔtū nɛ̄hi le gwō Ujúda ɔ́ci. Ɔ́ci nēé gwō Ujúda ɔ́ɔmā cɛ̄ lɛ ācɛ Ɛ́dɔm lɛ ɛpɔ̄bí nɛ̄hi lé ɛɛ́.

¹³Ohígbū ɔ́ɔmā, ami nōo wɛ Ɔwɔicā gē ka tɛ́ɛcɛ lɛ ācɛ Ɛ́dɔm ā ka n géē je uwá yíífi klla í jē odúúdú ācɛ ɔlɛ́ nū mɛ́mla aɛ́bɛ́ kú nū kpó ŋmó. N géē je ɔlɛ́ ā tá alácɛ̄ ŋmá igelī nēé hī ka Utéman jāā ga ɛ̄nɛ̄ é hī ka Udɛ́dan ā, ɛfú kē í kpó ācɛ ā lé.

¹⁴Ācɛ ɔlɛ́ um, Ísrɛ̄lu ā géē gwō Ɛ́dɔm ɔ́ci gā um piíí, é í yá ka Ɛ́dɔm ā ká ō jɛ̄ ɛ́gɛ́nɛ̄ ícɔ̄nū kú um lɔnɔ lɛ aā. Eko ɔ́ɔmā, Ɛ́dɔm géē jé ɔdā nōo wɛ ká n̄ gwū ɔ̄cɛ dúúmā ɔ́ci ā.” Óndú ā, nōo wɛ Ɔwɔicō ā le ka ɛɛ́.

¹⁵Óndú ā, nōo wɛ Ɔwɔicō ā, kahíníī, “Ācɛ kú Ufilístiya bī íwɔ́tū nɛ̄hi nēé lɛ lɛ ācɛ Ujúda ŋmá īkííkée ā lɛ ɔ́ci gwō uwá klla ī tíne ō je uwá kpó yíífi.

¹⁶Ohígbū ɔ́ɔmā, n géē ka tɛ́ɛcɛ ka n géē kpɛ́fú tá Ufilístiya, í je uwá yíífi. N géē kpó ācɛ Ukɛ́rɛ̄ti ŋmó, klla í je ɔdā dúúmā nē o hile yēeyī ipú ajɛ kú Ufilístiya ā kpó yíífi ŋmá ajɛ.

¹⁷N géē je ōwē obɔ̄bí nɛ̄hi lɛ uwá klla ī gwō uwá ɔ́ci dúúdú. É géē jé ɛ́gɛ́nɛ̄ ícɔnū kú um lɔnɔ lɛ aā. Eko ɔ́ɔmā, uwá géē jé ka ami ɔ́ɔ wɛ Óndú ā á.”