Read idoma ISÍKƐ̄LU 26 Bible Online

ISÍKƐ̄LU 26 - idoma bible

ISÍKƐ̄LU 26

¹Ipú iháyí igwólée ā, ɛ̄cī éyi kú ɔyā, nēe kpó alɔ ŋmá ɔlɛ́ abɔ̄fú ā. Óndú ā wā ɛgiyí um.

²Ó kahíníī “Ɔyí ɔ̄cɛ, ɛ̄nyā wɛ ɔdā nɛ̄ ācɛ Utáya bá í gwéeyē ohígbū nū á. Uwá gē tá ɔga ka, ‘É kwú Ujerúsālɛm ú yíífi ɛɛ́, ɔfú kú ɔ́su, ōtá kú nū ā mɛ ɛɛ́.’ Ó klla gáā kwu alɔ ɛga ɛ́ɛ́ gɛ ŋ́.

³Ícɛ nyā, ɛ̄nyā wɛ ɛlā nɛ̄ ami, Óndú ā nōo lɔfú fíyɛ́ dúú gē ka ohígbū ipɔ́lɛ́ kú utáya á. N kwú pīya olɛlā kú uwɔ̄ ɛɛ́ géē kpó aéwo alɛwa wā í kpɛ́fú tá ɔ̄, uwá géē wā í klá nú bá ajɛ bɛ̄ɛka ísu ā wuu.

⁴É géē je ɔdɔ kú utáya wúla tāajɛ klla í je inɔ̄ɔda olicō kú nū ca tāajɛ. Cɛ́ɛ́ n géē je odúúdú úmúlá kú nū ā kpó gwu bónū gáā hile igbɛ́cɔ̄ ō gbā kú nū ā piyóó mla ápɛ́tɛ́cɔ̄ kú nū ā.

⁵Ācokwɛ́bényi géē nā ɛ́yá kú uwá daa klá ɛcɛ abɔ́ɔ, ɛga nōo māháyi eyī ísu ā. Ami Óndú ā, nōo wɛ Ɔwɔicō ā le ka ɛɛ́. Aéwɔhá a géē je Itáya wúla tāajɛ.

⁶É klá í bī ɛ̄wā kú uwá i je ācɛ kú ipɔ́ɔ́lɛ́ a kpó ŋmó. Eko ɔ́ɔmā, Itaya géē jé ka ami ɔɔ́ wɛ Óndú ā á.”

⁷Óndú ā nōo lɔfú fíyɛ́ dúú a klla kahíníī, “N géē bī ɔcɛ́ nōo fíyɛ́ aɔ́cɛ́ ɔhá dóódu ā, Unebúkádinēsa ɔcɛ́ kú Ubábīlɔn ā wā í kpɛ́fú tá Utáya. Ó géē wā ŋmá ɛhícō mla ɛwa kú aícɔ́ɔja nɛ̄hi, mla ɔnyɛ̄ɛfú mla úgbɔ́nya, mla ɔkpacaŋ́gelī mla óbō.

⁸Ācɛ nēe lā ipɔ́lɛ́ mla okónu ɔkpá ā, é géē kpó uwá ŋmó ɔgbɛ́fú nyā. Olɛlā ā géē bū ɔbā klla í tū ɔ̄kā í hɛ́ ɔdɔ kú ɛfú a tū ipɔ́lɛ́ ā.

⁹Uwá géē je ɔdɔ kú aá ā ca tāajɛ mla oje, klla í je inɔ̄ɔda kú ɔlɛ́ ā wúla tāajɛ mla ogbló oje kú uwá a.

¹⁰Úmúlá nɛ̄ ɔnya kú uwā gáā tá ā, ó géē klá aá bá ajɛ. Uya kú ɔnya kú uwá mla ɔnya nēe ba ī pi úgbɔ́nya kú uwā ā, géē bá ī jíla ɔdɔ kú aá iyē, abɔ̄ é bá ī bū ɔwɛ kú ipɔ́lɛ́ kú aá bá ī kpó aa yíífi ŋmá ajɛ ā.

¹¹Ācɛ ɛfú ɔnya kú uwá géē pahīla klá úláyi kú ɔlɛ́ aá, kllā í ŋmó ācɛ mla ɛ̄wā kú uwá. Upíla mla ákanaba kú aá nōo nwuné fíyɛ́ dúú nēe bī ɔdɔ kú ɔlɛ́ ā háyi ā géē je wúla wā ajɛ.

¹²Aólɛlā kú aá, géē je agbénú mla ɔdu mla ije ɔ́sú kú aá ā kpó. E géē je ɔdɔ kú aá pīyeyī klá ajɛ, klla í je inu abahi kú aá ā kpó fíyákátā klá ajɛ. É géē kpo ɛcɔ̄, ɔcí, mla oje mla ɔdā dóódu nɛ̄ aá le gwó inu ā kpó tá tū ipú ísu.

¹³odúúdú ijē nɛ̄ aá ge gwó mla ɛ̄ngwū kú aá ā géē mɛ hímm.

¹⁴Ápátɛ́cɔ̄, ɛga nēe i kwú ɛbéenyi enyi, géē na ɛ́yá daa ká ō ŋmó ā, nɛ̄ n gáā habɔ̄tá á. É klla gáā gwó ipɔ́lɛ́ nyā igbɔhá gbóógbóō ɛ́ɛ́ gɛ ŋ́. Ami Óndú ā, nōo wɛ Ɔwɔicō ā le ka ɛɛ́.

¹⁵Óndú ā, nōo wɛ Ɔwɔicō ā lɛ ɛlā nyā oōka lɛɛyí kwu ipɔ́lɛ́ kú Utáya. “Eko nēé géē bá ī yá aá lé klla í ŋmó aá ā, íbá nɛ̄ aá géē bá ī dɛ̄ ā géē tū ācɛ nēe lā okónu ísu ā ufi, mla íbá kú ācɛ nēé bá ī hɛ́ ɔkɔ ā.

¹⁶odúúdú aɔ́cɛ́ kú okónu ísu ā géē pɛ́ wā ajɛ ŋmá ɛyi akpa kú ɔcɛ́ kú uwā. É géē fu ɔfulā kú uwá ŋmá ɛyí, í plá otógwo ahilíki kú uwá ŋmá iyē, géē cīce ajɛ ba ī fīyɛ̄ godogodo, lɛ abɔ̄ ce agba ipú ufi. Ɔdā nōo yɔ̄ ī yá aá nyā géē tū uwá ufi, géē je uwá ipú gbogodo nɛ̄hi, nēe gáā lɛ ɔtū cāŋjɛ nyɔ̄ ī cīce akpa kú ɔcɛ́ kú uwá a glá ɛɛ́ gɛ ŋ́.

¹⁷Uwá géē gwííjē kú ɛyíkwū lɛ aā: “É kwú éwo olófu nɛ̄hi nyā ú kpó yíífi ɛɛ́, ísu kwú aúgbéényi kú nū ú kpó gwu nyɔ̄ ɛɛ́. Ācɛ Utáya wɛ óndú kú ísu, klla í tū odúúdú ācɛ nēe lā okónu ísu ā ufi á.

¹⁸Amáŋ ɛ̄cī nɛ̄ é le ɔ́ yálé nyā, ɔlɛ́ nɛ̄ isu yɛ uwá jīla tá ā ge gɔ́ ipú ufi, okónu í klla gáā hɛ́ ācɛ a ohígbū ífi nɛ̄hi nyā ŋ́.

¹⁹Óndú ā, nōo wɛ Ɔwɔicō ā klla ka kpɔ́ kahíníī, “Utáya, n géē je uwɔ pīya ipú alácɛ̄ bɛ̄ɛka aígelī nɛ̄hi, nɛ̄ ɔ̄cɛ dúúmā í gáā lā anú gɛ ŋ́. Ísu ā géē je cēenyi klá uwɔ ɛyí.

²⁰N géē bī aá ga ɛga únóji nyɔ̄ í lā abɔ́ɔ mla ācɛ kú íkée ā. N géē yá ká a klá ipú ajɛ abɔ́ɔ, ipú ífi opiyóó mɛ́mla ācɛ nēe gekwū ɛɛ́ mā. Ohígbū ɔ́ɔmā a, ācɛ í klla gáā lā ipú uwɔ igbɔhá gɛ ŋ́, ɛ́ɛ́ nāa í wā í lā ipú ajɛ kú ācɛ nēe yēeyī ā igbɔhá ɛɛ́ gɛ ŋ́.

²¹N géē je uwɔ yá ɔdā ocābɔ̄ obɔ̄bí mɛ́mla ɔdā ufi nɛ̄hi, ɔ́ɔmā ī wɛ oŋmɛ́yí kú uwɔ á. Ācɛ gēe tíne uwɔ, amáŋ é gáā má uwɔ gbóógbóó gɛ ŋ́.” Óndú ā nōo wɛ Ɔwɔicō ā le ka ɛɛ́.